1) Ужась но крестьян калыклэн политика уж ласянь азьлань вырӟеменыз, сумен ужез ужанъёс котьма ужлэн азязы пуксё.
Беспартийной калыклэн азьлань вамыштӥсь политика ужез парти сюрестӥ-а, яке со вӧзтӥ-а мынэмез, асьмелы та уж борды нырысь кутскем бере гинэ тодмо луоз. Соку гинэ асьмеос сое висъяса эскерыны быгатом.
2) Сумен уж нырысь ик партийной ячейкаос вылэ усе. Партийной ячейка ас предприятиысьтыз ужасьёсызлы политика ужен азьветлӥсь, соосыз валэктӥсь дышетӥсь мед луоз. Со ас предприятиысьтыз ужась калыкез пушкын коммунист фракцилэн мылкыдызъя ужаны тупатэм планъяз мед ужалоз. Асьме удмурт областямы зэмзэ ик ячейкаос та дырозь ужась калык азьын политика ужен азьветлӥсьёс ӧй на вал.
3) Ячейкаез ужась калыклы политика ужен азьветлӥсь карон понна, нырысь ик беспартийноёс шоры вазиськонэз, мылкыдэз воштыны кулэ. Беспартийноёс шоры чиньы пыр учконэз, кусып ляб возёнэз но соос шоры зол-зол кеськыса вазьконэз быдэсак порыса куштоно.
Сумен уж борды, эшед шоры кадь вазьконэз, валэктонэз, оскытонэз интыяно, беспартийноёс шоры кеськыса вазьконэз быдтоно.
4) Ячейкаос куке соос беспартийной калыкез валэктыны кутскыса, соослэн юам верамзылы пумит ӟеч валэктыса, кыл сётыса гинэ, азьветлӥсь луозы.
Со понна, ячейка калыклэсь ма юано верано ужзэ тодыса мед улоз, калыкен кусыпсэ юн мед герӟалоз.
5) Та герӟаськон уж, быръем организациосыз (делегатъёсыз, уполномоченноёсыз но мар) матэ карыса, соосыз валтӥсь луыса гинэ быдэсмоз. Горсоветысь членъёсыз, кооператив эштосъёсысь уполномоченнойёсыз нимазы нимазы люкалляса, соослэсь асьсэ эскероно ужъёссэс эскерылыса но умой луоз.
Таӵе кенешъёсын ячейка соослэн юалляськемзылы тырмыт вераны быгатоз, выльысь луоно ужасьёсын но тодматскоз.
Таос сяна, калыклы азьветлӥсь луыны, соослы валтос луыны, волостной но заводской мастерской беспартийной конференциос юрттозы. Таосыз ӵем лэсьтылоно, котькытчы вӧлдоно.
6) Сумен ужен быдэсак ячейкалэсь ужамзэ сяна, нимаз партийной муртъёслэсь но ужан туссэс воштоно. Партийной мурт калык пӧлын партилэн политической представителез мед луоз.
Калыклэсь вичак юалляськонзэ но марзэ, со ячейкае мед вералоз, ячейкалы мед тодытоз. Со ячейкаен калык кусыпез ваче вурись сӥньыс кадь мед луоз.
Огшоры партийной муртэ таӵе ужез ужаны косонъёс, солэн етӥзтэменыз, политика ужез ляб тодэменыз ваче шуккиськоно луо. Таӵе ужъёс нырысь ячейкаын, собере беспартийной кенешъёсын калык борды шуккиськись эскероно ужъёсыз кенешонын тупатонэз кулэ каро.
7) Кыл вӧлмытон ужъёс асьме организация азе, быдэс мугоренызы шонертӥськыса султо. Беспартийной калык пӧлын политической мылкыдын ужанэз планъя огзэ борды огзэ лякыса нуйтоно.
Та уж, та дыръя лэсьтӥськись ужъёсыз (текущий момент) югдытон гожъя мед мыноз.
Кыл вӧлдон уж бордын кампаниез келяны, асьмеос али но ӧм дыше на. Таосыз, дасяськыса, огазе кариськыса келяны, асьмелы дышетскыны кулэ. Та кампаниосыз келяку, вичак партийной эшъёс беспартийноёс борды пыкиськыса мед ужалозы.
Кыл вӧлдон ужез общественной организациосы но выжыятоно.
Соосыз асьсэсыз политика ужез калык пӧлы вӧлмытыны быгатӥсь кароно.
8) Асьме азьын азьло сямен ик умой ужасьёсыз партие кыскон уж сылэ. Та дырозь та уж ог кенешен тупаса уг мын, ӵем дыръя зол умой беспартийной ужасьёс вӧзамы кылё.
Таӵе зол умой ужасьёс нош, беспартийной калык пӧлын туж трос. Быръем организациосын но общественной организациосын уж паськытамъя, зол умой беспартийной ужасьёслы тужгес но трос йылыны кулэ. Таос пӧлын, ячейка сяна нимаз партийной ужасьёс но туж мед ужалозы.
Соослэсь ужан планзэс уж мынон гожзэс умой тодмо карса пуктоно. Сое районъя тупатоно Райкоме та нимаз партийной муртъёсыз люкалляса, 2-3 арня соосын огазьын вичак эскерыны шедись ужпумъёсыз эскерыса тупатъяно.