Рытын (Елькин Василий Иванович)
Кор эзысь тӧлысь
Шпыннялігтыр кайӧ
И гӧгӧр сявкйӧ
Югӧр кельыдлӧз,
Ме босьта кышан,
Чӧвта пельпом сайӧ
И пета сэтчӧ,
Тӧдса кӧні звӧз.
Мем сэні ставыс
Матыса и муса:
Сук лапъя кыдз пу,
Дзоридзьяса йӧр,
И сійӧ рытыс
Сьӧлӧмысь оз кусав,
Тыр шудӧн кодыр
Гортӧ локті бӧр.
Ме сэні колли
Волысь медбур кадсӧ,
Сэн менам чужис
Медводдза любов,
И сьӧлӧм вылын
Пыр на меным рад со;
Ме сэтшӧм шудӧн
Некор на эг ов.
И коляс гожӧм,
Кӧдзыд лоас ывла,
Йи море дорсянь
Локтас еджыд лым,
А менам сьӧлӧм
Сідз жӧ муса нывлы
Пыр лоас сэтшӧм,
Ӧні кутшӧм пым.
И татшӧм чувство
Абу дзик весьшӧрӧ,
Том нывка йылысь
Весь ог кут ме дум.
Нин регыд, регыд
Воас сійӧ пӧра,
Кор выльысь аддза
Сылысь кыпыд нюм.
А ӧні, тӧлысь
Енэжлань кор кайӧ
И гӧгӧр сявкйӧ
Югӧр кельыдлӧз,
Ме ассьым кышан
Чӧвта пельпом сайӧ
И пета сэтчӧ,
Тӧдса кӧні звӧз.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1942, so this work is also in the public domain in other countries and areas where the copyright term is the author's life plus 81 years or less (if applicable), or the copyright term is 75 years or less since publication for posthumous works (if applicable). |
|