Усгуры хъынцъым (Хетæгкаты)

by Хетæгкаты Къоста

УСГУРЫ ХЪЫНЦЪЫМ

     Мæ сæфт хуры хай,
     Дæргъæрфыг чызгай,
Куы нæ дæ федтаин, бæргæ!
     Дæ фидауц хъазтмæ,
     Дæ симгæ кафтмæ
Кæм лæууы иунæджы зæрдæ!

     Дæ мидбылты худт,
     Дæргъæрфыг рæсугъд, –
Фæскъæвда хур бон у лæгæн.
     Дæ рухс цæстæнгас,
     Дæ рæвдыд ныхас
Мæгуырæн бирæ сты мæтæн.

     Куыд царæфтыд дæн –
     Цæмæн амбæлддæн
Дæуыл, мæ иунæг сæры бон!
     Цы ма кæндзынæн,
     Куыд ма цæрдзынæн
Æнæ дæу, амæддаг дын уон!..

---