Чери кыйысьяс
(Революцияӧдзса олӧмысь)
Тувсов шонді лэччӧ сёрӧн.
Дыр оз унмовсь Коми му.
Катӧ пыжа лыа дорӧд.
Шуньгӧ кыркӧтш дорті ю.
Мӧдлапӧлын кельыд лыа.
Юӧ сунӧма виж кыа.
Нӧрыс йылын сиктъяс, йӧр...
Тшӧк ланьтӧма парма вӧр.
Вит верст сынім Эжва паныд.
Аски праздник, шойччан лун,
Посни котыр ставным тані...
Сьӧлӧм радлӧ, оз лок ун...
Кыркӧтш дорын кӧстер би.
Код нӧ сэні?.. Сэні ми!
Ӧльӧ, Ӧньӧ... Уна мукӧд —
Дзоньӧн чери кыйысь чукӧр!
Бипур дорын — мойдӧм, вен...
Уна чери кыям сэн!
Чӧвтам быдӧн вугыр юӧ,
Шатин пыдӧ сутшкам муӧ:
Кыркӧтш дорын джуджыд йир,
Вермас шедны ыджыд сир.
Асьным пуксям бипур дорӧ,
«Вуграсям» сэн сёрӧдз-сёрӧдз.
Мойдӧм, сӧрӧм, серам гор
Бипур дорын дыр оз ор.
Петас асъя шонді югӧр.
Век на оз узь челядь чукӧр.
Иванлӧн паськавлӧ вом:
— Вода! Мойдлӧн оз во пом!
Дзоргӧ шонді парма весьтын,
Садьмӧ, чеччӧ Коми му.
Грездсянь мӧс жыннян шы кылӧ.
Шуньгӧ кыркӧтш дорті ю.
Лӧньӧма нин сёрни, мойдӧм —
Сыркмунӧма-сь посни войтыр.
Бипур гӧгӧр рутш ни ратш.
Коді кымынь, коді гатш,
Коді нюжӧдчӧма кузя,
Коді читкыртчӧмӧн узьӧ!
Ӧтпӧлӧса. Кӧмтӧм кок.
Кӧдзыд понда абу шог.
Узьӧ чери кыйысь чукӧр.
Мойдӧ сылы шонді югӧр:
— Ӧввӧ, узь жӧ, муса пи!..
Кынман?.. Ваймис кӧстер би?..
Мелі шонді кайис вылӧ.
Олӧ ставнас Коми му.
Сьӧд вӧр ворсӧ, сьӧд вӧр сьылӧ.
Шуньгӧ кыркӧтш дорті ю.
Садьмис Ӧльӧ, садьмис Ивӧ.
Лун шӧр бӧр нин, аттӧ дивӧ!..
— Чӧв, зон! Мун сэтысь, эн сӧр,
Абу жӧ ӧд лун шӧр бӧр!
Кыйсьысь войтыр звиркйӧн чеччис,
Ӧдйӧ вадор дорӧ лэччис,
Чужӧм гожъялӧма гӧрд,
Быттьӧкӧнӧсь ыргӧн пӧрт.
— Видлам! Кутшӧмкӧ йӧй ёкыш
Эз-ӧ вугыр самӧс кокышт?
— Йӧрш шедӧма — весыс пуд!
Чужъясьӧ, некыдз он кут...
Збыль ӧд, гажыс кодыр петас,
Кодлыкӧ и йӧршпи шедас.
Тэрыба зэв пыжӧ сӧлам,
Сӧвтам сэтчӧ чери, кӧлуй,
(Мукӧддырйи йӧршыд нёль...
Сэтчӧ сійӧс, дерт, он коль!)
Дживгӧ пыжа лӧнь ва ньылыд.
Варов сёрни бара кылӧ,
Тільскӧ челядь серам шы.
Ворсыштӧ посньыдик гы...
Серам ланьтас — сьылӧм ӧзъяс
Ёсь гӧлӧса кыйсьысь йӧзлӧн.
Юргӧ гӧгӧр мича гор,
Кодыр гажа, кодыр нор...
Шыльыд лӧз ю мышку вывті
Тшап дзодзӧг моз пыжа кывтӧ,
Ва ньылыдыд пыжыд сюсь:
Сійӧ шлывгӧ быттьӧ юсь...
Енэж шӧрсянь шонді сотӧ.
Онялӧ со Коми му.
Кывтӧ гортас посни котыр.
Шлывгӧ мойдігтырйи ю.
 
|
This work is in the public domain in the United States because it was first published outside the United States prior to January 1, 1930. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1954 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1930 works copyrighted at home. Данная работа, впервые изданная до 1930 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1981 году, соответственно эта работа выйдет в России в общественное достояние в 2052 году.
The author died in 1981, so this work is also in the public domain in countries and areas (outside Russia) where the copyright term is the author's life plus 30 years or less. |