Тима Веньлы письмӧ (1919)
Вениамин Тимофеевич!
Народнӧй образование отдел пуктіс менӧ учительӧ Ваполкаӧ январь 22 лунсянь. Прошение ме эг сетлы, а сідз пуктӧмаӧсь. Ӧткажитчыны абу лӧсьыд да и мечтаыс менам век вӧлі лоны учительӧн, и ме сӧгласитчи, кӧть эськӧ образование абу йӧзлӧн моз. Ме думайта сэні велӧдчыны прӧст пӧраас и, гашкӧ, сэсся лоа век кежлӧ учитель, кута велӧдны коми йӧзӧс. Тэ менсьым думӧс тӧдан — ӧтвылысь кутам быдтыны коми пиянысь коми войтырӧс. Эмӧсь на велӧдысьяс, кодъяс лёкысь видзӧдӧны комиӧн велӧдӧм йылысь ӧнія индӧдъяс вылӧ. Ми сідз огӧ кутӧй видзӧдны, кутам збыльысь велӧдны комиӧн.
Гиж, кыдзи олан, кыдзи велӧдан. Тэ ӧд опытнӧй и меным колӧ тэнсьыд велӧдчыны, мед эськӧ и менам делӧыс мунас водзӧ. Тэ, пӧжалуйста, ысты меным книгаяс. Эм тай тіян «Самообразование», позьӧ кӧ — ысты, ме эськӧ велӧдчышті.
Комиӧн гижа выль пасьясӧн первойысь, и вочаасьӧ ӧшыбкаяс, но регыд велала.
Менам жалӧванньӧ ӧні вӧлі 750 шайт, воӧ быд тӧлысь джынйӧ. Удж кокни. Ме сӧгласитчи пуксьыны учительӧ сы понда, мый Ионаыд письмӧас меным гижӧма, он жӧ пӧ ӧд ӧткажитчы, меным пӧ оз ло лӧсьыд, сэсся меным окота учителяс овны, ловъя йӧзыскӧд уджавны, а не немӧй бумагаясӧн ноксьыны. Сӧмын ог тӧд, сямӧй лоӧ оз, каитчыны лоӧ оз.
Ваполкаӧ кӧсъя лэччыны аски, аскомыссянь заводитны велӧдны. Ог тӧд, кыдз кутас мунны менам велӧдӧмыс, оз жӧ ӧд бӧр коллявны.
Уна гижны некор. Поклон став помӧсдінсалы.
Февраль 1 лун, Н. Шахов.
1919 во.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). The author died in 1942, so this work is also in the public domain in other countries and areas where the copyright term is the author's life plus 81 years or less (if applicable), or the copyright term is 104 years or less since publication (if applicable). |
|