Розъялӧм

by Ярасов Борис Степанович

Ме сиктса олӧм выль ног сьыла,
Тан сьыла сӧмын ӧтитор:
Мый аддза синмӧн, пельӧн кыла
Том нывлысь гажа сьылан гор.

Ёсь гӧлӧс дзольгӧ визув шорӧн,
Ме сьывны сы ногӧн ог куж.
Век сьылӧ Анук шыа горӧн,
Кӧть сьӧкыд, ыджыд сылӧн удж.

Гӧрд вирӧн банйӧ гӧгрӧс бандзиб,
Кыдз гожӧм кисьмӧ ӧмидз тусь.
Век банйӧ бан, кӧть тӧвся кӧдзыд,
Кӧть зэра, бандзиб би оз кус.

Зэв зумыд роз кодь розйӧ тӧлын,
Ӧд сылы ӧткодь тӧв кӧть ар.
Том Анук розъялӧ том вирӧн —
Ӧд сылы дзик дас ӧкмыс ар.

Кыдз арся войӧ югыд кодзув,
Сідз ӧзйӧ сылӧн лэчыд син.
Кӧть жӧник корлас уна козин —
Бӧр лэдзан, сэк, кор аддзас син.

Быд зонлӧн ёна петӧ вежыс:
— Зэв шань мем тайӧ гӧтырпу...
Сэк мусмас меным му выв эжыс,
Сэк менӧ некод нин оз су.

Сэзь енэж шӧрӧд кывтӧ тӧлысь,
Кыдз быттьӧ сійӧ жӧник морт.
Дзик ӧтнас бурлак петіс гортысь
Да кинас личкис гудӧк кӧрт.

Чӧв ывла садьмис гудӧк шыӧн,
Ӧль киын гудӧк ёна пельк:
Быд ворсӧм юргӧ сынӧд гыӧ,
Оз дӧзмы ворсӧмысь выль мек.

Том Анук ворсӧм зонлысь кыліс.
Пыр тӧдіс: тайӧ менам Ӧль.
Выль чышъян чӧвтіс сьылі вылас —
Пыр мӧдіс сылань, кыдзи тӧв.

 * * *

Йӧктіганыд, нывъяс, ті
Лайкыдӧсь, кыдз бадьяс.
Сиктын гажаа ті зэв
Коллянныд том кадъяс.

Анук варов, перыд, збой,
Чужӧм гажӧн ӧзйӧ.
Мусук йылысь абу шог —
Пӧръявны эз кӧсйы.

— Медым мусук менам гӧль
Сійӧ комсомолеч:
Сы понда мем муса Ӧль —
Радейта кыдз вӧля.

Ӧльӧ чуйдіс гӧльлысь садь...
Сы дор гӧль йӧз сувтіс.
Озыр йӧзлӧн потӧ гадь,
Чиніс налӧн вытьыс.

Гӧриг-кӧдзигкежлӧ Ӧль
Колхоз сиктас тэчис.
Шӧркоддьӧмакӧд сэн гӧль
Ӧтвыв ён удж вӧчис.

Вежсьӧ мулӧн чужӧмбан,
Выль ног ставыс мунӧ.
Розйӧ гажӧн Ӧлькӧд Ан —
Важыс, лёкыс вунӧ.