Тесэ ды тосо (2013)/20
[141]
| * * * |
| Комсеце сёрмась |
Тоначив, Тосонь эрицянтень Лемаень Виянанень, свал вечкицям туртов
Паро мельть-арсемат, апак прядо мором! ...Зярдо-бути, ламо-ламо иеде икеле, чачома велензэ киява-янга тундосто сёксес кепе чийнесь ашо пря цёрыне. Лангсонзо коцтонь панарнэ, кумажа видьга гармониякс сормсевезь каргоць понкскеть. Мельсэнзэ кирдсь — кундамс сыреждиця пуло нармуненть. Онстонзояк а весть некшнизе. Сельмензэ икельга ливтнесь, а вана кундамс... Шожда меремс... Секс лиякскак арсесь: а понгиндеряй, ноцковтомс мазый пулостонзо куш вейке сырнекс цитниця толгине. Пансесь цёрынесь уцяскань кандыця нармуненть мельга веледензэ аволь васоло тумонь вирьганть. Чоподасто чоподас ёмсесь тосо. Бажась муемс тарканть, конадо кияк а соды ды козонь валгони симеме кувака пулось.
Мель, вийть путсь цёрынесь аволь аламо. Мелявксонзо стяко эзть ёма — толга, кода а стакаль, таргавсь тензэ!
[142] Истямокс дошуз пакшантень, вирьга-укшторга сиземань апак сода чийницянтень, ульнесь Книгась — сонзэ ёнкскетнень ланга певердезь мельтне-валтнэ, койтне, умонь эрямодонть, ломантнень обуцядост ёвтнематне. Панжовсь тензэ покш-келей, эрьва мейсэ — валдо мельсэ, валонь мазычисэ, кеняркссо, кежсэ... — сюпав мастор. Абунгавтнесть ловныцянть менельсэ, мода лангсо ды мода потсо эрямодонть ёвтнематне.
Се цёрынесь, Вияна, ульнесь — теть сёрмадыцясь.
Книгатневтеме, умонь вечкемам Вияна, лангозон саезь сталмось аволь кепедеве ды аволь кирдеве: мендявовлинь, кадововлинь карязтомо. Видькстан: сынтемест, книгань лопинетневтеме, пингем перть ютазь ким аволь ютаво, теезь тевень авольть тееве, перькан сравтневезь мазычись ютаволь вакска.
Кие, кодамо вий мунимим ды педявтымим книгань ёнкскетнес? Кинень мерема сюкпря — парсте а содан. Школась? Виде. Лездась. Мезеяк а мерян. Мельсэнь ванстовсть тонавтыцятне, сеть, кить редизь ловномас бажамом. Сюконян икелест. А чарькодеви лиясь: тонавтнинь аволь ськамон, мекс ансяк монь лангс прась те уцяскась? Ярсамопеленек, кудонок-чинек, трицянок... вейкетельть. Эйстэнек пелест — тетявтомольть. Войнась кедьстэнек нельгекшнинзе. Мекс эно явовинь? Мекс туинь допрок лия ёнов? Мекс лиятне, ялган, вансть книгатнень лангс оймевтеме, эзть маря потсост гайгиця вайгельтнень, кашторкстнэнь, пурьгинень зэрнематнень?.. Мекс эзть лово сонзэ, валонть, лексицякс?
Эно кие, бути а школась, ормалгавтымим книгань ормасо? Паряк, эйкакшпингестэ ёвтнезь-марязь ёвкстнэ? Содамкайтне-содамоёвкстнэ? Кода меремс... Евтницятнеде-кунсолыцятнеде сеть шкатнестэ ульнесь керькс. Тонсь содат, а радиот, а телевизорт сестэ арасельть. Минсь истямокс ульнинек. Мекс эно тонавтниця ялган вановтост эзть валго превде пешксе книгань ёнкскетнес?
Казненть, Вияна дугай, кода мон арсян ды кеман, казекшнизь тень чачомстон, казекшнизь, сюконян тенст, тетям [143] ды авам. Кода истя лиссь, сынськак эзть сода. Монгак а содан. Кияк а соды. Секскак кортыть: Пазонть пельде. Сюконямо тень, лисни, Инешкипазонтень? Паро! Невтят Пазонть лангс, пшкадят, зярдо мезе а содат, ды сеске весемесь ары тарказонзо. Истя-аволь, книгась свал тень ульнесь ялгакс, превень максыцякс, стака шкатнестэ, зярдо эрявсь, кемевикс нежекс. Сон эждсь эйсэнь эсь лембесэнзэ, паро валсонзо, эрьва ков сайнемасонзо. Эжди нейгак. Сон, монь ине вечкемам, зярдояк киньгак лангс эзимим полавтне. Монь койсэ, Вияна, домкасто, кувать, седе «сюпавсто» вечки се, кие вечксы книганть, ламо ловны ды ламо соды. Мон истя арсян.
Зярдо-бути «ЖЗЛ» книгатнестэ ловнокшнынь «замечательнойтнень», инетнень вечкемадост. Секс сыньгак истямо мельс. «Инесь», васняяк мерема, стякодо, мадезь аштезь киненьгак а максови. Сонзэ эряви «кастомс», путомс ламодояк ламо вийть, ламо псилгалемс. Кисэнзэ эряви пандомс. Ды пандомс аволь аламо, аволь вишкине питне. Видестэ ёвтазь. Марсить, кеман, лия валтнэдеяк, конатне умок теевсть валмеревксэкс: пайстомочись — превейчиде. Ёвтыцяст сынст ламонь ды ламодо содыця рузонь поэтэсь-дипломатось Грибоедов Александр. Ютась сынст чачомадо мейле кавто пингеде ламо. Абунгадат: кодамо домка смусть эри-кирдеви эйсэст! Кавто, ансяк кавто валсо ёвтави эрямонь покш-келей ёнкс. Видечинть, ламонь содамонть кис Перстнэнь Масторсо шкадо икеле саезельгак те ине ломаненть оймезэ. «Горе от ума» пьесанть авторозо вечкилизе Нина Чавчавадзе од нинзэ истямо нардев, седейсэ-превсэ сюпав, мазый вечкемасо, кодамоль сонсь поэтэсь.
Таштамс седе ламо содамочить, кепедевемс эрямосонть, седеяк — Эрзянь Масторсо, кона умоктояк умок нельгезь ды тапазь тюшумбар, седе верев — стакадояк стака. Эрьва сильдейнесь сень кис, мекс тон аламнеде седе сэреят ды седе васов неят, карми кежень пандомо. Вана истят койтне-ладтнэ тесэ, Эрицянь Масторсо.
Тонь марто вейсэ ванокшнынек клубсо «Велень тонавтыця» фильманть. Мельсэть? Стувтык, маряви. Умок, [144] пек умок те ульнесь. Кодгеменьшка иеть ютасть. Тельня, кирдевсь мельсэнь. Клубсонть ушодонть якшамоль. Кона ёндо улемс лембентень апак уштне? Мезде ёвтневсь «киносонть», превсэнь, арсемскак а мезть, эзь ванстово. Мелезэнь кадовсь вейке: ломанесь сась велентень ды васенцеде совась школань классонтень од, мазый, кавшаня валдо черь тейтернекс, лиссь, прядови фильмась, — сыре-сыре, сормсезь-пуворязь чама ды шержей, сиякс цитниця пря сырькаекс. Истя часто ламо шкань перть ютась икельганок эрямопингезэ. Ды истя юты сон эрьвань.
Ташто фильманть, лисни, ванан омбоцеде. Те — эсь эрямом. Тон — арась, тон сыречис эзить пачколе. Ловнан сёрмат, ды чиезь чии икельган пиже коцтокс сравтовозь луга ланга эйкакшпингеть, юты мельганзо ашосо копачазь умарь чувтокс од шкат. Арась, эзь ванстово теть мазычизэ. Муевсь се, кие сезизе ансяк панжовозь чахранть. Берянь, эзить саво неемс кинонь меельце пелькссэнть тонавтыцянть кондямокс — шержевкс; эзитинь нее мик ведьгемень иесэ авакскак. Те, лия ёндо варштазь, вадряяк: кадовить сельмень икелев, седеезэнь од, эрямонь вийсэ лакиця тейтерекс, кадовить тень ашолгадома шкань тештекс. Вастовиндерятано, дугинем-ойминем — содазь, Тоначисэ, — вастовтано сувсулеекс. Ялатеке неявомо кармат — мезесь кецневти! — самай се шкань мазычисэть.
Вейке превей ломань истя мерекшнесь: эрьва ломанесь эри кавто эрямосо. Вейкесь эйстэст — весеменень неявикс-марявикс: корты, моры, сёвны, ярсы, важоди, пейди, моли, чии... Эрямонть омбоце чачозо — дюм чопода ве. Те — арсематне, онтнэ, ёжомарямотне... Сындест соды ансяк эрьвась сонсь, сынь киненьгак а невтневить, а неявить. Сынь — удементь «эйдензэ», эрить эсест эрямосо.
Истя, эрямонь кавто лувсо, эрить тон, эрян мон, эрить весе.
Кинь зяро неявикс ды а неявикс ёнксонзо? Эрьвань — эсензэ. Прясь-удемесь апак арсе а ашти. Ансяк удомсто кадносы тевензэ. Оймси. Превскак а совси: удомась, кекшнезь ютыцятнестэ вейкесь, — те аволь куватень шкас кулома. Удомс — улемс зярс-бути Тоначинь эрицякс. Яви удомат, [145] панжсыть сельметь ды одс сат Тоначистэ Течис. Эрямот поладомо. Те эсензэкс алкуксонь куломантень репетиция. Яла кевкстнить Течинь эрицятне: мезе карми Тов туемадо мейле? Карми се, мезе марят лашсо удомсто веть эли чить. Мезе?
Эскельдявинь, нолдык чумом, аламнеде лия ёнов.
Поладсынь эно певтеме шназь вечкемадонть арсеман.
Зярдо-бути ловнокшнынь модамасторонь келес содавикс шведэнь ломанденть — Линнейде. Наукантень путовксозо мейсэяк а онкстави — а метрасо, а граммасо-миллиграммасо. Муевксэнзэ шкань ютазь совасть биологиянтень, медицинантень ды лия наукатнес. Кудосо вана чарькодицянзо арасельть. Низэ эзь содаяк мирдензэ тевде; эзь сода, кие марто эри ды кодамо таркасо наукасонть карми поланзо лемезэ, зярдо прядсы Тесэ эрямокинзэ. Секскак Карлонь Тов туемадонзо мейле низэ питнейдеяк питней гербариензэ миизе лия масторов, ловт, стякодо; кедезэнзэ кадовикс покш сюпавчитнеде эзь содаяк.
Несак кода эрси? Те вечкема?
Сеедьстэ ламось эрямосонть ашти аволь истя, кода неяви-маряви. Паряк, умонь пингень се аванть парочизэяк текеньсэль — эзь эцне поланзо тевс. Ды теньсэ лездась тензэ. Эрси лиякскак, ды аволь чуросто: сонсь мезеяк а соды, а машты, а теи, тонавтомо бажи — пикссэ а кирдеви. Истямо уш коесь-кирдась: тонавты, эрси, се, кинень тевесь а тееви.
Чарькодить, мекс пачколинь лия масторов — мик Швецияв?
Эсь эрямом Линнеенсенть ваксс а путан. Те — пеедькшнема. Ансяк пеедькшнемс, мерян, а мезть. Весе минь — ломанть, секскак а стака муемс вейкеть ёнкст, параллельть, вельть содавикстнэнь ды лиятнень ютксо. Истя арсезь, покш пежетекс а ули, путындерясак эсь прят «покш» ломанень лем ваксс. Мерян апак визде: кой-мезень коряс Линней марто минь лелят-ялакст. Кода сон чинек-венек сокарясь тикшетнесэ, вешнесь, явнось сынст кувтань-кувтань, «наука тейсь», истя монгак. Вейкетельть «орманок». Ансяк вана нитне аволь [146] вейкеть понгсть: сонзэ — «кудонь», монь — эрьва козонь судонь эцний. Мон, зяроцеде уш ледстяса, аволь пирень-кардазонь ломань. Неть тевтнес — ашо кедне — а правтан. Важодема таркам — стувор. Экшсэнзэ мон — прявт: эрян, важодян, оймсян, кецнян, ризнан... Улезэ сельмень икеле конёв лопа, перькан — книгат ды... кашт. Сёрмадан, ловнан, таго сёрмадан ды раздян сёрмадозенть панксонь-панкс. Ды истя вана пингем перть. Те монь эрямом. Текеньсэ ды тень кис эрян. Секс савкшны марямс музгордемат омбо пельксэнь ёндо. Пелян, истямонть марто, Вияна, кодаман мон, аволить эряво. Тынь, аватне, вечктядо мельганк якицят, меленк ваныцят, тынк лувсо, тынк ладсо теицят, кунсолыцят, чинек-венек важодицят, ярмаконь нарвицят-кандыцят... Мон, ёвтаса потмовалом, малавгак аволь те куростонть. Кие истямонть карми вечкеме ды мартонзо эрямо?
Тикшесэ сокариця Линней зярдояк аволь тееве гениекс, аволь понгояк тензэ истямо ни. Кувака кель, мирдензэ тевс эцницянть марто инекс, а кавтолдан, аволь «кузеве». Чуро-о-осто Линнеень нинзэ кондятнэ вастневить! Эйстэнк малав весе пижнякайть, «ламонь содыйть», тонавтыцят, седеяк пек — кармавтыцят. Чанстезэ Карлонь — эзь эртеве истямос. Низэяк, сави меремс, гениель. Ды мезть васолдонь ломаненть уцяскадонзо валт сравтнемс? Эсенек ютксояк истят тевть вастневить, Ды аволь чуросто. Авольть мукшновояк Карлонь нинзэ кондят ават, секень вант, аволь уле модамасторонть лангсо вейкеяк талантов сёрмадей, артыця, содамочинь паксятнень «изыця». Тесэ истя: эли вешнема чарькодиця ойме, эли иля арсеяк урьвакстомадо. Эряк ськамот. А стяко ламо содавикс ломантне эзть урьвакстне, мирденень эзть лисне. Ёвтан зярыя лемть? А? Те, тешкстык, Тургенев, Чайковский, Крылов, Гончаров, Прончатов...
Ней арсек, онкстнек: вечксть-эзть Линнеймезть? Мезе те истямось, ёвтык, вечкемась?
А вана допрок лия вечкема.
Германиянь ине композиторось Иоганн Себастьян Бах. Кулось низэ. Кадсь кеменде ламо эйкакшт. Урьвакстсь [147] фугань кол сёрмадыцясь, неень кельсэ — «тештесь», омбоцеде. Омбоцеськак чачтась кеменде ламо. «Вана те аля!» — мель меремс. Тевесь, мерема, аволь сеньсэ, зяро пакшат нолдась. Тунь аволь. Омбоце низэ тонадсь (ульнесь буквас а чарькодиця) ловномо-сёрмадомо. Ды те мезе! Сёрмадомо истя, кода мирдезэ. Сёрмачелькест-кедест мейсэяк эзть явово. Кодамо Бахонь, истямо нинзэ. Мезть ансяк а эрсить эрямосонть! А кемевияк.
Ёвтык, Вияна, вечксть?
Истя вана! Вечкемась аволь ве тюсонь. Эрьва кода прянзо невтни. Те аволь мазый валт, аволь куроксто ютыця кецнемань эльнемат, те — ламо виень саиця, кувать молиця-теевиця тев. Теке марто те — суликань, човинестэ валозь, ламо тюссо кувтолдыця налкшке. Вант, илязо колаво!
Ней кунсолок «инеде» мейле лия ёвтнемине.
Ульнесь ялгам. Виряень Федя. Вейсэ важодилинек. Нинзэ марто эрясть — кискат-псакаткак истя а эрить. Ялгам сэреель, келей лавтоволь. Низэ — раужо чеернель. Сень кис вайгелезэ — торонь тороль. Чачк керятанзат. Кода калгась ялгань, монень содавсь эсенсенть коряс. Прок вейсэ якасть келест-пеест човсевтеме ве кузницяв. Абунгавтнимим лиясь: удсесь авась, Федянь валонзо коряс, уш покш, васенце классос якиця цёрынензэ марто. Содат мекс? Федя илязо са малазонзо... Кода тень лемезэ? Вечкема?
Лиссь тень эйстэ вана мезе.
Эринек ве кудосо. Чувтонь стенанть пачк парсте марявсь азораванть цярныця вайгелезэ. Рангсь — маряст шабратнеяк. Рангомасонзо мирдензэ панизе пес. Кудонзо-чинзэяк, уш колмо покш эйкакшонзояк савсть кадомс. Тусь аволь васоло лия велинев, совась содамокс. Кодамо совазь содамонть эрямонь лувозо, содат: вант мель. Вант валске, чикуншкат, чокшне, вант ветькак. Те сэпей-чапамо эрямонть цидярдомс а шождыне. Вий ды вий эряви! Эсь кудонь «ярмонть» коряс — тесэ кавксть «ярмо». Лиясто авантеньгак а кирдеви корось! Цёратнеде кортамскак а мезть.
Ялганьгак илыкезэ эзь сато. Сёвноматнеде, ней уш кавто [148] ёндо, эрьва чинь ацирьгалематнеде прянзо каизе симемас. Мезес теде пачколить, кортамс а мезть, содат. Кода-бути весть, парсте «токавозь», озась велиненть вакска ютыця чугункань кинь рельсатнень лангс оймсеме. Озась ды...
Талай шкань ютазь вастовинь икелень шабрам, «раужо чеерненть» марто. Васняяк ёвтызе — кемсь, мон а содылинь, — покш кулянть. «Мой-то ведь умер...» — мерсь мельспаросо ды цяхазевсь, прок вашо, куринкань келес. Чувтоминь. Келем кундатотсь. Эзинь муе мезе меремс. Сынь ёжос, варштынь перькан: кияк эзизе маря те ракамонть? «Ха-ха-ха...» — теке чаво парь потсто, кайсети пилесэнь нейгак, ламо иень ютазь. Вайгельсэнзэ марявсь кеж, пезэрдема, инзамо, седеймарямонь ды превень арасьчи... Пеедькшнезь, визьксэнь апак сода, та-кода прянь шназь ёвтнесь колмо эйкакшонзо тетяст ёмамодонзо. Монень маряви, эсь превсэ эриця цёра эли аваломань зярдояк истя а теи. Те авась вана, эрямонь максыцясь...
Сюлмавкшность, содави, вейкест-вейкест вечкезь. Косо эно сон, те вечкемась? Каштомонь содов почкованть тусь качамонть марто? Вальмава пулонзо эзизе невте, эзь оргоде?
Эрян тунь лия таркасо. Вастневемс ней уш умок сыре те ломаненть марто савкшны пек чуросто. Сестэяк бажан теемс прям а неицякс, ютамс вакска. Виень а сатыть вастовомс мартонзо лиякс. Видьстэ ёвтазь, тейсь сон мейсэяк а идевикс пежеть — ёмавтсь ломань. Ансяк вана «раужо чеернесь» чумокс прянзо эзь лово, кадык аволь ансяк мирдензэ калмос панизе, эйкакшонзояк пайстомокс теинзе. Цёрадонзо мезеяк а мерян. Урьвакстсь, эри. Тейтерензэ вана... Вейкесь тейтерькс чачтась; те аламо — цяркат кепси. Омбоцесь мирдеть полавтни, яла седе вадря, седе кунсолыця, эсензэ коряс мазый вешни. «Вадрянть» таркас, зярс вешнесь, мусь колмо эйкакшт, конань кие тетязо, сонськак а соды.
Вай, те мезе истя теян? Мекс вередеминь ёвтнеме аволь эсень, лия ломанень эрямодо?
Кода истя мекс? Невтемс самай те вечкеманть, невтемс эрьва ёндо.
[149] Те ёжодонть, сонзэ шкань-шкань пултыця псидензэ, а содавикс, салавань вийдензэ минек ды икелень эратнень перть сёрмадозь Мода планетанть лангсо ламодояк ламо книгат, теезь фильмат, сёрмадозь картинат, операт, симфоният, путозь спектаклят, стявтозь скульптурат... Моротнеде а мезть кортамскак.
Меельце шкасто мекс-бути сеедьстэ кармась содавтнемень од шкань вальсэнь лувсо сёрмадозь «Московонь студенттнэнь морост». Васняяк сакшныть тень неть валтнэ
Нам студенческих песен вовек не забытъ,
Наш Московский закон понесём мы по свету:
Коль дружить так дружить, а любить так любитъ
Горячей и нежней чем Ромео Джульетту.
Вечкема, вечкема, вечкема... Теке лия валгак арась! Кода ансяк а лемдить сонзэ автортнэ: валдочи, чансть, кенярксонь келей-кувака пакся, сэнь сельме эрьке... Сондензэ башка теке лия валткак арасть! Сон, сон, сон... Сестэ эно мекс, мекс те валдось вети ламодояк ламо вечкицятнень чоподас? Мекс вечкиця аватне ёртнить эйдест шукшонь ящикс? Мекс пешксеть уроз эйкакшонь кудотне? Мекс чуросто, вельть чуросто вастневить вечкезь, мелень ванозь эрицятне? Косот сынь? Кие марто а вастоват...
Ламодо-мезде уш ёвтнинь. Кой-кува видьстэ, кода ульнесь, таркань-таркань — ингельде валсо, нурькинестэ, пестэ пес апак пачколе.
Эсь эрямодон, явовомадонок мейле эсь вечкемадон? ...Чипаесь сыргась оймсеме — мон чуман; варма кепететсь — таго мотордомат; кувать пиземе арась — беряньстэ Пазонтень ознынь, а маштан вешеме. Аволь истя валонть ёвтык, а истя пенченть саик, аволь истя озыть... Пупордямсто-прамсто томбавиндерят, седеймарямо иля учо, пижакадома — эрь. Кельме вановт, полгарьгавтозь сельметь, ёжонь калавтыця рангомат... Чуман мик лексеманть ды масторланга якамонть кисэяк...
[150] Вана эседень. Эсь эрямодон. Кельгсь, кода ванат, кото киксэс. Весемезэ.
Эсень... вечкемадо.
Истя. Кото кикст. Ансяк.
Вастовинек, вастневинек, салавине палсинек, кияк эзимизь кармавто. Вечкинек?.. Ды невак кода! Истямо сэтьме, истямо мелень ваныця, истямо чевте вайгель ульнесь раужо сельме, човине рунго се тейтересь... Марявкшнось тень, лия истямо косояк Моданть лангсо арась. Кеминек, пингенек перть чипаесь валгонеме а карми.
Мейле... кото кикст.
Ды истя «вечкезь» эрицятнеде зняро, зяро тештеть велькссэнек, зяро прят-товт товсюронь те эли тона паксясонть. Кода иляст шна, вечкемась — кудос совамонь кенкш; соват, сон ёми — ушодови те кудосонть эрямо, стака, оймень ды рунгонь виень саиця эрямо; тарчксонть трокс эскельдя-модо мейле пиземечирькекс кувтолдыця тюстнэ румить, лиясто ёмить, лиясто совить допрок лият.
Сестэ эно мезень кис мон, тон, ламодояк ламо тёжат, миллионт сакшныть те эрямонтень? Мезень парось чинь-чоп кунсоломс кенгелемат, ацирьгалемат, неемс сельведть, верень валомат, кежей вановтт? Косо морось, косот верень эждиця эльнематне? Косот? Ков прят а пурдасак — кенгелемат, майсемат, тюремат, куломат... Мезень кис шешктяно моданть? Саемс — путомс, чопода — валдо, кувака — нурькине... Зяро, кортыть, вейкеденть, зняро — омбоцедентькак. Сестэ мекс эно пародонть эрямосонок беряненть коряс ков седе аламо? Косо эно кенярксонь кандыця валдось?
...Сиянь горниповнекс чольдерди кудонть келес Эрзяй нуцькань вайгелезэ. Чийни, пачколи элякалемань шалтозо аволь ансяк шабрав, кавонст вальматнень пачк ушовгак. Чокшне. Пеняцицят а марявить. А верде, а алдо. Чатьмонить этажтне... Кеман, сыньгак кенярдыть мартон. «Покштяй! — секе тев сеери тень. — Покштяй!» Гайгиця, седеень токновтыця те валось ды эйстэнзэ мельспарось витить седеем, одокс марян эсь прям. Сизема Эрзяй а соды!
[151] Варчик азё, шержакай, чийнемс-кирнявтнемс сонзэкс! Икеле дильнесть баягинекс кавто тейтернень вайгелест, ней — эрьвела, паро ёжонь раштыця — нуцькань. Сынтемест, сынст вайгельтеме, Вияна, а содан, соваволь-арась потмозон эрямонть мазычизэ.
Вана истят кеняркстнэстэ, койсэнь, аштияк эрямонть мазычизэ.
Пелян, илязан томба неть ёвтнематнесэ ойметь: арасельть эйдинеть, эзик варчне те танстенть. Нолдык чумом. Мезе теят, эрьвань эсензэ канстозо.
Кудонь тевтнеде кевкстнят...
Кевкстнемс сындест — ёмавтнемс валт! Аволь васенцеде видькстан: аволь кудоюртсо котьмицятнедян. Ансяк, мерема, тевтнеде мацтс а эцят. Эцят — мутадызь. Тукшныть-арась мелезэть — теемат, седейпелькскень коронзояк кирдема.
Кирдян. Кирдян чить, ковт, иеть. Кодамояк лазкске а лазови, кува лисевлинь те туворстонть. Лиясто сельмень сявалить седе «ломанькс» эрицятнень, чинек-венек модасо карыцятнень, пандя велькссэ котьмицятнень лангс. Куш сынст, «эмежпрятнень», ансяк пекедест мелявтыцятнень, седе сеедьстэ эсь пачкан сялдан. Мезень кис, видеяк, эрямс чинть-ковонть ало, бути васькавтнемс ансяк тутманть? Кавто тёжадо ламо иеде икеле Сократ ине грекесь мерекшнесь: «Эряма аволь ярсамонть кис, ярсама — эрямонть кис». Ютат базарга ды сат мельс: секень вант, ламодояк ламо ломантне зярдояк ине философонть валонзо коряс эрямо а кармить. Неезденть сови потмозот нурьгата ёжо.
Кодамокс, содамс, теевель ломанень вейсэндявксось, эрявольгак Сократонь меревксэнзэ лувсо? Кеман, театратне, музейтне, картинань галереятне, концертэнь залтнэ, кода ней, чаво авольть эрсе. Истяяк нувара ёжом тертнян: Мода планетанть лангсо эриця ломантнень эйстэ превсэ эрицятнеде ды превень максницятнеде ансяк кавто-колмо процентт. Мезес пачкоди планетась, карминдеряйть вейкень пес эрямо ине грекенть валонзо лувсо?
[152] Эрямось — аволь беряньстэ, ялатеке ильведькс марто сёрмадозь сёрма. Ансяк сёрманть, а туиндеряй мелезэть, аволь стака одс сёрмадомс эли раздемс, эрямонть вана а полавтсак, од конёв лопа лангс а кандсак. Сон максови ансяк весть. А улиндеряйть вакссот мельгат кадовицят, эйкакшт, — те сёрмась кадови апак сёрмадо эли сёрмадозь а витневикс ильведькс марто. Мезеяк а теят. А корштамс эйдень чачтома-кастома танстень кечестэнть?.. Арась, арась, а карман теде — те тонь сехте сэредиця, сехте мариця таркат! Мик... Тоначисэяк.
Нурькинестэ: ускан, зярс ускови, улавонть.
Эрьва кодат мельть кальдявкшныть превсэнь.
Цёраломанесь, монь арсемга, эряви малав эрьва ава марто, эрьванть карми вечкемензэ, карминдеряй кудосонзо уряд, чевте валонь гайгема, оймень эждий вановт. Содазь, аволь свал истя эрси. Кортамскак теде а мезть. Ялатеке — сеедьстэ. Авась вана — седе кочксиця. Те — сыре, тона — од, те — сэрей, тона — алкине... Вейкесь — ярсы, а андови, лиясь — а ярсы. Ламо уды — берянь, аламо — таго берянь... Савтык азё лангозонк! Истя кочксезь муемс эрявиксэнть а шождыне. Кува понгсь сон, мазыйде мазыесь, превейде превеесь, а усксеви. Секскак веенстнэ вешнить-вешнить — мирденень а лисевить, лиядыть кадалькакс. Лиятне мирдедест орголеме кармить. Яла вадря, яла мазый, дошуз вешнить!
Эрьва кодат, Вияна, понгонить ютксонк. Кода цёратнень ютксояк. Ялатеке авась — ава. Теньсэ ёвтави весемесь. Сонзэ эсензэ мелензэ-мелявксонзо, обуцязо, ёжонзо-валонзо, вановтозо — редясы эрьва челькиненть. Сон — вий, ды те виесь вети-теи модамасторонть лангсо весе покш ды вишкине тевтнень. Аволь чуросто — цёратнень кармавтозь.
Арсят, те виесь — вечкемась? Э-э-э...
Зярс Модалангонь эрицясь, вечкицят Валдай.
2002-це иень медьковонь 13-це чи.
[153] Поладкс. Удомам а кольневтнян. Кеверькшнемс тарка лангсо — коесь а монь. Секс чуросто некшнян онт. Ней кода-бути поладовсь весь, аламнеде велькска удовинь, ды... кецневтимим он.
...Велосипедсэ Пичепестэ аловпандт аволь ардан, ливтязь ливтян. Иень кевейксэе. Лангсон раужо кикст-кикст ашо панар. Кайксэм — чадыведь шкань. Ардан — мон а мон! Марямга моран моро:
Я помню чудное мгновенье: |
Ды алкукс! Ташто, модас лепштявозь кудонк видьс аламнеде апак пачкоде, эскелят, ванан, ким ёнов тон. Кедьсэть ведра, сыргить куро куншкасо лисьмантень ведьс. Неявить мекс-бути, Вияна, эседеть алкинекс. Мекс? Ушосонть кизэ. пси. Лангсот вана кодазь, лембе ковтань кондямо берякшке оршамопель. Чамат ловтаня, аволь од шкань, сормсевезь ды пужозь. Истямокс зярдояк эзитинь некшне. Мезе-бути серьгедить тень, ды ардомам тоцк прядовсь. Лип шкань ютазь «лишмем» ды ведрат ёмасть, понгинек тынк вальмалов. «Кадык, — меринь теть, — кудонк таштомсь, юрозо — вантака! — од, кевень. Секскак сядо иеть карми аштеме!»
Кивчк — ды мартот, Вияна, понгинек кудонть потс. Сон путовиця. Эйсэнзэ а киякс, а потолок, а лато. Ансяк сэрей-сэрей, а ютавиця, теке кодамояк башнянь, ниле стенат. Сетнеяк аволь чочконь — бетонсто валозь блоконь. А кенкшть, а вальмат. Ансяк сэрей стенат. «Ды тестэ а лисеваткак! Аволь кудо — тувор!» — ютась пряван...
Сыргозинь. Эх, пароль поладомс, кадык прядовськак беряньстэ, мартот вастовоманть. Кадык сакшныть сыре ломанекс ды беряньстэ, пурныцякс оршазь, ялатеке покшоль мелем зярояк кортнемс мартот.