Сальӧ Микулай

by Чупров Яков Иванович

1.

Войвылын ылын выйим из.
Ой, вывті-вывті сійӧ кыз.
Сьӧд кымӧр быттьӧ дӧлалӧ,
Зэв ылӧ сійӧ тыдалӧ.
Сы сайын — важсянь нималӧ, —
Зэв ыджыд кар эм, сулалӧ,
Сэн вина уна юӧны,
Йӧз Обдорскӧйӧн шуӧны.
Зэв ыджыд ӧксы оліс сэн,
Сэн сійӧ вӧлі мувыв ен.
Изсайса йӧзлы вӧлі ай,
А нимыс — Сальӧ Микулай.
Сы ордын быдмис ӧти зон,
Зон сійӧ вӧлі вывті ён:
Кык керка вӧчис айыслы,
Да куим керка дядьыслы.
Вит керка ставыс сійӧ из, —
Ӧд ставсӧ сійӧ кыпӧдіс,
Да нӧшта сымда перйис сьӧм —
Оз бырӧд ӧти мортлӧн нэм.
Сы йылысь быдӧн тӧдісны,
Мир Кадпучиӧн шуисны.
Бур йӧз, дерт, ставыс ошкисны
Да гусьӧникӧн вежгисны.
Кӧть кытчӧ тырмис сылӧн сям;
Да ачыс вӧлі вывті рам.
Ай овмӧс вӧсна тӧждысис
Да сьӧлӧмсянь век рӧбитіс.
Сы понда Сальӧ Микулай
Эз кедзовт, — радейтіс кыдз ай.
Зэв тӧлка вӧлі быдтас пи,
Кыдз шуны, сылӧн веськыд ки.

2.

Эз на и югды асывводз,
Мир Кадпучилӧн Ӧндрей дядь
Сы ордӧ воис пукавны...
Дай корис сійӧс гӧститны.
Дерт, кывзіс сійӧ дядьыслысь,
Да юалӧмӧн айыслысь,
Эз тшапитчы, эз ӧтдортчы, —
Дядь ордӧ мунны мӧдӧдчис.
Кыдз муні сійӧ гӧститны,
Эз удит весиг чай юны,
Водз ӧшиньӧдыс видзӧдліс
Да дядьыслысь друг юаліс:
— «Дядь! Видзӧдлы лок, видзӧдлы,
Лок таті, таті видзӧдлы.
Со ми дораным войӧдіс:
Код сійӧ сэтшӧм дадьяыс.
Дядь ӧшиньӧдыс видзӧдліс
Да Кадпучилы висьталіс:
— «Зэв ыджыд ӧксы войвылысь,
Став рытыввывса тундраысь.
Сэн сійӧ медся вылынджык,
Дзик некод абу ыджыдджык,
Сы кындзи рытыв тундраын
Да тундрабердса ягъясын.
Мед кывводз вылас веськалам,
Лок мунам ӧдйӧ, тэрмасям.
Мый шуас сійӧ — кывзылам,
Мый выльыс выйим — юавлам».

3.

Зэв ылӧдз кыссьӧ, быттьӧ гез,
Чим югыдгӧрд да югыдлӧз,
Сод вывсянь паськыд дона ной,
Да сэтшӧм мича — вой, вой, вой!
Сэн сулалӧны пищальӧн
Кык салдат Сальӧ Микуллӧн.
На костті пырӧ нимкодя
Ной кузя пытшкӧс горнича.
Выль гӧсьтыс Сальӧ Микуллӧн,
Рытвывса ӧксы тундралӧн.
Сы морӧс вылын волялӧ:
Кызь ӧти металь ӧшалӧ.
Эз вывті манитчыны дыр, —
Чай пырысь — пузьӧдісны — пыр.
Быдсикас сёян, сёй кӧть мый,
А медся уна нянь да вый,
Да дона вина пызан тыр,
Кӧть мында ю, оз некор быр.
Мый колӧ вӧлі юисны,
Дай варовитны мӧдісны.
Гӧсьт оліс чӧв чай юигчӧж,
Медбӧрын заводитіс ньӧж:
— «Эн скӧрмы, Сальӧ Микулай,
Ме эг лок юны тэнсьыд чай.
Тэ тӧдан? — Менӧ суис шог,
Тэ дінӧ выйим ыджыд мог.
Быдторйыс менам уна эм,
А медся уна кӧр да сьӧм.
Ме сьӧмас тӧкӧтьӧ эг пӧд, —
Дзик некод сылы лыд оз тӧд, —
Куш кӧрыс менам дас кык сюрс,
Кор вӧрзьӧдчасны, кыптӧ бус.
Дзик весьӧ вошӧ менам кӧр:
Зэв уна быд пельӧсын вӧр.
Дзик некодлы сэн ыдждавны.
Ме локті питӧ медавны.
Тэ сійӧс быдтін, тэ и ай.
Вай медав сійӧс, Микулай.
Ӧд тэнад детинаыд ён,
Ог жалит сы вылӧ ме дон.
Ме сета сылы вит сюрс кӧр,
Мед сӧмын кӧрӧс оз ну вӧр.
Мем лоас сійӧ веськыд ёрт,
Став тундра вылын ыджыд морт».
Оз тэрмась Сальӧ Микулай.
Кыввидзны мӧдіс кыдзи ай:
— «Ме быдті сійӧс ичӧтсянь,
Эз весь сёй сійӧ менсьым нянь.
Кыдз ыджыд морт, век лун и вой
Зэв ёна уджаліс, зэв збой;
Зэв уна вына — вывті ён,
Дай тӧлка сійӧ менам зон.
Став овмӧс менсьым нуӧдӧ
Дай кӧръяс бӧрысь видзӧдӧ.
Ӧд сійӧ менам олӧмӧ, —
Ог вермы сетны сійӧс ме.
Вай чокнитчам да юыштам!»
— «Оз некыдз югды олан сям...
Тэ он кӧ медав, ог и ю.
Ог сэсся нинӧм тэныд шу».
— «Он ю кӧ кисьтӧм чаркатӧ,
Он пукты мортӧ менӧ тэ».
— «Но, юам, юам либӧ вай,
Да медав питӧ, Микулай.
Он жӧ ӧд нэмтӧ сійӧс видз,
Мый прӧста скупитчыны сідз.
Кӧть мыйта донсӧ менсьым кор,
Сы вылӧ сета ме быдтор.
Ог жалит ме сы вылӧ дон.
Вай висьтав, висьтав, сетан он».
— «Эм менам нянь, эм менам сов,
Мем доныс ниӧти оз ков;
Эм менам, ен мед видзас, кӧр,
Дай сьӧмыс некытчӧ оз тӧр.
Ме шуи тэныд кыдзи ай.
Кӧть мында дон сы вылӧ вай,
Кӧть мында сьӧм кӧть сет, не сет, —
Ог вермы сетны сійӧс тэд.
Дай сійӧ ачыс абу том;
Эм сылӧн юр, эм сылӧн вом.
Тэ юав ассьыс меысь водз,
Мый шуас — окотитас оз».
— «Эн лӧгась, кывзы, муса зон,
Тэ вывті збой, тэ вывті ён,
Тэ верман меным отсавны.
Ме локті тэнӧ медавны.
Ме тэныд сета ыджыд дон,
Вай медась меным, муса зон».
— «Эн мекӧд сёрнит, айӧкӧд:
Ме нинӧм сы йылысь ог тӧд»:
— «Он часӧн бергӧд сылысь ныр:
Ме сыкӧд сёрниті нин дыр;
Мед тэнӧ меным медавны,
Водз тшӧктіс тэнсьыд юавны.
Вай ачыд висьтав: кӧсъян он
Тэ меным медасьны, бур зон?»
— «Ме кӧсйыся тэд медасьны,
Мед сӧмын ай-мам лэдзасны».
— Вай, юав, сідзкӧ, айыдлысь
Да кор сӧглассьӧ мамыдлысь.
Ме чайта, строксӧ куим во
Ми пуктам. Сыысь водз он во».
— «Ме мӧда мунны, муса ай,
Эн скӧрмы, — лэдзлы менӧ вай.
Лёк, гашкӧ, нинӧм сэсь оз ло.
Кыдз тырас шуӧм куим во,
Бӧр воа гортӧ пырысь-пыр.
Ӧд сійӧ абу вывті дыр».
— «Тэ мӧдан мунны, — ме ог тӧд...
Вай ветлы, сідзкӧ либӧ, — мед.
Тэ, видзӧд, сійӧс бура видз», —
Выль гӧсьтлы Микул шуис сідз.
Сы бӧрти найӧ мӧдісны
Ньӧж пасьтасьны да кӧмасьны.
Кыдз колӧ йиасялісны
Дай сэсся киасялісны.
Кыдз толькӧ дадьяс пуксисны,
Дзик быттьӧ бордйӧн лэбзисны:
Бус, пурга сӧмын кыпавлі...
Эз нинӧм сэсся тыдавлы.
Став керка коли шы ни тӧв.
Эз сӧмын гозъя овны чӧв:
Век бӧрдісны да бӧрдісны...
... Нин коркӧ дыр мысьт дугдісны.
— «Кӧть яран вӧлі быдтас пи,
А вӧлі миян веськыд ки.
Кӧть бокӧвӧй да, быть ӧд бӧрд;
Нянь-солӧн сьӧлӧмтӧ он верд».
Тадз ӧксы гозъя шуисны,
Кор пиныс понда шогсисны.

4.

........................................
Со локтӧ матын, аддзӧ син
Мир Кадпучилӧн оланін.
Со синмӧн тыдалӧ нин чом,
Чом дорас кӧрыс, быттьӧ ном.
........................................

5.

Вылинын олӧ яран зон,
Век важ кодь вына, важ кодь ён.
Век ноксьӧ быттьӧ пӧрысь бес,
Кор вайӧ ва, кор вайӧ пес.
Пес вайны ветлас ӧтчыд дзик,
Да тырмас сійӧ тӧлысь кык.
Ӧд сымда ӧтчыдысьӧн пес
Оз вермы вайны ачыс бес.
Оз уджыд тырмы сылы дыр,
Оз виччысь, вӧчас пырысь-пыр.
Зэв паськыд вӧлӧм вежӧртас:
Быдторйыс сылӧн юрас дась.
Эз ов на весиг вежон кык,
А тӧдӧ коді кутшӧм бык.
Он некор некыдз сійӧс йӧрт.
Сы понда сьӧлӧм вылас, дерт,
Кыдз тӧлка, збой дай вына морт
Сэк воис ӧксылы выль ёрт.

6.

Сідз дыр-ӧ-недыр олісны,
Дай ӧксы гозъя мунісны.
На пыдди коли яран зон,
Сы вылӧ лача лои ён.
Сы дінӧ коли налӧн ныв,
Кок улас кыссьӧ юрси йыв,
Зэв мича, зэв на ачыс том.
Гӧрд мырпом быттьӧ сылӧн вом.
Зэв тӧлка, велӧдчӧма ныв.
Оз шулы некор прӧста кыв.
Он некыдз сійӧс нылӧн чайт,
А сӧмын сылы ар дас квайт.
Том нывлӧн оланіныс чом.
Став уджыс чом дор посни пом.
Оз весь ов — уджалӧ лунбыд:
Кор пуӧ рок, кор пуӧ шыд.
Пыр вурсьӧ, либӧ пыртлӧ лым,
Кор вурӧ мальча, кор и пим.
Оз прӧста ов и мужик морт, —
Войвывса ӧксылӧн бур ёрт.
Кӧр дорӧ ветлывлӧ быд лун,
Мед кӧрыс некытчӧ эз мун,
Да вӧчӧ чера-пурта пом.
Сідз олӧ миян мойд выв чом.
Сідз олӧны да вылӧны,
Кор немтор вӧчны — сьылӧны
Роч ӧксы ныв да яран зон.
Тшӧтш сьывлӧ накӧд налӧн пон.
Кӧть яран вӧлі миян зон,
А вӧлі вывті сійӧ ён,
Дай зэв на вӧлі ачыс том,
Дзик роч кодь вӧлі сылӧн вом,
Сы кындзи рочлӧн кодь жӧ ныр,
Дай мича югыд вӧлі вир.
Сы понда нывка, кӧть и роч,
А сылы муса лои прӧч.
Дай сідз жӧ нывлы олан ёрт
Зэв мусмис, воис, кыдзи морт,
Зэв ёна сьӧлӧм вылас, дерт,
Ӧд ассьыд сьӧлӧмтӧ он берт.
Эз найӧ думайтчыны дыр, —
Пи чужис налӧн пырысь-пыр.

7.

Рыт сёрӧн ӧтчыд Кадпучи
Чом дорын пестіс ассьыс би.
Сы дорӧ воис дадья дас,
Дзик ставыс посни кӧраяс.
Мир Кадпучилы шуӧны,
Сы ёртлысь гусьӧн корӧны
Кӧр дас кымын ли, унджык ли.
— «Код гусьӧн корӧ — ни-ни-ни,» —
Мир Кадпучи сідз висьталіс
Да бӧр гортаныс ысталіс.
— «Ог сет ме тілы ӧти кӧр».
— «Мед гуас кӧртӧ тэнсьыд вӧр».
Сідз паныд сылы шуисны,
Дай лӧгасисны, мунісны.
Мӧд асыв сійӧ сувтіс водз.
Кӧр дорас вӧлӧм уна додь.
Пыр тӧдіс — волӧм сэтчӧ вӧр,
Пыр тӧдіс — гуӧмны дас кӧр.
Эз повзьы, муні пырысь-пыр.
Кок улас чиргӧ арся чир.
Кыдз воис, шуис пырысь-пыр:
— «Ті понда эз ло оландыр.
Ті, зонъяс, гуӧмныд тай кӧр.
Эн суссьӧй, вайӧй ӧдйӧн бӧр».
Сідз-тадз да мый да, — пыксьӧны
Оз сетны найӧ, суссьӧны.
Мир Кадпучилӧн пузис вир:
— «Эн суссьӧй лучшӧ прӧста дыр.
Ог некор гусясь, абу вӧр,
Но тӧда тіянсьыныд кӧр.
Оз пӧръясь некыдз менам юр:
Со менам кӧрлӧн тайӧ сюр:
Ті сёйӧмныд нин сійӧс... мед.
Ті кӧнкӧ чайтад, ме ог тӧд.
Ме тӧда аслам кӧрлысь пас.
Ті ставсӧ гуӧмныд кӧр дас».
— «Тэ мыйла воин? Кутшӧм кӧр
Сідз миян ордысь коран бӧр?
Мый гуим тэнсьыд? Кодыр? Кӧн?
Ми эг на гулӧ весиг гӧн.
Ни гӧн, ни гӧн пом некор эг
Ми босьтлывлӧ на юавтӧг.
Ми костын некод абу вӧр.
Мый сӧран, ас пытшкад он тӧр.
Ми тэныд сетам сэтшӧм кӧр,
Мед некор гортад он во бӧр.»
Тадз гусясьысьяс шуисны
Дай вины сійӧс кутісны.
Эз ёна повзьы Кадпучи,
Эз тірзьы ньӧти сылӧн ки.
Эз тэрмась. Ньӧжйӧникӧн зэв,
Эз равзы-горзы: шы ни тӧв
Додь бердӧ найӧс кӧртавліс
Дай туйсӧ ассьыс весаліс,
Кыдз шулывлӧны, мавтіс лызь.
Со гӧгӧр лымъяс, быттьӧ пызь.
Дзоньвидза гортас воис бӧр,
Тшӧтш ордас вайис ӧкмыс кӧр.
Сы бӧрын сійӧ пырысь-пыр
Кӧр дорӧ муні, эз во дыр.
Кӧр гуысьяслӧн гӧтыръяс
Сэк кості локтісны морт дас,
Чом ӧдзӧс мыйӧн восьтісны,
Пыр нылӧс вины босьтчисны.
Эз сёрмы весиг ӧти си:
Дзик сэтчӧ воис Кадпучи.
Сы бӧрысь кӧрсӧ гуысьяс
Зэв скӧрӧсь воисны морт дас.
Чом дорӧ мыйӧн воисны,
Мир Кадпучилы шуисны:
— «Ог повзьӧй, ӧксы, тіянысь,
Он пышйы ӧні миянысь:
Шань — ӧтчыд сідзи мавтін лызь.
Вай бурӧн миянлы кӧр кызь.
Ӧд бурӧн ми костысь он пет, —
Мый корам, сійӧс он кӧ сет.
Вын судзас миян тіянкӧд,
Эн водзсась прӧста миянкӧд.
Оз ликмы тэнад сымда вын.
Он бурӧн миянысь тэ мын».
— «Мый прӧста сідзи ошйысяд,
Кыв вылад песад аслыд гайд».
Сідз шуис налы Кадпучи,
Эз повзьы. Некодӧс эз ви,
Кӧть скӧрмис сідзи, быттьӧ би.
(Морт вылӧ эз на лэптыв ки).
Эз гырканыс, эз водзаныс,
Ён нярталаӧн бӧраныс
Кузь кияснысӧ кӧртавліс
Да ӧтилаӧ домаліс.
Да орччӧн ставсӧ разьгӧдіс,
Бӧр гортаныс сідз мӧдӧдіс.
Сы бӧрти сэсся некор эз
Кӧр гуны волывлыны йӧз:
Мир Кадпучиысь полӧны,
Век бурӧн сылысь корӧны.
Дерт, бурӧн сетіс Кадпучи:
Прӧст вӧлі сетны сылӧн ки.

8.

Сідз найӧ сэні олісны.
Дзонь куим во нин колисны.
Сэн оліс сійӧ куим во,
А кӧрыс содіс уна сё.
Водз вӧлі ставыс сюрс дас кык,
А ӧні куим сымда дзик,
Он сійӧс кӧр чукӧрӧн чайт,
Кӧр лыдыс сэн — сюрс комын квайт.
Мир Кадпучилы воис кад
Бӧр гортас мунны. Сійӧ рад.
Оз радлы сӧмын ӧксы ныв,
Оз ваксьы некор ни оз сьыв,
Оз тӧд, мый вӧчас сыкӧд ай.
— «Оз шуд, дерт, сійӧ меным вай.
Ме быдта яран помысь пи.
Юр вылам оз коль ӧти си,
Кор воас гортӧ айӧ бӧр.
Ӧд сійӧ кӧин кодь жӧ скӧр,
Оз жалит менӧ айӧ сэк,» —
Тадз чайтӧ коньӧр сійӧ век.

9.

Со понъяс ёна увтӧны,
Кык дадья чомйӧ ӧвтӧны.
Юр садьыс нывлӧн вошласьӧ,
Вир чужӧм вылас вежласьӧ:
— «Вой, дивӧ: тайӧ айӧ тай...
...Мый бара шуас меным ай,
Мый шуас меным бара мам...
Оз тырмы некыдз менам сям».
Со ӧксы гозъя воисны.
Со чомйӧ найӧ пырисны.
Со ӧксы гозъя кульсисны.
Со найӧ видзаасисны.
Со варовитны мӧдісны,
Кыв-мӧд, кыв куим вӧйписны.
Со ныв да яран кӧні кыдз
Став делӧ висьталӧны сідз.
Оз некыдз найӧ пыксьыны,
Оз нинӧмысь дзик суссьыны.
Зэв бура кывзіс ӧксы век,
Век кытчӧдз эз быр сылӧн лек.
Друг мыйкӧ — мыйла ме ог тӧд —
Зэв чужӧм лои сылӧн сьӧд.
Сэк ӧксы пыр жӧ котӧртіс,
Кӧр чукӧр ассьыс гӧгӧртіс,
Да кӧрсӧ кодъяс гулісны,
На ордӧ муніс ыждавны.
Сэсь виис сійӧ ӧти морт, —
Код шуис сылы: «старый чорт».
Бӧр гортас воис ёна скӧр,
Скӧрлуныс некытчӧ оз тӧр.
— «Тэ вӧсна висьӧ менам юр...
Тэ мортӧс виин — кутшӧм бур», —
Мир Кадпучилы шуӧ тадз
(Сы йылысь сылӧн ӧксы дядь).
— «Эг некор некодӧс ме ви», —
Тадз шуис воча Кадпучи.
Сы бӧрти шуис ӧксы ныв
Ас айыслы со кутшӧм кыв:
«Ме тӧда — некодӧс эз ви,
Сы вылӧ сета ассьым ки».
Ныв вылӧ ёна скӧрмис ай.
Зэв скӧрысь шуис: «рузяд кай».
Зэв дыр на ӧксы скӧраліс,
Зэв мисьтӧм кывъяс шуаліс.
Сэк мыйсӧ сійӧ сэн эз сӧр,
Оз ставыс татчӧ мойдас тӧр.
Кӧр гуысьясӧ муніс бӧр,
Кӧн куйлӧ сылӧн виӧм вӧр.
Сэсь виис сійӧ ӧти зон,
Код шуис сылы «пӧрысь пон».
Сэк кості чомйын шогсьӧны,
Зон нывкӧд ёна шензьӧны.
Оз тӧдны кӧні кыдзи-мый,
Сідз оз-ӧ найӧс ӧксы кый.
Быдторсӧ чайтӧ ӧксы ныв,
Да оз лысьт шуны ассьыс кыв.
Сэк кості бара воис ай,
Оз дугдыв матькӧ; мать да мать.
Оз ов, а пуӧ скӧрысь-скӧр,
Скӧрлуныс некытчӧ оз тӧр:
— «Со кутшӧм бур сьӧлӧма ёрт.
Дзик прӧста виӧма кык морт.
Ме тэнӧ сы вылӧ-ӧ мый
Ас пыдди коли, эг сэк лый?
Сэк эськӧ ме тэнӧ эг видз,» —
Мир Кадпучилы шуӧ сідз.
— «Тэ збыльысь ӧмӧй сёрнитан?
Ме чайті, прӧста балуйтан.
Ӧд збыль эг некодӧс ме ви,» —
Тадз шуӧ сылы Кадпучи:
— «Эг вилы некодӧс на ме,
Оз тырмы сэтчӧ сьӧлӧмӧй».
Кӧть мый тэ ӧксылы эн шу,
А сійӧ шуас сӧмын — «ну!»
Он небзьӧд сылысь сьӧлӧмсӧ,
Оз жалит, ёрӧ олӧмсӧ.
Век матькӧ, матькӧ: «ва и му,
Оз небось чӧртыс тэнӧ ну».

10.

Чом пытшкын шогсьӧ ӧксы ныв,
Ньӧж шуӧ зонлы татшӧм кыв:
— «Эн повзьы, кывзы, муса зон!
Мый вӧчӧ айӧ, тӧдан он?
Тэ дінӧ сюйӧ сійӧ гыж,
Быд дорысь корсьӧ сійӧ мыж.
Быд ногыс тэнӧ ӧтдортӧ,
Кык мортӧс, шуӧ, виин тэ.
Ӧд найӧс ачыс виалӧм,
Тӧн шуис инька сійӧс мем.
Мед эськӧ сійӧ ставыс лёк,
Да эм на уджыс сыысь лёк.
Эм сыысь ыджыдджык на мог,
Сы понда меным медся шог:
Тэд кӧсйис сетны сійӧ кӧр.
Мед лоас кӧрыс аслыс бӧр,
Сы понда тэнсьыд босьтны юр
На кындзи кӧсйысьӧ, — оз дур.
Ӧд сійӧн корсьӧ тэнсьыд мыж.
Ог, шуӧ, сет ниӧти гыж.
Со кутшӧм сійӧ ош кодь дур.
Мед видзны сыысь тэнсьыд юр,
Вай пышъям кытчӧдз абу сёр.
Сы кындзи вӧчны нинӧмтор».
— «Со мыйла сійӧ, енмӧй видз,
Ме вылӧ шуӧ вӧлӧм сідз.
Жаль лоӧм сылы вит сюрс кӧр.
Сы вӧсна сійӧ сэтшӧм скӧр.
Мед, донсӧ сылысь ме ог кор,
Сы понда ме вылӧ быдтор
Сідз дзугӧм. Аттӧ, пӧрысь чӧрт,
Эн радлы, эн на менӧ йӧрт.
Кӧть кӧсъян босьтны менсьым юр,
Ме ог на тэныд ӧні сюр.
Он вермы юны менсьым вир,
Кӧть мында пиньтӧ ассьыд йир.
Оз някав менам вирысь юм.
Ме ӧні тӧда тэнсьыд дум»...
Тадз нуӧ сёрни Кадпучи,
А чужӧм аслас быттьӧ би:
— «Ог падъяв, веськыд тэнад кыв!
Тэ ногӧн вӧчам, мича ныв.
Тэ лӧсьӧдчы — мый колӧ вӧч,
Мый ковмӧ туйын — ставсӧ тэч.
Кор воас айыд, кӧмкот, пась, —
Мед ставыс вӧлі тэнад дась».
Тадз шуис нывлы Кадпучи,
Ас киас босьтіс сылысь ки:
— «Тэ пышъян айсьыд мекӧд тшӧтш,
Эн сідзи прӧста сійӧс вӧч.
Ме тэнӧ кольччӧмысь ог кут;
Тэд, гашкӧ, тані лоас шуд.
Сы йылысь думайт-гӧгӧрво,
Мед бӧрас каитчӧм оз ло».
— «Эм менам тэсянь ичӧт пи,
Оз медым айӧ сійӧс ви,
Ме коля татчӧ ассьым ай.
Оз немтор кольччӧм бурӧс вай.
Кӧть кытчӧ нуӧд — ме ог пов,
Тэ кындзи некод мем оз ков.
Ме лоа тэныд шуйга ки,
Кӧть кытчӧ мун: кӧть ва, кӧть би.
Горт лоас миян ва да вӧр.
Мун пет да мунны лӧсьӧд кӧр»...
Тадз шуис зонлы татшӧм кыв
Мир Кадпучилы ӧксы ныв.
Мед мича лоас сёрни пом,
Зэв ёна окыштіс на вом.

11.

Лӧнь, небыд, мича тӧвся рыт.
Оз ньӧти кынты, ньӧти сыд.
Оз некысь кыв ни шы, ни зык.
Вит еджыд гӧна мича бык
Зэв вылӧ лэптӧмаӧсь юр,
Оз тыдав весиг налӧн сюр,
Лым-гӧптын сулалӧны сідз.
Оз некод найӧс сэні видз.
Со чомйысь петі яран зон.
Тшӧтш сыкӧд петі сылӧн пон.
На бӧрысь петі ӧксы ныв.
Оз тыдав сылӧн юрси йыв.
Оз кынмы сылӧн ичӧт пи,
Нёнь бердын шонтӧ ассьыс ки.
Эз эшты дадьйӧ пуксьыны
Да места вылысь вӧрзьыны,
Пыр воис кыськӧ нывлӧн ай.
Эз матькы, эз шу ӧти мать.
Эз думайт сійӧ ёна дыр,
Мый керсьӧ, гӧгӧрвоис пыр.
Чом дорӧ ӧдйӧн котӧртіс,
Сэсь пищаль киас кватитіс.
Бур лои пышйысьяслы кост:
Оз ӧні пищаль найӧс босьт.
Збой вӧлі Кадпучилӧн ки,
Со лэбӧ сійӧ кыдзи би.
Он сэсся ӧні сійӧс кый;
Оз пищаль сы ывлаысь лый.
Лёк ӧксы лыйліс эськӧ дыр,
Эз кытчӧдз пуля сылӧн быр,
Эз ньӧти пуля пасӧ сюр, —
Эз жугӧд Кадпучилысь юр.
Со ӧдйӧ чомйӧ котӧртӧ.
Со кӧлуй кинас гӧгӧртӧ.
Ки улас сюри пуля доз.
— «Час, энлӧ, энлӧ, мути гоз.
Час ёна эн на мекӧд дур.
Кӧть кыдз-а, босьта тэнсьыд юр».
Тадз песӧ ӧксы ассьыс скӧр,
А ачыс лямкаалӧ кӧр.
Кӧть ӧксы пӧрысь, век на збой.
Со пуксис, муні, равзӧ: «гой!
Час эн на радлы, дявӧл шуй,
Он весав небось ассьыд туй», —
Со вӧтчӧ ӧксы — вӧтлӧ кӧр,
Сюр кӧрлӧн вӧрӧ, быттьӧ ньӧр.
Со ӧтчыд лыйис — кыпті лым.
Оз дугды, лыйлӧ — гым да гым.
Со пуля пырис, кыдзи ув,
Мир Кадпучилы кыняув.
Со шлютькӧбтыліс быттьӧ рос,
Сідз пуля нуис мальча сос.
Со ӧти кӧрлӧн петі сюв,
Эз сӧмын мимӧ сійӧ кув.
— «Сё енмӧй, отсав меным тӧн», —
Тадз шуӧ енлы яран зон.
— «Эн скӧрав ме вылӧ, бур ен,
Мед лёк морт менӧ оз жӧ вен».
Ен аслас ыджыд милӧсьтӧн
Оз отсав сылы. Аттӧ ен!
Со пуля ёнтыштіс, кыдз йӧн,
Со кыдзи отсасьӧ бур ен.
Дзик матӧ воис пищаль вом, —
Мир Кадпучилы локтӧ пом.
Оз некод сылы отсӧг сет.
Мый вӧчны, Кадпучи оз тӧд.
— «Тэ, тӧлӧй, ветлан быдлаын,
Зэв уна выйим тэнад вын,
Эн, тӧлӧй, тэ кӧть менӧ чӧвт;
Мем отсӧг неыджыдӧс сет.
Тэ быд во вайлан уна лым.
Тэ вайлан кымӧр, вайлан гым.
Мем отсав, пальӧд ассьыд ун,
Оз некор сійӧ менам вун».
Сідз тӧвлы кайтӧ Кадпучи:
— «Вай, тӧлӧй, тӧлӧй, лэптыв ки».
Тшӧтш сыкӧд кевмӧ ӧксы ныв,
Со сьылӧ тӧвлы сьыланкыв.