Тесэ ды тосо (2013)/14
[91]
| * * * |
| Кемнилееце сёрмась |
Тоначив. Седе куроксто.
Шкадо икеле Тов саезентень — Лемаень Виянанень
Тоначинь паро эрямо теть, Вияна!
Сёрмат ловномсто сельведень эзть кирдеве. Телень пултыця вармат, ушкс виев пиземеть, пештень покшолмасо цярахмант... Кода тень тон, допрок од тейтерь, цидярдык, превс а саеви! Прям комавтса икелеть. Челькинень пес чарькодия, мезес ветясы тейтеренть эрямосонзо сехте покш ильведьксэсь, мекс ванстома эсь прянть сондензэ. Прядыя ловноманть ды арсезевинь: мекс эрямосонок лаказь лаки уцяскавтомочись? Ков а варштат... Вейке шабранок, Сёвонень Ольгакай, лиснесь мирденень таджикнень. Кавонест эйкакшонзо — токазь. Ольгакай сырькаенть марто эрицясь — кодгеменьшка иесэ букашка цёразо. А семия, а эйкакшт. Косояк, содазь, а важоди. Ютан лия ёнов. Вецакаень ниленьгемень вете иесэ цёраст апак урьваксто. Тетязо вечксь копордамо. Теде чачсь эйкакшось цёрань вийтеме. Варштатано Ледяйтнень кудос. Эрить эйсэнзэ кавонест. Симить кавонест. «Прявтось» кемень иеть эрясь панжома экшсэ. Дораень Микитань ниленьгемень иесэ вейкине цёразо нузяксчиденть ды «палыцядонть» прянзо тонгонизе килькшес. Таргизь... Ды истя, эли малав истя, седе тов. Секскак, сяткинем, пря пек иля чаво. Аволь ськамот. Весе минь пиксетяно пиштемань саргосонть. Ансяк аволь тынк ёнкстнэсэ, тесэ — Модамасторсо. Аволь вейкетьстэ — те виде. Секс истя сеедьстэ палманькс стякшны икелень кевкстемась: мезень кис сакшны ломанесь, сакшнотано минь, истямо мазый-кежей моданть лангс? Истямо мельгак совси превезэнь: паряк, эрямонть мазычизэ чачияк амазыенть, пайстомочинть эйстэ?
Ламот Пазонть пелев, менелев кепсить кедест, энялдыть. Кемить, яла кемить лангозонзо. Кемить: лезды, [92] максы, кинь «варии», шумбрачи, максы чансть. Улевельгак Сон, самай те Пазось, улевельгак парочинь ванстый, зняро майсевемат, вейке-вейке лангс пеняцямот, кежть ды нулгодькс чумондомат аволь кучо. Мезень, кодамо чумо теить икелензэ? Пиже эйкакшокс кадовить ававтомо? Од авать пельде седеень раздиця нарьгамотне аламольть? Мезе ансяк ашти лангс ваномс Аполлон ёнов молиця, чинев ойме Кирин! Онкставить мейсэяк сонзэ «казевть» пиштематне? Ков зняро вейкень сявдиксэс?!
Тон та-кода мерекшнить: «Мон аволь сёрмадыцятнеде... Конёвонь паксясь — аволь монь». Тонь, тонь, Вияна, те паксясь! Истя сэвтнят ды мейле аравтнят валтнэнь таркаваст, сельмень сявадыть. Истямо мельсэ ловныя ёвтнемат, истят ёжот ютасть пачкан, валт сеске а муян. Аволитинь шна — сават шнамс. Виде, Течинь эрямосот «буквань» тевтнесэ докакс араселить. Содылинь. Содан. Ней вана... ловномсто истямо мельс прынь: улема, тонавтыть эйсэнк Тоначисэ, эли, паряк, тынсь тонавтнетядо мазыйстэ, чарькодевиксстэ пут» неме арсеманк конёв ланга. Истя? Паряк, тынк Тосо школань кондяткак улить? А? Мекс, алкукскак, тенст а улемс, мекс а максомс электрон вельде эрьва кодат содамочить?
Прядык сёрмат, кецнинь, седе паро эрямос совамонь валсо. Мажоронь нотасо, кода кортыть музыканттнэ. Стакадояк стака читне, валот коряс, кадовсть удалов. Те вельмевтсь эйсэнь кенярксов ёжот.
Кода седе тов?
Ёвтнить ансяк малав иень перть ютазденть. Эрьвань эрямокизэ таргазь эсензэ. Веенстнэнь виде, теке таргавозь суре, лиятнень — прок тей-тов менчевиця ёзнэ. Видеськак эно эрьва кодамо эрси: вейкесь келей, валаня, вети килеень валдо кужос; лиясь, мекевланг, — лушмов-лашмов, вети видьстэ терний, потиця чеядавксос. Кона ёнов пурдась тонь янось?
Сёрмадт, вечкевикс сэнь сельминем, сёрмадт, учан.
Эрямодон? Эсень?
Мезе учомс сизьгементнень трокс эскельдиця атянть пельде?! Кодамо эрямо? Лия ёндо, иень вайгельпень весе [93] эзть ютаво. Кадык сась чокшнем — каштомом эзь ява! А гувны, содазь, икелекс а цяторды, ялатеке толозо эзь маде. Пикстерди. Лиясто, сёпомо а карман, — гувкаи толпандякс. Мезе берянесь тень эйсэ? Тонсь мерить: «Сайть эрямостонть пародонть зяро саеви!». Саян, тештинем, саян зяро саеви!
Весень тонавтан, превс путан а кунсолыцятнень. «Ютнян» тень кувалма эсень лангаяк. Кода, видеяк, авидечисэ эри Модамасторось! Кода а кунсоломс сыре ломантнень, эрьва кодамо университетэнь прядыцятнень? Кунсоловольтькак, теевельтькак одтнэ куш кой-мезе сыретнекс, бачкатнень «раест» умок улевель Модалангсо. Ансяк вана пе илязо са те «лангонтень» истя келейстэ, неекс эрямодонть. Экшелетяно ойсэ ды винасо. Истямодонть пелема. Улест кудосонок-чисэнек, эрямосонок стакачитькак, сынст изнязь ломанесь ванстови ломанекс. Сынтемест... Ней кода лисни? Моданть лангс малав эрьва сыцясь пинге ташты содамочить, ёрокчи ды дошузчи, лиси пенсияс — неть сюпавчитне киненьгак а эрявить. Те кода истя? Кулы — сайсынзе мартонзо. Мекс а кадомс сынст мельганзо сыцятненень? Мекс а саемс питнейдеяк питней неть таштавкстнэнь сыретнень кедьстэ ды а максомс одтнэнень? Тонсь арсек, тетянок-аванок, покштянок, сынст покштяст аволь вейке тёжа иень перть тейсть, валакавтсть ды мазылгавтсть келенек, се келенть, конань эйсэ сёрмадан тонеть, тон — монень. Ды мезе? Мельганок сыцятненень максыцянзо, визькс видькстамс, эзть кадово. Ботыть, поксарить кемень-кемгавтово шержей прят, ды весе. Те монь мелявтовты, те сезни удомам.
Вана колмо-ниле валсо эсь мелявкстон. Течинь. Ванстомс келенек — тенень, инзейнем, алтан модалангонь меельце иень, максан эсь эрямом.
Саты течис. Пелян, таго «лаксемень» кармат. Мерят: о-о, таго превень синдтриця сёрма тень дянкадсь, таго превть яжак. Арась-арась, течинь сёрмам нурькинедеяк нурькине. Иля мурне. Ков молят, бути истямокс, буквань нильницякс, Инешкипазось теимим. Авань марто тетямгак, а мезть кавтолдомс, ве ёно эзть аште, лездасть тензэ. Секскак тонь музгордемат лиятакс а тейсамизь. Лия мельнеяк прясон [94] липни: пеняцят, а тонсь чулгсят «превень синдтрицятнень» пештеде шождасто.
Саты, саты! Эль эзинь мереве «вастомазонок». Кенерян. Вастовтано.
Учан эрязь иедеть ёвтнемат поладксонзо.
Паро мель марто, Учаень Валдай. Тесэньчи, 2001-це иень даволковонь 15-це чи.