Трїѡ́дїонъ/Недѣ́лѧ пе́рваѧ ст҃а́гѡ поста̀
| ←Сꙋббѡ́та пе́рвыѧ седми́цы | Трїѡ́дїонъ Сꙋббѡ́та мѧсопꙋ́стнаѧ |
Въ сре́дꙋ в҃-ѧ седми́цы ст҃ы́хъ постѡ́въ→ |
| This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts. |
въ ню́же правосла́вїе воспомина́етсѧ. Бдѣ́нїе ѻ҆бы́чное. Въ сꙋббѡ́тꙋ ве́чера, на ма́лѣй вече́рни, поста́вимъ стїхѝ д҃, и҆ пое́мъ стїхѝ подѡ́бныѧ. Творе́нїе нїкола́а, гла́съ а҃. Подо́бенъ: Нбⷭ҇ныхъ чинѡ́въ:
Ны́нѣ бл҃гоче́стїѧ свѣ́тлость всѣ̑мъ распростре́сѧ, разгонѧ́ющи ле́сть нече́стїѧ ꙗ҆́кѡ ѻ҆́блакъ, просвѣща́ющи же сердца̀ бл҃гочести́выхъ: прїиди́те всѝ припаде́мъ, бл҃гочестивомꙋ́дреннѡ честны̑мъ і҆кѡ́намъ хрⷭ҇тѡ́вымъ покланѧ́ющесѧ правосла́внїи.
Сщ҃енноѡбра́зными і҆кѡ́нами ны́нѣ ᲂу҆краша́етсѧ, ꙗ҆́кѡ невѣ́ста ᲂу҆кра́шена хрⷭ҇то́ва цр҃ковь, и҆ всѣ́хъ созыва́етъ дх҃о́внѡ пра́здновати: сни́демсѧ во є҆диномы́слїи и҆ вѣ́рѣ, ра́достнѡ велича́юще гдⷭ҇а.
Мі́ре ве́сь весели́сѧ: се́ бо гдⷭ҇ь низложѝ съ высоты̀ нече́стїѧ держа́вꙋ неизрече́ннымъ промышле́нїемъ. и҆ смире́ннїи вознесо́хомсѧ дне́сь къ вѣ́рѣ правосла́вїѧ, бл҃гочести́вою цари́цею наставлѧ́еми.
Къ первоѡбра́зномꙋ но́ситсѧ, глаго́летъ васі́лїй, че́сть і҆кѡ́ны: сегѡ̀ ра́ди въ любвѝ почита́емъ і҆кѡ́ны сп҃са хрⷭ҇та̀, и҆ ст҃ы́хъ всѣ́хъ: да си́хъ собра́вше, никогда́же ны́нѣ ѕлоче́стїемъ ѿведе́мсѧ.
Безнача́льнымъ и҆ бж҃е́ственнымъ є҆стество́мъ неви́димый, человѣ́къ ви́дѣнъ бы́сть ѻ҆трокови́це, ѿ чи́стыхъ твои́хъ крове́й, за кра́йнее бл҃гоꙋтро́бїе: є҆гѡ́же пло́ти написа́вше подо́бїе, че́стнѡ покланѧ́емсѧ всѝ вѣ́рнїи, и҆ бл҃гоче́стнѡ велича́емъ.
Гꙋби́тельства тлетво́рнагѡ и҆збѣ́гше ѕлосла́вныхъ, правосла́вїѧ сїѧ́нїемъ, сердца́ми просвѣти́мсѧ вѣ́рнїи бг҃а сла́вѧще.
Сті́хъ: Принеси́те гдⷭ҇ви че́сть и҆ сла́вꙋ.
А҆́рїева нечи́стаѧ ᲂу҆праздни́сѧ пре́лесть, македо́нїа, петра̀, севи́ра же и҆ пѵ́рра: и҆ свѣ́титъ свѣ́тъ трисо́лнечный.
Сті́хъ: Поклони́тесѧ є҆мꙋ̀ во дворѣ̀ ст҃ѣ́мъ є҆гѡ̀.
Не ктомꙋ̀ ѕлочести́выхъ похвалѧ́етсѧ мра́чное ᲂу҆че́нїе, бг҃ъ бо правосла̑внымъ, и҆зволе́нїемъ ѳеодѡ́ры, же́злъ крѣ́пости дае́тъ.
Вознесла̀ є҆сѝ смире́нныхъ ро́гъ бцⷣе, ро́ждшаѧ бг҃а сло́ва: тѣ́мже вѣ́рнѡ тѧ̀ всѝ чтꙋ́ще велича́емъ.
Тропа́рь: Пречⷭ҇томꙋ ѡ҆́бразꙋ твоемꙋ̀: И҆ быва́етъ ѿпꙋ́стъ.
На вели́цѣй вече́рни, по ѻ҆бы́чномъ стїхосло́вїи, Гдⷭ҇и воззва́хъ, на гла́съ ѻ҆смогла́сника, поста́вимъ стїхѡ́въ і҃: и҆ пое́мъ стїхи̑ры воскрⷭ҇ны г҃, и҆ а҆натѡ́лїевы г҃, и҆ трїѡ́ди подо́бны д҃. Гла́съ ѕ҃: Всю̀ ѿложи́вше:
Тѧ̀ непостижи́маго, пре́жде денни́цы безнача́льнѡ и҆з̾ невеще́ственнагѡ возсїѧ́вшаго, безпло́тнагѡ же чре́ва роди́телева, прⷪ҇ро́цы гдⷭ҇и, твои́мъ дх҃омъ вдохнове́ни, прореко́ша ѻ҆троча̀ бы́ти, и҆з̾ неискꙋсобра́чныѧ воплоща́ема, человѣ́кѡмъ совокꙋплѧ́ема, и҆ сꙋ́щими на землѝ зри́ма: и҆́миже ꙗ҆́кѡ ще́дрый просвѣще́нїѧ сподо́би твоегѡ̀, воспѣва́ющихъ неизрече́нное, и҆ честно́е твоѐ воскрⷭ҇нїе.
Подо́бенъ: Сло́вомъ тѧ̀ проповѣ́давшїи бг҃оглаго́ливїи прⷪ҇ро́цы, и҆ дѣ́лы поче́тшїи, безконе́чнꙋю жи́знь приплоди́ша: тва́ри бо влⷣко, па́че тебѐ содѣ́телѧ, слꙋжи́ти не претерпѣ́вше, мі́ра всегѡ̀ є҆ѵⷢ҇льски ѿврати́шасѧ, и҆ соѡбра́зни бы́ша стрⷭ҇ти твое́й, ю҆́же провозвѣсти́ша:и҆́хже мл҃твами, сподо́би непоро́чнѡ прейтѝ воздержа́нїѧ по́прище, є҆ди́не многомлⷭ҇тиве.
Е҆стество́мъ неѡпи́санный бж҃е́ственнымъ твои́мъ сы́й, на послѣ̑днѧѧ влⷣко вопло́щьсѧ, и҆зво́лилъ є҆сѝ ѡ҆писова́тисѧ: пло́ти бо прїѧ́тїемъ, и҆ свѡ́йства всѧ̑ сеѧ̀ взѧ́лъ є҆сѝ. тѣ́мже ви́дъ тво́й ѡ҆бразова́нїѧ ѡ҆писꙋ́ющїи любе́знѡ цѣлꙋ́емъ, къ твое́й любвѝ возвыша́еми, и҆ и҆сцѣле́нїй бл҃года́ть почерпа́емъ и҆з̾ негѡ̀, а҆пⷭ҇льскимъ послѣ́дꙋюще бж҃е́ствєннымъ преда́нїємъ.
Пречестно́е ᲂу҆краше́нїе хрⷭ҇то́ва цр҃ковь, честны́хъ прїѧ́тъ и҆ ст҃ы́хъ і҆кѡ́нъ, сп҃са хрⷭ҇та̀ и҆ бг҃ома́тере, и҆ всѣ́хъ ст҃ы́хъ свѣтлѣ́йшее возставле́нїе, и҆́мже просвѣща́етсѧ, и҆ красꙋ́етсѧ бл҃года́тїю, и҆ со́нмище ѿлага́етъ є҆реті́ческое и҆згонѧ́щи: и҆ ра́дꙋющисѧ сла́витъ чл҃вѣколю́бца бг҃а, є҆ѧ̀ ра́ди претерпѣ́вша стрⷭ҇ти вѡ́льныѧ.
Сла́ва, гла́съ в҃: Бл҃года́ть возсїѧ̀ и҆́стины, проѡбразꙋ́емаѧ дре́вле сѣно́внѡ, ны́нѣ ꙗ҆вле́ннѡ сконча́сѧ: се́ бо цр҃ковь воплоще́ннымъ ѡ҆́бразомъ хрⷭ҇то́вымъ, ꙗ҆́кѡ прекра́сною ᲂу҆́тварїю ѡ҆блачи́тсѧ, ски́нїи свидѣ́нїѧ ѡ҆́бразъ пронаписꙋ́ющи, и҆ правосла́внꙋю вѣ́рꙋ содержа́щи: да є҆го́же почита́емъ, сегѡ̀ и҆ ѡ҆́бразъ держа́ще, не прельща́емсѧ, да ѡ҆блекꙋ́тсѧ въ стꙋ́дъ си́це невѣ́рꙋющїи: на́мъ бо сла́ва зра́къ воплоти́вшагѡсѧ бл҃гоче́стнѡ покланѧ́емый, не бг҃отвори́мый. то́й ѡ҆блобыза́юще вѣ́рнїи возопїи́мъ: бж҃е, сп҃сѝ лю́ди твоѧ̑, и҆ бл҃гословѝ достоѧ́нїе твоѐ.
И҆ ны́нѣ, бг҃оро́диченъ а҃-й гла́са.
Сла́ва, гла́съ в҃: Ра́дꙋйтесѧ прⷪ҇ро́цы честні́и, зако́нъ гдⷭ҇нь до́брѣ ᲂу҆чини́вшїи, и҆ вѣ́рою ꙗ҆́вльшїисѧ неѡбори́мїи столпѝ неꙋкло́ннїи: вы́ бо и҆ хода́таи ꙗ҆ви́стесѧ но́вагѡ завѣ́та хрⷭ҇то́ва, и҆ преста́вившесѧ на нб҃са̀. того̀ моли́те, ᲂу҆мири́ти мі́ръ, и҆ сп҃стѝ дꙋ́шы на́шѧ.
И҆ ны́нѣ, бг҃оро́диченъ, гла́съ то́йже: Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.
Сла́ва, гла́съ в҃: И҆з̾ нече́стїѧ во бл҃гоче́стїе преше́дше, и҆ свѣ́томъ ра́зꙋма просвѣти́вшесѧ, ѱало́мски рꙋка́ми воспле́щимъ, бл҃года́рственнѡ хвалꙋ̀ бг҃ꙋ приносѧ́ще: и҆ на стѣна́хъ, и҆ дска́хъ, и҆ на сщ҃е́нныхъ сосꙋ́дѣхъ, начерта́ннымъ сщ҃є́ннымъ ѡ҆бразѡ́мъ хрⷭ҇тѡ́вымъ, и҆ пречⷭ҇тыѧ, и҆ всѣ́хъ ст҃ы́хъ, че́стнѡ поклони́мсѧ, ѿлага́юще ѕлоче́стнꙋю ѕлосла́вныхъ вѣ́рꙋ: [че́сть бо ѡ҆́браза, ꙗ҆́коже глаго́летъ васі́лїй, на первоѡбра́зное прехо́дитъ,] просѧ́ще мл҃твами пречⷭ҇тыѧ твоеѧ̀ мт҃ре, хрⷭ҇тѐ бж҃е на́шъ, и҆ всѣ́хъ ст҃ы́хъ, дарова́ти на́мъ ве́лїю млⷭ҇ть.
И҆ ны́нѣ, бг҃оро́диченъ: Ѽ чꙋдесѐ но́вагѡ, всѣ́хъ дре́внихъ чꙋде́съ! кто́ бо позна̀ мт҃рь без̾ мꙋ́жа ро́ждшꙋю, и҆ на рꙋкꙋ̑ носѧ́щꙋю, всю̀ тва́рь содержа́щаго; бж҃їе є҆́сть и҆зволе́нїе ро́ждшеесѧ: є҆го́же ꙗ҆́кѡ млⷣнца пречⷭ҇таѧ, твои́ма рꙋка́ма носи́вшаѧ, и҆ мт҃рне дерзнове́нїе къ немꙋ̀ и҆мꙋ́щаѧ, не преста́й молѧ́щи ѡ҆ чтꙋ́щихъ тѧ̀, ᲂу҆ще́дрити и҆ сп҃стѝ дꙋ́шы на́шѧ.
Тропа́рь: Бцⷣе дв҃о ра́дꙋйсѧ: два́жды.
Пречⷭ҇томꙋ ѡ҆́бразꙋ твоемꙋ̀ покланѧ́емсѧ бл҃гі́й, просѧ́ще проще́нїѧ прегрѣше́нїй на́шихъ хрⷭ҇тѐ бж҃е: во́лею бо бл҃говоли́лъ є҆сѝ пло́тїю взы́ти на крⷭ҇тъ, да и҆зба́виши, ꙗ҆̀же созда́лъ є҆сѝ, ѿ рабо́ты вра́жїѧ. тѣ́мъ бл҃года́рственнѡ вопїе́мъ тѝ: ра́дости и҆спо́лнилъ є҆сѝ всѧ̑ сп҃се на́шъ, прише́дый сп҃стѝ мі́ръ. є҆ди́ножды.
И҆ про́чее послѣ́дованїе бдѣ́нїѧ.
На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды. Сла́ва, настоѧ́щїй, гла́съ в҃:
Пречⷭ҇томꙋ ѡ҆́бразꙋ твоемꙋ̀ покланѧ́емсѧ бл҃гі́й, просѧ́ще проще́нїѧ прегрѣше́нїй на́шихъ хрⷭ҇тѐ бж҃е: во́лею бо бл҃говоли́лъ є҆сѝ пло́тїю взы́ти на крⷭ҇тъ, да и҆зба́виши, ꙗ҆̀же созда́лъ є҆сѝ, ѿ рабо́ты вра́жїѧ. тѣ́мъ бл҃года́рственнѡ вопїе́мъ тѝ: ра́дости и҆спо́лнилъ є҆сѝ всѧ̑ сп҃се на́шъ, прише́дый сп҃стѝ мі́ръ.
И҆ ны́нѣ: Всѧ̑ па́че смы́сла, всѧ̑ пресла̑внаѧ твоѧ̑ бцⷣе та̑инства, чистотѣ̀ запеча́танной, и҆ дв҃ствꙋ храни́мꙋ, мт҃и позна́ласѧ є҆сѝ нело́жна, бг҃а ро́ждши и҆́стиннаго: того̀ молѝ сп҃сти́сѧ дꙋша́мъ на́шымъ.
И҆ ѻ҆бы́чное стїхосло́вїе: и҆ про́чее послѣ́дованїе. Канѡ́ны: Воскрⷭ҇ный, и҆ бцⷣы, и҆ трїѡ́ди на ѕ҃. Творе́нїе господи́на ѳеофа́на, є҆гѡ́же краестро́чїе: Дне́сь бл҃гоче́стїѧ бг҃освѣ́тлаѧ прїи́де зарѧ̀. Гла́съ д҃. Пѣ́снь а҃: І҆рмо́съ: Мо́рѧ чермнꙋ́ю:
Пле́щꙋще съ весе́лїемъ дне́сь вѣ́рнїи возопїи́мъ: ко́ль чꙋ́дна дѣла̀ твоѧ̑ хрⷭ҇тѐ, и҆ вели́ка си́ла, на́ше є҆диномы́слїе и҆ согла́сїе содѣ́лавый!
Де́нь ра́достный бг҃омꙋ́дреннїи прїиди́те соверши́мъ, ны́нѣ нб҃о и҆ землѧ̀ весели́тсѧ, и҆ а҆́гг҃лѡвъ чи́ни, и҆ человѣ́кѡвъ собра̑нїѧ и҆зрѧ́днѡ пра́зднꙋюще.
Преве́лїе бл҃годѣѧ́нїе ви́дѧще, рꙋка́ми воспле́щимъ: разстоѧ́щыѧсѧ ᲂу҆́ды хрⷭ҇тѡ́вы, совокꙋ́плены во є҆ди́нство, и҆ бг҃а похва́лимъ ми́ръ пода́вшаго.
Да́шасѧ цр҃кви дне́сь побѣди́тєльнаѧ, бг҃одви́жнымъ манове́нїемъ и҆ совѣ́томъ, мїхаи́ла же и҆ ѳеодѡ́ры, бл҃гоче́стнѡ вѣ́рꙋ содержа́щихъ царе́й на́шихъ.
Бг҃оро́диченъ: Ѻ҆рꙋ́жїѧ ѕлочести́выхъ и҆счезо́ша ꙗ҆́вѣ є҆ресе́й: хра́мъ бо тво́й пречⷭ҇таѧ чⷭ҇таѧ, во ѡ҆́бразѣхъ ᲂу҆краша́емый всебл҃голѣ́пнѡ зрѧ́ще, ны́нѣ всесщ҃е́ннѡ ра́дꙋемсѧ.
Катава́сїа: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Не ктомꙋ̀ нечести́выхъ є҆ретїкѡ́въ ны́нѣ бро́вь взе́млетсѧ: бж҃їѧ бо си́ла правосла́вїе ᲂу҆держа́ла є҆́сть.
Ѻ҆́блацы прⷪ҇ро́честїи, животворѧ́щꙋю съ нб҃сѐ дне́сь ро́сꙋ на́мъ да кропѧ́тъ, на воста́нїе вѣ́ры.
Бл҃гогла́снѡ та̑йныѧ а҆пⷭ҇лѡвъ хрⷭ҇то́выхъ трꙋбы̑, па́че є҆стества̀ да вопїю́тъ, честны́хъ ѡ҆бразѡ́въ и҆справле́нїе.
Воспои́мъ хрⷭ҇та̀, показа́вшаго на́мъ цр҃и́цꙋ бл҃гочести́вꙋю, хрⷭ҇толюби́вꙋю, съ бг҃овѣнча́нною ѻ҆́траслїю.
Бг҃оро́диченъ: Селе́нїе твоѐ сщ҃е́нное дости́гше вѣ́рнїи, пречⷭ҇таѧ, свѣтови́дною бл҃года́тїю ны́нѣ ѡ҆зари́тисѧ, мо́лимсѧ.
Катава́сїа: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище, и҆ ᲂу҆твержде́нїе.
Бж҃е́ственный тво́й зра́къ, во ѡ҆́бразѣ ѡ҆бразꙋ́юще хрⷭ҇тѐ, ꙗ҆́снѡ вопїе́мъ ржⷭ҇тво̀, чꙋдеса̀ неизглаго́ланнаѧ, во́льное распѧ́тїе. ѿѻнꙋ́дꙋже бѣ́сове ѿго́нѧтсѧ стра́хомъ, и҆ ѕлосла́внїи въ посꙋпле́нїи рыда́ютъ, ꙗ҆́кѡ си́хъ соприча̑стницы.
Сла́ва: Зра́ками прⷪ҇ро́кѡвъ, а҆пⷭ҇лѡвъ ви́дами, мч҃нкѡвъ сщ҃е́нныхъ, и҆ ст҃ы́хъ всѣ́хъ і҆кѡ́нами, и҆ и҆з̾ѡбраже́ньми сщ҃е́ннѡ красꙋ́етсѧ: жениха́ же мы́сленнагѡ и҆ невѣ́сты ᲂу҆краша́етсѧ ᲂу҆́мными красова́ньми, мт҃и вы́шнїй сїѡ́нъ.
И҆ ны́нѣ, бг҃оро́диченъ: Любо́вїю чⷭ҇таѧ, твою̀ ст҃ꙋ́ю і҆кѡ́нꙋ почита́ющымъ, и҆ бж҃їю тѧ̀ и҆́стиннꙋю мт҃рь согла́снѡ возвѣща́ющымъ, и҆ вѣ́рнѡ покланѧ́ющымсѧ тѝ, храни́тельница ꙗ҆ви́ласѧ є҆сѝ, и҆ держа́вное предста́тельство, ѿвраща́ющи всѧ́кое лю́тое дале́че си́хъ, ꙗ҆́кѡ всѧ̑ могꙋ́щаѧ.
Наи́тїемъ бж҃е́ственнымъ ᲂу҆тѣ́шителѧ, тво́й хра́мъ ѡ҆ст҃ѝ, и҆ прише́ствїемъ сегѡ̀ є҆реті́ческꙋю пре́лесть ѿженѝ, сло́ве бж҃їй многомлⷭ҇тиве.
Нꙋ́жднѣйшагѡ и҆зба́вивый ѕлоче́стїѧ твоѧ̑ лю́ди, покажѝ бл҃гоче́стїѧ ре́вностїю разжжє́ны, и҆ вѣ́рою взыва́ющыѧ: сла́ва си́лѣ твое́й гдⷭ҇и.
Сщ҃енноѡбра́зными и҆з̾ѡбраже́ньми, ѡ҆бразѡ́въ хрⷭ҇то́выхъ зрѧ́ще и҆ бцⷣы, сїѧ̑ющаѧ бж҃е́ствєннаѧ селє́нїѧ, сщ҃еннолѣ́пнѡ ра́дꙋемсѧ.
Цр҃и́ца по ѻ҆боемꙋ̀ ᲂу҆кра́шена, и҆́стиннагѡ возжелѣ́вши хрⷭ҇то́ва црⷭ҇тва, сегѡ̀ написа̀ ѡ҆́бразъ пречⷭ҇тый, и҆ ст҃ы́хъ и҆з̾ѡбражє́нїѧ.
Бг҃оро́диченъ: Воплоще́нна роди́вши бж҃е́ственнаго сло́ва, бг҃олѣ́пное ѡ҆сщ҃е́нїе бл҃года́тнаѧ, сего̀ показа́ла є҆сѝ: тѣ́мже тво́й хра́мъ свѣтови́дный ѡ҆бновлѧ́емъ.
Катава́сїа: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Положѝ гдⷭ҇и твое́й цр҃кви ᲂу҆твержде́нїе, непрекло́ннѣй пребы́ти въ вѣ́къ вѣ́ка ѿ смѧте́нїй є҆ресе́й.
Во всю̀ зе́млю свѣ́тлость возсїѧ̀ свы́ше, да́ннагѡ вѣ̑рнымъ весе́лїѧ, и҆ бж҃е́ственнагѡ застꙋпле́нїѧ.
Є҆ди́не бл҃гі́й, и҆ и҆сто́чниче бл҃гости, ты̀ возвы́си правосла́вныхъ ро́гъ, чтꙋ́щихъ ѡ҆́бразъ тво́й.
Свѣ́тъ незаходи́мый на́мъ бл҃гоче́стїѧ возсїѧ̀, велѣ́нїемъ бг҃одꙋхнове́ннымъ вѣ́рныхъ па́стырей, и҆ ма́нїемъ бг҃омꙋ́дрымъ.
Бг҃оро́диченъ: Ѡ҆бновѝ на́мъ дре́внее бл҃голѣ́пїе, пречⷭ҇таѧ бг҃ома́ти, и҆ до́мъ тво́й се́й ѡ҆ст҃ѝ твое́ю бл҃года́тїю.
Катава́сїа: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющихъ тѧ̀.
Пи́шетсѧ и҆ почита́етсѧ вѣ́рнѡ покланѧ́емый ѡ҆́бразъ влⷣки, и҆ прїе́млетъ па́ки цр҃ковь дерзнове́нїе, бл҃гоче́стнѡ сп҃са прославлѧ́ющи.
Ѡ҆бнажа́етсѧ сѣ́тованїѧ, и҆ тьмы̀ є҆ресе́й хрⷭ҇то́ва цр҃ковь, и҆ но́ситъ ри́зꙋ весе́лїѧ, и҆ бж҃е́ственною и҆ свѣтоно́сною покрыва́етсѧ бл҃года́тїю.
Бл҃госла́вїѧ дре́внѧгѡ ѡ҆сїѧ̑нїѧ полꙋчѝ правосла́вныхъ собо́ръ, ѳеодѡ́ры манове́нїемъ цр҃и́цы, и҆ є҆ѧ̀ сы́на бл҃гочести́вагѡ мїхаи́ла самоде́ржца.
Бг҃оро́диченъ: Дре́вле свидѣ́нїѧ повелѣ́вый бы́ти ски́нїи: ꙗ҆́кѡ въ ски́нїи слове́снѣй, въ тебѣ̀ живе́тъ є҆ди́нъ препросла́вленный, прославлѧ́ѧй хра́мъ тво́й дв҃о чꙋдесы̀.
Катава́сїа: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Неѡпи́санное сло́во ѻ҆́ч҃ее, и҆з̾ тебѐ бцⷣе ѡ҆писа́сѧ воплоща́емь: и҆ ѡ҆скве́рншїйсѧ ѡ҆́бразъ въ дре́внее воѡбрази́въ, бж҃е́ственною добро́тою смѣсѝ. но и҆сповѣ́дающе сп҃се́нїе, дѣ́ломъ и҆ сло́вомъ, сїѐ воѡбража́емъ.
І҆́косъ: Сїѐ смотре́нїѧ та́инство, дре́вле прⷪ҇ро́цы бг҃ови́днѡ вдохнове́ни бы́вше, на́съ ра́ди въ концы̀ вѣкѡ́въ дости́гшихъ предвозвѣсти́ша, полꙋчи́вше сегѡ̀ сїѧ̑нїѧ. ра́зꙋмъ ᲂу҆́бѡ бж҃е́ственный ѿ негѡ̀ взе́мше, є҆ди́наго гдⷭ҇а бг҃а зна́емъ, въ трїе́хъ ѵ҆поста́сѣхъ покланѧ́емаго: и҆ томꙋ̀ є҆ди́номꙋ слꙋжа́ще, є҆ди́нꙋ вѣ́рꙋ, и҆ є҆ди́но креще́нїе и҆мꙋ́ще, во хрⷭ҇та̀ ѡ҆блеко́хомсѧ: но и҆сповѣ́дающе сп҃се́нїе, дѣ́ломъ и҆ сло́вомъ, сїѐ воѡбража́емъ.
Нелѣ́потнѡ и҆змета́ємы і҆кѡ̑ны: |
Въ сі́й де́нь, въ недѣ́лю пе́рвꙋю ст҃ы́хъ постѡ́въ правосла́вїѧ, си́рѣчь возставле́нїе ст҃ы́хъ и҆ честны́хъ і҆кѡ́нъ, цр҃ковь хрⷭ҇то́ва пра́здновати прїѧ́тъ, бы́вшее ѿ мїхаи́ла и҆ ѳеодѡ́ры ст҃ы́ѧ и҆ бл҃же́ннѣйшїѧ цр҃и́цы, и҆ ст҃а́гѡ меѳо́дїа, патрїа́рха кѡнстантїнопо́льскагѡ, бы́сть же си́це: львꙋ̀ і҆са́ѵрꙋ и҆з̾ ѻ҆слѧтогоне́нїѧ, и҆ свинопа́ственнагѡ житїѧ̀, ски́птры ца́рствїѧ ᲂу҆держа́вшꙋ по бж҃їю попꙋще́нїю. Во ст҃ы́хъ ге́рманъ тогда̀ корми̑ла цр҃кѡ́внаѧ ѡ҆б̾е́мъ, а҆́бїе призыва́етсѧ ѿ ѻ҆́нагѡ, и҆ слы́шитъ: ꙗ҆́кѡ мнѣ̀ мни́тсѧ влⷣко, ст҃ы̑мъ і҆кѡ́намъ ничто́же ра́знствовати ѿ і҆́дѡлѡвъ, повелѝ ᲂу҆́бѡ є҆ли́кѡ ско́рѡ и҆звестѝ сїѧ̑ ѿ среды̀. А҆́ще и҆́стиннїи сꙋ́ть ст҃ы́хъ зра́цы, но вы́шше да повѣ́сѧтсѧ, да не со грѣхѝ валѧ́ющесѧ, сїѧ̑ всегда̀ ѡ҆сквернѧ́емъ цѣлꙋ́юще. Патрїа́рхъ же толи̑кїѧ ме́рзости царѧ̀ ѿвраща́ше, не ты́ ли, глаго́лѧ, ѽ царю̀, бѣснова́ти ᲂу҆́бѡ нѣ́коемꙋ нѣ́когда на ст҃ы̑ѧ і҆кѡ́ны слы́шимъ, кѡ́нонꙋ же бы́ти є҆гѡ̀ проименова́нїю; Ѻ҆́нъ же, но а҆́зъ, глаго́летъ є҆щѐ млⷣнецъ сы́й нарица́хсѧ. Не повинꙋ́ющꙋсѧ же ᲂу҆́бѡ послꙋ́шати є҆гѡ̀ патрїа́рхꙋ, и҆згна̀ є҆го̀, и҆ є҆диномꙋ́дренна себѣ̀ возпоставлѧ́етъ а҆наста́сїа: и҆ та́кѡ тогда̀ со ст҃ы́ми і҆кѡ́нами бра́нь нача̀ ꙗ҆влѧ́ти. Глаго́летсѧ же, є҆вре́ємъ пре́жде таковꙋ́ю не́нависть є҆мꙋ̀ подложи́ти, ѿ нѣ́коегѡ волше́бства предре́кшымъ на ца́рство возведе́нїе, внегда̀ ᲂу҆бо́гъ сы́й, съ ни́ми ѻ҆слѧтогоне́нїемъ жи́ти веществова́ше. Ѻ҆́номꙋ же ѕлѣ̀ житїѐ ѿто́ргшꙋ, и҆з̾ ѻ҆́нагѡ сꙋровѣ́йшїй скѵ́менъ, копронѵ́мъ кѡнстанті́нъ, нача́льства, наипа́че же на ст҃ы̑ѧ і҆кѡ́ны бѣснова́нїѧ прее́мникъ быва́етъ. И҆ что̀ подоба́етъ глаго́лати, є҆ли̑ка и҆ ꙗ҆кова̑ и҆ се́й беззако́нный содѣ́ла, но ѻ҆ба́че и҆ ѻ҆́номꙋ стꙋ́днѣйше сконча́вшꙋсѧ. Ѿ хаза́ры сы́нъ ѻ҆́нагѡ на ца́рство поставлѧ́етсѧ, поне́же и҆ то́й є҆́же жи́ти ѕлѣ̀ и҆змѣ́ри. І҆ри́на и҆ кѡнстанті́нъ нача́льства наслѣ̑дницы быва́ютъ. Сі́и ѿ тара́сїа ст҃ѣ́йшагѡ патрїа́рха наставлѧ́еми, седьмы́й собо́ръ собира́ютъ, и҆ ст҃ы̑ѧ і҆кѡ́ны па́ки хрⷭ҇то́ва цр҃ковь прїе́млетъ: си̑мъ же ца́рство ѿло́жшымъ, ѿ ге́нїка нїки́форъ возво́дитсѧ. Та́же стаѵри́кїй, посе́мъ мїхаи́лъ рагкаве́й, бж҃е́ствєнныѧ і҆кѡ̑ны чтꙋ́ще. Мїхаи́ла ѕвѣрови́дный ле́въ а҆рмени́нъ прее́млетъ: и҆́же ѿ мона́ха нѣ́коегѡ затво́рника, и҆ ѕлочести́вагѡ, ле́стїю растлѣ́всѧ, второ́е і҆кѡнобо́рство воздвиза́етъ: и҆ па́ки безлѣ́потна бж҃їѧ цр҃ковь показꙋ́етсѧ. Сегѡ̀ а҆морре́й прее́млетъ мїхаи́лъ: тогѡ́же па́ки сы́нъ ѳео́фїлъ, на і҆кѡ́ны неи́стовство, про́чыѧ во вторы́хъ полага́юще. Се́й ᲂу҆́бѡ ѳео́фїлъ мнѡ́гїѧ ѿ ст҃ы́хъ ѻ҆тє́цъ томлє́нїемъ и҆ мꙋ́камъ разли̑чнымъ преда́въ, ѡ҆ і҆кѡ́нахъ честны́хъ, пра́вдꙋ тогда̀ наипа́че ᲂу҆своѧ́ше, ꙗ҆́кѡ взыска́ше: а҆́ще кто̀ є҆́сть во гра́дѣ, крамо́лю дрꙋго́мꙋ быва́емь, ни є҆ди́нагѡ на мнѡ́ги дни̑, ꙗ҆́кѡ глаго́лютъ, ѡ҆брѣстѝ. И҆ двана́десѧте лѣ́тъ самодово́льствовавъ, и҆ чре́внымъ недꙋ́гомъ ѡ҆б̾ѧ́тъ бы́въ, расто́ргнꙋтисѧ хотѧ́ше ѿ живота̀: ᲂу҆ста̀ є҆гѡ̀ преѕѣ́льнѡ ѿверзо́шасѧ, ꙗ҆́коже и҆ самѣ̑мъ ᲂу҆тро́бамъ внꙋ́трєннимъ ꙗ҆ви́тисѧ. Цари́ца же ѳеодѡ́ра болѣ́зненна ѡ҆ приключи́вшемсѧ бы́вши, є҆два̀ ко снꙋ̀ ѡ҆браща́етсѧ: и҆ во снѣ̀ ви́дѣ пречⷭ҇тꙋю бцⷣꙋ, млⷣнца ѡ҆б̾е́мшꙋ превѣ́чнаго, ѡ҆бстои́мꙋ пресвѣ́тлыми а҆́гг҃лы: ѳео́фїла же сеѧ̀ мꙋ́жа ѿ тѣ́хъ бїе́ма, и҆ ᲂу҆ничижа́ема. Ꙗ҆́кѡ ᲂу҆́бѡ ѿи́де ѿ неѧ̀ со́нъ, и҆ ѳео́фїлъ ма́лѡ въ себѐ прише́дъ, возопѝ: ᲂу҆вы̀ мнѣ̀ ѻ҆каѧ́нномꙋ, ст҃ы́хъ ра́ди і҆кѡ́нъ бїе́нъ є҆́смь. А҆́бїе полага́етъ верхꙋ̀ є҆гѡ̀ цр҃и́ца бг҃оро́дичный ѡ҆́бразъ, молѧ́щисѧ се́й со слеза́ми. Ѳео́фїлъ ᲂу҆́бѡ си́це и҆мы́й, ви́дѣвъ нѣ́коего ѿ предстоѧ́щихъ носѧ́ща ꙾є҆гко́лпїй꙾, ꙾нанѣ́дренникъ꙾ похи́тивъ ѿ негѡ̀, ѡ҆блобыза́ше. И҆ а҆́бїе на і҆кѡ́ны шата̑вшаѧсѧ ᲂу҆ста̀, и҆ безстꙋ́днѡ зи́нꙋвый горта́нь, въ пе́рвый чи́нъ ᲂу҆строѧ́шесѧ, и҆ ѿ содержа́щїѧ бѣды̀ и҆ нꙋ́жды преста̀ и҆ ᲂу҆снꙋ̀, бы́ти и҆сповѣ́давъ добро̀ ст҃ы̑ѧ і҆кѡ̑ны почита́ти. И҆зне́сши ᲂу҆́бѡ цари́ца ѿ свои́хъ ковче́жцѡвъ ст҃ы̑ѧ и҆ честны̑ѧ ѡ҆́бразы лобыза́ти, и҆ все́ю дꙋше́ю почита́ти ѳео́фїла ᲂу҆строѧ́ше. Пома́лѣ ᲂу҆́бѡ и҆счеза́етъ ѿ житїѧ̀ сегѡ̀ ѳео́фїлъ. Ѳеодѡ́ра же сꙋ́щихъ во и҆згна́нїихъ и҆ въ темни́цахъ всѣ́хъ воззва́вши, свобо́днѣ пребыва́ти повелѣ̀. И҆ низверга́етсѧ ᲂу҆́бѡ ѿ патрїа́ршескагѡ престо́ла і҆ѡа́ннъ, и҆́же и҆ а҆нні́съ, волхвонача́льникъ, и҆ бѣсонача́льникъ наипа́че, не́жели патрїа́рхъ. хрⷭ҇то́въ же и҆сповѣ́дникъ меѳо́дїй восхо́дитъ на престо́лъ, мнѡ́га пострада́въ пре́жде, и҆ во гро́бѣ жи́въ затворе́нъ бы́сть. Си̑мъ же та́кѡ и҆мꙋ́щымъ, посѣще́нїе нѣ́кое быва́етъ бж҃е́ственное і҆ѡанні́кїю вели́комꙋ, во ѻ҆лѵ́мбовѣхъ гора́хъ ѡ҆бꙋчева́ющемꙋсѧ. Вели́кїй ᲂу҆́бѡ по́стникъ а҆рсаа́кїй прише́дъ къ немꙋ̀ глаго́ла: бг҃ъ мѧ̀ къ тебѣ̀ посла̀, ꙗ҆́кѡ да къ прпⷣбномꙋ мꙋ́жꙋ и҆са́їи затво́рникꙋ въ нїкомиді́ю прише́дше, ѿ негѡ̀ наꙋчи́мсѧ, є҆ли̑ка сꙋ́ть любѡ́вна бг҃ꙋ, и҆ прикла̑дна є҆гѡ̀ це́ркви. И҆ ᲂу҆́бѡ къ прпⷣбномꙋ и҆са́їи прише́дше, слы́шатъ ѿ негѡ̀: та́кѡ глаго́летъ гдⷭ҇ь, сѐ прибли́жисѧ коне́цъ врагѡ́мъ моегѡ̀ и҆з̾ѡбраже́нїѧ, вы̀ ᲂу҆́бѡ къ цр҃и́цѣ ѳеодѡ́рѣ, но и҆ къ патрїа́рхꙋ меѳо́дїю ше́дше, рцы́те си́це: ѡ҆ста́ви всѧ̑ не свѧщє́нныѧ, и҆ та́кѡ со а҆́гг҃лы же́ртвꙋ мнѣ̀ принесе́ши, зра́ка моегѡ̀ ѡ҆́бразъ и҆ крⷭ҇та̀ почита́ѧй. Сїѧ̑ ᲂу҆слы́шавше, въ кѡнстанті́нь гра́дъ а҆́бїе достига́ютъ, и҆ речє́ннаѧ меѳо́дїю патрїа́рхꙋ, и҆ и҆збра́ннымъ всѣ̑мъ бж҃їимъ возвѣща́ютъ. Собра́вшесѧ же къ цр҃и́цѣ прехо́дѧтъ, и҆ поко́рнꙋ сїю̀ во всѣ́хъ ѡ҆брѣта́ютъ: ѿ ѻ҆тє́цъ бо бѧ́ше бл҃гочести́ва и҆ бг҃олюби́ва. А҆́бїе ᲂу҆́бѡ цр҃и́ца бг҃оро́дичный ѡ҆́бразъ на вы́и ѡ҆бвѣша́емый и҆зне́сши, всѣ̑мъ зрѧ́щымъ: лобза́ше глаго́лющи: а҆́ще кто̀ си̑мъ не покланѧ́етсѧ, и҆ не цѣлꙋ́етъ любе́знѣ, не слꙋже́бнѣ, не ꙗ҆́кѡ бо́ги, но ꙗ҆́кѡ ѡ҆́бразы, первоѡбра́зныхъ ра́ди любвѐ: бꙋ́ди про́клѧтъ. Ѻ҆ни́ же ве́лїею ра́достїю возра́довашасѧ. Проти́вꙋ же про́ситъ и҆ сїѧ̑ ѿ ни́хъ, ꙗ҆́кѡ да бы̀ моле́нїе ѡ҆ мꙋ́жѣ є҆ѧ̀ ѳео́фїлѣ сотвори́ли. Ѻ҆ни́ же вѣ́рꙋ є҆ѧ̀ ви́дѣвше, а҆́ще и҆ ѿрица́ющесѧ, ѻ҆ба́че же повинꙋ́ютсѧ. И҆́бо во ст҃ы́хъ меѳо́дїй патрїа́рхъ лю́ди всѧ̑ собра́въ, и҆ приче́тъ ве́сь и҆ а҆рхїерє́и, въ вели́кꙋю бж҃їю цр҃ковь та́мѡ прихо́дѧтъ. Въ ни́хже бѧ́хꙋ и҆збра́ннїи сі́и: и҆з̾ ѻ҆лѵ́мба вели́кїй і҆ѡанні́кїй, и҆ а҆рсаа́кїй, наѵкра́тїй же, и҆ ᲂу҆ченицы̀ ѳео́дѡра стꙋді́та, и҆ вели́кагѡ села̀ ѳеофа́нъ, и҆ ѳео́дѡръ пи́саннїи, и҆ и҆сповѣ̑дницы: мїхаи́лъ ст҃огра́децъ, и҆ сѷгге́лъ, и҆ и҆ні́и мно́жайшїи, моле́нїе всено́щное къ бг҃ꙋ сотворѧ́ютъ ѡ҆ ѳео́фїлѣ, всѣ̑мъ молѧ́щымсѧ со слеза́ми, и҆ протѧже́ннымъ моле́нїемъ: и҆ сїѐ во всю̀ пе́рвꙋю седми́цꙋ постѡ́въ соверша́шесѧ, и҆ само́й цари́цѣ ѳеодѡ́рѣ подо́бнѣ съ жена́ми, и҆ про́чими людьмѝ содѣва́ющи. Си̑мъ же си́це и҆мꙋ́щымъ, ѳеодѡ́ра цари́ца ѡ҆ ᲂу҆́трѣ ѡ҆зарѧ́ющымъ пѧтка̀ на со́нъ ѡ҆бра́щшисѧ, возмнѣ̀ ѡ҆брѣсти́сѧ ᲂу҆ столпа̀ кре́стнагѡ, и҆ нѣ́котѡрыѧ съ шꙋ́момъ проходи́ти пꙋ́ть, разли̑чнаѧ мꙋчи́тєльнаѧ ѻ҆рꙋ̑дїѧ носѧ́щыѧ ви́дѣ: посредѣ́ же си́хъ ведо́ма свѧ́зана и҆ царѧ̀ ѳео́фїла, созадѝ свѧ́заныма рꙋка́ма: сего́ же позна́вши, послѣ́доваше и҆ та̀ съ ведꙋ́щими. Є҆гда́ же до мѣ́дѧныхъ вра́тъ достиго́ша, ви́дѣ преесте́ственнымъ видѣ́нїемъ, мꙋ́жа нѣ́коего сѣдѧ́ща пред̾ ѡ҆́бразомъ хрⷭ҇то́вымъ, є҆гѡ́же проти́вꙋ ѳео́фїла поста́виша: сегѡ́ же нога́мъ прикоснꙋ́вшисѧ цари́ца, ѡ҆ царѣ̀ молѧ́шесѧ. Ѻ҆́нъ же є҆два̀ ѿве́рзлъ ᲂу҆ста̀, ве́лїѧ твоѧ̀ вѣ́ра, же́но, глаго́летъ: разꙋмѣ́й ᲂу҆́бѡ, ꙗ҆́кѡ сле́зъ ра́ди твои́хъ и҆ вѣ́ры, є҆ще́ же и҆ ра́ди проше́нїѧ и҆ моле́нїѧ рабѡ́въ мои́хъ, и҆ сщ҃е́нникѡвъ мои́хъ, проще́нїе даю̀ мꙋ́жꙋ твоемꙋ̀ ѳео́фїлꙋ. Та́же глаго́летъ ведꙋ́щымъ: разрѣши́те є҆го̀, и҆ предади́те женѣ̀ є҆гѡ̀. Ѻ҆на́ же взе́мши сего̀, ѿстꙋпѝ веселѧ́щисѧ и҆ ра́дꙋющисѧ: и҆ а҆́бїе ю҆̀ со́нъ ѡ҆ста́ви. сїѧ̑ ᲂу҆́бѡ ѳеодѡ́ра цари́ца ви́дѣ. Патрїа́рхъ же меѳо́дїй, мл҃твамъ и҆ моле́нїємъ быва́ємымъ ѡ҆ не́мъ, хартїю̀ но́вꙋ взе́мъ, написа̀ въ не́й всѣ́хъ є҆ретїкѡ́въ царе́й и҆мена̀, вчини́въ и҆ того̀ ѳео́фїла, и҆ под̾ ст҃о́ю трапе́зою взе́мъ всѧ̑ положѝ. Ѡ҆ пѧтцѣ́ же ви́дитъ и҆ то́й нѣ́коего а҆́гг҃ла стра́шна вели́каго, входѧ́ща во хра́мъ, и҆ къ немꙋ̀ прише́дша рещѝ, глаго́летсѧ: ᲂу҆слы́шасѧ моле́нїе твоѐ є҆пі́скопе, и҆ проще́нїе полꙋчѝ ца́рь ѳео́фїлъ, не ктомꙋ̀ ᲂу҆́бѡ про́чее ѡ҆ се́мъ стꙋжа́й бж҃ествꙋ̀. Ѻ҆́нъ же и҆скꙋша́ѧ, а҆́ще и҆́стинно є҆́сть ви́димое, ѿ мѣ́ста своегѡ̀ сше́дъ, и҆ хартїю̀ взе́мъ, и҆ разви́въ, ѡ҆брѣ́те, ѽ бж҃їихъ сꙋде́бъ! загла́жено ѿ бг҃а всѧ́чески ѳео́фїлово и҆́мѧ. Сїѐ ᲂу҆вѣ́дѣвши цари́ца, преѡбра́довасѧ ѕѣлѡ̀, и҆ къ патрїа́рхꙋ посыла́етъ, всѧ̑ лю́ди собра́ти съ честны́ми крⷭ҇ты̀, и҆ со ст҃ы́ми ѡ҆́бразы, въ вели́кꙋю цр҃ковь: ꙗ҆́кѡ да ᲂу҆́тварь ст҃ы́хъ ѡ҆бразѡ́въ се́й ѿда́стсѧ, и҆ но́вое бж҃їе чꙋ́до всѣ̑мъ позна́но бꙋ́детъ. И҆ ᲂу҆́бѡ всѣ̑мъ вско́рѣ въ цр҃ковь собра́вшымсѧ со свѣща́ми, и҆ цари́ца съ сы́номъ прїи́де. И҆ лїті́и та́мѡ бы́вшей, со ст҃ы́ми і҆кѡ́нами, и҆ бж҃е́ственными и҆ честны́ми древесы̀ крⷭ҇тными, и҆ сщ҃е́ннымъ и҆ бж҃е́ственнымъ є҆ѵⷢ҇лїемъ, да́же и҆ до глаго́лемагѡ по́прища и҆зыдо́ша, Гдⷭ҇и поми́лꙋй, взыва́юще. И҆ та́кѡ па́ки въ цр҃ковь возврати́вшесѧ, бж҃е́ственнꙋю лїтꙋргі́ю соверши́ша. Возста́влєннымъ ст҃ы̑мъ и҆ чⷭ҇тны̑мъ і҆кѡ́намъ ѿ предрече́нныхъ ст҃ы́хъ мꙋже́й, проповѣ̑даннымъ ᲂу҆́бѡ бл҃гочести̑вымъ и҆ правосла́вѧщымъ: проти̑внымъ же и҆ нече́ствꙋющымъ, и҆ ст҃ы́хъ і҆кѡ́нъ че́сти не прїе́млющымъ, ѿречє́ннымъ, и҆ преда̑ннымъ проклѧ́тїю. И҆ ѿто́лѣ ѡ҆предѣли́ша сі́и ст҃і́и и҆сповѣ̑дницы, лѣ́тномꙋ си́це семꙋ̀ сщ҃е́нномꙋ торжествꙋ̀ быва́ти, да не когда̀ и҆ па́ки въ то́жде ѕлоче́стїе впаде́мъ. Неизмѣ́нный ѡ҆́бразе ѻ҆́ч҃їй, мл҃твами ст҃ы́хъ твои́хъ и҆сповѣ́дникѡвъ, поми́лꙋй на́съ. а҆ми́нь.
Да сликовствꙋ́етъ цр҃ко́внѣй свѣ́тлости любо́вїю бж҃е́ственною а҆́гг҃льское во́инство, бг҃омꙋ́дреннѡ воспѣва́ющее: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Це́рковь перворожде́нныхъ, и҆ торжество̀ ра́дꙋетсѧ, зрѧ́ще ны́нѣ бж҃е́ствєнныѧ лю́ди, є҆диномꙋ́дреннѡ воспѣва́ющыѧ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
И҆зба́влени пре́жде мра́чныѧ є҆́реси, ма́нїемъ ѳеодѡ́ры достолѣ́пныѧ цари́цы, воспѣва́емъ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Бг҃оро́диченъ: Па́че вы́шнихъ ликостоѧ́нїй, вознесла́сѧ є҆сѝ всечⷭ҇таѧ, є҆ди́на бы́вши мт҃и вседѣ́телѧ. ра́дꙋющесѧ ᲂу҆́бѡ взыва́емъ: бл҃гослове́нна ты̀ є҆сѝ въ жена́хъ, всенепоро́чнаѧ влⷣчце.
Катава́сїа: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Зако́ны цр҃кве ѻ҆те́ческїѧ сохранѧ́юще, ѡ҆́бразы пи́шемъ, и҆ лобза́имъ ᲂу҆сты̀, и҆ се́рдцемъ, и҆ хотѣ́нїемъ хрⷭ҇тѡ́вы, и҆ є҆гѡ̀ ст҃ы́хъ, зовꙋ́ще: бл҃гослови́те всѧ̑ дѣла̀ гдⷭ҇нѧ гдⷭ҇а.
На первоѡбра́зное ꙗ҆́вѣ ѡ҆́браза, по́честь и҆ поклоне́нїе возносѧ́ще, чти́мъ, бг҃оглаго́ливыхъ ᲂу҆че́нїємъ послѣ́дꙋюще, и҆ хрⷭ҇тꙋ̀ вѣ́рою зове́мъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Оу҆́мъ ѡ҆зари́вши просвѣще́нїемъ бж҃е́ственнагѡ дх҃а, честна́ѧ цари́ца, плоды̀ бг҃омꙋ́дрєнныѧ и҆мꙋ́щи, бл҃голѣ́пїе возлюбѝ цр҃кве хрⷭ҇то́вы, и҆ красотꙋ̀, бл҃гословѧ́щи кꙋ́пнѡ съ вѣ́рными і҆и҃са бг҃очеловѣ́ка.
Бг҃оро́диченъ: Лꙋча́ми свѣ́та ᲂу҆́мнагѡ, ѡ҆свѣща́емый бж҃е́ственный до́мъ тво́й, ѡ҆сѣнѧ́етъ ны́нѣ всѣ́хъ ѻ҆́блакомъ дх҃а, и҆ ѡ҆сщ҃а́етъ вѣ̑рныѧ согла́снѡ пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.
Катава́сїа: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Сщ҃еннописа́ньми ѡ҆бразѡ́въ ᲂу҆кра́шенꙋю, зрѧ́ще па́ки честнꙋ́ю цр҃ковь, со бл҃гоговѣ́нїемъ всѝ притеце́мъ и҆ бг҃ꙋ возопїи́мъ: тебѐ велича́емъ трист҃ы́й.
Че́сть и҆ сла́вꙋ стѧжа́вши цр҃ковь, крⷭ҇тъ тво́й и҆ честны̑ѧ і҆кѡ̑ны, и҆ ст҃ы́хъ и҆з̾ѡбражє́нїѧ, съ весе́лїемъ влⷣко и҆ ра́достїю велича́етъ тѧ̀.
Ѡ҆свѣтѝ бж҃е́ственною твое́ю сла́вою лю́ди на́ши ще́дрый, и҆ ѡ҆полче́ньми а҆́гг҃льскими, и҆ всеѻрꙋ́жествы сїѧ̑ ѡ҆градѝ, ꙗ҆зы́кѡвъ свирѣ́пство покарѧ́ѧ и҆̀мъ влⷣко.
Бг҃оро́диченъ: Взѧ́тсѧ прама́тере є҆́ѵы ѡ҆сꙋжде́нїе бцⷣе, ꙗ҆́кѡ ты̀ всѣ́хъ влⷣкꙋ несказа́ннѡ чⷭ҇таѧ родила̀ є҆сѝ: є҆гѡ́же и҆ ны́нѣ подо́бїе на і҆кѡ́нахъ цѣлꙋ́емъ.
Катава́сїа: Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀ бцⷣе велича́емъ.
Є҆ѯапостїла́рїй ᲂу҆́треннїй воскрⷭ҇ный, є҆ди́ножды. И҆ настоѧ́щїй. Подо́бенъ: Со ᲂу҆ч҃нкѝ взы́демъ:
Взыгра́йте, восплещи́те, съ весе́лїемъ воспо́йте: ко́ль чꙋ̑днаѧ и҆ стра̑ннаѧ твоѧ̑ хрⷭ҇тѐ, вопїю́ще, дѣла̀! и҆ кто̀ возмо́жетъ и҆зрещѝ сп҃се могꙋ̑тства, тебѐ, на́ше є҆диномы́слїе и҆ согла́сїе во є҆ди́нꙋ соедини́вшагѡ цр҃ковь;
Бг҃оро́диченъ: Ѻ҆рꙋ̑жїѧ ны́нѣ ѡ҆скꙋдѣ́ша вражде́бныѧ є҆́реси, и҆ па́мѧть є҆ѧ̀ и҆счезѐ съ шꙋ́момъ: хра́мъ бо тво́й всечⷭ҇таѧ всебл҃голѣ́пнѡ зрѧ́ще, ᲂу҆кра́шенный бл҃года́тьми честны́хъ і҆кѡ́нъ, ра́дости и҆сполнѧ́емсѧ всѝ.
На хвали́техъ стїхи̑ры воскрⷭ҇ны, д҃: и҆ а҆нато́лїевъ а҃: и҆ трїѡ́ди подо́бны трѝ, гла́съ д҃.
Подо́бенъ: Да́лъ є҆сѝ зна́менїе:
Въ тебѣ̀ ны́нѣ ра́дꙋетсѧ цр҃ковь чл҃вѣколю́бче женисѣ̀ и҆ созда́телѣ свое́мъ, сїю̀ во́лею бг҃олѣ́пною ѿ і҆́дѡльскїѧ ле́сти и҆зба́вльшемъ, и҆ себѣ̀ ѡ҆брꙋчи́вшемъ честно́ю кро́вїю, свѣ́тлѡ прїе́млющи сщ҃е́нное возставле́нїе і҆кѡ́нъ, и҆ ра́дꙋющисѧ тѧ̀ пое́тъ, и҆ сла́витъ вѣ́рнѡ.
Сті́хъ: И҆сповѣ́мсѧ тебѣ̀ гдⷭ҇и бж҃е мо́й, всѣ́мъ се́рдцемъ мои́мъ.
Пло́ти и҆з̾ѡбраже́нїе твоѐ возставлѧ́юще, гдⷭ҇и, любе́знѡ лобыза́емъ, вели́кое та́инство смотре́нїѧ твоегѡ̀ и҆з̾ѧснѧ́юще: не мнѣ́нїемъ бо, ꙗ҆́коже глаго́лютъ бг҃обо́рнїи дѣ́ти ма́нентѡвы, на́мъ ꙗ҆ви́лсѧ є҆сѝ чл҃вѣколю́бче, но и҆́стиною и҆ є҆стество́мъ пло́ти, тобо́ю возводи́ми къ твое́й любвѝ, и҆ жела́нїю.
Сті́хъ: Возвеселю́сѧ и҆ возра́дꙋюсѧ ѡ҆ тебѣ̀:
Де́нь ра́достный, и҆ весе́лїѧ и҆спо́лненный ꙗ҆ви́сѧ дне́сь: свѣ́тлость бо догма̑тъ и҆́стиннѣйшихъ блиста́етъ, и҆ сїѧ́етъ цр҃ковь хрⷭ҇то́ва ᲂу҆кра́шена возставле́ньми і҆кѡ́нъ ст҃ы́хъ ны́нѣ, и҆ и҆з̾ѡбраже́нїй сїѧ́ньми, и҆ є҆диномы́слїе быва́етъ вѣ́рныхъ бг҃опочте́нное.
Та́же глаго́лемъ сті́хъ, гла́съ ѕ҃:
Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
И҆ пое́мъ самогла́сенъ днѐ, гла́съ ѕ҃:
Мѡѷсе́й во вре́мѧ воздержа́нїѧ зако́нъ прїѧ́тъ, и҆ лю́ди привлечѐ: и҆лїа̀ пости́всѧ нб҃са̀ заключѝ: трїе́ же ѻ҆́троцы а҆враа́мстїи, мꙋчи́телѧ беззако́ннꙋюща поще́нїемъ побѣди́ша. и҆́мже и҆ на́съ сп҃се сподо́би воскрⷭ҇нїе ᲂу҆лꙋчи́ти, си́це вопїю́щихъ: ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ.
Сла́ва, па́ки то́йже. И҆ ны́нѣ: Пребл҃гослове́нна є҆сѝ бцⷣе:
Славосло́вїе вели́кое. И҆ ѿпꙋ́стъ.
Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃-й. На лїтꙋргі́и, бл҃же́нны гла́са, на ѕ҃: и҆ ѿ канѡ́на днѐ, пѣ́снь ѕ҃, на д҃. Прокі́менъ, гла́съ д҃. Пѣ́снь ѻ҆тцє́въ: Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки. Сті́хъ: Ꙗ҆́кѡ првⷣнъ є҆сѝ ѡ҆ всѣ́хъ, ꙗ҆̀же сотвори́лъ є҆сѝ на́мъ.
А҆по́столъ къ є҆вре́ємъ, зача́ло тк҃ѳ ѿ полꙋ̀. А҆ллилꙋ́їа, гла́съ и҃: Мѡѷсе́й и҆ а҆арѡ́нъ во і҆ере́ехъ є҆гѡ̀, и҆ самꙋ́илъ въ призыва́ющихъ и҆́мѧ є҆гѡ̀. Сті́хъ: Призыва́хꙋ гдⷭ҇а, и҆ то́й послꙋ́шаше и҆́хъ. Є҆ѵⷢ҇лїе ѿ і҆ѡа́нна, зача́ло є҃. Прича́стенъ: Хвали́те гдⷭ҇а съ нб҃съ: Дрꙋгі́й: Ра́дꙋйтесѧ првⷣнїи ѡ҆ гдⷭ҇ѣ: На трапе́зѣ же ꙗ҆ди́мъ варе́нїе со є҆ле́емъ, а҆ не ры̑бы. А҆́ще же прилꙋчи́тсѧ, пїе́мъ вїно̀, ᲂу҆ста́вленное въ сла́вꙋ бж҃їю, по двѣ̀ ча́ши: Та́кожде и҆ въ ве́черъ по двѣ̀.
Послѣ́дованїе моле́бнагѡ пѣ́нїѧ
въ недѣ́лю правосла́вїѧ.
[edit]въ недѣ́лю правосла́вїѧ.
По сконча́нїи лїтꙋргі́и, и҆з̾ ѻ҆лтарѧ̀ и҆схо́дѧтъ всѝ сщ҃еннослꙋжи́тели. Сщ҃енницы же и҆зно́сѧтъ і҆кѡ́нꙋ сп҃си́телевꙋ и҆ бг҃оро́дичнꙋ и҆ полага́ютъ посредѣ̀ це́ркве на а҆нало́гїи.
Дїа́конъ: Бл҃гословѝ, влады́ко.
І҆ере́й: Бл҃гослове́нъ бг҃ъ на́шъ всегда̀, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Дїа́конъ: Сла́ва тебѣ̀, бж҃е на́шъ, сла́ва тебѣ̀.
Ли́къ: Цр҃ю̀ нбⷭ҇ный, ᲂу҆тѣ́шителю, дш҃е и҆́стины, и҆́же вездѣ̀ сы́й, и҆ всѧ̑ и҆сполнѧ́ѧй, сокро́вище бл҃ги́хъ, и҆ жи́зни пода́телю, прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны, и҆ сп҃сѝ, бла́же, дꙋ́шы на́шѧ.
Та́же чте́цъ: Трист҃о́е. Прест҃а́ѧ трⷪ҇це: Ѻ҆́ч҃е на́шъ:
Возгла́съ: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.
Чте́цъ: А҆ми́нь. Гдⷭ҇и, поми́лꙋй, в҃і. Сла́ва, и҆ ны́нѣ:
Прїиди́те, поклони́мсѧ цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ.
Ѱало́мъ ѻ҃д. Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Ми́ромъ гдⷭ҇ꙋ помо́лимсѧ.
Ѡ҆ свы́шнѣмъ ми́рѣ, и҆ спасе́нїи дꙋ́шъ на́шихъ, гдⷭ҇ꙋ помо́лимсѧ.
Ѡ҆ ми́рѣ всегѡ̀ мі́ра, бл҃гостоѧ́нїи ст҃ы́хъ бж҃їихъ цр҃кве́й, и҆ соедине́нїи всѣ́хъ, гдⷭ҇ꙋ помо́лимсѧ.
Ѡ҆ ст҃ѣ́мъ хра́мѣ се́мъ, и҆ съ вѣ́рою, бл҃гоговѣ́нїемъ и҆ стра́хомъ бж҃їимъ входѧ́щихъ во́нь, гдⷭ҇ꙋ помо́лимсѧ.
Ѡ҆ вели́комъ господи́нѣ и҆ ѻ҆тцѣ̀ на́шемъ ст҃ѣ́йшемъ патрїа́рсѣ и҆́мⷬ҇къ, и҆ ѡ҆ господи́нѣ на́шемъ преѡсвѧще́ннѣйшемъ митрополі́тѣ (и҆лѝ а҆рхїепі́скопѣ, и҆лѝ є҆пі́скопѣ) и҆́мⷬ҇къ, честнѣ́мъ пресвѵ́терствѣ, во хрⷭ҇тѣ̀ дїа́конствѣ, ѡ҆ все́мъ при́чтѣ и҆ лю́дехъ, гдⷭ҇ꙋ помо́лимсѧ.
Ѡ҆ богохрани́мѣй странѣ̀ на́шей, власте́хъ и҆ во́инствѣ є҆ѧ̀, гдⷭ҇ꙋ помо́лимсѧ.
Ѡ҆ гра́дѣ се́мъ, [и҆лѝ ѡ҆ ве́си се́й, и҆лѝ ѡ҆ ст҃ѣ́й ѻ҆би́тели се́й,] всѧ́комъ гра́дѣ, странѣ̀, и҆ вѣ́рою живꙋ́щихъ въ ни́хъ, гдⷭ҇ꙋ помо́лимсѧ.
Ѡ҆ бл҃горастворе́нїи воздꙋ́хѡвъ, ѡ҆ и҆з̾ѻби́лїи плодѡ́въ земны́хъ, и҆ вре́менѣхъ ми́рныхъ, гдⷭ҇ꙋ помо́лимсѧ.
Ѡ҆ пла́вающихъ, пꙋтеше́ствꙋющихъ, недꙋ́гꙋющихъ, стра́ждꙋщихъ, плѣне́нныхъ, и҆ ѡ҆ спасе́нїи и҆́хъ, гдⷭ҇ꙋ помо́лимсѧ.
Ѡ҆ є҆́же млⷭ҇тивымъ ѻ҆́комъ призрѣ́ти на ст҃ꙋ́ю свою̀ цр҃ковь, и҆ соблюстѝ ю҆̀ невреди́мꙋ и҆ непребори́мꙋ ѿ є҆ресе́й и҆ сꙋевѣ́рїй, и҆ ми́ромъ свои́мъ ѡ҆гради́ти, гдⷭ҇ꙋ помо́лимсѧ.
Ѡ҆ є҆́же ᲂу҆тиши́ти раздира́нїѧ є҆ѧ̀, и҆ си́лою ст҃а́гѡ дх҃а ѡ҆брати́ти всѣ́хъ ѿстꙋ́пльшихъ къ позна́нїю и҆́стины, и҆ сопричестѝ ко и҆збра́нномꙋ своемꙋ̀ ста́дꙋ, гдⷭ҇ꙋ помо́лимсѧ.
Ѡ҆ є҆́же просвѣти́ти мы̑сли невѣ́рїемъ помраче́нныхъ свѣ́томъ своегѡ̀ бг҃оразꙋ́мїѧ, вѣ́рныхъ же свои́хъ ᲂу҆крѣпи́ти и҆ непоколеби́мыхъ въ правовѣ́рїи соблюстѝ, гдⷭ҇ꙋ помо́лимсѧ.
Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.
Застꙋпѝ, спасѝ, поми́лꙋй и҆ сохранѝ на́съ бж҃е, твое́ю бл҃года́тїю.
Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю со всѣ́ми ст҃ы́ми помѧнꙋ́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀, гдⷭ҇и.
Возгла́съ: Ꙗ҆́кѡ подоба́етъ тебѣ̀ всѧ́каѧ сла́ва, че́сть, и҆ поклоне́нїе, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не.
Сті́хъ а҃: И҆сповѣ́дайтесѧ гдⷭ҇еви, ꙗ҆́кѡ бл҃гъ, ꙗ҆́кѡ въ вѣ́къ ми́лость є҆гѡ̀.
Сті́хъ в҃: Ѡ҆быше́дше ѡ҆быдо́ша мѧ̀, и҆ и҆́менемъ гдⷭ҇нимъ противлѧ́хсѧ и҆̀мъ.
Сті́хъ г҃: Не ᲂу҆мрꙋ̀, но жи́въ бꙋ́дꙋ, и҆ повѣ́мъ дѣла̀ гдⷭ҇нѧ.
Сті́хъ д҃: Ка́мень, є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла: ѿ гдⷭ҇а бы́сть се́й, и҆ є҆́сть ди́венъ во ѻ҆чесѣ́хъ на́шихъ.
Пое́тъ же ли́къ Бг҃ъ гдⷭ҇ь: четы́режды.
Гла́съ д҃: Бл҃года́рни сꙋ́ще недосто́йнїи рабѝ твоѝ гдⷭ҇и, ѡ҆ твои́хъ вели́кихъ бл҃годѣѧ́нїихъ на на́съ бы́вшихъ, сла́вѧще тѧ̀ хва́лимъ, бл҃гослови́мъ, бл҃годари́мъ, пое́мъ, и҆ велича́емъ твоѐ бл҃гоꙋтро́бїе, и҆ ра́бски любо́вїю вопїе́мъ тѝ: бл҃годѣ́телю сп҃се нашъ, сла́ва тебѣ̀.
Сла́ва, гла́съ г҃: Твои́хъ бл҃годѣѧ́нїй и҆ дарѡ́въ тꙋ́не, ꙗ҆́кѡ рабѝ непотре́бнїи сподо́бльшесѧ, влⷣко, къ тебѣ̀ ᲂу҆се́рднѡ притека́юще, бл҃годаре́нїе по си́лѣ прино́симъ, и҆ тебѐ ꙗ҆́кѡ бл҃годѣ́телѧ и҆ творца̀ сла́вѧще, вопїе́мъ: сла́ва тебѣ̀, бж҃е преще́дрый.
И҆ ны́нѣ, гла́съ д҃: Ꙗ҆́кѡже вы́шнїѧ тве́рди бл҃голѣ́пїе, и҆ ни́жнюю споказа́лъ є҆сѝ красотꙋ̀ свѧта́гѡ селе́нїѧ сла́вы твоеѧ̀, гдⷭ҇и, ᲂу҆твердѝ сїѐ во вѣ́къ вѣ́ка, и҆ прїимѝ на́шѧ въ не́мъ непреста́ннѡ приноси̑маѧ тебѣ̀ молє́нїѧ бцⷣею, всѣ́хъ животѐ и҆ воскр҃се́нїе.
Дїа́конъ: Во́нмемъ.
Сщ҃е́нникъ: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Премⷣрость.
Чте́цъ: Прокі́менъ, гла́съ д҃: Насажде́ни въ домꙋ̀ гдⷭ҇ни, во дво́рѣхъ бг҃а на́шего процвѣтꙋ́тъ.
Сті́хъ: Ра́дꙋйтесѧ првⷣнїи ѡ҆ гдⷭ҇ѣ, пра̑вымъ подоба́етъ похвала̀.
Дїа́конъ: Премⷣрость.
Чте́цъ: Къ ри́млѧнѡмъ посла́нїѧ ст҃а́гѡ а҆пⷭ҇ла па́ѵла чте́нїе.
И҆ па́ки дїа́конъ: Во́нмемъ.
А҆по́столъ къ ри́млѧнѡмъ, зача́ло рк҃а.
Сщ҃е́нникъ: Ми́ръ тѝ.
Ли́къ: И҆ дꙋ́хови твоемꙋ̀.
И҆ посе́мъ возглаша́етъ дїа́конъ: И҆ ѡ҆ сподо́битисѧ на́мъ слы́шанїю ст҃а́гѡ є҆ѵⷢ҇лїа, гдⷭ҇а бг҃а мо́лимъ.
Ли́къ: Гдⷭ҇и, поми́лꙋй, три́жды.
Дїа́конъ: Премⷣрость, про́сти, ᲂу҆слы́шимъ ст҃а́гѡ є҆ѵⷢ҇лїа.
Предстоѧ́тель: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Предстоѧ́тель: Ѿ матѳе́а ст҃а́гѡ є҆ѵⷢ҇лїа чте́нїе.
Ли́къ: Сла́ва тебѣ̀, гдⷭ҇и, сла́ва тебѣ̀.
Дїа́конъ: Во́нмемъ.
Предстоѧ́тель чте́тъ є҆ѵⷢ҇лїе ѿ матѳе́а, заⷱ҇ ѻ҃є.
Ли́къ: Сла́ва тебѣ̀, гдⷭ҇и, сла́ва тебѣ̀.
Поми́лꙋй на́съ, бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.
Ли́къ: Гдⷭ҇и, поми́лꙋй, три́жды.
Е҆щѐ мо́лимсѧ ѡ҆ вели́комъ господи́нѣ и҆ ѻ҆тцѣ̀ на́шемъ ст҃ѣ́йшемъ патрїа́рсѣ и҆́мⷬ҇къ, и҆ ѡ҆ господи́нѣ на́шемъ преѡсвѧще́ннѣйшемъ митрополі́тѣ (и҆лѝ а҆рхїепі́скопѣ, и҆лѝ є҆пі́скопѣ) и҆́мⷬ҇къ, и҆ все́й во хрⷭ҇тѣ̀ бра́тїи на́шей.
Ли́къ: Гдⷭ҇и, поми́лꙋй, три́жды.
Е҆щѐ мо́лимсѧ ѡ҆ бг҃охрани́мѣй странѣ̀ на́шей, власте́хъ, во́инствѣ и҆ наро́дѣ є҆ѧ̀, да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀.
Ли́къ: Гдⷭ҇и, поми́лꙋй, три́жды.
Не хотѧ́й сме́рти грѣ́шныхъ, но ѡ҆жида́ѧй ѡ҆браще́нїѧ и҆ покаѧ́нїѧ, ѡ҆братѝ всѣ́хъ ѿстꙋ́пльшихъ ко ст҃ѣ́й твое́й цр҃кви, мо́лимъ ти сѧ, млⷭ҇рдый гдⷭ҇и, ᲂу҆слы́ши и҆ поми́лꙋй.
Ли́къ: Гдⷭ҇и, поми́лꙋй, три́жды.
Оу҆стро́ивый мі́ръ се́й въ сла́вꙋ твою̀, сотворѝ, да и҆ проти́вѧщїисѧ твоемꙋ̀ сло́вꙋ ѡ҆братѧ́тсѧ, и҆ вкꙋ́пѣ со всѣ́ми вѣ́рными, и҆́стинною вѣ́рою и҆ бл҃гоче́стїемъ тебѐ бг҃а на́шего просла́вѧтъ, мо́лимъ ти сѧ, всеси́льный тво́рче, ᲂу҆слы́ши и҆ поми́лꙋй.
Ли́къ: Гдⷭ҇и, поми́лꙋй, три́жды.
Да́вый за́повѣдь твою̀ на́мъ, є҆́же люби́ти тебѐ бг҃а на́шего, и҆ бли́жнѧго своего̀, сотворѝ, да нє́нависти, вражды̑, ѡ҆би̑ды, и҆ прѡ́чаѧ беззакѡ́нїѧ прекратѧ́тсѧ, и҆́стиннаѧ же любо́вь да ца́ртвꙋетъ въ сердца́хъ на́шихъ, мо́лимъ ти сѧ, сп҃си́телю на́шъ, ᲂу҆слы́ши и҆ млⷭ҇тивнѡ поми́лꙋй.
Ли́къ: Гдⷭ҇и, поми́лꙋй, три́жды.
Возгла́съ: Оу҆слы́ши ны̀, бж҃е сп҃си́телю на́шъ, ᲂу҆пова́нїе всѣ́хъ концє́въ землѝ, и҆ сꙋ́щихъ въ мо́ри дале́че: и҆ ми́лостивъ, ми́лостивъ бꙋ́ди, влⷣко, ѡ҆ грѣсѣ́хъ на́шихъ, и҆ поми́лꙋй ны̀. млⷭ҇тивъ бо и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Всевы́шнїй бж҃е, влⷣко и҆ содѣ́телю всеѧ̀ тва́ри, наполнѧ́ѧй всѧ̑ вели́чествомъ твои́мъ, и҆ содержа́й си́лою твое́ю! Тебѣ̀ вседарови́томꙋ гдⷭ҇ꙋ на́шемꙋ мы̀ недосто́йнїи бл҃годаре́нїе прино́симъ, ꙗ҆́кѡ не ѿвраща́ешисѧ на́съ беззако́нїй ра́ди на́шихъ, но па́че предварѧ́еши ны̀ щедро́тами твои́ми. Ты̀ ко и҆збавле́нїю на́шемꙋ посла́лъ є҆сѝ є҆диноро́днаго твоего̀ сн҃а, и҆ бл҃говѣсти́лъ безмѣ́рное твоѐ къ ро́дꙋ человѣ́ческомꙋ снизхожде́нїе: ꙗ҆́кѡ хотѣ́нїемъ хо́щеши, и҆ ѡ҆жида́еши, є҆́же ѡ҆брати́тисѧ на́мъ къ тебѣ̀, и҆ сп҃сє́нымъ бы́ти. Ты̀ снизходѧ̀ къ не́мощи на́шегѡ є҆стества̀, ᲂу҆крѣплѧ́еши на́съ всеси́льною ст҃а́гѡ твоегѡ̀ дх҃а бл҃года́тїю, ᲂу҆тѣша́еши сп҃си́тельною вѣ́рою и҆ соверше́нною наде́ждою вѣ́чныхъ бла̑гъ, и҆ рꙋково́дствꙋѧ и҆збра́нныхъ твои́хъ въ го́рнїй сїѡ́нъ, соблюда́еши ꙗ҆́кѡ зѣ́ницꙋ ѻ҆́ка. И҆сповѣ́дꙋемъ гдⷭ҇и, вели́кое твоѐ и҆ безприкла́дное чл҃вѣколю́бїе и҆ млⷭ҇рдїе. Но ви́дѧще мно́гихъ поползновє́нїѧ, прилѣ́жнѡ тѧ̀ всебл҃гі́й гдⷭ҇и мо́лимъ: при́зри на цр҃ковь твою̀, и҆ ви́ждь, ꙗ҆́кѡ твоѐ сп҃си́тельное бл҃говѣ́стїе а҆́ще и҆ ра́достнѡ прїѧ́хомъ, но те́рнїе сꙋеты̀ и҆ страсте́й твори́тъ ѻ҆́ное въ нѣ́кїихъ малопло́дно, въ нѣ́кїихъ же и҆ безпло́дно, и҆ по ᲂу҆множе́нїю беззако́нїй ѻ҆́вїи є҆ресьмѝ, ѻ҆́вїи раско́ломъ проти́вѧщесѧ є҆ѵⷢ҇льской твое́й и҆́стинѣ, ѿстꙋпа́ютъ ѿ достоѧ́нїѧ твоегѡ̀, ѿрѣва́ютъ твою̀ бл҃года́ть, и҆ поверга́ютъ себѐ сꙋдꙋ̀ твоегѡ̀ прест҃а́гѡ сло́ва. Премлⷭ҇рдый и҆ всеси́льный, не до конца̀ гнѣ́ваѧйсѧ гдⷭ҇и! бꙋ́ди млⷭ҇тивъ, мо́литъ тѧ̀ твоѧ̀ цр҃ковь, представлѧ́ющи тебѣ̀ нача́льника и҆ соверши́телѧ сп҃се́нїѧ на́шегѡ і҆и҃са хрⷭ҇та̀: бꙋ́ди млⷭ҇тивъ на́мъ, ᲂу҆крѣпѝ на́съ въ правовѣ́рїи си́лою твое́ю, заблꙋжда́ющымъ же просвѣтѝ разꙋ̑мныѧ ѻ҆́чи свѣ́томъ твои́мъ бж҃е́ственнымъ, да ᲂу҆разꙋмѣ́ютъ твою̀ и҆́стинꙋ: ᲂу҆мѧгчѝ и҆́хъ ѡ҆жесточе́нїе, и҆ ѿве́рзи слꙋ́хъ, да позна́ютъ гла́съ тво́й, и҆ ѡ҆братѧ́тсѧ къ тебѣ̀ сп҃си́телю на́шемꙋ. И҆спра́ви гдⷭ҇и и҆ны́хъ развраще́нїе, и҆ жи́знь несогла́снꙋю хрⷭ҇тїа́нскомꙋ бл҃гоче́стїю: сотворѝ, да всѝ свѧ́тѡ и҆ непоро́чнѡ поживе́мъ: и҆ та́кѡ сп҃си́тельнаѧ вѣ́ра ᲂу҆корени́тсѧ, и҆ плодоно́сна въ сердца́хъ на́шихъ пребꙋ́детъ. Не ѿвратѝ лица̀ твоегѡ̀ ѿ на́съ гдⷭ҇и, возда́ждь на́мъ ра́дость сп҃се́нїѧ твоегѡ̀. Пода́ждь гдⷭ҇и, и҆ па́стырємъ цр҃кве твоеѧ̀ ст҃ꙋ́ю ре́вность, и҆ ѡ҆ сп҃се́нїи и҆ ѡ҆браще́нїи заблꙋжда́ющихъ попече́нїе и҆́хъ дꙋ́хомъ є҆ѵⷢ҇льскимъ растворѝ: да тобо́ю всѝ рꙋководи́ми, дости́гнемъ, и҆дѣ́же соверше́нїе вѣ́ры, и҆сполне́нїе наде́жды и҆ и҆́стиннаѧ любо́вь, и҆ та́мѡ съ ли̑ки чⷭ҇тѣ́йшихъ нбⷭ҇ныхъ си́лъ просла́вимъ тебѐ гдⷭ҇а на́шего, ѻ҆ц҃а̀, и҆ сн҃а, и҆ ст҃а́го дх҃а, во вѣ́ки вѣкѡ́въ.
Ли́къ: А҆ми́нь.
Посе́мъ дїа́конъ, ста́въ на ᲂу҆гото́ваннѣмъ мѣ́стѣ, возглаша́етъ:
Кто̀ бг҃ъ ве́лїй, ꙗ҆́кѡ бг҃ъ на́шъ; ты̀ є҆сѝ бг҃ъ творѧ́й чꙋдеса̀ є҆ди́нъ.
Пото́мъ вы́сшимъ гла́сомъ: Кто̀ бг҃ъ ве́лїй, ꙗ҆́кѡ бг҃ъ на́шъ:
И҆ па́ки высоча́йшимъ гла́сомъ: Кто̀ бг҃ъ ве́лїй, ꙗ҆́кѡ бг҃ъ на́шъ:
И҆ глаго́летъ: Правосла́вїѧ де́нь пра́зднꙋюще, правосла́внїи лю́дїе, наипа́че просла́вимъ вино́вника всѣ́хъ бла̑гъ бг҃а, и҆́же сы́й блгⷭ҇ве́нъ во вѣ́ки. Се́й бг҃ъ на́шъ, промышлѧ́ѧ и҆ ᲂу҆твержда́ѧ возлю́бленное своѐ достоѧ́нїе ст҃ꙋ́ю цр҃ковь, пра́ѻтцєвъ престꙋпле́нїемъ ѿпа́дшихъ ᲂу҆тѣша́ѧ нело́жнымъ свои́мъ сло́вомъ, є҆щѐ въ раѝ ѡ҆снова́нїе є҆́й положѝ: се́й бг҃ъ на́шъ, рꙋково́дствꙋѧ ко ѻ҆́номꙋ сп҃си́тельномꙋ ѡ҆бѣтова́нїю, не прикрове́на себѐ ѡ҆ста́ви, но хотѧ́щее бы́ти сп҃се́нїе провозвѣстѝ пе́рвѣе чрез̾ ѻ҆тцє́въ и҆ проро́кѡвъ, живоѡписа̀ разли́чными ѡ҆́бразы: се́й бг҃ъ на́шъ, многоча́стнѣ и҆ многоѡбра́знѣ дре́вле гл҃го́лавый ѻ҆тцє́мъ во прⷪ҇ро́цѣхъ, въ послѣ́докъ дні́й си́хъ гл҃го́ла на́мъ въ сн҃ѣ, и҆́мже и҆ вѣ́ки сотворѝ, и҆́же возвѣстѝ ѻ҆́ч҃ее ѡ҆ на́съ бл҃говоле́нїе, ѿкры̀ та̑инства нбⷭ҇наѧ, ᲂу҆вѣ́ри си́лою ст҃а́гѡ дх҃а ѡ҆ и҆́стинѣ бл҃говѣ́стїѧ, посла̀ а҆пⷭ҇лы во ве́сь мі́ръ проповѣ́дати є҆ѵⷢ҇лїе црⷭ҇твїѧ, ᲂу҆твердѝ ѻ҆́ное разли́чными си́лами и҆ чꙋдесы̀. Семꙋ̀ сп҃си́тельномꙋ ѿкрове́нїю послѣ́дꙋюще, сегѡ̀ бл҃говѣ́стїѧ держа́щесѧ,
Вѣ́рꙋемъ во є҆ди́наго бг҃а ѻ҆ц҃а̀ вседержи́телѧ, творца̀ нб҃ꙋ и҆ землѝ, ви̑димымъ же всѣ̑мъ и҆ неви̑димымъ. И҆ во є҆ди́наго гдⷭ҇а і҆и҃са хрⷭ҇та̀, сн҃а бж҃їѧ, є҆диноро́днаго, и҆́же ѿ ѻ҆ц҃а̀ рожде́ннаго пре́жде всѣ́хъ вѣ̑къ: свѣ́та ѿ свѣ́та, бг҃а и҆́стинна ѿ бг҃а и҆́стинна, рожде́нна, не сотворе́нна, є҆диносꙋ́щна ѻ҆ц҃ꙋ̀, и҆́мже всѧ̑ бы́ша. На́съ ра́ди человѣ̑къ, и҆ на́шегѡ ра́ди сп҃се́нїѧ сше́дшаго съ нб҃съ, и҆ воплоти́вшагосѧ ѿ дх҃а ст҃а и҆ мр҃і́и дв҃ы, и҆ вочл҃вѣ́чшасѧ. Распѧ́таго же за ны̀ при понті́йстѣмъ пїла́тѣ, и҆ страда́вша, и҆ погребе́на. И҆ воскрⷭ҇шаго въ тре́тїй де́нь, по писа́нїємъ. И҆ возше́дшаго на нб҃са̀, и҆ сѣдѧ́ща ѡ҆деснꙋ́ю ѻ҆ц҃а̀. И҆ па́ки грѧдꙋ́щаго со сла́вою сꙋди́ти живы̑мъ и҆ мє́ртвымъ, є҆гѡ́же црⷭ҇твїю не бꙋ́детъ конца̀. И҆ въ дх҃а ст҃а́го, гдⷭ҇а животворѧ́щаго, и҆́же ѿ ѻ҆ц҃а̀ и҆сходѧ́щаго, и҆́же со ѻ҆ц҃е́мъ и҆ сн҃омъ спокланѧ́ема и҆ ссла́вима, глаго́лавшаго прⷪ҇ро́ки. Во є҆ди́нꙋ ст҃ꙋ́ю, собо́рнꙋю и҆ а҆пⷭ҇льскꙋю цр҃ковь. И҆сповѣ́дꙋемъ є҆ди́но кр҃ще́нїе, во ѡ҆ставле́нїе грѣхѡ́въ. Ча́емъ воскрⷭ҇нїѧ ме́ртвыхъ: И҆ жи́зни бꙋ́дꙋщагѡ вѣ́ка. А҆ми́нь.
Сїѧ̀ вѣ́ра а҆пⷭ҇льскаѧ, сїѧ̀ вѣ́ра ѻ҆те́ческаѧ, сїѧ̀ вѣ́ра правосла́внаѧ, сїѧ̀ вѣ́ра вселе́ннꙋю ᲂу҆твердѝ.
Е҆ще́ же собо́ры ст҃ы́хъ ѻ҆тє́цъ и҆ и҆́хъ преда̑нїѧ и҆ писа̑нїѧ бжⷭ҇твенномꙋ ѿкрове́нїю согла̑снаѧ, прїе́млемъ и҆ ᲂу҆твержда́емъ.
А҆́ще семꙋ̀ гдⷭ҇ню ѡ҆ на́съ помышле́нїю и҆ ѿкрове́нїю сп҃си́тельномꙋ вразѝ правосла́вїѧ и҆ проти́вишасѧ, но помѧнꙋ̀ гдⷭ҇ь поношє́нїѧ ра̑бъ свои́хъ: хꙋ́льники бо сла́вы своеѧ̀ порꙋга̀, и҆ продерза́тели и҆ врагѝ правосла́вїѧ боѧ́знєнны и҆ бѣжа́тели ꙗ҆вѝ.
Ꙗ҆́коже ᲂу҆́бѡ плѣнѧ́ющихъ ра́зꙋмъ сво́й въ послꙋша́нїе бж҃твенномꙋ ѿкрове́нїю и҆ подвиза́вшихсѧ за ѻ҆́ное ᲂу҆бл҃жа́емъ и҆ восхвалѧ́емъ: та́кѡ проти́вѧщихсѧ се́й и҆́стинѣ, а҆́ще ѡ҆жида́вшемꙋ и҆́хъ ѡ҆браще́нїѧ и҆ раска́ѧнїѧ гдⷭ҇ꙋ не пока́ѧшасѧ, сщ҃е́нномꙋ писа́нїю послѣ́дꙋюще и҆ пе́рвенствꙋющїѧ цр҃кве преда́нїй держа́щесѧ, ѿлꙋча́емъ и҆ а҆наѳема́тствꙋемъ.
Та́же, ѧ҆снѣ́йшимъ гла́сомъ глаго́летъ:
Ѿрица́ющымъ бытїѐ бж҃їе и҆ ᲂу҆твержда́ющымъ, ꙗ҆́кѡ мі́ръ се́й є҆́сть самобы́тенъ, и҆ всѧ̑ въ не́мъ без̾ про́мысла бж҃їѧ и҆ по слꙋ́чаю быва́ютъ, а҆на́ѳема, три́жды.
И҆ возглаша́етъ а҆рхїере́й со̀ всѣ́мъ кли́ромъ: а҆на́ѳема, три́жды, та́же и҆ пѣвцы̀ и҆лѝ лю́дїе возглаша́ютъ а҆на́ѳема, три́жды. И҆ быва́етъ сїѐ по кое́мждо а҆наѳема́тствованїи.
Глаго́лющымъ бг҃а не бы́ти дх҃ъ, но пло́ть: и҆лѝ не бы́ти є҆го̀ првⷣна, млⷭ҇рда, премⷣра, всевѣ́дꙋща, и҆ подѡ́бнаѧ хꙋлє́нїѧ произносѧ́щымъ, а҆на́ѳема, три́жды.
Дерза́ющымъ глаго́лати, ꙗ҆́кѡ сн҃ъ бж҃їй не є҆диносꙋ́щный и҆ не равноче́стный ѻ҆ц҃ꙋ, та́кожде и҆ дх҃ъ ст҃ы́й, и҆ и҆сповѣ́дающымъ ѻ҆ц҃а, и҆ сн҃а, и҆ ст҃а́го дх҃а, не є҆ди́наго бы́ти бг҃а, а҆на́ѳема, три́жды.
Безꙋ́мнѣ глаго́лющымъ, не нꙋ́жно бы́ти ко спⷭ҇нїю на́шемꙋ и҆ ко ѡ҆чище́нїю грѣхѡ́въ прише́ствїе въ мі́ръ сн҃а бж҃їѧ во пло́ти и҆ є҆гѡ̀ во́льное страда́нїе, смр҃ть и҆ воскрⷭ҇нїе, а҆на́ѳема, три́жды.
Не прїе́млющымъ блгⷣти и҆скꙋпле́нїѧ є҆ѵⷢ҇лїемъ проповѣ́даннагѡ, ꙗ҆́кѡ є҆ди́нственнагѡ на́шегѡ ко ѡ҆правда́нїю пред̾ бг҃омъ сре́дства, а҆на́ѳема, три́жды.
Дерза́ющымъ гл҃го́лати, ꙗ҆́кѡ прчⷭ҇таѧ дв҃а мр҃і́ѧ не бы́сть пре́жде ржⷭ҇тва̀, въ ржⷭ҇твѣ̀ и҆ по ржⷭ҇твѣ̀ дв҃а, а҆на́ѳема, три́жды.
Не вѣ́рꙋющымъ, ꙗ҆́кѡ дх҃ъ ст҃ы́й ᲂу҆мꙋдрѝ прⷪ҇ро́кѡвъ и҆ а҆пⷭ҇лѡвъ, и҆ чрез̾ ни́хъ возвѣстѝ на́мъ и҆́стинный пꙋ́ть къ вѣ́чномꙋ спⷭ҇нїю, и҆ ᲂу҆твердѝ сїѐ чꙋдеса́ми, и҆ ны́нѣ въ срⷣца́хъ вѣ́рныхъ и҆ и҆́стинныхъ хрⷭ҇тїа́нъ ѡ҆бита́етъ и҆ наставлѧ́етъ и҆̀хъ на всѧ́кꙋю и҆́стинꙋ, а҆на́ѳема, три́жды.
Ѿме́щꙋщымъ безсм҃ртїе дꙋшѝ, кончи́нꙋ вѣ́ка, сꙋ́дъ бꙋ́дꙋщїй и҆ воздаѧ́нїе вѣ́чное за добродѣ́тели на нб҃сѣ́хъ, а҆ за грѣхѝ ѡ҆сꙋжде́нїе, а҆на́ѳема, три́жды.
Ѿме́щꙋщымъ всѧ̑ та̑инства ст҃а̑ѧ, цр҃ковїю хрⷭ҇то́вою содержи̑маѧ, а҆на́ѳема, три́жды.
Ѿверга́ющымъ собо́ры ст҃ы́хъ ѻ҆ц҃ъ и҆ и҆́хъ преда̑нїѧ, бжⷭ҇твенномꙋ ѿкрове́нїю согла̑снаѧ и҆ правосла́вно-каѳолі́ческою цр҃ковїю бл҃гочⷭ҇тнѡ храни̑маѧ, а҆на́ѳема, три́жды.
Помышлѧ́ющымъ, ꙗ҆́кѡ правосла́внїи гдⷭ҇ри возво́дѧтсѧ на престо́лы не по ѻ҆собли́вомꙋ ѡ҆ ни́хъ бж҃їю блг҃оволе́нїю и҆ при пома́занїи на ца́рство дарова̑нїѧ дх҃а ст҃а́гѡ къ прохожде́нїю вели́кагѡ сегѡ̀ зва́нїѧ на ни́хъ не и҆злива́ютсѧ; и҆ та́кѡ дерза́ющымъ про́тивъ и҆́хъ на бꙋ́нтъ и҆ и҆змѣ́нꙋ, а҆на́ѳема, три́жды.
Рꙋга́ющымъ и҆ хꙋ́лѧщымъ ст҃ы̑ѧ і҆кѡ̑ны, и҆̀хже ст҃а́ѧ цр҃ковь ко воспомина́нїю дѣ́лъ бж҃їихъ и҆ ᲂу҆го́дникѡвъ є҆гѡ̀, ра́ди возбꙋжде́нїѧ взира́ющихъ на ѡ҆́ныѧ ко бл҃гочⷭ҇тїю, и҆ ко ѻ҆́ныхъ подража́нїю прїе́млетъ, и҆ гл҃ющымъ ѡ҆́ныѧ бы́ти і҆́дѡлы, а҆на́ѳема, три́жды.
Всѣ̑мъ же ѡ҆ правосла́вїи подвиза́вшымсѧ словесы̀, писа̑нїи, ᲂу҆чє́нїи, страда̑нїи и҆ бг҃оꙋго́днымъ житїе́мъ, ꙗ҆́кѡ защи́тникѡмъ и҆ посо́бникѡмъ ѻ҆́наго, хрⷭ҇то́ва цр҃ковь, многѡлѣ́тнее воспомина́нїе творѧ́щи, восклица́етъ:
Ст҃ы̑мъ равноапⷭ҇льнымъ цр҃ю̀ кѡнстанті́нꙋ и҆ ма́тери є҆гѡ̀ є҆ле́нѣ, вѣ́чнаѧ па́мѧть.
Ли́къ: Вѣ́чнаѧ па́мѧть, три́жды.
Ст҃ы̑мъ бл҃говѣ̑рнымъ равноапⷭ҇льнымъ вели́комꙋ кнѧ́зю влади́мїрꙋ и҆ вели́цѣй кнѧги́ни ѻ҆́льзѣ, вѣ́чнаѧ па́мѧть.
Ли́къ: Вѣ́чнаѧ па́мѧть, три́жды.
Свѧтѣ́йшымъ правосла̑внымъ патрїа́рхѡмъ константїнопѡ́льскимъ, а҆леѯандрі̑йскимъ, а҆нтїохі̑йскимъ, і҆ерꙋсали̑мскимъ и҆ всерѡссі̑йскимъ, и҆ про́чымъ преѡсщ҃є́ннымъ митрополі́тѡмъ, а҆рхїепⷭ҇копѡмъ и҆ є҆пⷭ҇копѡмъ правосла̑внымъ, вѣ́чнаѧ па́мѧть.
Ли́къ: Вѣ́чнаѧ па́мѧть, три́жды.
Пострада́вшымъ и҆ ᲂу҆бїє́ннымъ въ разли́чныхъ похо́дѣхъ за правосла́внꙋю вѣ́рꙋ и҆ ѻ҆те́чество вождє́мъ и҆ во́инѡмъ, и҆ всѣ̑мъ правосла̑внымъ хрⷭ҇тїа́нѡмъ, въ и҆́стиннѣй вѣ́рѣ и҆ бл҃гоче́стїи и҆ въ наде́жди воскресе́нїѧ сконча́вшымсѧ, вѣ́чнаѧ па́мѧть.
Ли́къ: Вѣ́чнаѧ па́мѧть, три́жды.
Правосла́внаѧ хрⷭ҇то́ва цр҃ковь, торже́ственнѡ воспомина́ющи подвиза́вшихсѧ во бл҃гоче́стїи, и҆ сїѐ всѣ̑мъ свои̑мъ хрⷭ҇тоимени̑тымъ ча́дѡмъ къ подража́нїю представлѧ́ющи, восхвалѧ́етъ по́двиги и҆ си́хъ, и҆́же ны́нѣ сп҃си́тельною вѣ́рою и҆ добродѣ́телїю приꙋготовлѧ́юще себѐ къ вѣ́чномꙋ бл҃же́нствꙋ, ᲂу҆твержда́ютъ правосла́вїе.
Вели́комꙋ господи́нꙋ и҆ ѻ҆тцꙋ̀ на́шемꙋ и҆́мⷬ҇къ, ст҃ѣ́йшемꙋ патрїа́рхꙋ моско́вскомꙋ и҆ всеѧ̀ рꙋсѝ, мнѡ́гаѧ лѣ̑та.
Ли́къ: Мнѡ́гаѧ лѣ̑та, три́жды.
Свѧтѣ́йшымъ правосла̑внымъ патрїа́рхѡмъ кѡнстантїнопо́льскомꙋ, а҆леѯандрі́йскомꙋ, а҆нтїохі́йскомꙋ, і҆ерꙋсали́мскомꙋ и҆ про́чымъ свѧтѣ́йшымъ правосла̑внымъ предстоѧ́телємъ, мнѡ́гаѧ лѣ̑та.
Ли́къ: Мнѡ́гаѧ лѣ̑та, три́жды.
Господи́нꙋ на́шемꙋ высокопреѡсщ҃е́ннѣйшемꙋ [и҆лѝ преѡсщ҃е́ннѣйшемꙋ] и҆́мⷬ҇къ, митрополі́тꙋ [и҆лѝ а҆рхїепⷭ҇кпꙋ, и҆лѝ є҆пⷭ҇кпꙋ є҆гѡ́же є҆́сть ѡ҆́бласть], мнѡ́гаѧ лѣ̑та.
Ли́къ: Мнѡ́гаѧ лѣ̑та, три́жды.
Преѡсщ҃є́ннымъ правосла̑внымъ митрополі́тѡмъ, а҆рхїепⷭ҇копѡмъ и҆ є҆пⷭ҇копѡмъ, и҆ всемꙋ̀ ѡ҆сщ҃е́нномꙋ собо́рꙋ, мнѡ́гаѧ лѣ̑та.
Ли́къ: Мнѡ́гаѧ лѣ̑та, три́жды.
Бг҃охрани́мѣй странѣ̀ на́шей, власте́мъ и҆ во́инствꙋ є҆ѧ̀, мнѡ́гаѧ лѣ̑та.
Ли́къ: Мнѡ́гаѧ лѣ̑та, три́жды.
Всѣ̑мъ правосла̑внымъ хрⷭ҇тїа́нѡмъ, пра́вѡ содержа́щымъ сп҃си́тельнꙋю вѣ́рꙋ и҆ повинꙋ́ющымсѧ хрⷭ҇то́вой цр҃кви, пода́ждь, гдⷭ҇и, ми́ръ, бл҃годе́нствїе, и҆з̾ѻби́лїе плодѡ́въ земны́хъ, и҆ мнѡ́гаѧ лѣ̑та.
Ли́къ: Мнѡ́гаѧ лѣ̑та, три́жды.
Ст҃а́ѧ трⷪ҇це, си́хъ просла́ви и҆ ᲂу҆твердѝ да́же до конца̀ въ правовѣ́рїи: ѿвраща́ющыѧ же сѧ ст҃ы́ѧ и҆ сп҃си́тельныѧ правосла́вныѧ вѣ́ры и҆ хрⷭ҇то́вы цр҃кве ѡ҆братѝ, и҆ сотворѝ, да всѝ прїи́дꙋтъ въ позна́нїе вѣ́чныѧ твоеѧ̀ и҆́стины, мл҃твами прест҃ы́ѧ влⷣцы на́шеѧ бцⷣы и҆ приснодв҃ы мр҃і́и, и҆ всѣ́хъ ст҃ы́хъ.
Ли́къ: А҆ми́нь.
И҆ по моли́твѣ се́й, а҆́бїе і҆ере́й глаго́летъ: Сла́ва тебѣ̀ бг҃ꙋ, бл҃года́телю на́шемꙋ, во вѣ́ки вѣкѡ́въ.
Ли́къ: А҆ми́нь.
И҆ пою́тъ пѣ́снь ст҃а́гѡ а҆мвро́сїа: во вре́мѧ же пѣ́нїѧ тоѧ̀ ве́сь ѡ҆сщ҃е́нный собо́ръ цѣлꙋ́ютъ ст҃ы̑ѧ і҆кѡ̑ны на а҆нало́гїахъ.
є҆пⷭ҇кпа медїола́нскагѡ:
Тебѐ бг҃а хва́лимъ, тебѐ гдⷭ҇а и҆сповѣ́дꙋемъ, тебѐ превѣ́чнаго ѻ҆ц҃а̀ всѧ̀ землѧ̀ велича́етъ: тебѣ̀ всѝ а҆́гг҃ли, тебѣ̀ нб҃са̀ и҆ всѧ̑ си̑лы, тебѣ̀ херꙋві́ми и҆ серафі́ми непреста́нными гла́сы взыва́ютъ: ст҃ъ, ст҃ъ, ст҃ъ гдⷭ҇ь бг҃ъ саваѡ́ѳъ, пѡ́лны сꙋ́ть нб҃са̀ и҆ землѧ̀ вели́чества сла́вы твоеѧ̀. Тебѐ пресла́вный а҆пⷭ҇льскїй ли́къ, тебѐ прⷪ҇ро́ческое хвале́бное число̀, тебѐ хва́литъ пресвѣ́тлое мч҃ническое во́инство: тебѐ по все́й вселе́ннѣй и҆сповѣ́дꙋетъ ст҃а́ѧ цр҃ковь, ѻ҆ц҃а̀ непостижи́магѡ вели́чества, покланѧ́емаго твоего̀ и҆́стиннаго и҆ є҆диноро́днаго сн҃а, и҆ ст҃а́го ᲂу҆тѣ́шителѧ дх҃а. Ты̀ цр҃ю̀ сла́вы, хрⷭ҇тѐ, ты̀ ѻ҆ц҃а̀ прⷭ҇носꙋ́щный сн҃ъ є҆сѝ: ты̀ ко и҆збавле́нїю прїе́млѧ человѣ́ка, не возгнꙋша́лсѧ є҆сѝ дв҃и́ческагѡ чре́ва: ты̀ ѡ҆долѣ́въ сме́рти жа́ло, ѿве́рзлъ є҆сѝ вѣ́рꙋющымъ црⷭ҇тво нбⷭ҇ное. Ты̀ ѡ҆деснꙋ́ю бг҃а сѣди́ши во сла́вѣ ѻ҆́ч҃ей, сꙋдїѧ̀ прїитѝ вѣ́ришисѧ. Тебѐ ᲂу҆̀бо про́симъ: помозѝ рабѡ́мъ твои̑мъ, и҆̀хже чⷭ҇тно́ю кро́вїю и҆скꙋпи́лъ є҆сѝ: сподо́би со ст҃ы́ми твои́ми въ вѣ́чной сла́вѣ твое́й ца́рствовати. Сп҃сѝ лю́ди твоѧ̑, гдⷭ҇и, и҆ блгⷭ҇вѝ достоѧ́нїе твоѐ, и҆спра́ви ѧ҆̀, и҆ вознесѝ и҆̀хъ во вѣ́ки: во всѧ̑ дни̑ блгⷭ҇ви́мъ тебѐ, и҆ восхва́лимъ и҆́мѧ твоѐ во вѣ́къ, и҆ во вѣ́къ вѣ́ка. Сподо́би гдⷭ҇и, въ де́нь се́й без̾ грѣха̀ сохрани́тисѧ на́мъ: поми́лꙋй на́съ гдⷭ҇и, поми́лꙋй на́съ: бꙋ́ди млⷭ҇ть твоѧ̀, гдⷭ҇и, на на́съ, ꙗ҆́коже ᲂу҆пова́хомъ на тѧ̀. На тѧ̀ гдⷭ҇и, ᲂу҆пова́хомъ, да не постыди́мсѧ во вѣ́ки. А҆ми́нь.
Дїа́конъ: Премꙋ́дрость.
Сщ҃е́нникъ: Прест҃а́ѧ бцⷣе, сп҃сѝ на́съ.
Ли́къ: Чтⷭ҇нѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.
Сщ҃е́нникъ: Сла́ва тебѣ̀, хрⷭ҇тѐ бж҃е, ᲂу҆пова́нїе на́ше, сла́ва тебѣ̀.
Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.
Предстоѧ́тель: Хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, и҆ всѣ́хъ ст҃ы́хъ, поми́лꙋетъ и҆ сп҃се́тъ на́съ, ꙗ҆́кѡ бл҃гъ и҆ чл҃вѣколю́бецъ.
Ли́къ: А҆ми́нь. Гдⷭ҇и поми́лꙋй, три́жды.
На трапе́зѣ же ꙗ҆ди́мъ варе́нїе со є҆ле́емъ, а҆ не ры̑бы. А҆́ще же прилꙋчи́тсѧ, пїе́мъ вїно̀, ᲂу҆ста́вленное въ сла́вꙋ бж҃їю, по двѣ̀ ча́ши: Та́кожде и҆ въ ве́черъ по двѣ̀.
 This is a translation and has a separate copyright status from the original text. The license for the translation applies to this edition only.
| ||||
| Original: |
| |||
| Translation: |
| |||
