Тесэ ды тосо (2013)/Ламбамо нартемкс/6
[252]
— 6 —
Чипаенть келей, сырнесэ валозь вакан ёнов молиця чамазо эль кирдевсь мизолкстонть. Мезес кецнесь, мезень мельспаро стардызе — сонсь содась. Варма сульть костояк эзь маряво. Качамось кудонь трубатнестэ лиссь видестэ-видестэ. Менель ёжонтень педясть — кавтолдсть, эзть сода, кона ёнов сыргамс, — ашназа-сэнь пельнетне. Кудотнень икельга кальтне явавтнесть удомаст, кой-конат эйстэст арсесть од чинть ютавтомадо. Кодамо карми сон? Мезе карматано тееме? Мезе кази менелесь?
— Шказо ушодомс, ават-цёрат! — виев, прок аволь атяньгак вайгельсэ рангстась Куляз атя, Элювань шабразо, одониянть прясто, конань аволь умок сонсь вачкакшнызеяк, ды теке басом, эвтемань апак сода, ливчанясто ушодсь пулттнэнь макснеме, кой-кува — кайсеме кундсицятнень пильге алов.
— Иля вакно, седе эрязасто кедтнесэ яксевтть! — пеедькшнезь, пулттнэнь кандтнемадо сеедьстэ лексезь, серьгедсь Юртайнень Олдай. — Каня а неят, якстере эвсь, — а кенерят мельганок?
— Эрде, эрде, начко пулот, ансяк кандтнеде, — эзь максо пря, пукшо ваксскак эзинзе путо згилямонь валтнэнь «якстере эвсесь». А мезть кежиявтнемс, тетязо казинзе тензэ якстерть-тюжа чертнень-сакалотнень ды лапужа судонть. Ков молят...
Кузаень Мияна, омбоце ёндо шабрань аваломанесь, седе ламо чатьмонсь. Керязонь Валдоня, Элювань уряжонзо тейтерезэ, Олдай ды Элюва сонсь вачкасть анокстазь таркас кандтнезь пулттнэстэ «пандят». Эрь, пивсыця, пивсэк, чукак! Иля вансто виеть!
Пурнавсть аватне ве курынес. Оймень полавтомо. Ёвтама, кие мезе течи пансь, кинь чапаксозо беряньстэ кепететсь, кие зяро потявтсь скалстонзо, кинь мезезэ сэредсь, кие кинень якась...
— Мезе, ават, ушодтано? — пе путсь кулятненень Олдай ды кепедизе пивсэманзо — недезэ валаня, цивтёрды: покштязо зярдо-бути теекшнизе, кода а валакады зняро иень перть.
Сайнизь кедьёнксост лиятнеяк.
— Чангодть, Инешкипаз, лездак, Масторава, — мерсь Элюва ды васенцекс нолдызе пивсэманзо.
Чук! — жойнезевсть каршонзо сырнень прятне. Мельганзо риштясь Олдай, мейле Мияна, меельцекс Валдоня. Лиссь мельцек-мельцек: чук-чук-чук-чук... Васня пивсэматне тёкаесть чуросто, мейле седе сеедьстэ, сеедьстэ, саевезь лувсо.
Ток-и-токи, ток-и-так... Ток-и-токи, ток-и-так... — васов, веленть пес марявсь пивсэматнень кенярксов дубордомась
[254] Чуки-чуки-ка-ка, чуки-чуки-ка-ка... — марявсь аламнеде седе лиякс маласто, эстест пивсыцятненень.
— Ладинек! — шалтонть пачк кецнезь серьгедсь Валдоня, ашо, келей чама мазый авась. Псиденть, мельспародонть чамазо палозь палы.
Аволь эрьва марто, аволь свал сеске саеви риштямонь лувось. Лиясто пивсэмань цётмаркатне-кичатне эшксевить вейкест-вейкест эйс, лиясто кальмавкшнитькак. Вант ды вант, илязо понго киненьгак пря ланга... Истят апароткак лиснить. Течи вана аватнень тевест ушодовсь, видеяк, киштезь.
— Лекстядо, ават, — сэтьме, аволь кажаня вайгельсэ пшкадсь Юртай.
Аватне «оймавтызь» кичаст-пивсэмаст, шаштсть ве ёнов. Юртай шожда сянгинесэ кундась олготнень сорновтнеме. Каштмолезь ютызе «пандянть», ютась омбоцеде. Текень тейсь лия «пандянть» мартояк — явсь товтнеде олгонть.
— Весе, ават! Эсень тевем теия. Ней — тынь! Аламо кадовсть апак певерде, весть ютамга!
Юртай калаш-кулаш мольсь одониянть ваксс, кона, неявсь, алкиньгадсь. Куляз атя озадо аштесь пулттнэнь лангсо вере. Кувака ожа панарозо педязь педясь келей лавтовтнес, алга вейкетьстэ наразь шержей сакалонзо сравтовсть мештензэ келес, пондакш сельмечирькензэ алдо вановтозо сэтьме, ванькс. «Тронсонзо» озадо аштезь, сон мольсь кезэрень пингень Тюштя ёнов. Оймсесь. Учось Юртаень тевень прядоманзо.
Сась Виряз атяяк. Сон те шкас котьмась кардазсо, витнесь-петнесь утомтнень: козонь лазпине эрявсь чавомс, косо варинетнень сёвоньсэ ваднемс.
— Шумбратадо, ават! Ванан, тевенек кополсо ардыть, — гайгиця вайгельсэ, Куляз атянень кедьсэ чирьказь, пшкадсь сыцясь.
— Кополсо-аволь, сыргамс сыргасть, — каятотсь верде Куляз атянь эчке, прок васолдо пурьгинень урнома, [255] вайгелезэ, — ансяк, пелян, илязо карма кольгеме менелесь, вельть уш вень перть ловажан чулксететсть.
Виряз варштась верев.
— Менелесь чатьмони. Туиндеряй — берянь. Теке марто, пиземне эряви. Сонтемензэ понкстнэ лавшомить, кадовтано розень кшивтеме.
— Те виде. Юртай, ютака, почаксыть аватнень олгост, — кармавтсь Куляз атя, верде алов ванозь, — варштак, паряк, явомскак шказо... — ды поладсь: — Те тон, шабра, видестэ ледстик: пиземевтеме тундось стакалгады. Лов алов видевкстнэнь савить вельтямс тундонсетнесэ. Тевтне, ловт, кавксть ламолгадыть. Видьметькак кармить эрявомо. Паро, кинь кадовить.
— Пекетнеяк урномо кармить! — серьгедсь Виряз ды кевкстсь: — Кодамо тев тень максат?
— Зярс а эряваткак. Чикуншка малава сак... Ужо, ужо! Кундака, атя-парочи, аламос аштезь понжавтомо. Ансяк вана варминезэ ёмась. Зярс сайть пивсэма ды... Велувс пратадо ветененк? — прок менель ёжосто сравтневсть тингелангонь келес Куляз атянь валонзо.
— Снартсынек... — эль марявиксстэ мерсь Виряз ды саизе тевтеме аштиця кичанть, кона прок учось сонзэ.
«Ветецесь» стясь аватнень марто омбоце «пандянтень».
Тевесь седеяк лаказевсь. Виряз атя совась эшксемань лувонтень. Марявсь, веленек кунсолыть пивсэматнень вейкест-вейкест марто пелькстамонть. Ютасть весть, ютасть омбоцеде. Коське пулттнэ чукавсть куроксто. Омбоцеде ютазь велявтсть уш олгокс. Виряз атя кадызе авань кужонзо. Сайсь сянго ды кундась Юртай марто явомо. Цёратне явизь олготнень, айгизь пивсэзь товсюронть оровтс. Ушодсть понжавтомо. Юртай чувтонь коймесэ товтнень верев ёртни, лездыцязо калгсемасо, тарадонь тенстьсэ, оровтонть «вадяши», панси олгонь шукштнень.
— Верев седе, верев! — пеедькшнесь Юртай лангсо Виряз.
Тона ливезькадсь. Улевельгак паро варма, сюватнень [256] сеске саевлинзе, пек верев кайсемс аволь эряво. Ней вана ламот валгить мекев оровтонтень. Псилгадат...
Аватне кандтнесть пултт, тейсть од «пандя».
— Варштадояк! — серьгедсь кие-бути.
Чивалгомась копачавсь тандавтниця, чопода-сэнь пельсэ, кона келейгадозь уйсь веленть ёнов. Кувать апак учо копачизе чипаенть. Чополгадсь. Прок сундерькст састь. Менелесь лекстясь лов экше коштсо. Васолдо-васолдо каятотсь, зярс лавшосто, прок мельде-валдо, пурьгинень урнома.
Элюва арсекшнесь серьгедемс важодицянзо ярсамо. Ней теде арсемскак ульнесь а мезть.
Эрязкалезь кундасть «пандякс» «мадстнезь» пулттнэнь стявтнеме — копоняс вачкамо. «Васняяк, — арсезевсь Куляз атя, — эряви ванстомс одониянть. Пачк илязо лоподе, мейле а костяви». Секскак серьгедизе Виряз атянь верев, ды кавонест, кавто атят, бажасть теемс сонзэ седе цёцянякс, седе пшти прякс, илязо соваво начкось потс.
— Юртай! Чийть седе курок ябунцянть мельга! — талнозь серьгедсь камажа пиле Виряз. — Латало, несак! Пивсэзенть, васняяк, ванстома...
«Куш чокшнес кирдевлизе эли кавтошка-колмошка част максоволь, — чарасть-велясть Элювань превсэ мельтне. — Одониянть а копачасак, пивсэзенть куш кекшемс». Варштась ды неезденть седеяк капшазевсь кедьсэнзэ чувтонь коймесь — бажась седе курокке айгшемс товтнень оровтс.
Ансяк нардавсть-пурнавсть товтне, прасть кснавонь покшолмасо пиземень васенце эй кельме байгетне. Седеяк экшендсь. Кирнявтнезевсть модас эшкевемстэ цярахманонь эрьгеть. Пувазевсь аера вармине. Пивсыцятне ношкстасть кудов, латалов кекшеме. Куродынзе набой обуця пиземесь кардаз видьс аламнеде апак пачкоде. Тусь лосьсэ. Латонть алов путозь паресь ды очкось торнозевсть латосто чудиця ведтенть.
Элювань потсо потязь потясь мелявксось — пельстеезь тевденть ды пиземеде мейлень ёмавкстнэде. «Кеман, те [257] лоподемадонть пургондамо а кармить: а одониясонть, а оровтсо», — оймавтызе оймензэ латалов эрязасто чиемстэ.
Пиземень кельме банядонть мейле кудонь лембесь раштась паро ёжот, пеедькшнемат, мизолкст. Кармасть коськеме лавтовга-кутьмерьга начко оршамопельтнеяк.
Каванясть Пиргужт покшчинь каванямосо. Сывель ям, рестазь модарькат, ансяк салтозь куярнэть, чапамо ловсо, прякат... Путсть, содазь, суликаяк. Аватне ансяк турваст начтнизь. Олдайгак, лиятнень лангс ванозь, эли, паряк, мезде-лиядо, эзь правто цярканзо кепсеме. Весемень кис копорясть Юртай ды Куляз атя. Эзть визде. Кепсесть цяркаст пивсэмань ушодксонть, кудазортнэнь, пизементь кис... Кепсесть зняро — Юртай лиссь стуворонть экшстэ тей-тов чиремкшнезь. Куляз атя — крежа кандо. Сонзэ а сявордсак. Симезденть ансяк вайгелезэ седеяк урнозевсь, секень вант, кенкшесь вийдензэ панжови.
— Валскес, валскес, — вейке омбоце мельга ёвтызь ильтема валост ды габор-губор лиссть кудостонть.
Мельгаст куроксто сыргасть аватнеяк. Сынст ютксо истя эрси чуросто.
Юртай, Ураень видьмесь, кинь апак кочксе, видьстэ пиземень ведьганть эскелязь, кирдсь ёнкс кудов. Мольсь ды эстензэ марямга мотордсь мезе понгсь: «А! Симан, симан, теке лишме. Мекс лишме? Мекс а скал? Эли реве? Лишме... Симан зняро, зяро понги. Э-эх, баяга пря! Мекс истя зняро каят? А? Ёвтык. Арсят весе чапамонть пачкат нолдамс? Превтеме айма! А нолдави! Чапик судопрязот: а нолдави! Мекс эно а кадсак? Кадык ды весе. Кармат лиятнень кондямокс — «паро ломанекс», «превеекс». У-уф! Паро эрямось! Мезекс монень неть «паротне»? Мон истякояк вадрян. Кадык копорян. Мейле мезе? Монь тевесь. Вай, мекс мон, алкукскак, тонадынь чапамонтень? Тетям эзь симне, авадон кортамскак а мезть. Сисем патянгак а содыть, мезе те истямось. Тон жо, сисем тейтерде мейле муевкс, оно мезе теят. Эх, мамагай, мамагай! А Олдай авинесь а берянь. Потензэ налксезь налксить. Мезе, бути чиявтомс? А? Иля арсеяк, баяга пря! Каня лиси истямонть экшс? Кадык эно, [258] мерян, лиси. Мейле мезе? Валске жо мекев ношксты. Кинень, кодамо аванень эряват удый катерьзанот марто?!
Эх, яблочко!
Куды катисся...
Кадык а лиси. Мейле мезе? Ськамон седеяк вадря. Кияк а сёвны. Ды мекс ськамон? Чапамось каня а ялга?
Эх, ябло-о-очко!..
Ха-ха-ха! Весе вадря, Ураень Юртай, иля лырнэ, кецнек, морак, киштть.
Адядо, ялгат, розь паксяв,
Розь паксяв, розь паксяв...
...Лездамо сакшныцятне срадсть. Кудось општ мерсь. Каштмолеманть колызе Элюва.
— Мон теть исяк мезе меринь? — ушодсь човсеме «квартирантонзо».
— Содан, — музгордезь ёвтызе валонть тона.
— Мекс эзимик кунсоло? Мекс свал каршо? Содат, мезе лиси товсюронть марто?
— Содан. Модась пильгенек ало а лыказеви. Лиси чись, костясы, ды поладсак пивсэманть. Вана мезе лиси, — валтнэнь кевензасто ёвтазь, каштансто мерсь Виряз атя стувор пес озамсто.
— А манейгадындеряй?! Неят, таго копачизе? — машнетезь невтсь кедьсэнзэ вальманть пелев Элюва. — Неят, менелесь мезе теи?
— Карминдеряйть лодорсо прамо кевть менельстэ, — нарьгазь, ингелькс валсо полавтызе Элювань кортамонзо Виряз, — сестэ мезе?
— Саты теть ремедемс! Азёка пенчтнень-вакантнэнь шлить. Аштек! Вана сувтементь васня понгавтык тарказонзо. Арась, тень мейле. Азё васня пенчтнень шлить.
— Вантака, вантака лангозонзо! Тон мезе, ярсамот кадсак? Сестэ валске жо а карман пидеме-панеме. Тонсь мелявтт! — кивчкадсть сельмесэнзэ сяткот, кежиявтозь, юв-яв лиссь удалце кудов. Сеске совась мекев.
Виряз чатьмонезь пурнынзе покш ваканс ярсамодо мейле кадовкстнэнь, кедьгетнень, саизе вальмалангсто газетанзо ды озыксэль ловномо.
Кодак неизе Элюва конёв лопанть, чамазо ацирьгадомадонть полавтовсь. «Кие, кодамо идемевсь арсизе-теизе сонзэ, газетанть?!»
— Вант вана лангозонзо! Анок поремс конёвонть. Ваны, ваны эйзэнзэ. Мезе неи — сонсь а соды. Теке тевтькак кудосонть кодаткак арасть, — сялгонесь, мекев-васов яказь, газетань «порицянть». Теке марто каясь покш ваканонтень лембе ведь. Виряз кадызе ловноманзо ды арась нинзэ ваксс. Кавонест болдордсть, шлясть кедьгетнень.
Эзь кенере Виряз путнеме таркаваст шлязь-нардазь пенчтнень-вакантнэнь, Элюва токизе лавтовс ды мерсь:
— Кадыть, адя тингелангов.
— Кадык сорксты аламнеде. Допрок, маряви, эзь лоткаяк.
— Варштака тон, варштака лангозонзо! Мезе а мерят — каршо. Мезе а кармавтат — а истя! Кода тонь марто улемс, превс а саеви.
— Тон неят, мезе ушосонть? — эзь кирдеве, казямосто гайгезевсь Вирязонь вайгелезэ.
— Неян. Тонеть ансяк тувтал муемс. Ансяк мезеяк а теемс! — кежтнеде аванть сэнь сельмензэ полгарьгадсть, пешкедсть а паро сяткодо. Сон ахолдась кедьсэнзэ ды юрк совась икеле кудос.
— Идемак, Инешкипаз, чангодть, — прасть Вирязонь кургосто энялдомань валтнэ. Прядынзе «авань тевензэ», озась вальманть малас ды педявтызе вановтонзо сёрмав лопантень. Ансяк «вансь» эйзэнзэ аволь кувать. Эрявсь алкукскак варштамс, мезе кадсь мельганзо видевкстнэнь туртов истя эрявикс пиземесь.
[260] Менчизе ловномапеленть, путызе вальмалангс, стясь ды апак каштордо лиссь ушов.
«Кода эрямосонть весемесь човорявозь. Ве кудосонть — свадьба, шабрасо — лайшить-калмить. Веенст — вастовсть, омбонст — явовсть. Ды истя эрьва косо, эрьва шкасто. Чопода — валдо, раужо — ашо, чевте — калгодо, сельведть — мизолкст... Истя ульнесь ды карми улеме. Свал. Течинь пиземеськак... Кодат сёвномат-пеняцямот лиссть! Кецнемс эряволь, зярдо сон кандсь зняро парочи! Арась, истя илязо уле, эряви ацирьгалемс... Ушодовсь таштамковось. Аволь улеяк те пиземесь вете-кото чить, кадововлинек сы иестэ розень кшивтеме. Кажось те а вишкине. Эряви таргошкань ютазь варштамс, — велясть Вирязонь прясо арсематне тингелангов яннэванть молемстэ, — начтызе, неяви, куш ков, мик вецана рудаз теевсь. Ютаськак чопоньпелев, пачк лопавтьсы, парсте сотави. Паро, паро, атя! Ансяк вана... мезекс весе те монень?..»
Покш зыян, кода арсеськак, менелень казнесь эзь тее. Куляз атя содась кода улемс — оровтонть сэрейгавтызе колмо-ниле пултсо. Путынзе сынст кода эряви, сравтызе лангаст ябунцянть, ды теевсь ватола лато. Превей, кол атясь! А стяко веленек ловить сонзэ истямокс ды натой лемдизь та-кодамо Сократокс.
Штавтызе Виряз оровтонть. Начксь ансяк верьга, таргавсь ланганзо келькш. «Саемс састынька те келькшкенть, сравтнемс коськеме. Лиятанть, апак арсе, сусекс. Товсюрось коське, кирдть эйсэнзэ куш пинге. Лырнэмс а мезть».
Кузсь аравтозь кузтемаванть пелевидьга вишкалгадозь одониянть пряс. Токшесь, велявтнесь-ваннось пулттнэнь. «Начксть, мезеяк а мерят. Тагояк — аволь пачк. Верьга пулттнэ ансяк. Сельведть ёмсевтемс а мезень кис. Ванды, улиндеряй чись маней, летькетнень озавтнесынек башка-башка. Коськить. Пельчишка сави котьмамс, ков молят. А мезть майсевемс. Допрок эзть лоподе, пиземесь ульнесь коволонь...»
Валгсь Виряз скирданть прясто ды шкань апак таргсе кундась арсезенть топавтомо...
[261] Ушонть самай вадря шказо: а пси — а экше, а кизэ — а сёксь. Сеськетнень-карвотнень налкставикс коволосткак ютась. Ожось токинзе чувтотнень ансяк эль редямга, ансяк тия-тува артовсть килейтнень пиже черест нусманя ёжонь сыргозтиця тюссонть. Лов алов видевкстнэ ванькс, чинь каршо кувтолдыця пижесэст кецневтить сельметь ды ойме. Варштат лангозост, зярдо пельтнень экшстэ лисиця чипаесь юты лангаст ды паласынзе валдосонзо, сельведеть а кирдевить. Истямо мазычи!
Пиргужонь икелев лоткась тарантас. Эйстэнзэ валгсь аволь сэрей, келей лавтов сыре ломань. Сельмес каятотсть прясонзо «купецень» ашо картузось ды истят жо ашо сакалонзо. Сюлмизе лишмензэ панст ведьмеде кенкш палманентень. Ютыксэль совамо, эзь кенере. Чикор-чикор панжовсь кардазонь келей кенкшесь, ды сыцясь вастовсь азораванть марто.
— Иван Паксютыч, тонь истя кона ёндо вармась кандынзить?! — аламнеде абунгадозь ды гайги вайгельсэ вастызе Элюва васолдонь, чуросто сакшныця инженть — умоктояк умонь содавиксэнзэ.
— Кода истя, кона ёндо? Эли стувтык базарсо кортамонок? Мерекшнинь, кадык атят мусамам, кортасынек. Учинь, учинь... Ней ардан Сурвелев. Арсян, сован ютамсто, варштан.
— Ужока, — каясь трокс вал вастыцясь, — те мень тевде истя кортамо ушодынек куринка ютксо? Адя курокке, тосо уш... Стувтык меельце сакшномат? Адя, адя...
Элюва икеле, аволь сэрей крежа инжесь мельганзо, ютасть кардазонь келес панжадо кенкшканть ды совасть кудос.
— Атя, инже вастт! — кенярксто жойниця вайгельсэ серьгедсь Вирязнэнь низэ. Тона кодась карть, киякссонть икелензэ ленге керькст, ленгеть, шукссть-лаксевкст. — Сонсь Иван Паксютыч варштась тенек.
— Шумбрачи, азор! — пештизе кудопотмонть эчке, теке покш торамонь зэрть, вайгельсэнзэ инжесь ды венстизе куяв, нурькине сур кедьлапанзо.
[262] «Вайгелезэ дюм Куляз атянь», — арсезевсь Виряз. Стямсто сорновтынзе кумажанзо ланга сравтозь нуластонть лаксевкстнэнь, путызе эземс цёканьзюронзо, ушодозь каренть ды мельтеме, та-кода нузялдозь венстизе кедензэ. Седеензэ токизе кулелямонь псись, вановтонзо икельга кивчк ютасть седе икелень самстонзо мерьказь таркась, чамдозь пия бутылкатне. «Кода илязо уле, апак кундазесь — а ор», — сась превзэнзэ меельцекс.
— Азёдо икеле кудос. Монтемень седе ве кель-валс пратадо, — ильтинзе Элюва цёратнень ды эрязкалезь кундась анокстамо-ёрамо стувор; пидемадо-рестамодо эзь арсеяк: ломанесь капши, сатыть валскень пидевкстнэ-паневкстнэяк.
Виряз атя, мельганзо Паксютыч ютасть икелев ды озасть пазаватнень ало викшнезь коцтсо ацазь стуворонть кавто ёнга.
— О-о-о, — кувакасто, прок паркстась, таргизе оймензэ Паксютыч, — тедеде Пазось ванызе меленек, сюротне вадрясто макссть. Тынь зяро саиде десятинастонть?
— Кода теть меремс...
— Монь эрьвась, — эзь максо Вирязнэнь прядомс валонзо, сертизе Паксютыч, — макссь кавксоньгемень пондодо ламо, истямо менть умок арасель. Умо-ок! Норовава маримизь.
— Те виде. Ансяк...
— Мезе «ансяк»? — таго каясь трокс вал каршонзо аштиця инжесь.
— Ламонть марто сеедьстэ сюлмсеви питнесь. Мезесь ней седе питней: товсюрось, розесь, пинемесь?
— Питнесь, мерят? Ды сон, теть мерян, эрьва кода менчеви. Кадык сюрот тундос — ве питне, ускик ковгак — лия.
— Те виде. Питнесь полавтневи, — ве мельс прась мартонзо Виряз.
— Полавтневи, ды кода! — вайгелень кепедезь ёвтызе инжесь меельце валонть. — Тынь аравтнинк таркава пурназенть?
— Кода эно... — Вирязнэнь ялатекель, мезде кортамс, ансяк кортамонть кирдемс. Оймесэнзэ псакат ангорясть, нуваргавтнесь ледстнемань а ёвтавикс апаро.
Совась азоравась. Кедьсэнзэ нуласо тапардазь чакш.
Нить-полат совавтсть кши, пенчть-вакант, ашава чапамо ловсо. Виряз атя кундась кшинь печксеме. Элюва капшазь лиссь ды велявтсь мекев ченькс бутылка марто.
— Те а тев, сазорнэм. Мон совинь тевде кортамо. Те а тев, а тев, — вить кедьсэнзэ сакалонзо велькссэ ахолязь, ёвтызе мелензэ инжесь, — шкам овсе арась.
— Тонь арась, минек, арсят, ули? Тесэ мон прявтось, иля тонавто! Сиянь пенчкеде зыян а лиси, — керизе капшицянть азоравась ды кайсесь совавтозденть цяркава. — Ёвтак, атя, зярояк валт.
Виряз аволь ламо кортыцятнеде. Кепедизе цярканзо ды мерсь: «Эрьванень эрямосонть свал улезэ вадря».
Валтнэнь начко чочко ланга чапокс путнинзе: нурькинестэ, чуросто ды, марявсь, аламнеде казямосто. Кодат мельть эвтсть превсэнзэ ёвтазь валтнэде башка, содась ансяк сонсь. Паряк, седеезэ лиякс кортась: «Киньгак эрямосонзо илязо лисе истя, кода монь».
Глинк! — каятотсь суликань ванькс гайть цяркатнень эшкемстэ.
— Совинь кортамо сюронь рамамодо-миемадо. Монь питнем рамамонь... — ды ёвтызе, зяро анок максомс товсюронь ды лия сюронь пондонть кис.
— Истя а туи, Паксютыч, те, ловт, стякодо. Тон, койсэнь, монь ломанькскак а ловат, — пря эзь максо Элюва, згилязь ды аламнеде покордавозь, бажась «озавтомс» рамсицянть. — Мон сестэ кадса сюром тундос.
— Те, Паксютыч, видеяк, манчема, — саизе Элювань ёнксонть полазо ды пештинзе цяркатнень, куш ульнестькак эль чамдозь. Озась седе видестэ. Кедензэ путынзе кумажанзо лангс.
— Вадря. Кадык ули тынкс. Ветешка проценттэ кепедьса, — псистэ ёвтызе мелензэ Паксютыч, икельдензэ пешксе цярканть айгезь. Кепедизе вановтонзо Элюва лангс.
— Сестэ пондонть питнезэ карми... — арсезевсь Виряз ды ёвтызе.
— Вантака, мезе теи! Арась, паро ломань, зняродо миеме а арсянгак. Тон мезе, бажат минек вачодо кадомс? Пельпондояк те питнеденть а максан, аволь пондо.
Кортамось сертявсь.
Седе сеедьстэ ды марявиксстэ яксезевсть пенчтне. Виряз путызе пенчензэ. Кайсиксэль цяркатнева. Эзь саво. Кияк эзь копордаяк.
— Ярсадо, ярсадо, ялгат-инжеть, — чаво валсо вельмевтизе кортамонть Элюва — пенчтне содасть тевест кармавтомавтомояк.
— А тон, Элюва-сазоркам, а полат эзимизь кевксте: Паксютыч, ёвтык, мекс арсят сюронок нельгеме? — бигерьмекс цярнозевсь Паксютычень вайгелезэ, вальма суликатнеяк цийнезевсть.
— Мекс, алкукскак? — цинсть чатьмонемадо мейле пшкадсь Виряз.
— Мекс? — мельга-мельцек пшкадсть «сюронь нельгицянтень» азортнэ.
— Ули, ялгат-оят, тувтал. Покш тувтал. Сакшнось монень ломань. Кемевикс. Ёвтась тень: сюпавтнень пансемадо конёв лиссь. Монь — дух а кавтолдан — амзордасамизь васенцекс. Тынсь чарькодтядо... Истя арсян: рамамс пельпитнеде зярояк сюро, ялатеке кармить саемензэ стякодо, миемс сонзэ — ды седе курок — аламнеде седе питнейстэ ды шлямс пулонть неть таркатнестэ ков сельмень неить. Тынк эйскак, пелян, пачкоди вырновтнемась. Ней онкстынк, миемс-арась.
Теевсь општ. Зэрниця вайгелесь полавтовсь сёксень куяв карвотнень бизнэмасост.
— Арась, — керязь керизе каштмолеманть Элювань човине вайгелезэ, — кадык чеерть сэвсызь, зняродо а максса!
— Пелян, ильведькс теят, коткудавне-авине, — [265] терявтызе оймавтомс Виряз эриця ялганзо, — тевтне, газетатнень коряс, тенень кеверить, мезде корты Паксютыч.
— Виде, виде, — кемекстызе Паксютыч — эрзянь боярось, кода ламот мерить тензэ.
— Арась! — явизе коштонть кедьлапасонзо Элюва. — Зняродо фунткак а миян, кадык сайсызь, истямо питнеде товнеяк а максан.
— Ацирьгалемась — берянь неже, превс берянь путыця. Оймак, — мерсь Виряз ды путызе вить кедензэ Элювань лавтов лангс.
— Сестэ а мезть кортамскак! — чачк лазызе кортамонь лувонть Паксютыч. Путызе пенчензэ, нардызе кедь-коморосо кургонзо ды эрязасто стясь таркастонзо. — Ава марто пелькстамось — сувтемесэ ведень амолямо. Шкам, Элюва сазорнэм, арась. Капшан. Вастомазонок эно! «Аволь умонь валдынем, аволь умонь кеняркскем...» — поладынзе валонзо эсензэ пачк.
Атясь лиссь стуворонть экшстэ, венстизе маралянь ашо ёжопонав кедензэ Вирязнэнь ды велявтсь кенкшенть ёнов. Азортнэ тапор-тупор капшазевсть ильтемензэ.
— Сон уш овсе ормазкадсь, — ульнесть Элювань васень валонзо кудос совамсто, — стякодо, ловт, вешсь иень перть таштазь сюпавчинек. Мезе мартонзо теевсь?!
— Мезеяк эзь тееве, соды, мезе теемс, — витизе Виряз нинзэ-ялганзо эсь мельганзо кенкшенть пекстамсто.
— Те кода истя, кода максомс стякодо сюрот?.. — кирвазсь Элюва. — Шлить-пурныть кедьгетнень!
— Истя вана! Мезе сон ёвтась, «Якстере тештеяк» текеде сёрмады... Тов, тов тевтне ёнкс кирдить.
Виряз совась икеле кудос урядонь тееме, Элюва — мельганзо.
— Те тон мезде? — кевкстизе авась талнозь.
— Седе, мезде кортась умонь ялгат — сюпавтнень пансемадост.
— Мейле мезе?
— Мезеяк арась, — сэтьместэ, теке кортамось мольсь [266] кудоютконь эрьва чинь тевтнеде, ёвтынзе валонзо Виряз атя, — пачкодить... миненек, тонь эйскак.
— Миненек... Ды мон кодамо сюпаван? Кавто лишменек! — сялгавтынзе сельмензэ вакссонзо аштицянть эйс Элюва, лоткась стуворонть урядамодояк.
— Ды скалот, — поладызе Виряз, — кавто.
— Вантака! Каня аламо кинь велесэнть кавто лишметь ды кавто скалт? Мезе ней, соканть эсеть пулос поводемс? — эзь оймаво, мик якстерьгадсь низэ.
— Эсь велеть содасак. Монень маряви, истятнэде, кинь кавтонь-кавтонь лишмест-скалост, аволь уш пек ламо.
— Вантака, мезде арсить... Ды зярдо те апарось ушодови? — Элюва тевензэяк стувтызе, аштесь атянзо вакссо, кунсолось, теке эзь лексеяк, ды яла кевкстнесь.
— А содан... — чирькавтызе прянзо Виряз.
— А мезть кунсоломс Паксютычень, кенгели, арси седе ламо ярмакт нарвамс. Секс, теке цыган, ардтни велетнева. Тонь газетатнеяк текень содыть — кенгелемс. Кинь превс мезе пры — сёрмадыть. Пазоськак а соды, мезе ванды карми, аволь тонь кашторкаесь.
.. .Чоподас, кода свал, атят-бабат котьмасть пиресэ, кудоюртсо. Элюва скалтнэнь-реветнень новолемс лопавтнесь-муськсь. Мейле ракшатнень марто савсь аволь аламо ботамс: симдемс, потявтомс, педямс, кайсемс ловсонть кедьгева... Виряз атя васняяк тейсь уряд аунясо. Штемева вачказь олготнень каинзе-кепсинзе скирдас. Лиссь эйпаро. Ве таркас пурнынзе ды мейле кандтнинзе ауняс сюватнень. Товсюронсетне маштовить андомс. Телесь кувака. Почт ды лав марто човорязь весе сэвевить.
Сундерьгадома малава ютась кардазс, сайсь койме ды лиссь вальмалов. Чоподань самс топавтсь «прявтонзо» кармавтоманть: одс теемс кудонть икельга пирявкскенть. Чувнось варят, кандтнесь тумонь анокстазь палманнеть, пайметь-ологат, кев покольть. Пезнавтнинзе палманнетнень. Сялгизе коймензэ, сайсь мушкор, эскеть ды «педявтнинзе» таркаваст судодозь-лаксезь ологатнень. Чопотетсь. Пайметнес цицинатнень чавномо эзь кенере.
[267] Ярсасть толонь вельмевтезь.
Мадемадо икеле Виряз сайсь мель лазномс-керсемс ды ватксемс карень кодамс зярыя ленгеть. Теске жо, удалце кудосо, кундась тевс каштомикельксэнь азоравась. Вейкесь эйстэст калдордсь пивтемпарьсэ, ой пивтсь, омбоцесь котьмась навоз потсо кирдемадо мейле чопода-тюжа ленгень кирькстнэнь марто.
— Мон уш аволь васенцеде ледстнян, — колызе чатьмонеманть ленгень лазныцясь.
Теевсь општ.
— Те мезде истя, содавлия? — колызе Элюва, пачкодсь каштомикельде. Пивтемпаресь болдордомадо лоткась, энгамсь.
— Самай секеде. Кодаяк эряволь пе путомс та-кода апак кемекста эрямонтень. Кие мон тонеть? Мирде? Аволь. Кие тон монень? Тонгак аволь ни. Те кодамо эрямо: ве пильгесь тосо, омбоцесь — тесэ? Латось вейке, минсь вана — теке леень кавто пиреть.
— А мезть теде ушолемскак! Мон уш умок мелем ёвтыя: конёвсо тешкстазь мирденень лисемадо а арсян, вельсоветэв а молян, кудозон сёрмадстомот а карман. Зяроксть теть мернинь?! Кие соды, мезе кази вандынь чись. Тагояк мерян: вечкеви мартон эрямс — эряк, арась — китне панжозь. Киньгак а кирдян. Монень газетас ваныцят а эрявить.
— Мельсэнь неть валтнэ. Ансяк кода улемс седе тов? Мон а мерян — кемевлить эрьванень. Седеяк — чинь-кавтонь ютазь. Минь жо мартот эрятано кавксоце ие! Ды а кемемс... Те каня эрямо, зняро аштемс эземень кавто чирева?
— Кеман, ансяк... — эзизе поладо валонзо Элюва.
— Мезе «ансяк»?
— Вай, ды мезть а эрсить эрямосонть! — прок тандадомадо сорнозевсь аванть човине, теке тейтерень, вайгелезэ. — Течи солавты, ванды, вант, кшникс кельмевтьсы... Кемть азё!
— Лисни, а кемат. Кудот-чить, таштазь сюпавчить кис седееть ризны-мелявты. Сынь тонеть эрявить, аволь ломань, [268] аволь мон. Пелят. Виде, улевельгак тень ниленьгемень. Эли куш ведьгемень. Ней жо монь иетне сизьгемень малава чарыть, — чамдсь Виряз атя аволь ве иень перть потсонзо кандтневиця ризксэнзэ. — Виде, арсян сюпавчиде-эрьмеде — колмо аршинэнь кувалмосо мода панксто. Лия монень мезеяк а эряви. Мезекс? Мартон тов саемс?
— Содан. Ансяк течи истя, ванды... — эзь арсеяк потамо эсь мельдензэ Элюва. — Арась, чапозестэнть лия чапо а чапат.
— Ванды... А содан. Тонгак а содат. Течинседенть содан — ковгак а маштови. Косо эрян, мезень кис, кодамо тесэ таркам — а содан. Разди седеем теяк: кие мон те кудосонть? Мирде а мирде, ялга а ялга. Сонсь идемевсеськак а соды! Эрян ят велесэ, перькан ят ломанть, монгак сыненст та-косто кандовкс, монгак ят. Кудос сован — таго те ёжось тапардасамам. Содан: конёвсо-печатьсэ седей мелявксон, майсеман а тенсевить. Ансяк...
— Виде, — поладызе Элюва атянзо меленть, — тевесь аволь печатьсэ, печаттемеяк эрить, эрить ломанькс.
— Кить? — лепштизе Виряз кевкстемасо «печаттеме эрицянть», варштась сельмезэнзэ. — Кить, ёвтык! Ламо истятнэде?
— Ды вана...
— Самай «вана»! Мекс-бути тона мирдеть марто венчазелить церьковасо. Монгак истя жо. Ней вельсовет тень вети. Весе, весе мастортнэсэ истя теевить тевтне. Секскак... а мезть ёжовгалемс: «печаттеме» эрить ансяк а ванькс ойметне, — токизе Элювань сэредиця таркас атязо.
— Вантакая, мезть сон ремеди! Те мейсэ истя монь а ванькс оймем, мейсэ киткавчим? Мейле мезе, улиндеряй истямо ёнкс обуцясон? Мезень берянесь? — Элюва лиссь каштомикельде. Оезэ пивтевсь, ванькс коське нуласо нардтнесь кедензэ, сельмесэнзэ цивтёрдсть толнэть.
— Берянесь, содазь, арась. Кедьсэть важодян уш зяроце ие. Беряньстэ-вадрясто — цёрань тевтнень ветян... — Виряз лазнызе ве кирьксэнть, комась, кепедсь киякссто омбоце.
— Мейле мезе? — эзь максо Элюва прядомс мелензэ [269] ленгетнесэ котьмиця Вирязнэнь. — Каня вачодо кирдян эйсэть, кши кочом теть а венстнян?!
— Сюконян. Теке кадовськак.
— Эно мезе? Мезе теть эряви? — карциганокс каявсь Элюва икелензэ озадо аштицянть лангс.
— Тонь кортамга лисни, урьвакстнить ды мирденень лиснить кши... кочомонь кис?! Вай, тирякай... — Виряз понгавтызе лазнозь-лаксезь ленгензэ стенас чавозь эскентень, сорновтынзе кумажастонзо шукштнень, велявтсь нидензэ ды педявтызе вановтонзо чоподасо копачазь вальмантень. — Мон ськамон. Монь, Элюва, кияк арась, весе велявтсть эйстэнь — эйкакшон, нуцькан, кеж кирдить лангозон кавто патян, сазором. Тон теде содат, ансяк содыкскак а тейнят, тонеть ялатеке. Арсят ансяк эсеть тевде. Эседеть.
— Ней мезе, арсят — тердтян вельсоветэв? Иля арсеяк. Мольтяно тов — мезеяк полавтови? — седе сэтьместэ, апак покшкавтне, ялатеке кельме вайгельсэ пшкадсь Элюва.
— Шожда ёмавтомс — стака муемс. Печатесь кадозь кудозон а велявтсамам, чачома велем ёнов кинтькак а невтьсы. Ялатеке урьвакстомадо конёвонть марто седе кемевлинь: ормалгадындерян, лоткиндеряйть якамодо пильгень, а ёртсамак. Ней? Эль мезе а истя, сеске: азё тов, косто сыть. Зяроксть тень марсия?! Парочияк ули иердемасот: икелень пизэзэнь кенкштне панжадот, мезеяк, кодамояк конёв а кирди туемс тонь эйстэ. Вейсэнь эйкакшт а сюлмить.
— Лисни, стяко музгордят лангозон. А мезть капшавтнемс советка-кува, пурныть кармот-курмот ды кшу-кшу... Кенкштне, кода тонсь мерить, панжадот, — мерсь Элюва а мезень теемадо стуворонть юв-яв нардтнемстэ.
— Берянесь вадрявтомо умок куловоль, — прядызе Виряз кортамонзо вейсэнь чартьчисэ. Велявтсь вальмастонть, саизе ужосто нартемксэнь тенстенть ды тенсинзе мельганзо шукштнень.
«Шказо чиремемскак», — сась мелезэнзэ. Панжизе икельце кудос кенкшенть, кайсесь ды — ювк велькс потс.
Шилдорк совась Элюва.
Велькс потсо аштицянть стямс мелезэ арасель. Ды мезеяк а теят, савсь. «Сырькаенть» валонзо видельть. Штавтызе вельксэнть, автордынзе эземс каязь понксонзо-панаронзо ды, теке сулей, ёндолк ютась мартост тона кудос.
«Видестэ редязь, — одс мадемстэ ледсь мелезэнзэ содавикс валмеревксэсь, — тантей лангс тантейть полавтнемс — стяко шка ёмавтнемс. Вейкеть сынь, кувака пулотне, ве понань».
— Мелеть, сиякай, топавтыя, мезе седе тов? — згилязь пшкадсь таркастонзо Элюванень, конань ансяк судозо неявсь вельксэнть алдо.
— Саты теть сялгонемс! Чись каня теть эзь сато? — чошнозь мерсь авась ды велявтсь вить боканзо лангс.
Кудопотмось пешкедсь каштмолемадо, кона таргавсь а кувать. Тона пельде, косто-бути каштомалдо, каятотсь цирькунонь цирнема. Мельганзо, лия ёндо, лия таркасто, рангстась омбоце.
«Сыньгак, маряви, вейкест-вейкест марто туцкаемас пачколить. Ломантнекс. Кода мон ды вишка Элюва... Инешкипаз, шкиницянок-идицянок! Лездак чарькодемс, мекс эрятано сёвнозь-кежень кирдезь, мекс шлебердтяно пежетень чеядавкссо, мекс ютавттано моданть-масторонть лангсо пингенек певтеме кенгелезь? Тонь пельде максозь шкастонть комсь-колоньгемень иеть удотано. Сынст эрямостонть ёртыть. Кадовить — ниленьгемень-ведьгемень. Ды сынсткак печтятано кечкерезь, вейкенек-вейкенек дондяезь. Те кода истя? Мекс Теть, Инешкипаз, кодаяк уряд а тееви эсеть кудосо? Мекс истят акирдевикст эйдеть?» — истя Инешкипазонть кевкстнезь, сэтьминестэ кортазь, Виряз чопавтсь Онавань отьмантень.
Валске ёнов содавтызе он.
Кодат сынь ансяк а эрсить!
...Икелень нинзэ марто аштить озадо лей чиресэ. Апак учо леесь сеске теевсь иневедекс. Пе тензэ а неяви. Пижела-[271]сэнь ведезэ чипаенть вановтто истя кувтолды — а вановат. Кепететсь виев варма. Кумбава сиземань апак сода ушодсь пансеме комболксонзо мода чирентень. Сынь сэрейть. Ялатеке экшелицятне кодаяк а лисевить ведьстэнть, вельть вечкеви тенст мартост налксемась. Болдорды седе мазя таркасонть вете иесэ Лиянынеяк. «Ваи, ваи!» — каятотсь авань вайгель. Варштасть нить-полат — аймельгадсть: ведьстэнть лиси цёра, кедьсэнзэ Лияныне. Вирязонь чочизе кирьгадо кодамо-бути вий, бажи рангстамс — а рангстави, стямс — а стяви. Цёрась теевсь авакс, прок низэ, кирди кедьсэнзэ эйденть, нолдызе прянзо ды мизолдозь ваны тейтернензэ лангс. «Ведьпрясь салакшнызе!» — серьгедсь тандадомадонть верьга вайгельть...
Виряз сыргозсь.
Панжинзе сельмензэ, варштась вальматнес. Чоподат. Ашолгадомо а арсияк.
«Те истя мезе мартон? Морянть эзия некшнеяк, ды эрь — моря чиресан. Тюнихань тевть. Он. Мезть ансяк онстот а неят! Пазонть мартояк онстон весть палсекшнинь. Эрси жо, а? Эрявить содавтомс тейтерень. Ие уш эзинь нее. Чей, кодамояк апаро эзь тееве Лияна марто? Паро улевель, ладявольтькак аватне чикуншка ёнксонсетнекс. Тосо, ёвтнить, цёранть сеедьстэ зярыя нинзэ. Кода ладить сынь? Кода а сёвныть? Улевельгак истя, кильдевлия Вармань ды молевлинек Элюва марто кадозь ашком варштамо. Арась, тесэ лият койтне: вейкест-вейкест анокт раздемс, сеске черде черьс кундыть. Мезеяк а теят, вачочинь а содыцясь а содасы вачочинть «танстензэ». Секскак монь неть арсематне — ёвкст. Евкст-аволь, сы таргостонть ардтнян, содавтсынь. Иеде ламо эзинь нее, араселинь чачома велесэнь. Кадык сёксь, молян Пумбра вирев, ютан таркатнева, косоль эйкакшпингестэнь нешкепиресь ды латкось-лушмось, конадо нейгак мерить Нешкепире латко. Эскелян Пуворня ды Кутора пандотнень чирева. Зярдо-бути умок-умок кстыень кенерема шкасто яксекшнинек неть таркатнева авань марто!
Кодаяк а ашолгады.
Удомась одс а тердеви.
[272] А уды, бешоконь, майсевтицямгак, — полавтовсть Виряз атянь арсемань янонзо. — Паряк, кирякстан сонзэ чирес? Умок уш ёжосонзо араселинь. Снартомс бути? Брикстяеме таго карми... Аволь кода од шкасто. Иетне эсь тевест теить. А кочксить, яжавтыть — почткак а кадовить. Сестэ, васень иетнестэ... Сыргозсь-арась? Лексемазо а маряви. Сыргозсь сестэ...»
Айгизе лангстонзо вельксэнть, нолдынзе пильгензэ ды, кавто эскельксэнь ютазь, салава, прок чеерень кундамсто псака, илязо лисе кашторкс, васня озась, мейле штавтызе вельксэнть ды венемсь нинзэ ваксс.
— Вай! Мекс тень а максат удомс?! Кадомак, — удомань пачк мельде-валдо мерсь авась. Ялатеке «брикстяеме» эзь карма. Атясь куроксто кутмордызе поланзо кавто кедьсэ ды матедевсь ней уш талаень шкатнекс. Кутмордазь вейсэ удомась нардынзе нусманя арсематнень, оймень наксавтыця майсематнень, сёвноматнень... Текекс, мерема, нардасынзе сынст моданть лангсо весе мазычитнень марто куломась.