Татю (книга)/Татю/1 пелькс/1

by Раптанов, Тимофей Алексеевич

[ 3 ]

ТАТЮ

ВАСЕНЬ ПЕЛЬКС

I

Леенть кувалт, кальть, топольть касыть, пиже кудряст ваясть леентень. Кальтнень, топольтнень прясо, горнипов ладсо чоледить цековтнэ. Уш истя морыть, истя мазыйстэ вешкить... мик седеет одкстоми.

Татю варштась витев ды омбоце пелев, мейле сыргась алов пандт, П.-Толканов. Сэрей пандо штекаванть валгомсто сорновтнесь сэрей мештезэ.

Алов панд эськельдямось виензась молевтензэ, прок мерят эль снарты прамо. Бути пры, то а кенери кепедевеме пильге лангс, кевери леентень, ды ваи кияк а несы. Истямо пелема таркась намо тандавтнесь Татюнь. Теде мейле пурнась вий, мель ды велявсь одов пандонь пряс, штобу валгомс вирьганть тарадсто тарадс кундсезь.

Мекев велявтомаськак эзь оймавт седеензэ, шкань шкань эщо седеяк пек тандавтнесь те стака тевесь. Сон кеместэ пезнавтсы пильгензэ песоконтень, но кругловой кевтне, прок кснавт пильгалонзо, секень вант кевери леентень ды опи кулявтомо. Друк прок варма сявордызе. Суронзо, прок изамо пейть, пезнасть песоконтень, подсорсо кармась усковомо, пеке киське лангсо алов пандт.

Прячерензэ сравтовсть чамаванзо, кургозо пешкедсь мода пульде.

Кевери... Ков кевери седеяк виензы кевереме.

[ 4 ]Татю седеяк пек неждясь модантень. Эль новоли берекстонть ведентень; вана тейтересь тондавсь вишкине латкинес, кува эрьва тунда чуди лов ды пиземе ведь. Ламо иень чудевть ведесь карызе те латкиненть, самай те яманть, козонь угудявсь Татю.

Сон кепедизе пондакш стомавт прянзо, штеканзо ульнесть раздевть, кенере пакарензэ раздевть ды вить потьстэнзэ чудесь томба верь. Варштась пильге пезэнзэ-леесь прок тундонь чадо пурдавозь чуди алов. Пандонть текшкезэ уш эзь неяв. Ансяк вирь тарадтнэ сюконякшность варманть каршо.

* * *

Иван атянь кудонть чамазо ульцянтень. Конякс марто. Кавто вишка вальминеть, прок киргамо ормасо сэредиця сельмть — нулковт ды сельведевть, сокорсто ваныть ульцянтень.

Иван атя ломанесь пек бедной. Каладо кудодонзо башка ульнесть кавто тейтерензэ: Олда ды Татю. Олдась умок уш пужи ломанень роботань теезь. Татю эщо прок сал седей — ванькс, од тейтересь ульнесь киненьгак а неявикс севонень каладо кудо юртстонть. Татю тошнанзо, горянзо ютавтнинзе кудо ютконь роботасо. Родной авазо умок уш кулось. Од ава экшсэ мезе ансяк а печки пряват...

Сон зярдояк эзь учне, штобу од авась молевель тарканзо малас ды стявтовлизе удомсто. Арась. Сонзэ прок овсе арасель удомазо. Пельсь мельде, пельсь апаро кулядо. Секс стиль пелеветь, мадиль аштинь чокшне.

Тевтеме сельгень прамс а ашти. Викшни руцят-пацят сиверди пракстат...

Течияк стясь, зоря марто. Евардызе чаманзо ды совавсь уштомс пенгть. Каштомонть каршо стенасонть ульнесь ожа юрошка варя Тейтересь таргизе потомксонть. Сон варштась стенантень, но чувто лий эзь неяв. Эрьва валскень уштома качамо содось прок штукатурка, кевинзась чувтонтень — чувто лазксонтень. Татю ваны, такода мик дива тензэ. Те раужо, содов [ 5 ]стенасонть ушов варясо сырежди валдось. Те самай варясо валдо сулеесь жаднойстэ кармась нилеме кудонь тесна коштонть ды чокшнень штерьдема, сэвтнема мушко пуленть.

„Вадря бу эрямс валдо кудосо“. — Не валтнэ пряванзо ютасть чиезь. Витнизе кода эрявсь, карксонть ды каштомс тонгсь тол. Пенгтнень сыремемс тусто мик пиже качамось теснасто неждясь кудо потолоконтень. Стенасонть варясь аламонь аламонь нильсь те тусто качамонть. Но те варясь эзь кенерь нолдамо кирга парьганзо зняро — певтеме качамонть. Савсь панжомс кудо кенкшенть. Семиясь стякшность тарка стост пельс авардезь, рипакадсть кияксонтень.

Истя чудесть читне ды чудесь эрямось.

Татюнень уш кемсисемге иеть. Од седеесь бажась ялга юткс, ульця чирес. Лисемс ульнесь а мейсэ ды виськс. Те асатыксэсь, нужась пиже чекерькс озась тейтеренть седейс.

Сон лиссь орта ушов ды ванкшны кавтов. Велесь жив. Морыть, налксить. Те а неявикс лаштось то касы седееть, авардезеват „Весела велесь, ансяк а весела эрямось“ — эсь потмованзо думась Татю.

[ 6 ]

Сон эзь сода, кие морась, кинь лаштось сон истя жо эзь сода кинень весела, кинень аканя эрямось.

Сон содась эсь апаронзо.

Татю велявсь кардазов, кармась совамо орта варява, но орта кочкарястонть сезевсь левшень наксадо пиксэсь. Тумонь ортась сяворсь. Мартонзо прась Татюяк ды тапавсь судозо. Теде мейле вайгельсэ кармась авардеме.

Аварсь а секс, што томбавсь. Аварсь апародонть аразь чиденть. Сонзэ раужо сельмтнесэ чияк уш цитнесть сельведть.

Стямодо мейле колмоксть сельгсь, штобу илязсо сай прамо тарка.

Ансяк кенерсь панжомо кудыкелькс кенкшенть ушонть керязь керизе пшти вайгель.

— Татю!!! Тетять маштсызь!.. Те пшти вайгелесь сезизе Татюнь седеенть. Сон васня талакадсь, мейле, тандадоманть пачк, ношкстась орта ушов.

Якань Илькань кудонть те бокасо, коське эрокенть чиресэ, чейтнень пачк чии народось. Чиить, эрьва кие капши васеньсекс.

Эрькенть кунчкасо рудазонть коськемадо мейле каворьксэнть лангс венемсь Иван атя. Велькссэнзэ ожань илиштязь, аштить Писарь Васька, Якань Илька.

— Православные християне, идинк оймем... — Энялдсь Иван атя.

Но народось аштесть ве бокасо. „Намо а мезень кисэ эйсэнзэ... Кундат, штоли, мейле хуть кадык велентькак“ — якась истямо кортавт народонть юткова. Теке марто эрьва раз, кода Иван атя энялдсь не кавто мироедтнэ лоштясызь кува понгсь ды кортавтост ульнесь вейке: „Антихрист, розбойник“.

Васька ды Якань Илька, велесэ васень ломать, сюпавт. Ну вот, Иван нать каршо вал евтась. Ды а евтамскак а кода ульнесь секс, што Иванонь покордызь: „Тон — келя салыть ума лангсто пултон. Тон ништей киска. Тон якат нолсят столь нардавкст.“ Кона народось чийсь ваномо кавтолдсь: „Можо алкукс [ 7 ]кундызь. Секс кияк эзь кунда нельгеманзо. Чийсь Татюяк. Кизэнь чинть пси срунатне невельдсть човонензэ. Не срунатне прок пси сельведь экшелясть Татюнь: сон чопавсь чейтнень потс. Пиже чейтнень ютксто ашолдсь кодстонь викшнень лавтов панарозо. Сон чийсь, перьканзо прок весе кулозь, чейтнеяк прок мерят чувтомсть ды нурьгамсть кельме мастор ежонтень. Тейтересь чии, чейтне прок плетишкат тапардавсть ды прок нарошной а нолдыть тетянстэ капшеме.

— Машт! Рангстась Писырь Васька, сонсь кучкордызе Иван атянь кургс.

— Тетяй!... Тетяй, корминецькем, валдо сельминем — рангозь чийсь Татю. Народось сявордсь кавтов Иван атя панжинзе таргозезь сельмензэ. Сельме валдось сиянь поколькс цитнесь чинть каршо.

— Т-а-а т-ю... Т—а—а...

Се шканть Илька кепедизе узеренть, арсесь пря ловажанть яжамо.

— Тетяй! У-у х-х-у!!! — Татю сэрьсэнзэ прась тетянзо лангс. Кепедезь узересь эль цяподеви сонзэ копорьс.

[ 8 ]— Керик кавтов ды келими прок ватракш. Кодамо сонсь — истят эйдензэяк. — Пижакадсь Васька, сонсь кавто пильгсэ кирнявтсь Татюнь лангс.

— А-а-а!!! — Эйкакшонь лужаня вайгель каятоць коське эрькенть келес. Те вайгелесь ламонь седейс токась. Сон истямо жо а чумо коданя а чумо тетязо. Сынь тетят тейтерть аволь ансяк эсть сала, но мик виздильть вешеме кши коть кавто чить улест вачодо. Татю эщо пижакадсь.

— Месть теинетядо? — кармась кисэст пшкадеме Оська.

Эно, сонсь... тейтересь уш овсе а чумо.

— Теке отродиясь! — рангстась кие бутим ломатнень ютксто. Но Оська, натой эзь маряяк, чийсь Илька удалов ды цопадизе кедьстэнзэ узеренть.

— А максса маштомс, кадык куть ор улезэ...

— Намо уш а эряви маштомс, эцить пеке боканзо ды саты — удалдо каятоць вайгель.

— Оргодть! Монсь кавонест керясынь, монсь отвечан кисэст! — пижнесь Илька. Оська ваксс мольсть эщо кить бути, кепедизь Иван атянь.

Серьдешноенть кургстонзо, судостонзо петнясь верь. Сонсь, прок томбазь максо, весе таргойсь.

Татю мольсь удалост, рикнезь авардсь. Сонзэ мельс ледсь родной авазо. Буто ней сон дроцни эйсэнзэ ды кортавты, штобу лотказо авардемадо. Но ведь алкукс сон арась маласонзо, перьканзо ульнесть турицянь ваныцятне, сынст ютксо ульнесть ламо ломанть калгодо вановт марто ды таштомозь чамат. Мик Пашковна а родной авазо, коната эщо ансяк лиссь орта ушов, неявсь куштазь. Но теке марто ульнесть ламо ломанть, конатнень чамасо палсь такодамо ванькс вановт, жалямо вановт ды прок арсись кортамо: „Якань Ильканень панцызь тень кисэ“. Сельмсэ палсь такодамо кортамо, буто арсить мереме: „Илька ласте артни лангсонок“.

Те вановтось, те мелесь киненьгак ульнесь а чарькодевикс ды пек салава вановт.

— Эх, нужа чи — пшкадсь Пашковна ды кундызе кавал алдо Иван атянь. Кудов совамодо мейле сон [ 9 ]арсесь куземе сонсь кроватс, но тапавт рунгозо стакалгадсь, эзь аштев пильге лангсо — варсодевсь мастор ваксс.

— Тетяй, сяткинем...

Иван атя кепединзе сельме керензэ.

— Эйднем... Мон нать уш живстэ а кадован... Эряк кода маштат, ансяк ва ванст эсь прят... Пазонть иляк стувто, пазось а кадтанзат...

— Седей панкскем, илямизь кадт! — прась вельксэзэнзэ Татю ды вайгельсэ кармась авардеме. Иван атя эщо весть чевстэ кенерсь варштамо, мейле конинзе сельмензэ ды кармась чувтомомо...