Поладкстомо (2016)/Ули мастор, конась монь седейсэ.../4
[475]
4. Службадонть оргодсть...
«Симбирские ведомости» 1853-це иень газетась сёрмадсь: службадонть оргодсть ды эзть велявто кудов Ефрем Васильев, Михаил Петров, Степан Антонов... Истятнэде весемезэ ульнесть 13 од ломанть.
Мольсь Крымской войнась. Мезе тейнесть сеть шкатнева оргодицятнень марто? Пря ланга, содазь, эйсэст эзть вадяша. Эзть «налксе» седе мейлеяк, уш минек шкава. «Дезертир» — теньсэ весемесь ёвтазь. Тевтнень яксевтсь трибуналось. Валтнэнь кис «Монь арась мелем леднемс лелянь-ялаксонь (финнтнэнь) лангс» валтнэнь кис пандомс савсь седеяк кеместэ. Империясонть аволь ве пинге инязорокс ульнесь содавикс валмеревксэсь: кие аволь минек марто — се минек каршо.
Варматнень пувамо ёнксост ней аламнеде полавтовсть.
1992-це иень тундостонть эзть моле уредеме (служамо) Российской Федерациясто 1800 ломанть. Эзизь нолда цёраст, васняяк, Саха республикань аватне. 1991 иень сёксестэнть Татарстансто арасель мелест молемс армияв 600 од ломанень. Тунда эзть са пурнавома таркас 1400 од цёрат.
Ушмодейтне (полконь прявттнэ) 1992-це иень планост эзизь топавто. Тенень «лездасть» колониякс улиця лия республикатнеяк. Башкиртнэнь, чуваштнэнь ды удмурттнэнь прявткурост (парламентэст) кемекстасть валпутовкст: армияв туицятнень эйстэ виевгавтомс милициянть, гражданской ванстомань тевтнень ды кудонь-мезень теиця вийтнень. Теде башка, 226 ломанть эзть тердеве Кировской областьстэ.
[476] Минек республикань цёратне валпутовкст властень кирдийтнень пельде учомо эзть карма. Кода пачтясь республикань военкоматсо важодицясь С.В. Борисов, 1991-це иестэ Мордовиясто эзть моле уредеме 36 ломанть. Тедедень тунда те цифрась киртявсь 31-с.
Кодамокс сынст ловомс — дезертирэкс эли... откерь цёракс?
Сялдомс? Эли, паряк,.. шнамс?
Каршо валонь таркас вана таго невтевкс.
1992 иестэ 115 од цёрат ульнесть ильтязь служамо Новороссийскоев. Тень таркас сынь ускозельть Грузияв. Вейкесь эйстэст оргодсь ды сась кудов, Мордовияв. Ёвтнизе, кода ульнесь алкукскак. (СМ, 1992, 6 №). Мейле таго оргодсть вете ломанть («Столица» газетась).
Чачтнеде, эрзянь ават, Россиясь муи козонь нерьгстамс эйкакшонк!
«Тон вант, кодат «мордватне» а пелицят!» — савкшнось тень марсемс ламонь кургсто. Неть валтнэнь ёвтнить каштансто ды прянь шназь. Видеяк, «мордватнень» ютксо вельть ламо Советской Союзонь Геройть. Котоце таркасо аштетяно 150 ламо раськетнень ютксо. Минденек ламо героест ансяк осетинтнэнь, содави, рузтнэнь, украинецтнэнь ды белорустнэнь. Ды раськетнеяк минекенть коряс седе покшт!
Кецнемс эли мелявтомс тень кувалма?
Лайшема-сюмордома.
РФ-нь Конституциясо тешкстазь: Чачома масторонть (Россиянть) ванстомась — Российской Федерациянь эрьва гражданинэнть туртов прянь шнамонь ды каштанчинь тев (почетной долг).
Бути «долг», эряви пандомс. Лиякс меремс, иес-омбоцес максык цёрат государствантень урекс, ды тона теи эйстэнзэ алкуксонь товар, теи мартонзо сень, мезе мелезэ.
Неть законтнэнь марто тамашань тевть лиснить. Россиянь (РСФСР-нь) Уголовной кодекссэ васенцекс ашти статьясь: «Измена родине — тягчайшее преступление». Мезе теекшнить истятнэнь марто, ледстнемс а мезть. [477] Ансяк вана мезе истямо «родинась»? Теде кодексэсь чатьмони, чатьмонить лиятнеяк. «Родина» валось, мерсь тень вейке юрист, — те потмоёжонь марямо, те моральстэ саезь ёнкс. Бути истя, сестэ эрьва кенгелемань кис эряви стена ваксс стявтнемс...
Ламо лия мастортнэсэ армияв молицянть марто сёрмадстыть конёвт. Ули цёранть мелезэ — сайсызь, кармить тензэ пандомо уредемань кис ярмакт: арась — кияк а кармавтсы. Россиясо, эли икелень СССР-як, сиведемадо а содыльть. Нейгак ламось эзь полавтово. Нейгак рекрутствась азорокс каднови.
Мордовиянть, бути истя вечктяно кортамо эсь олясо эрямодо, ванстомань ды уредемань тевтнень кувалма улезэ эсензэ Законозо. Сонензэ кармить эрявомо эсензэ ушмант, армия. Секс эряви содамс, зяро эрявить ломанть-ушмант. Тень коряс кияк эзь арсе.
Европанть куншкасо ули масторнэ. Пелькапряшка. Лемезэ — Сан-Марино. Эрицянзо 23 тёжат. Отяжонь буеде вишкине. Тосонь ломантне эрить Европасонть весемеде парсте. Содасы те панкскешка масторонть весе мирэсь-масторось. Ули Сан-Маринонь эсензэ армиязояк... 18 ломанть.
Ловномс, зяро эрявольть ружия марто яксицят Мордовиянтень, а стака: 18 ламолгавтомс 39 кирда (зняроксть Мордовиясь покш эрицянь кувалма). Лиснить 700 уредейть-служицят.
Кие ансяк а невтни сурсо Вейсэнь Штаттнэнь лангс. А ледстнить ансяк теде: США-нь индеецтнэ, кить эрить резервациясо, кодаткак каявкст а пандыть. Неть резервациятнесэ питнетне ламо товартнэнь лангс 20-30 проценттэ седе алкинеть. Аймельгадомакс маряви тенек теяк: натой сонсензэ президентэнть арасть праванзо куш чувтыне керямс резервациянь вирьстэнть. Секс самай раськень ёмамодо, мезе моли минек марто, тосо а содыть. Индеецтнэде, эскимостнэде, алеуттнэде (свал тосонь эрицятнеде) весемезэ ней 1,4 миллион. Ёмамодо а содыть. Тенень лездыть Законтнэ. 1968 ды 1974-це иетнестэ ульнесть [478] кемекстазь «Кавто кельсэ кортамодо Закон». Виде теяк: Штаттнэсэ умок эрить неть Законтнэнь коряс. Тесэ вана, социалистической Мордовиясо... колмоце ие «муськить» Кельде закононть...
Ней армиядонть.
Индеецт уредеме а сайнить.
Бути теемс Американть ды лия, алкуксонь ломань чачо марто мастортнэнь ладсо, эрзятнень сравтнемс та-кодамо «отечествань» келес а мезть. Сынст Масторост тесэ, тесэ эрясть покштяст, конатнень туртов те модась теевсь пингень удома таркакс. Паряк, саты кувсиця-ёмиця раськентень улемс порох парьсэ тулокс? Паряк, саты улеме пушкань сывелекс империянть кемекстамонзо кисэ?
Мезе теемс? А макснемс эйкакштнэнь армияв?
Арась. Те а тев.
Эряви анокстамс ды кемекстамс Закон. Сонзэ коряс, эли сонзэ лангс нежедезь, яволявтомс армияв сайнеманть лангс мораторий. 40-50 иень перть Мордовиясто ды лия областень эрзятнень а сайнемс уредеме-служамо. Ансяк сестэ ды истя карми ламолгадомо раськенек.
Тевесь покш ды стака. Эряви полавтомс ломантнень арсемань лувост. Тень куроксто а тейсак. Лангсонок покштнэ умок чарькодизь: васняяк, эряви теемс раськенть эсь эрямонзо а содыцякс. Кияк илязо сода эсь историянзо. Теемс весень манкуртокс — эсь юронь, тетянь-авань а содыцякс. Зяро ульнесть кортамот, ялатеке школатнесэ ды ВУЗ-сэ течис ютазь пингенек а тонавтневи, арась парсте, чарькодевиксстэ, домкасто сёрмадозь тонавтнема книга.
Эряви чарькодемс тенек: кезэрень пингетнестэ саезь ды, ловт, меельце шкас ломантне пурнавкшность ошмонь-ошмонь эсь прянь эли раськень идемань кис. Ней лувтне-койтне полавтовсть. Ней мамонтось изняви Эйкакшонтеньгак. Секскак течинь эрямосонть седе шождыне ды ён эрямс ды теемс тевтнень башка-башка, вишка масторсо, эсь раськесэ.
Лия тевесь — экономикась. Тесэ «башка» мезеяк а теят. Сон сюлминзе ве килькшс весе мастортнэнь ды [479] раськетнень, Ялатеке «эрьвась сонсь ды весе вейсэ» Законось илязо колсеве тесэяк. Весе вейс човорямодонть, кода ульнесь колхозтнэсэ, паро иля учне.
Кеман шканть лангс. Ансяк сон ды превейгадомась сайсызь эрзятнень прясто раужо пацянть, конань кандтнить сынь уш аволь вейке пинге.
«Сятко», 1993, 11 №.