Тесэ ды тосо (2013)/4
[23]
| * * * |
| Нилеце сёрмась |
Тоначив, Шкань а содыця таркав, Лемаень Виянанень
Валдо, сэтьме онт теть, Вияна!
Чинь ютазь, Вияна, ульнинь эйстэть васоло. Пиже, ламо
вайгельсэ рангиця покш ошсо.
Пурнавинек ламонек. Цёрат ды тейтерть. Эрьва ёндо.
Рузт, эрзят, мокшот... Ульнесть ютксонок кавто кореецт ды натой грекень тейтерь, кирдевсь превсэнь лемезэяк — Галя Ксандопуло. Макссть тенек чувтонь покш кудосо лембе-[24]валдо нупаль. Эряк! Кецнек, каст превсэ, тевсэ да мельсэ!
Чинь-кавтонь ютазь кундынек, ожань илештязь, содамочитнень, кода кортыть, пореме. Мезе те истямось, содави: книгат, тетрадть, библиотекат, аудиторият, лекцият, лабораторият, экскурсият, штапо коня, превейдеяк превей профессорт... Мартост, эйсэст-ютксост — валскестэ чокшнес. Мукшновсь шка молемс кинов, кунсоломс концерт, ваномс спектакля.
Тонавтнемань тевтнесэ пивтезь, ютасть кавто ковдо ламо. Марявсть тень кавто ды пель иекс. Аноколинь ношкстамс тов, косто сынь, мезе лангскак апак вано: чить, веть, пиземе алга, леень-пандонь трокс; а неявикс потмовий тердсь ды усксь эйсэнь чачома велев. Ансяк варштамс, куш ве сельмсэ, сельмепонань пачк варштамс сэняждыця домка сельмезэть, марямс киньгак ёнов а молиця вайгелеть. Свал, свал — неть аволь мазый валт — якить мартон, ков илязан моле, теке сулеем.
...Сыргозинь. Панжинь сельмень. Штавтыя вельксэнть. Маряса: студент ялган мезде-бути пеедькшнить, ледстнить... тонь леметь. «Эрьга. цёра. ёвтыка, кие те Виянась? — пшкадсь тень вейкесь. — Сыргоземазот, натой ветькак, кельпрясотоль те лемесь. Кие те, видькстат?» «Виде-виде! — каясь трокс вал омбоцесь. — Монгак мария, Валдай: удомань пачк кортнить-ремедить та-кодамо Вияна марто. Мазы-ый лемесь... Те кие истямось, алкукскак?»
Мельспародонть ансяк мизолдынь.
Те аламоль. Кармасть лангсон згилямо. Мик Виянокс лемдекшнимизь тонавтнемань курссонтькак! Марят? «Виян, мартонок молят? Виян. адя тейтертненень инжекс! Адя, адя, содавиксэкс теевтяно», — пшкалесть тень ялган. Кемат, цяк эзь полавтово лемем тонь лемсэ. «Виян, Виян!» — сеересть мельган. «А покордават, — весть кевкстимим эсенек ёнксонь эрзясь, Верьгай ялгам, — истя лемдемат кис?»
Каршо муст-муст мизолдынь.
Кодат покордавомат! Мекевланг! Аноколинь кунсоломс истят згилямотнень-мусколямотнень куш зярдо, куш кинь [25] кургсто иляст лисе — ансяк марямс леметь. Сон ульнесь тень прок вечкемадо моро.
Уш кавто ковдо ламо минь тонь марто ульнинек башка-башка. Теке марто — вейсэ. Свал ульнить вакссон, свал потсон. Чопоньпелев молян книган-тетрадень марто библиотекав, ловномань залов эли валске чоподава тонавтнеме — тонгак мартон. Кунсолан аудиториясо тонавтыцянть — вайгелесь кайсети тонь. Ялган чокшнеланга сыргить танцовамо таркав, мон саян книга ды нерьгстаса судом эйзэнзэ. Монень тосо, ков пурныть цёратне, тонтеметь теемс а мезе. Вальст, краковякт, фокстротт, мизолдыця турват... Арась, арась! Сынь монь а тердить. Косо тон арасят, монгак арасян.
Учинь Масторсонок сёксень весемеде покш кенярксчинть самонзо, учинь сонзэ чачома ёнов нокиця-бажиця нармунекс. Сакшнось тень мель: мекс Пазось эзимим тее ливтницякс? Келемтевлинь сёлмон, ливтязь ливтявлинь тонь ёнов ды валговлинь кузтемпенк икелев.
Тешкстылия эрьва ютазь чинть. Эрязкавтынь сынст. Тостяинь.
Сась, окойники сась те шкаськак!
Сась «якстере» чись. Ансяк кудов... эзимизь нолда. Келя, эрьванень улема демонстрациясо. А молят — вант, кадоват стипендиявтомо. Сестэ, ведьгеменце иетнестэ, койтне Истятольть. Ульть! Кирдть кодамояк «вождень» портрет эли лозунг: «В 1990 году будем жить при коммунизме». Куш кулок — ульть! «Мезе теемс? Кода улемс?» — чавсь пряпотсон вересь. «А! Мезе ули, се кадык ули!» — ахолдынь кедьсэ, чачк керинь кавтолдоман. Истя кисэть тошнакадокшнынь, эзинь вано мезеяк лангс. Капшазь пурныя кансткем ды Ине Ноябрянь 7-це чинть каршо, сундерьгадозь, ношкстынь кшнинь кинь вокзалов.
Вокзалось пешксе, озамо тарка сеске а муят. Учомс тесэ пассажирэнь поездэнть пелеведе мейлес? Те а тев. Знярс лужалемс те коткудавонь пизэсэнть? Мезень парось — ёмавтнемс шканть? Теяк: зепень варявт, билетэнь рамамс чондан а сатыть. Мезе теемс? Арсинь-теинь ды салава-салава озынь минек ёнов «чииця» товаронь усксицяс.
[26] ...Сёксень чопода талай чокшне. Вагононь тамбур. Эрьва ёндо ноцори эйсэнь, пачкан яки ардомадонть седеяк виевекс теевиця вармась. «Ко-о-ов тон, пайстомо ломань, сыргить вензэ лангс, мезеть ёмавтык, кинь вешнят?» — вешкезь кевкстни, кевкстни-тандавтни эйсэнь сон. Стяко, стяко ловсь монь пиштякакс олячинь вечкицясь. Мондень уцяскав сестэ, се чопода-начко чокшнестэнть-вестэнть, кияк арасель, мон ардынь вечкемам марто вастовомо, капшинь тов, ков тердсь седеем.
Ба-ба-бах, ба-ба-бах... — пурьгинекс зэрнить пильгень ало жой вайгель кшнинь чаротне. Лиясто маряви тень, онгить вейкест-вейкест лангс кшнинь пей, кудонь покшолмасо пинеть. Ба-ба-бах, ба-ба-бах...
Вый-вы-ый... — совси шкань-шкань онгомаст юткс эрьва ков эциця варманть кинь-бути лангс пеняцямозо.
Чаротне ловсть вайгельпетнень. Киртясть тонь ды монь явиця ютконть. Талныця оймем учось кенярксонь алтниця шканть. Чаротне чиезь чийсть, шкась вана эзь капша ды кодаяк эзь капшавтово.
Та-кодамо станциясо поездэнть аштемстэ чоподасонть каятотсть цёрань вайгельть ды «купезэнь» кузсть кавто алюхат. Оршазь сёксекс. Лангсост раужо, усксевезь-ёзазь пальтот. Прясост картузт. Шказо, марявсь, ульнесь пелеведе мейлень. Дюм ве. Зярс «лишменек» эзь сырга, «инжень» цяхазь-згилязь, верьга вайгельть ёвтнесть кодамо-бути Серойде, мартонзо лоподемазост симезь, чартьчист коряс, парсте ютавтозь чокшнеденть. Копордазельть сатышкасто. Вейкесь, седе алкинесь, марявсь, седе одоль. Ялгазо, муюконь кандтниесь, кортась-ёвтнесь, теке чиньжарамот чулгсесь. Лодор-лодор певерсть кургстонзо визькс валтнэ. Мон кукшкадынь вагононь стенанть ёжос. Марицякскак эзинь тейне.
Чаротне кеверить зэрнезь. Ардтано. Ардыть мартонок, а кадовить эль пургсиця пизементь марто чоподаськак.
Апак учо муюк мартось велявтсь монь ёнов.
— Ку...курево есть? — кевкстимим чаронь зэртенть пачк. Келезэ понгонесь, чамазон эшксь нулгодькс чине.
— Куда едешь? — каятотсь чоподасонть корсяня вайгелезэ.
— Домой, — путынь мель а невтемс талномам-пелемам. Кирдинь превсэнь: илязо лисе истятнэнь пельде а паро тев.
— Деньги есть? — варманть выжнэманзо изнязь, седе марявиксстэ ёвтынзе валонзо муюк мартось. Эскельдясь ды стясь каршон. Лексесь, укснозеват, ченькс чинесэ.
— Если бы были, на площадке товарняка не ехал бы, — сэтьместэ, вайгелень апак кепсе меринь каршо.
— Что-что? За такие разговорчики я тя... на рельсы, — кижнэзевсь кевкстницям, чочимим ангоря кедьсэнзэ сиведе. — Ты знаешь, с кем едешь?! Знаешь, кто я?!
Алкинесь эскельдясь ёнонок, кундась лавтовзонзо, вийсэ лутынзе мештестэнь кедензэ ды мерсь пеень пачк, теке гуй вешкезевсь:
— Колян, ты чё, снова на мокрень? Оставь. Брось. Ну яво!
— А чё он? А чё он? — мотордсь тона, эль чарькодевсть валонзо, ялганзо каршо.
Тандавтницям кадымим. Чарькодинь, кодат «ялгат» эйзэнь эртевсть, кие марто ардан. Апак арсе ве вал, ды, секень вант, кадоволь эйстэнь начко тарка, улевлинь, Вияна, косат ней тон. Тынк кузтемпесэ аволинек вастово. Тоначис пачкодевлинь тондеть икеле. Мезе истятнэнень ломанень оймесь? Кода карвонь...
Сорнозевинь. Эзь содаво, мезде седе пек: якшамо, летьке, пачкан якиця-эзэльдиця, лангозон пачакс кайсевиця вармадонть эли... Улевлиньгак олясо, мода лангсо, ломань ютксо, тевесь, содазь, лия улевель. Ней вана, веть вагононь тамбурсо увнозь ардомсто... кортамскак а мезть. Шолодтядызь зэрниця вагонтнэнь юткс — «вай» рангстамояк а кенерят.
Шкась мольсь.
Цярнозь кеверсть кияксонть ало чаротне, вешксь пилесэнь вармась, чарасть-велясть прясон арсематне. «Мезень [28] чумом, истя майсян? Кинь кинзэ трокс стинь? Улевельтькак трёшникень, ардовлинь, кода лиятне, лембе-валдо таркасо, улевлинь ломанекс, аволинь тарно, кодаткак алюхат эйзэнь авольть педсе. Истя, кеман, улевельгак, аволизь саеяк тетянь оймензэ кодамо-бути а содавикс «Ине Масторонть» кис. Кадовкшнынек авань кедь лангс ветенек, кавтотне седе покшт, колмотне — ципакат. Кодат ярмакт... Мезеяк ней а теят. Уцяскам, лисни, истямо. Лиякстомтомс сонзэ, витемс эсень коряс, седе вадрялгавтомс сави оно кодамо питнесэ.
Иля пеле.
Иля пеле.
Иля пеле. Прок кармавтсть монь кемеме, вийсэ пештясть оймем рельсатнень ланга эрязасто чииця чаротне. Сынь аламонь-аламонь оймавтымизьгак. Сынь ёжос.
...Пелекинь ютазь, уш ашолгадома малава, ве станциясо кувать аштемстэ, кадыя «купейной» товарняком ды салава-салава, манчезь эцинь ломанде тыц пешксе вагонс. Кода тозонь совавинь, мельсэнь педе-пес эзь кирдеве. Азё совак ней! Ярмактнеяк а лездыть. Кода илязо уле — лембе таркасолинь. Эрямось, эрявиндеряй, эрьва козонь совавттанзат.
Судос эцесь ливезень ды махоркань чине. Кемгавтовошка иесэ пшти вайгель цёрыне сеересь тетянстэнь, вешсь мезе-бути. Шалт, кортамот, эйкакшонь ильсезь лайшема. Весемеде пек тень эзь вечкеве таргамонь качамось. Корсяня чинезэ эцесь кирьгапарьс. Мекс а кардыть?! «Вадря-берянь, качамо-аволь — вагонсат, аволь кузтемпесат, вармась эйсэть ниле ёндо а човси», — кецнинь полавтовксонтень.
Васня мерькавинь, теке сенксь, пильгень полавтнезь, стядо. Шкань ютазь муевсь таркинеяк. Озынь. Знярс стядо аштемадо мейле мария — сизинь. Перькан ломантне, кецнинь, эрзяльть. Ардсть, пеедькшнезь ёвтызь аватне, свадьбав. Вейкесь цёратнеде седясь гармониясо, ды седясь, мерема, а беряньстэ. Кавто ават, вейкесь чова вайгельсэ, омбоцесь — эчке, серьгедсть, кецневтимизь, нурька [29] морынеть. Пелькстасть, кие серьгеди седе пшти, седейс токиця-пачкодиця валт. Окойники энгамсть. Седицясь, пиже сельме валдо черь од цёрась, каинзе лавтовонзо лангсто каркстнэнь ды путызе инструментэнзэ ваксозонзо. Морыцянзо, невак вейке ава ды допрок од цёра, арсесть-тейсть эсь ютковаст ды серьгедсть эрзянь лужаня моро:
Вай, пиже садсо, |
Морасть мазыйстэ, лийканя вайгелест эзть кельге пешксе вагононтень. Мерят таргсесть-ветясть мелодиянть аволь ниленест — хор. Вагонсонть шалтось, башка сеерематне лепиясть.
Вай, аволь куко, |
Прядовсь те морось, ушодсть лия. Монгак салава ладсо, илязан кола лув, кой-кува вайгель полалинь.
Эрде, ялгат, паро ялгат, |
Тевень чиезь чиить, теке ёвкссо — жойсэ. Лембе, валдо; вальмаванть неяви, кода кивчк-кивчк кадовить удалов новолезь уське марто телеграфонь палмантне, лопавтомо чувтотне, куракштне... Моротнень кунсолозь, стувтыя тамбурсо кельме вармадонть аволь умонь сорномамгак. Паро!
Апак учо ялткекс ютасть вагононть кувалт вайгельть: «Ванныця, ванныця, билетт анокстадо!». Те пшти кулядонть седеем тарск мерсь. Вай, Чипаз! Мезе ней теемс? А? Козонь кекшемс? Кундасамизь, атят-сэрдят...
[30] Уцорсо, теке колыця псака, кузинь весемеде верев, колмоце — паро, чаволь! — эземнентень. Венеминь. Прям теия иредьстэкс. Вана косо маштовсь бажамом улемс артистэкс! Маряса: ванныцясь пачкодсь минек видьс. Морось лепиясь. Чатьмонезь, цянк-цянк тешкстынзе свадьбав ардыцятнень билетэст. Пачкодсь, редимим, моньс. Венстизе кедензэ ды ноцковтымим ожапеде. Мон каршонзо эрзякс, иредьстэнь вайгельсэ мендердинь мезть понгсть. Ноцковтымим таго, мон таго текекс: «Ма-у-у, глмн...». Чарькодть азё!
— Этот ваш, что ли? — каятотсь мучкиця цёранть вайгелезэ.
— Наш, наш, — сисем вайгельсэ кецневтимизь эрзя ялган.
— Ну и чёрт с ним, — оймавтымим валсонзо, машнетезь тусь седе тов ревизорось.
Монень, «нумолонтень», те «чёртось» эрявськак. Течи покшчи, ломантне ардыть ков-бути тейтерень чиявтомо, мон мартост. Мекс, алкукскак, а улемс тень симезекс? Течи Ине революциянь чи. Мекс а копордамс?
«Иредьстэкс», вере эземсэнь, теке цянав, куроксто пачкодинь содавикс станциянтень.
Колоньгемень вайгельпеть рудазонть ичезь, чикуншкадо мейле окойники пачкодинь чачома велезэнь. Орданьбуем прок учось эйсэнь. Кувака кись кадовсь удалов. Паро, зярс эскелинь, уйсть велькскан коське пельть. Сундерьков, эрьва мезть учок пельдензэ...
Курок уш кудосолинь. Авам каванясь эйсэнь каштомсто таргазь пси, тантейстэ качадыця сывель ямсо. Чапамо ловсо марто панжакайтнеде, кода мерить Орданьбуесэ модарькань прякатнеде, кортамс а мезть, келеть нильсак! Вейксэ иеть, кода прядовкшность чивалгома ёнксонь верев ацирьгалематне, аволь уш пек ламо, ялатеке ней ульнесь мезе путомс стуворонть лангс, мейсэ таньшкавтомс кургонть.
Валдочинь арсезь, Валдай.
Эрицянь Мастор,
1999-це иень якшамковонь 15-це чи.