Тесэ ды тосо (2013)/1
[7]
| * * * |
| Васенце сёрмась |
Модамасторов, Учаень Валдайнень, Васень тештинем туртов Шумбрат, Валдай!
Сёрма монь пельде... А кемеви? Ёжот эзь машто тыжныця конвертэнть кедезэть саемстэ? Улема, тандадыть. Сёрма Тоначистэ! Кода тесэ а тандадомс! Иля пеле. Тесэнь эрицякс эрьвась карми. Тонгак... Тедеде, иень, кавтонь, кеменень ютазь... Сат, ялатеке сат, теде ковгак а туят. Кода а кода тонадома те мелентень ды теке марто чоподадояк чопода, кода тыненк, эрийтненень, маряви, певтеме келей Масторонтень.
Ней, Валдай, арсян ёвтнемс теть аламошка Тоначиденть, тесэнь эрямодонть, койтнеде-кирдатнеде, эрицятнеде ды сынст мелявкстост. Тонавтнемс тень, содат, ламо эзь саво, школань сисем класстнэде верев эзинь пачколе. Секскак, манявиндерян сёрмадомсто косо-мейсэ, илямак чумондо, илямак пейде.
Эно ушодса ёвтнемам.
Тынк тосо, Модалангсо, минек Мастордонть мезть ансяк а кортыть. Веенстнэ, марят, эрить тесэ стакачинь, майсемань апак сода. Лиятне, пежетевтне, кирдить-цидярдыть эрьва кодат нарьгамот. Тесэнь эрицятне, келя, малав вейкень пес чинек-венек велявтнить-шаштнить таркасто таркас покш кудошка кевть, чувныть мода потмова овтонь эчкесэ кувакадояк кувака норат-варят. Неть тевтне теке басом лововить аволь пек стакакс. Покш ды ламо пежетень теицятне, салыцятне-колыцятне, берянь цартне-императортнэ, президенттнэ-премьертнэ кирдевить, ливтнить юткованк ёвтнемат, соргавкст ботнозь лакиця пичеойсэ; нарьгить лангсост весе нарьгамотнесэ.
Содат, Валдай, мезе теть мерян: киньгак иля кунсоло. Кияк эйстэнк, вере эрицятнеде, а соды, мезе тесэ моли-тееви. Кияк эйстэнк мезеяк эзь нее, эзь маря. Ды тонгак [8] монь сёрмавтомо аволить сода. Адонь кемготово кирькстнэде ды лия нарьгамотнеде ёвтнематне — лаужа келень човсемат. Истят кулятне, келятне-мелятне кандтневить-сравтневить эрий ломантнень юткова тандавтнемань кис. Тень теить кочкаряс раужосо якицятне, поптне, ды икелест сюконякшныцятне. Сынь бажить вейкес: эрьванть, кие понги малазост, теемс пелиця, кинень понгсь савтыця ломанекс, карвонтькак кунсолыця урекс, «пазонь урекс», «ревекс». Седе шождыне улезэ панемс неть «реветнень» ков эряви.
Кода ломантне цидярдыть тень — а чарькодеви. Мекс вейкеяк кежиявтниця, эсензэкс арсиця а вастат? А мезть, мерема, вешнемс, каня эрсить арсицят ракшатнень ютксо?! Ризнэвти монь, Тоначинь эрицянть, мекс истят баяга прят Чачома Мастором эрицянзо.
Лия, лия, Валдай, тесэнь эрямонок!
Кодамо? Кунсолок. Панжсынь сельметь, ёвтнеса, кодамо сон, алкуксонь ТОНАЧИСЬ.
Тынк Масторсо эрси тундо, сы шказо, элякали ал тюжа тюссонзо сёксесь. Минек Масторсо мезеськак а полавтневи! Тонь велькссэ келейдеяк келей, сэняжа парсеекс сравтовозь менель. Тунда, ловонь соламо шкасто, те чова коцтонть сорновтнить вайгельсэст норовжорчтне. Кепедилия, мельсэнь, прям ды кирьгам матратомс ванылинь баягинекс чольдердиця раужо паморькскенть мельга, ванылинь сэнентень ёмамозонзо. Мейле аламонь-аламонь ушодыль сон, моронзо моразь ды пилень кецневтезь, те тюсонть потсто валгомо.
Эрьва чистэ келей чама чипаесь, ансяк кенери лисеме, ушоды вадяшамо Моданть чаманзо, максы тензэ вийть, тыненк — кеняркст. Вечкилинь кизэнь пси чистэ кунст мадезь ваномс седеень кецневтиця, сорк а мериця сэнь домкачинть лангс. Венстьсак рунгот пиже лугине лангс, путсыть кедеть прят алов, сялгавтсыть сельметь верев ды, маряви, тонськак човоряват сэнь тюсонть марто.
Ланга туевинь... Аволь седе ёвтнян, мезде алтынь.
Илямак чумондо.
Тон чистэ якат сэнь ды шкань-шкань пельтнеде чопода [9] менеленть алга, секскак, паряк, а чарькодьсак тошначим. Монень ней кадовсть ансяк ледстнемат, сынст эйсэ эждян оймем. Куш сельмепонань пачк, лип меремга неевлинь Модалангонь мазычитнень! Шканть лангс аволинь вано: тунда, кизна, кецневлинь телентеньгак. А лездат, Валдай? Вай, вай, авакай, мезть кортан! Вельмемадо... Истя эрси ансяк ёвкссо.
Эзия стувто, эзия — алтакшнынь ёвтнемс неень менельдень. Сон, Валдай, тынсекенть коряс, челькинень пес лия. Тюсозо ансяк соказь раужо модадояк раужо. Ансяк таркань-таркань — чопода-тюжа. Сэрезэ — кемат? — сыре пичень сэрьсэ. Паряк, эль седе сэрей. Тень кувалма маряви, свал лепшти эйсэнь а неявикс вий. Истямо ёжояк содавтнесамам: секень вант, новоли-лондады те чопода потолокось. Лепшти, лепшти... Мелем рангстамс — вайгелем арась! Маряви, модерьдясамам. Сы те ёжось — сорнозеван. Мезде пелян, мекс — монськак а содан: омбоце кулома жо а эрси! Менелеськак а пры. Мезде, видеяк, пелемс? Каня а содан — тенень а улема? Латонок-менеленек ашти мезестэ-бути калгодосто. Кшни а кшни, кев а кев. Новолезь ашти велькссэнек покштояк покш поколень-поколь. Теке уропейть. Вана мезе минек тесэ сэнь тюсонть таркас. Каятовольгак киньгак вайгель, сеске зэрнезевель моданть алга пурьгинекс. Менелесь сестэ, монень маряви, лондадоволь. Секс тесэ пингеде пингень, ушодксонь-пень а содыця, покш вийсэ лепштиця каштмолема. Маряволь карвонь, понговольгак тей, лексемаськак! Тынк тосо кодат ансяк гайтть арасть! Вармась увны, пиземесь поцерди, чувтотне чикордыть, нармунтне чоледить, эйкакштне эльнить... Тесэ минек, кода тынь мертядо, — а куш а каш.
Эйстэнек кшнинь-кевень алкине менеленть ало ламодояк ламо, велькссэнк тештетнеде ламо. Тонсь арсек, зяро эрицят тей састь ламо тёжа-тёжа иень перть. Оно мезе теть, теде башка, ёвтан. Эриень Масторсо шумбра ломаненть рунгопсизэ колоньгемень кото градуст, а минек тесэ — а пурнавить кементнеяк. Весе эрицянок, ловт, кельметь. Вана истя, Валдай!
[10] Кулозень Масторсонть, кода тынк Эриень Масторсонтькак, улить чить ды веть. Истя вана! Тынь арсетядо, тесэ свал чопода, сельмс нерьгстак — а неят, свал ве. Ильведькст тейнетядо, ялгинем, ильведькст! Менеленек раужо — те виде. Чоподанть вана, венть, свал полавтни валдонь кондямо валдо. Виде, чинек ды венек лият. Кевень менельганок чипай, чарькодеви, а чары. Валдоськак тесэ аволь сонзэ. Ашолгадома эли сундерькс шкань. Састыне-састыне сакшны та-косто Масторонок алдо. Сон аволь пси. Аволь кельмеяк. Истят лембе чить кой-зярдо эрсить Эриень Масторсо ожоковонь прядовома шкасто. Зярс кирдеви валдось, а содан. Тесэ шка арась. Секскак а мерят, ашолгады ниле эли вете чассо, чопоти...
Мелезэнь, Валдай, вана мезе тукшны: тесэ а эрсить а пиземеть, а ловт. Косто сыненст саевемс пельтеме ды вармавтомо? Менелеськак кевень. Коське эрямо тарканок. Аволь пек якшамояк. Пеняцямс а мезе лангс.
Эрямо тарканок...
Монськак а содан, мезть пенгедян. Кодамо «эрямо» Тоначисэ, минь — кулозтяно! Те истя. Эно кода лиякс меремс?
Содат мезе, Валдай, тесэ, Кулозень Масторсо, вастневить чувтоткак. Седе виде ули меремс, чувто ёнов молицят. Касыть аволь тустосто. Сэрьскак аволь сэрейть. Содазь, пичень эли тумонь вирть тесэ арасть. Васня тамашакс тень марявкшнось тесэнь чувтотнень тюсост. Теине, теке калень, коськана лопинест, комелест, тарадост — якстереть! Тынк тосо пижеть, тесэ... теке верьсэ пургсезь. Сундерькс валдонть вельмемстэ — чопода-якстереть. Паряк, куломадо мейле веренек кодаяк миненек а чарькодевиксстэ юты эйзэст? Содат, Валдай, васня лангозост ваномсто пелема саилимим. Верь... Тонадынь. Ков молят... Нармунень чоледема, цёковонь цёкордома, кода тынк тосо панжиковсто, сюрдов-сярдов неть чувтотнень прясто а марят. Иля арсеяк! Видькстан: полавтовольгак, куш весть, верь тюсось пиже тюс лангс — те улевель тень покшчикс. Кенярксонь кептернем пешкедевель верьга. Полавтовольгак... Содан: [11] тенень а улемс, кода чипаентень зярдояк а лисемс чивалгома ёндо.
Истямо вана, нурькинестэ ёвтнезь, Тоначись ды эйсэнзэ — тагояк мерян! — эрямось. Аволь уш истямо берянь. Виде? Вай, тунь стувтокшныя! Кемат, Валдай, весемеде валдо, кецнемань явшиця чикс эрсить тенек леменек кундамонь читне! Васняяк — Инечинть каршо. Сестэ кевень менеленек вельтяви човалянь эли кансёронь видьмень покшолмасо пикстердиця ламо-ламо тештинесэ. Те истя кудосо-калмазырьсэ кирвазтезь тынк штатолтнэнь валдынест та-кода пачколить минек пелев. Типель-типель-типель... — верде мельспаросо кончтнить тенек сяткинетне. Сюконян теть, Валдай, кирвазтнезь штатолнэть кис. Паро, эзимик стувто. Кундсят лемем. Мон сынст, тонь сяткинетнень, сеске содасынь ламотнень ютксто. Кода? Содык, снартык азё! Сонсь Пазоськак, маряви, а соды. Истямо мельгак пачколи уцемезэнь: тонь пельде пикстердиця тештинетне аволь тей варштамо сакшныця оймень пелькскеть? Сыть, цитнить-теить, мекев туить. Тонь-аволь — аздан. Сень кис лиядо содан: зяро кеняркс кандыть тенек лемень кундамотне! Кадык сынь, неть тештинетне, аволь Мода велькссэтнень кондят, кадык! Ялатеке учотано вельмемаст. Свал-свал. Секскак, Валдай, иля стувтне, мондень башка, кундсемс авать, тетять, покштять, Учаень Митя атянь, ялгать-оять лемест... Теемс тень, путомс штатолнэ, а стака, кенярксонок — кескавс а кельги. Сакшны мель: куш сельмепонань пачк варштамс алкуксонь тештетнень лангс. Лисевлинь, кода ульнесь тейтерьксчистэнь, маней веть кузтемпес, неевлинь цивтёрдомаст, вейкест-вейкест туртов кончтнемаст, кунсоловлинь валтомо кулянь пачтнемаст. Арась, исень чинтень, куш сезевть, а совават. Тененьгак а улема.
Омбоцеде теть мерян: аволь уш истямо берянь тесэнь эрямось. Кадык а тандавтнить чинев одар поптне адсост. Улевельгак сон, певтеме кенгелемаст, ярмаконь ды палыведень вечкемаст кис понговольть эйзэнзэ кадиласо ахолицятне васенцекс. Адонь азорось сеске рестедевлинзе толпандяс. Пачтян теть теке басом: тесэяк, куш адт-райть [12] арасть, ойметне аволь весе вейкеть ды аволь вейкетьстэ эрить. Веенстнэ истя, лиятне — лиякс. Те, кевкстьсамак, кода истя?
Ёвтаса.
Кинень, арсят, тесэ лембе ды чевте таркатне максневить? Тон, содан, истя мерят: сетненень, кить эрямост эризь пежеттеме, ломанькс, ваньксстэ, визьксэнь содазь, кить вечксть тетяст-аваст, кить ламо важодсть. Вант, иля кезгеме ёвтазденть: тесэнь паро таркава эрицятне салыцят-колыцят, симицят, тюрицят, аксунгалицят, ломанень маштницят. ордакш кал ицят... Ютксост покш прявттнэяк. Сынь жо пайстомо ломанекс эрямост эризь! Кемат? Весе сынь Тоначисэ седе сэтьме, лембе таркасот, ризкст-мелявкст а содыть. Ды те виде.
Содат мекс, Валдай?
Превть иля мерька. Теньгак ёвтаса.
Салыцятне-симицятне, те рудазов кувтастонть лиятне — весемеде пайстомо, эрямосонть сехте покордазь ломанть. Мезень парось, мерьсынек, винадо глохтямосонть? Кодамо чансть, уцяска те ведтенть туводо берянькс теевемасонть? Допрок ёмавтсызь ломанень чачост. Мирдем истямоль. Варчнинь мартонзо эрямонь «кеняркстнэнь» верьга-алга. Кирьгава, кода кортыть. Яла бажинь, вийть путынь кардамс те ормадонть. Сюдомаскак пачколинь. Кодат ансяк берянь валт тензэ эзинь чочне! Ней... янксян. Эзь чарькодевкшне тень: сон, чумонь тейницясь, лангсон нарьгицясь, дух а чумо. Сонзэ теекшнизе истямокс, яжакшнызе икелечинзэ симагай тетязо. Панстомо, лавшо уця ломанельть мирдемгак. ававтомгак. Мон эрдекстиинъ... Эно мезе кадовкшнось тень теемс?
Лия невтевкс. Ярмак потсо экшелицятне, арсят, уцяскавт? Э-э-э...
Саты, Валдай. Ве сёрмасо весе мелень-арсеман а пачтявить. Лиядо-мезде, алтан, ёвтнян теть сы сёрмасон. Содак. Валдай, Кулозень Масторсо эрить видечисэ. Мерезенть, алтазенть а топавтомат минь а содатано. Тесэ кенгелемадо эзть марсеяк. Те валонтькак а содасызь. Мерезь — теезь!
[13] Тей-тов шаштнемат иляст уле. Те тынк тосо...
Каршо тень тешкстат?
Кеман. Кеман, кецневтьсамак...
Тон, кода содан, умок уш ошонь эрицят. Содан, кадык беряньстэ, чальть-чульть, тевдеть-эрямодот. Лиясто, маринь, пачколят велев. Секскак энялдан: тов молемстэть сюконяк пельдень, веледенть башка, куринкантень, яннэнтень, кува кедте кедьс кундазь якинек вейсэ, минек ташто кудонтень. Ёвтак паро валт тейтерькспингень ялганень — Паксютонь Марюшнень, Аржаень Олдайнень, Валкужонь Лизанень ды лиятненень, кинь марто коволнэкс ютась од шканок. Варштык, кода эри-ашти пиренек куншкавидьсэ рацяня ламарь чувтось, конань ало вастневинек. Эзь коське?
Энялдан, топавтык мелем.
Каршо валонь учозь, умонь-умонь вечкицят Лемаень Вияна.