Шумпотонэн кайгу валче уло (Ильин)

Шумпотонэн кайгу валче уло Автор: Михаил Ильич Ильин

Кылдытон дыр: 1917. Источник: Ильин М. И. Стихотворенияёсыз. — Елабуга: Типография совета народного хозяйства, 1920. — 15-16-тӥ бамъёс.

Шумпотонэн кайгу валче уло

Гудри бере, сильтӧл бере,
Шӧтэм жобась куазьёс бере
Ин сэзьдэ ке, чебер куазьлы
Сюлэм туж шумпотылэ.

Эк, уг луы шол ялан таӵе
Мылкыдъёсын улыны!
Дась уло шол сьӧд пилемъёс
Сэзьдэм инэз ӵоктаны…

Акыр шунды пилемъёсын
Ог нуналсын вордӥськем,
Акыр шумпотонэн кайгы,
Тыпак валче думиськем.

1917 ар. 24 августын.

---

* * *

Дугдытэк тӧлало
Туж кужмо тӧлъёс,
Дыртыса кошкыло
Шӧтэм пилемъёс.

Лызпыръем инбамед
Ялпак ӵоктаськем,
Туж чебер шундыед
Копак капласькем.

Мускыто пеймытын
Нап бусъёс сьӧрын,
Одӥг уй гинэ
Сьӧд-сьӧд адӟиське.

Таӵе вадесъёсын
Одӥген кылён
Акыр котькинлы но
Туж секыт луэ.

1917 ар. 16 декабрын.

---