Сьӧмдӧмӧн кызӧм
Сьӧмдӧмӧн кызӧм посни челядьяслӧн — вуджан висьӧм. Кагаӧс виӧ, зэв ёна кызӧ. Кузя, дугдывтӧг помала кызӧ. Висьысь сьӧмдӧ: лӧзӧдас, лолыштӧ гора шутёвтӧмӧн, чипӧстӧмӧн. Висьӧм заводитчӧ прӧстӧй кызӧмӧн. Кыссьӧ тӧлысь-кык. Мукӧддырйи дырджык на ещӧ. Тайӧ висьӧмысь регыдджык колӧ бурдӧдны кагаястӧ: зэв ӧд сэк налы сьӧкыд. Виӧ-кызӧдӧ найӧс быд часын, либӧ ещӧ тшӧкыдджыка на. Кузя кызӧмысла кагаыд нэмӧ воӧ, ёна восӧдӧмысла да узьтӧмысла омӧльтчӧ, вын-эбӧсыс бырӧ. Сійӧ и виччысян коръя лолыс петас.
Сьӧмдӧм кызӧмӧн висьысьяслы зэв лӧсялӧ бур сӧстӧм сынӧд (воздух). Сы вӧсна шоныд лунъясӧ висьысьяссӧ колӧ видзны ортсын. Тӧлын найӧ оланінӧ унджыкысь лэдзны выль сынӧд: ломтыны пач, труба восьсӧн видзны либӧ видзчысьӧмӧн восьтывлыны ӧдзӧс. Мед эськӧ висьысьлы оз жӧ веськав пыр мунан тӧлыс. Сыысь ёна сійӧс колӧ видзны.
Омӧль сынӧда, дукаинын оз ков висьысьястӧ видзны. Кызӧдігӧн кагалысь юрсӧ колӧ лэптыны, неуна водзлань копыртны, плешсӧ кырымӧн кутны. Ёна поснияслысь нильӧг орсӧ вомсьыс весавны чуньӧн. Висьысь кӧ сьӧмдылӧ, кувлӧ, колӧ пызйыны кӧдзыд ваӧн. Висьысьӧс оз ков кынтыны. Биалас кӧ сійӧс ёна, сьӧкыда кутас лолавны, пырысь-пыр жӧ колӧ ветлыны доктор дінӧ.
Сьӧмдӧм кызӧмӧн висьысьӧс колӧ вердны кокни, пӧтӧс сёянӧн: йӧлӧн, колькйӧн, яйӧн. Вердны этшаникӧн, но тшӧкыда. Медбур вердны восӧдӧм бӧрын пыр.
|
This work is in the public domain in the United States but it may not be in other jurisdictions. See Copyright.
|