Эрзянь Мастор/2003/02/Эрзянь ават, пурнаводо "Литованть" перька!

←Владимир Егоров: избрание Николая Меркушкина - благо для Мордовии

Эрзянь Мастор, № 2 (153), 30 января 2003 редактор Нуянь Видяз, Кшуманцянь Пиргуж Эрзянь ават, пурнаводо "Литованть" перька!

Наградной обвал наблюдали сейсмологи 13 января в Саранске→

Статья на сайте газеты: № 153, 30.01.2003, Эрзянь ават, пурнаводо "Литованть" перька!

 

Эрзянь ават, пурнаводо "Литованть" перька!

2003 иень якшамговонь 17-це чись кадови редявикс тешксэкс: те чистэнть васенцеде ютавтозель эрзянь авань покш промкс. Сценанть велькска покш буквасо сёрмадозь тердема: “Эрзянь ават, пурнаводо “Литованть” перька!” Эрзянь ды мокшонь театрас састь аватне Сарансто, Дубинкань, Отяжвелень, Орданьбуень, П-Игнатонь, Чаунзань ды лия эрзянь буетнестэ. Залсонть мокшонь авань “Юрхтава” вейсэндявксонь пельде делегациясь, сыцятне эрьва кодамо учреждениятнестэ, журналистт.

Штатолонь кирвазтема ды моронь морамо коенть топавтомадо мейле ушодовсь промксось.

Теезденть ёвтнесь Щанкина Раиса Борисовна, "Литовань" прявтось. Сон пачтясь, келя, меельце иетнестэ ютавтозельть аволь аламо эрьва кодат мероприятият: концертт, промкст, озкст, вастовомат... Сынст теезь седе виевгадсь вейсэндявксось, теевсь седе содавиксэкс.

Ёвтнеманть прядомга парочинь арсемат “Литованень” ды эрзянь аватненень ёвтась мокшонь аватнень пельде “Юрхтава” вейсэндявксонь прявтось Петербургская Анастасия. Теде мейле поладозельть кортамотне эрзянь келенть ёжодонзо ды сонзэ паролгавтомадонзо. Ёвтызь тень кувалма мелест 16 кортыцят.

Разгуляева Татьянань. Ёвтнемазо домка, ламо цифра марто. (Максови башка).

Жегалина Римма, П-Игнатвелень школань эрзянь келень тонавтыцясь, А. П. Рябов лемсэ казнень Лауреатось. “Эрзянь велесэ эрзянь келентень максови недлязонзо ансяк вейке час, сеяк факультатив ды ансяк ушодкс класстнэсэ. Седе тов эйкакштнэ рузыить, мелест чачома келезэст ёми. Секскак ловномс эрзянь книгат, эрзянь журналт-газетат а кинень, секскак 95% тетятнень-аватнень эйстэ кортыть эйкакшост марто рузкс”.

Ларина Татьяна, радионь журналистка “Сияжар” редакциясто. Радионь фонотекасо ламо эрзянь кезэрень морот, сёрмадеень вайгельть-кортамот. Ловныть эсь сёрмадовксост А. Куторкин, С. Люлякина, В. Коломасов, К. Абрамов ды лиятат. Теке марто, эрьва ёндо вешить кедьстэнек кассетат. Энялдан тонть, Пётр Николаевич, кода культурань министрантень, тееде тираж. Те канды покш лезэ минек культурантень. Мон карман лездамо. Истямо жо энялдомам Кадакин Василийнень, содамочинь министрантень. Школатнень туртов истят аудиокассетатне кармить алкуксонь бальзамокс.

Цыпкайкина Валентина, Мордовиянь университетэнь эрзянь келень кафедрань прявт. “А чарькодеви, мекс арась ютксонок Маризь Кемаль. Сон жо ушодокшнызе васня цёрань-авань “Масторава” молеманть-вейсэндявксонть, седе мейле, 1993 иестэ,“Эрзява” авань кужонть .

Кулдыркаева Елена, Госпромксонь икелень депутат. “Курок кармить Прявтонь кочкамот. Монь койсэ эряви лездамс (кирдемс) кочкамс те таркантень Меркушкин Николаень. Сон ламо иень перть невтизе прянзо превей, тевень тееме маштыця азорокс.”

Кшуманцянь Пиргуж, Мусалёв Григорий, эрзянь келень идема фондонь прявтось. Сон эрзянь цёратнень пельде арсесь эрзянь аватненень шумбрачи, гайгиця морот, келей сёлмот ды вийть “Литовантень”.

Промкссонть ульнесь Конаков Валентин, Ветийкуронь (Правительствань) Прявтонть полавтыцязо, министрат ды Масторпромкссто Горбачёв Александр.

Макснезельть ламо эрьва кодат Шнамонь лемть ды конёвт. Щанкина Раисанень ды Осяева Нинанень максозь “Мордовия Республикань заслуженной важодиця” лемть. Ламотненень максозельть мазый паро пацят. “Литовань” покш промкссонть аватне састь истямо мельс: лездамс сыця кочкамотнесэ Николай Иванович Меркушкиннэнь улемс Мордовия Республикань прявтокс.

Прядовсь покш промксось неень койтнень коряс — таргазь моргасо, банкетсэ.

Ютась промксось — покш уличи, келей эскелькс эрямосонок, Пазонь тевсэнек. Арсетяно аватненень паро ёжо ды седе ламоманей чить.