Узьны оз лэдзны

by Нёбдінса Виттор

Ичӧтик ворсантор

Йӧз:

Сиктсӧветса председатель.

Инструктор.

Гудӧкасьысь.} Сцена сайын

Сьылысь ныв.

Вӧчсьӧ прӧстӧй керка пытшкын, председатель ордын.

ПРЕДСЕДАТЕЛЬ (ӧтнас пукалӧ лабичын, очсалӧ, нюжмасьӧ). О-о, трустӧ, кутшӧма вугрӧдлӧ да очсӧдлӧ! Лоӧ, буракӧ, нёровтлыны ӧти здук кежлӧ. (Лӧсьӧдӧ лабичас лёк кӧлуйысь вольпась кодьӧс). Узьышта час-мӧд-коймӧд дай скод вылӧ ковмас мунны сэсся. О-о-ойм! (Кӧсйӧ водны.)

ИНСТРУКТОР (пырӧ, портфеля). — Чолӧм-здорово! Сиктсӧветса председательыс нӧ тані али оз ов?

ПРЕД. (дыша). Тані, шуам кӧть, да мый. Тэныд нӧ мыйла сійӧ ковмис?

ИНСТР. Сідз, ичӧтик мог выйим. Час нӧ виччысьла нин асьсӧ (пуксьӧ лабичӧ.)

ПРЕД. Колӧ висьтавны, мыйла локтін, кутшӧм сэтшӧм мог суис. Быдсяма йӧзыс ӧні шляйтчӧ да, код морыс тӧдас, коді пӧ кутшӧм делӧӧн локтӧ. Колӧкӧ, ачым ме и эм председательыс да.

ИНСТР. (чеччӧ). Тэ председательыс? Сідзкӧ тай зэв бур! (Перйӧ кабала.) Ме лоа инструктор, уездсянь мӧдӧдісны...

ПРЕД. (чепӧсйӧ инструктор дінӧ). Збыльысь? Аттӧ, мый нӧ водзвыв эн висьтав? Пуксьы, шойччы, инструктор ёрт! Ме тэнӧ важӧн нин виччыся, позьӧ шуны, дона гӧстьӧс моз виччыся. (Бокӧ шуӧ.) Чӧртыс тай ваяс тэнӧ!

ИНСТР. (пуксьӧ, перйӧ карандаш, лӧсьӧдчӧ гижны). Ме локті тӧдмавны, кутшӧма тіянын гӧриг-кӧдзигкежлад лӧсьӧдчӧмыс мунӧ?

ПРЕД. Гӧриг-кӧдзигкежлӧ, шуан? О, миян ставыс зэв бура мунӧ! Час, ме тэныд та йылысь быдса доклад вӧча. Менам тайӧ уджсӧ пуктӧма, другӧ, ёна бура. (Бокӧ шуӧ.) Час, ме тэнӧ бура и кӧмӧда!

ИНСТР. (гижӧ). Сідзи и колӧ. Висьтав нӧ вай, мый ӧнӧдз вӧчинныд? (Сайын кылӧ гудӧк шы да нывлӧн сьылӧм.)

ПРЕД. Уджыс миян оз мукӧдлаын моз шлёпикты, а, позьӧ шуны, веськыда кыккокйыв пызйӧ. Сиктсӧвет ёна тӧждысьӧ, мӧда-мӧдлы отсасян комитет тшӧтш отсасьӧ, — кумпанньӧыд миян веськыда кульӧ, екуня-ваня! (Сьылӧм-ворсӧм матысмӧ). Ме ачым уджала шойччывтӧг, войяснас весиг омӧля узьлывла — пыр тӧждыся. (Бокӧ шуӧ.) Лунъяснас стынита-узя да, кысь сэсся войнас узян?

ИНСТР. (гижӧ висьтавлігас, сэсся юасьӧ.) Кутшӧма землеустройствоыд тіян мунӧ? (Кывзӧ сьылӧм-ворсӧм). Со кутшӧм лӧсьыда кодкӧ, кылӧ, гудӧкасьӧ. А нылыслӧн кутшӧм ёсь да мича гӧлӧсыс!

ПРЕД. (дӧзмӧмпырысь). Буретш нин эськӧ мича да. Кывзыныыс весиг дыш. Лӧвтӧны, пель сьӧдмӧдӧны сӧмын... Землеустройствотӧ юалан? Ёна бура мунӧ. Ме сы понда зэв ёна тӧждыся. Сытӧг оз позь.

НЫВ (сайын сьылӧ, ньӧжйӧник гудӧк ворсӧ сэки):

Дышмис, дышмис менам верӧс,

Оз нин удж вылӧ со пет.

Корим, корим землемерӧс —

Оз тай тӧждысь сиктсӧвет.

ИНСТР. (кывзӧ). Лӧсьыда ӧд сьылӧ!..

ПРЕД. Прӧстӧй лявзӧм. Тэ, инструктор ёрт, эн кывзы найӧс... Гашкӧ, ӧшиньсӧ тупкам, мед оз мешайтны тэныд? (Босьтӧ лёк дукӧс да кӧсйӧ вевттьыны ӧшиньсӧ.)

ИНСТР. Эн тупкы, мед сьыласны. Частушкаяс тай, кылӧ, сьылӧны. Сэтшӧм сьылӧмад ӧд буретш и тӧдчӧ йӧз костса олӧм-вылӧмыд... Кыдзи сэсся ті кӧдзан муяснытӧ паськӧдны кӧсъянныд?

ПРЕД. Муястӧ паськӧдны? Зэв ёна тӧждысям. Медсясӧ, дерт, меным лоӧ. Тӧдан, мый, инструктор ёрт: сы кузя вывті бура уджсӧ менам пуктӧма.

НЫВ (сьылӧ ортсыын):

Кӧсъям, кӧсъям керӧс гӧрны,

Кӧсъям вӧчны унджык му.

Сиктсӧветлы зэв дыш вӧрны,

Ӧнӧдз нинӧмтор эз шу.

ИНСТР. (гижӧ). Кӧйдысъяс весалӧм-сортируйтӧмыд кутшӧма мунӧ?

ПРЕД. (видзӧдлӧ ӧшиньӧд). Юавныыс весиг нинӧм — зэв бура мунӧ. Мый вынысь ме сы вӧсна тӧждыся.

НЫВ (сьылӧ):

Сёрни мунӧ зэв нин кузя:

Кӧйдыс весавтӧм оз ло.

Председатель миян узьӧ —

Сортировка век оз во.

ПРЕД. (уськӧдчылӧ ӧшиньлань да бӧр бергӧдчӧ). Мешайтӧны, инструктор ёрт, миянлы, трустъясыд!

ИНСТР. Оз ёна. Мед сьылӧны. Ми тэкӧд уджыштам, а найӧ мед сьыласны (гижӧ). Видз-му уджалан машинаясыд тіян эмӧсь жӧ?

ПРЕД. Но, кыдзи нӧ? Миян сиктын ёна нин машинаяснад уджалӧны.

НЫВ (сьылӧ):

Кысь нин бара машинаяс —

Этша весиг плугъясыс;

Председатель гӧрны каяс —

Лёк пу гӧрйыс жугласис.

ИНСТР. Ӧшинь улад быттьӧ дзик мӧдтор сьылӧны, мый тэ тані меным сьылан.

ПРЕД. Да тэ, мися, эн кывзы налысь... Найӧ ӧд сідз сьылӧны, медтыкӧ складыс кытчӧкӧ муніс-а. Збыль вылас, дерт, абу сідзи. Менам уджыс зэв бура мунӧ. Часлы, ме тэныд ставсӧ лючки висьтала.

НЫВ (сьылӧ):

Председатель сӧрӧ, сӧрӧ,

Ньӧтчыд веськыд кыв оз шу.

Кыдз тон таво кӧдзам, гӧрам,

Уна кольӧ кӧдзтӧм му!

ИНСТР. (чеччӧ, идралӧ ставсӧ). Но ме сэсся, буракӧ, муна.

ПРЕД. Кытчӧ нӧ? Пукышт на, зонмӧ, эн тэрмась. Ме ӧд эг на ставсӧ висьтав. Час, докладӧс помала, да вӧлисти мунан...

ИНСТР. Бӧрти висьталан, тӧварыш. Талун пӧ тіян буретш скод лоӧ. Скод вылад и вӧчан докладтӧ, сэки сёрнитам. (Мунӧ.)

ПРЕД. (ӧтнас, видзӧдӧ дыр инструктор бӧрся). Ӧд, зонмӧ, кутшӧм бюрократ! Газетӧ эськӧ, трустӧс, гижны колӧ... Эсійӧ лёк гӧлӧса нылыс дзикӧдз пельясӧс сьӧдмӧдіс, трасичаыд!.. Тьфу! Весиг ӧні сэсся и унмӧй паляліс... Кыськӧ тай ваясны кузьясыс инструктортӧ!

Занавес.