Тесэ ды тосо (2013)/23
[178]
| * * * |
| Комськолмовоце сёрмась |
Менелень Масторов,
икелень Модалангонь эрицянтень
Лемаень Виянанень
Сэтьме чить теть, Вияна, Менелень Масторсо!
Весе, дугинем, мода, пижине луга ланга якицянь сёрман сёрмалевсть. Течи вана сёрмадан васенцеде... — вант, иля тандадо! — Тоначистэ. Се ёнксстонть, косо менелень таркас чопода тюс кевень потолок, косо свал сундерькс чопода, косо эри а куш а кашось, косо... А карман седе тов, тон эсь шкастонзо те Мастордонть ёвтнить аволь аламо. Содасак мондень парсте. Мон Модалангонь тевень-мелявксон, кудом-чим, виртнень-паксятнень кадынь килейтнень-укштортнэнь сыреждема шкастост. Инешкипазось топавтызе мелем: саимим, ялгинем, вечкевикс ковстон, ожоковонь васень пельксстэнть, читнестэ, зярдо лов алов видезь товсюротне-розтне кецневтить сельметь цитниця ванькс изумрудонь тюссост, зярдо пельтнень потсто апак учо лисиця чипаесь паласынзе валдосонзо ды сынь седеяк кенярдовтыть ойме мазычисэст. Конинь сельмень, лоткась, прядынзе тевензэ сиземань а содыця седеем 2012-це иень ожоковонь — малав кода кортазель — 12-це чистэ. Редик? Ловт, ковонь ютазь чачома-кулома шкадот мейле.
Мезе тей, Модаалксонь Масторонтень, пачтимим, кодамо орма — монськак а содан. Эйстэст пурнавкшность кавто пешксе зепеть. Ловомс — келеть каназкады. Содави, кавксоньгементнень малава сынь эрьвань таштавить. Иесэ сюпавтнень некеть сюпавчист. Моньгак теке.
Майсевинь эрямом перть тонь коряс седе аламо. Секс Кулава макссь тень аволь шождыне, кода тонь, кулома. Ялатеке кувать эзинь ченярдо. Сэредькстнэ эйсэнь пек эзть разде. Кеменьшка чить ацамот мерькинь. Оймем нельгизе тевелявонь-бронхань орманть вельде. Лексемс ульнесь а мейсэ, кулынь коштонь асатыкстэ. Мейле уловом нолдызь [179] модас ды пиксэнь кувака кузтемаванть оймем валгсь Тоначинь Масторс. Кода ильтимизь, зяро кандолазон мельга молицят ульнесть, мезть кортасть марамодон, модасо копачамодон мейле — теде уш монень а ёвтнемс. Калмамонь мелявкстнэнь сайнизь эсест лангс тейтерень. Сюкпря тенст. Монень маряви, ильтемень сакшнось Мазаваяк. Кандолазон мельга мольсть кавонест, Нуя марто вейсэ.
Куломадо икеле сёрмадокшнынь кармавтома: калмамс монь эрзянь кезэрень койтнень лувсо. Сакалов «тетятнень» чинесткак уловом ваксс илязо пачкоде. Сыцянть кундаса, венстьса кандолазтнэстэ кедем, сакалодо. Лазонь од кудынем улезэ аравтозь кода покштян тейнесть: прясь — пелеве, пильгетне — чикуншка ёнов. Кодамояк крёст калмом лангсо илязо уле! А тумонь, а кшнинь. Ансяк истя. Тарказонзо путост кшнистэ теезь кудынень кондямо — истя мерекшнесь калмсемс эрзятнень Инешкипазось. Сонзэ теевтекшния Тоначив туемадон икеле. Покштянь покштяст кемсть: тесэ, Тоначисэ, кулыцясь поладсы модалангонь эрямонзо.
Оно невак мезе!
Кандолазтнэсэ чамам каршо кармавтокшнынь путомс сёрмадозтнестэ кодамояк вейке книгам. Наксадомадо седе нардевстэ тапардама сонзэ келькшсэ эли мейсэяк лиясо. Кода кезэрень шкатнестэ, кадык путсамизь кандолазтнэс вить ёнксом лангс. Чамам икеле, книгадонть башка, улест путозь каша чакшке, кшнинь пенч, пеель, цёканьзюро, сёрмадомапель.
Кармавтомам топавтызь. Ялган, васняяк. Кецневтимизь. Сюкпря. Улевлиньгак эрий, сюконявлинь тенст модас. Поптне, поптне — оймень сайницятне — арасельть. Пек паро! Мокныця нулгодькс вайгелест эзть кайсете, эзть лымбакстне уловом велькссэ. Эзть сакшно. Кулозьгак марявлинь! Арасельть — те кецневти. Калмонь маронть лангс, кода мерекшнинь сёрмасон, крёстонь таркас, пачкодсь куля, путызь теевтезь кудыненть. Латынензэ ланга тешкстазь буень ды эсень лемем — Учаень Валдай, чачома-кулома чинь — 1934.03.30 — 2012.10.12. «Раб божиенть» таркас ве вал — ЭРЗЯ.
[180] Весенень, весенень сюкпря.
Кулозень Масторсо эрямодонть тон, килей рунго Вияна, сёрмалить. Ды сёрмалить зярыяксть. Сонзэ «сюпавчидензэ» кортамо а карман. Некетнеде а мезть томбамс. Ней аравтозь Шкам сэняжа сувнекс ютавтома тесэ, мейле, модалангонь ловомасо ловозь, кемгавксово — комсь иень ютазь, сайсамизь, кеман, Менелень Масторов, тов, косат ней тон, Вияна, умонь-умонь вечкемам. Сы шка, ды минь, сэнь сувнеть, окойники вастовтано.
Видельть валот. Кодаткак адт-райть тесэ эзинь нее. Куш бажинь неемс. Гурныця толпандят, косо реставольть пежеть потсотне, икелень эзть понгоне. Кенярксокс тень ульнесь: тесэ, Тоначисэ, а содыть кенгелема, кежень кирдема ды кежень пандома, эзть марсеяк сельмень сявадомадонть. Вейкест-вейкест лангс ойминетне а пижнить, мокшнат а сюворить. Кирьгапарь, арсемскак а мезть, а начтнить. Секс тесэ истямо уряд, сэтьмечи, мелень ванома...
Вастневинь тесэнь Азораванть марто. Кулава вастымим парсте. Вейкенек-вейкенек чарькодинек валтомо. Те аволь кода икелень эрямосон. Пелькапряшка начальник — аштить кенкшензэ икеле, кенжеть артыть-ваднить, кавто секретаршат. А кенерят эскелькс тееме, лоткавттадызь. «А мереви, тевензэ ламо!» — кецневттянзат эйстэст вейкесь. Теде башка, кенкшенть удало нувси келей лавтов, прясто пильгс раужосо оршазь ванстыця. Тесэ тевтне яксевтевить лиякс — эрязасто, тевень содазь, мелень ванозь... Допрок лиякс.
Вастомазонок, Вияна, умонь шкань балягинем, тонь сэнь Масторсо.
Тоначи,
вастовомадо арсиця Учаень Валдай.