Рака

by В. А. Молодцов

Гӧль чой-вок котырлӧн вӧлі Микайлӧ нима ыджыд вок. Сійӧ вӧлі зэв зіль да бур. Сылӧн вӧлі сьӧлӧмыс майышмунӧ чой-вок тшыгъялӧм вылас видзӧдігӧн.

Ӧти гожся лунӧ сійӧ муніс вуграсьны. «Час пӧ зорӧд йӧр потшигмоз ветла. Оз-ӧ пӧ кӧть юква вылӧ челядьяслы сёйыштны шед».

Лун вӧлі гажа. Сынпиян да гӧрд синма кельчи да мый да сылы буретш пумӧн шеді. Вуграсис, вуграсис да зорӧд йӧрыд сылы дум вылад уси. Чери тыра пестер пуӧ ув вылӧ ӧшӧдіс. Ачыс муніс зорӧд йӧр потшны. Сы коста локтіс сэтчӧ рака да кӧсйӧ на пуксьыны пестер вылӧ, увйыс чеги да пестерыд уси. Уси да пестер лапӧдыд воссис. Чериыд гылалі му вылас.

Ракаыд кодӧс ачыс сёйис, кодӧс пияныслы позъяс новліс. Нинӧм эз коль куйӧдсӧ кындзи.

Локтіс Микайлӧ зорӧд потшанінысь. Аддзис ракалысь уджтӧ да быдӧн шай-паймуні. Неуна синваыс эз пет.

— «Кӧсйи пӧ чой-вокӧс юкваӧн вердны, а со пӧ тай».

— «Абу и яндзим!» — шуны кутісны ракалы жонь да вой тӧв лэбачьяс: — «челядьыслысь мырддин»...

— «Энӧ колӧкӧ увгӧй-а!» — шуӧ рака.

— «Мый нӧ»... — шуӧны бара: — «эз ӧмӧй нӧ на горшыд тыр гӧп косьмӧм вывса черинад?..»

— «Эн зыньгӧй, мися: эг ме сёй. Каляпиян волісны да сёйисны»...

— «Лӧсявтӧмторсӧ эн висьтав», — шыӧдчис каля: — «менам пиянӧй кольк кыш пиын на. Тэ ачыд сёйин!»

— «Тэнӧ юалӧны!..» — кравӧстіс рака. (Ачыс думайтӧ: «кыдз жӧ эськӧ дорйысьны?) Сэсся шуӧ: — «Ме кӧ мыжа, мед менӧ ракаяс жӧ и мыждасны!»

Чукӧртчисны ракаяс, думайтісны, думайтісны юрнысӧ гоньйӧдлігтырйи дай шуисны: «Мед пӧ эськӧ сёйис кӧ да, эз ков каститныыс»...