Пичи, пинал нылпиос
Быдэн кияз тусьтыен
Мыно ваньзы огазьын
Ӵуж-ӟег бусы сюресэн.
Вуэм ӵуж-ӟег пушкысен
Отӥ-татӥ потыло,
Лыз но, горд но дӥсьёсын
Сяська кадь ик адскыло.
Шудэм, кырӟам куаразы
Бусы кузя вӧлдӥське,
Нюлэс доры вуэ но
Шуккиськыса берытске.
Тани соос нюлэскы
Мынон сямен вуизы,
Сокы туж ӝог чалмытскиз
Шудэм, кырӟам куаразы.
Ваньзы узы бичаны
Нюлэс пушкын кутскизы…
— Узы татын ӧвӧлгес,
Ойдо пыром пыдлогес!.. —
Шуэ огез эшезлы,
Куара сёто ваньзылы:
— Аннок, ӝоггес лык татчы,
Татын туж уно узы!..
— Митрей! Иван! Кытын тӥ? —
Шуыса куара кесяське,
Собре нош ик нюлэстӥ
Нылпи куара чалмытске.
Ог-огзылэсь уногес
Узы туртто шедьтыны,
Соин ваньзы чалякгес
Кужмысь кутско бичаны.
Ӧжыт улса, жадьыса
Оген-оген тэль дуре
Пото, эшсэс кеськыса,
Гуртэ берто собере.
Котькудӥз но тусьтыяз
Туж уно узы бичам —
Кудӥз-кудӥз азькышетаз
Губи но сяська ышкам.
Кин тэльысь мае адӟем —
Веран кылзы быронтэм:
Огзэ сьӧд кый кышкатэм,
Огзэ кеч куалектытэм.
Огез адӟем кикыез,
Огез адӟем ӵушъялэз:
Мукетыз нош адӟиллям
Чик луымтэ гондырез.
Асьсэ гуртэ-доразы
Соос вуэм беразы,
Веран кылзы соослы
Лумбыт тырмоз вераны.
