Сембе ванфтф ярмакнень индустриализацияти/1
Мезе макссихть займатне государствати
Конашк ва оцю лезксокс арсихть государствати займатне няеви тянь эзда, што тяддень кизоня, мзярда народнай хозяйствань строительстваньди государствась нолни 2,2 миллиард целковай, а займатне тяддень кизоть эзда-жа максыхть 800 миллион целковай. Тяста няеви, што тя 800 миллион целковайсь, конац сявф займанкса, моли минь хозяйстваньконь келептеманцты и кемокстаманцты.
А кда афольхть уль займатне, афольхть уль ня ярмакневок, конат молихть минь в.-хозяйстванеконь и промышленностенеконь касфтомс и кемокстамс.
Кда афоль уль тя 800 миллион целковайсь, то саволь кирьфтамс минь строительстванекя. Тянь эзда лисель-ба, што минь лядолемя-ба тя тевса сяда фталу и минь строительстванькя афоль мольстаня вишкста, кода эряви сон вятемс, штоба мяньдемс эсь пряньконь омба масторста товаронь рамсемода.
Вага мес эрь трудяйти, эрь рабочайти, сьора-видити, служащайти эряви рамамс займань облигация.
Эсь лемсна минь займаньконь — индустриализациянь займат — няфцазь што синь эздост дохоць моли совецкай масторонь хозяйствать касфтоманцты и кемокстаманцты, тяжолай промышленность касфтоманцты, од фабрикань и заводонь, шахтань и всякай лаца касфтомаснонды, илятф сьора—видиень хозяйствать одукс тиеманцты, сьоронь шачемать и велень хозяйствать касфтоманцты, ошонь и велень эряхнень йоткса кемя сотксть ванфтоманцты.
Кие-жа трудяхнень йоткса кармай молема сембонь тянь каршос?
Кие рабочайхнень и сокайхнень-беднякнень и среднякнень — эзда кармай молема займатнень каршос? Кие атказай пролетариянь государствати лездомода, кда содасы, што тя государствась рабутай рабочайхнень и сокайхнень эсь мяльснон коряс и што займатне — тя аф кодамовок пожертвование государствати, а оцю выгода трудяйхненьди эстеест?
Анок содаф, што трудяйхнень эзда кивок аф кармай молема займатнень каршос. Тяда инголя советонь правительствать мархта нолдаф займатне няфтезь, што рабочаень и сокаень массатне тя тевть ланкс ваныхть сознательнайста, аф нолдань — мяльхть.
Тяфта синь кармайхть ванома, и эряви ваномс, инголь-пингонь нолдови займатнень ланкска.