Шыӧдчӧй, школаяс!
Коми школаясын ӧні эм коми буквар — важ эськӧ да выльсӧ лӧсьӧдӧны на — медводдза книга — «Асъя Кыа». Сэсся ӧні печатайтӧны «Мӧд книга». Книгаяс зэв сьӧкыд лӧсьӧдны — уна сьӧм колӧ, уджалысьяс колӧны. Ар кежлӧ колӧ лӧсьӧдны 3-ӧд книга школаясӧ. Тайӧ зэв колан дай ыджыд удж. Войдӧр вӧлі роч книгатӧ восьтан да, ставыс тӧдтӧм коми челядьыдлы: ичӧтдырся олӧмыд, быдмӧмыд, уджыд, ворсӧмыд, сьылӧмыд, унатор на. Ӧні сэтшӧм книгаыд оз лӧсяв. Мед восьтан книгатӧ да челядьыдлы ачыс книгаыс дзоньнас сералӧ-нюмъялӧ, мед ставыс тӧдса, сьӧлӧманыс мӧрччӧ. Сэтшӧм книга вӧчны ёна вермасны отсавны коми школаяс.
Обонобердса Методическӧй бюроӧ колӧ ыставны челядьяслысь уджъяссӧ (гижӧдъяссӧ), торъя нин кӧні ёна петкӧдлӧма комилысь олӧм-вылӧмсӧ, быдсяма уджсӧ, челядьдырся олӧм, быдмӧм, ворсӧм, сьылӧмсӧ. Сідзи жӧ ёна колӧ еджыдъяс волӧм йылысь, на дырйи олӧм йывсьыс; гӧрдъяслысь локтӧм, вермасьӧм йылысь. Та йылысь уна вермасны гижны Эжваса школаяс: Аныбса, Пӧддельнӧйгӧгӧрса, мукӧд.
Ми чайтам, тайӧ гижӧд оз весь ло: быд велӧдысь челядьныскӧд шыӧдчасны, отсаласны коми книгаяс лӧсьӧдны Обонолы.
Методическӧй бюроын гижысь А. Суканова.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). The author died in 1925, so this work is also in the public domain in other countries and areas where the copyright term is the author's life plus 98 years or less (if applicable), or the copyright term is 98 years or less since publication (if applicable). |
|