Священная история Ветхого завета (мокшень)/О/05
5. Адамть дъ Евать грехс прамда меле эряфсна.
Кодак Адамсь дъ Евась прасть грехс, афкукс панжевсть синь сельмосна, синь няезь апак вельхтяк теласнон дъ кармасть фкя-фкянь эзда виздема. Эстокиге тисть лопань каркст дъ карксасть мархтост; сальде кяшсть шуфттнень ёткс. Шкайсь вешезень синь каендафтомс. Сась Райти дъ кармась серемост: Адам, тон косат? Адамсь Шкайть каршес пшкядсь: Шкабаваз, мон кулине Тонь вайгяльцень, дъ кяшень: мон виздян Тонь эздот: монь лангозе апак щак. Шкайсь кизефтезе: кие теть мярьгсь, тонь лангце апак щак? Ашеть суска-ли тон ся шуфтть эзда, конань марьдонза Мон ашень мярьге теенть ярхцамда. Адамсь мярьгсь: мондиень макссь авазе дъ мон ярхцань.
Эста Шкайсь кизефтезе Евать: тон мес стане тиеть? Евась мярьгсь: монь васькафтомань куйсь.
Эста Шкайсь синь лангозост путсь наказание. Адамти мярьгсь: тон куломозт ливезь потмоса кармат эсь пряцень тряма. Евати мярьгсь: тон сярядезь кармат идень шачфнема, мирдце ули тонь лангсот оцюкс. А куйти мярьгсь: тон сюдоф улят масторть лангса сембе зверьхтнень ёткса; кармат шашнема пекцень лангса дъ модада ярхцама. Дьяволти Шкайсь мярьгсь: масторть лангс шачи Спаситель, конац шятяй тонь пряцень лангс. Сальде тонафтозень Шкайсь Адам мархта Евать, кода Теенза озонкшнема; макссь теест кедень щапт, дъ панезень райста. Райть кенкшензон лангс ладясь толонь палаш мархта Херувим, конанди ашезь мярьге Адам мархта Евань райти нолдамда.