Поладкстомо (2016)/Тесэ весе монь...
[256]
| ТЕСЭ ВЕСЕ МОНЬ... |
Мон, Ашо пильгине, чачинь Пичекужо велесэ ожоковонь кеменце чистэ, мелят. Ловномам коряс, тень кото ковт. Мон уш ней эйбаро псака. Вант, кенжем алов иля понго! Сеске верьс айгордатан. Тонсь содат, самай од шкам... Сатыть вием.
Мелят, сёксень ожо шкасто, саимизь авань вакссто, шикадимизь чопода юдмас ды — та-кодамо ошов. Валонтькак тень эзия марсе. Ды мезть кортамс! Сынст, ломантнень, мезест ансяк арасть, весемеде ламо, монень маряви, — валост. Кескавс а кельгить. Кортыть, кортыть...
Ошсо — кемат тень? — макссть башка нупальне, валдо, лембе. Коникеськак эсень. Удок чевте таркинесэть куш чинек-венек. Азоравам, сэрьс-келес апокш авине, анды эйсэнь, теке эсь пакшанзо. «Ловсыне, Ашинькай, а эряви? Паряк, сывельне теть нолдамс, а?» — бийни чова вайгелезэ. Мирдезэ пеедькшни лангсонзо: «Тон поте, потине макст тензэ!» Порть, псакине, мезе вечкат. Теке марто видькстан: апак садто, апак пиде калдо анокан ярсамс сезевемазом. Вечкан!.. Те монь ярсамопелесь.
Кецнек, ошонь эриця, кудосот лембе, удома таркат инязоронь, симть, ярсак, налксек. Кодамо теть седе вадря эрямо?! Ансяк вана... венелев якак ве таркас, тов иля кузне, тень иля ангоря, тезэнь иля совсе, иля никсе, иля ванно, иля, иля... Ды истя чистэ чис. Стака, лиясто седеем човоряты, анокан налксезь ладсо пеень сялгомс азораванть сурс эли кирнявтомс тошначиденть кавксоце этажсто. Ветькак теке питнесь. Сыргозян пелеведе мейле, карман ардтнеме-кирнявтнеме нупальтнева. Марясамизь азортнэ. Ну, тесэ тонсь содат... кедь малас седе [257] паро а понгомс. Зярыя чиде икеле, уш ашолгадома малава, пивсымизь ламодо велькска. Мельгам шержей пря якицясь автордымим пулодо, мейле сювордынзе икельце пильгем, сайсь тапка ды эрь, эрь мукор ланга! Цяк менинь кежпаргонть кедьстэ. Мезень кис, мерят? Стяконь. Правтыя вальмалангсто лисезь помидор марто кундонзо. Прась кияксос, касынькайтне мерькавсть, кияксось рудазкадсь. Сави меремс: почаксымим тевень кисэ. Чумангак аламнеде. А стяко пулоюром течис сэреди. Те кодамо, видеяк, эрямо? Аноколинь прямгак ёмавтомс.
Сёвнозь-налксезь, телесь пурнынзе оршамопелензэ. Эйзюрковонь прядовома ланга монь таго глянкадимизь келей курго чопода юдмас. Ошов сакшнынь тейтерень мокшнашка левкскекс, тестэ сырган — псакакс. «Малав колмо килограммат тарги!» — мерсь весть паро ёжосо улемстэнзэ вадяшицям. Юдмас тонгомсто эзинь дряга, чатьмонинь. Дарманом маштсь, аймельгадынь козонь-бути совавтомстом: урны, сорны, кальдерди-калдорды, сыргась, марян, таркастонзо. Неемс мезеяк а неян. Мезе те истямось? Юдмань коцтонть пачк марян авань вайгель: «Садитесь, автобус трогается!» Чарькодинь: ардыцядонть мерить автобус.
Прям, кода эзинь кирде, ливтия ушов, варштынь верев, алов, видьстэ... Зяро неинь, маринь, кецнинь, а ёвтавияк! Эринь кудосо-юртсо кавто марто, тесэ эйстэст — а лововитькак. Ансяк вана майсевтицям, идемевсь калгавлизе, таго тарказом тонгимим. Ковгак кедьстэнзэ а нолды. Кундасамам кирьгадо ды кирди, кирди... Зяроксть эзинь снартне менемс, эзь лисе. Аламошкас макснимим поланстэнь. Тона истя лепштимим мештезэнзэ, марявсь, сюломгак лисить. Пельсть, оргодян. Теяк тенст эзь чарькодеве: ков ёман ардыця, эрьва ёндо пекстнезь кудынестэнть?
Кирдезь-вадяшазь, мурнезь-ладязь, окойники пачкодинек Пичекужо велес.
Сон — чачома велем. Тесэ левксыимим авам. Сайсамизь-арась се кудонтень? Содаван-арась аванень? Келя, сонзэкс туинь. Кутьмерь ёндо кикст-кикст, пекем ашо, пильгелапинемгак ашот. Андыцям-палсицям ды... [258] пансицям валонзо коряс, авань лемезэ Сёрмай. Вельть, кортыть, дошуз, чеертнень кундси сиземань апаке сода. Мезть неть чеертне, кодамо понань? Куш ве сельмсэ варштамс лангозост! Ардтницят? Ливтницят? Сюро мартот? Чеерть, чеерть... Кунсолок кавто пильге лангсо якицятнень! Сынь мезть ансяк а сюворить!
«Бустонть» мейле веленть кувалт вайгельпе, ды минь колмоненек уш кудонок икелетяно. Тень мон чарькодия юдмастонть нолдамстом. Васня талакадынь. Вай, те мезе истямось? Мезе ацазь ошонь кудонь киякстнэсэ кумботнень таркас? Мода? Те мезе истямось? Ланганзо ожо-тюжала тюссо вельтявкс. Те таго мезе? А-а, тикше, тикше, маряка! Чинетне, чинетне, кодат ансяк арасть! Каязь каявинь тикшенть ланга чийнеме-кирнявтнеме, никсеме. Кецнемадонть оймамо эзинь сода.
Велькссэнь — валдо-сэнь чаво тарка. Кодаткак ашо потолокт арасть, арасть Стенаткак, вальматкак, кодаткак шкапт-макт. Вант нильтякадомазот. Ошсо ансяк вальмалангсо аштезь ваннынь тей-тов. А ней — ков мелеть, кода мелеть, зяро мелеть! Кияк а стардтанзат. Трокс вал а марят.
Ваннынь-теинь ды юрк кудыкелькс алов, тосто — пенгень, курмонь-кармонь кирдема утомонтень. Вадря!.. Зяро тесэ эрьва кодат таркат-ужинеть, коймть, лазт ды лазнэть, варинеть, судос эциця чинеть.
Лисинь ушов. Тесэ валдо-валдо! Ваннан: лугиненть лангсо тия-тува мезть-бути нула панкске ёнов молицят либордыть-лыкить. Мон кирк кирнявтынь вейкес, омбоцес! Сынь эйстэнь а оргодить. Те мекс? Монень эрявить орголицят, эйстэнь кекшницят. Вай, ды неть мезть? Авасолга якить мезть-бути толгавт. Якить кавто пильге лангсо, мондень кавксть-колмоксть покшт, поксорить моданть. Неть мезть истятнэ? Мон салава-салава, кирдевезь-лотксезь ютынь седе малав. Кить неть? Чарькодия азораванть кургсто марязенть коряс.
— Типа-типа-а-а! — рангстась сон секе валонть усксезь ды мештезэнзэ лепштязь ваканстонть ёртсь мезть-бути [259] коморсо. «Типатне» пурнавсть тердицяст перька ды кармасть капшазь кочксеме ёртозенть. Мазыйть «типатне»! Ашот, сёрмавт. Вейкесь эйстэст сэрей кирьга. Свал верьга ванны. Секс, паряк, кирьгазояк кувалгадсь. Ванны — вансты. Шкань-шкань «сэрей кирьгась» пижнезеви. Ды истя, куш пилеть потомдыть. Мекс ранги? Моры? Кинень эрявить истят моронзо? Ярсамо терди? Покшкавтни? Паряк, пекезэ вачсь? Сестэ мекс а мавксни?
Вай! Ды те таго мезень тюниха?! Велькссэнь мезе-бути кудодо сэрей. Сэрей ды рацяня-сюракш. А-а, оно мезе — чувто. Вишкапингстэ марсия те чикордыця валонть — чувто. Ва кода! Косто а косто прязонзо валгсть кодат-бути кивчакайть. Таркасост дух а аштевить, кивчк-кивчк тарадтнэнь юткова, теке раужо ёндолнэть. Неть таго мезть? А уш чоледить, чоледить кода! Ужока, ужока, паряк, амзордаса вейкешканть? Варчаса. Салава-салава, пекекиське лангсо молинь сыре каленть юрс ды комельганзо уцор-ацор, сынст ладсо ёндолокс, — верев! Э-э, ливтницятне, неяви, аволь чаволат, учомо эзть карма, либорк — ды кадымизь судом марто. Куроксто а кундасыть. Эряви учомс, ванстомс, кирдемс мель... Эрямосонть, совась пшти пилетнева прязом, стякодо мезеяк а максови.
«Ашакай, Ашакай!» — чопоньбелев мария азораванть вайгелензэ. Тердсь эйсэнь ярсамо ды удомо. Эзинь моле, кудос эзинь сова. Кодат кудот! Марикскак эзинь тее. Тосо таго вальмат, потолокт, стенат — эрьва ёндо пирявкст. Бр-р, ледстнемскак мелем арась! Саты, кирьгава топодинь, налкстынь эйстэст.
Муия, кадык вестькак эзинь кузне, кудыкельде потмарс кузема кинть ды ювк тов, «пандо пряс». Тесэ, каткат-ловныцят, эзинь арсеяк, — малавикс мастор. Васняяк, тусть мелезэнь чевте матрасонь таркас ацазь кошксекс каштордыця лопатне. Мейс тей сынст кузтнить, кевкстинк кудонь путницятнень.
Зярс эзинь матедеве, прявам яла чарасть, яла чарасть арсематне: «Ломанть, мекс арась меленк эрямс минекс, псакатнекс? Мекс превсэнк теке: ярсамс прамозонк, [260] удомс топодемазонк? Ды аволь косояк — чевте-чевте кенде лангсо! Стявтнетядо покштояк покш кудот, эрьва чистэ кандтнетядо од оршамот. Пештевтядо-арась зярдояк? Пурнатадо мезе понги перьканк! Канстонк сталмост-келест мейсэяк а онкставить. Мезекс? Марят пельденк текень: кенгелемат, кенгелемат ды тагояк кенгелемат... Каня сынтемест а эрявтадо? Мон, од псакине, а чарькодян: эли монсь педе-пес аптюкан, эли тынк, стядо якицят, а сатныть.
Мон вана кудопотмарсан, азоравам поланзо марто — алот, потолоконть тона ёнот. Кудосонть, содави, лембе-лембе, алксост-прялксост чевтть-чевтть. Кадык, кадык ули истя, мон ялатеке а полавтса неень таркам. Сындеряй теле? Мезе карман тееме? Мезеяк уш теян. Пелян, телензэ лангс илямизь сае таго тов, тюлень шаршавтнэнь ды кумботнень юткс. Арась-арась, кадык кулан, сындеряйть телень цят якшамотне, ансяк тов а молян».
Удынь од таркасом талай. Сыргозтимим кудыкеле калдордомась. Те мезе? Кие? Тарск стинь. Эряви, арсян, варштамс. Монь сельмтненень чоподась а пирявкс, муия валгома варям-таркам ды — голдорк алов. Варштынь кудыкелькс кенкшенть ёнов ды абунгадынь: вай, те мезе, кие истямось? Псакань совсема варяванть лангозом вансть кавто пиже покш сельметь. Сынст неезь, пачкам ютась ачарькодевикс, вечкевикс лембинень ялтке. Шаштынь седе малав. Пиже кирьксалтнэ седеяк полгарьгадсть. Вай, авакай! Каршом каятотсь тандавтыця, пачкат ютыця эчке вайгель: «Ма-у-у!» Пелемадо башка, кодамо-бути вий тердсь седе малав. Кодамо? Арсемс шкаяк арасель. «Чопачась» стявтынзе чеченанзо ды таго пиже-ожо вайгельсэ рангстась: «У-у-у!» Кода а соракадат! Эно мекс а ношкстан икельдензэ? «Те аволь авам марясь ды сась содавтомон?» — арсезевинь пиже плошкатнень лангс ванозь. Арась, те лия та-кие. Вайгелеськак аволь авань, аволь аваканьгак. Кинь илязо уле, мелезэ, ванан, совамс ды теевемс мартом содавиксэкс. Монгак... Од шка, тундо, тантей, судос эциця кошт... Ков эйстэст ношкстат?
[261] Вень инженть теке кияк тандавтызе, эрязасто ёмась варянть тона ёнов. Ней мезе? Одс, зяроцеде уш, никснинь кудыкельксэнь весе ужинетнень. Мезть тесэ ансяк арасть! Ведрат, вакант, ташто шуба, нулат... Ютковаст, кода читькак, маряви вельть качадыця, вельть вечкевикс чине. «Кие сонзэ нолдтни? Кинь те чинесь?» — сась мелезэнь потмарс куземстэ.
Сювордавинь лапам лангс кирьксэкс ды сутяминь.
Ашолгадсь. Валгинь содазь «яннэванть» ды мавкстынь удомаст явавтыця азором туртов. Панжовсь кенкшесь. Васняяк луньк-луньк чиинь аксяло вакашкентень. Тосо сывель марто пидезь лапшат. «Мусть андомка!» — пурдыя прям вакашкестэнть. Кадык потятотськак седеем, сындест ярсамс мелем арасель. Тынсь пупседе!
Пря вешинь ушов.
Омбоце чинть пелензэ ютавтыя васенценть коряс: кузнинь латотнень прява, кундсинь луганть ланга лыйниця коське лопинеть, нетькскеть, кунсолынь эйстэнек аволь васоло пиче виренть ды вельксканзо ливтниця варманть морост. Те вана эрямо! Тейть, мезе мелеть, вант, чийть, кунсолок, мезе седееть мери. Каня ошто мейле весе, мезе тесэ ули, ёвтневи?! Олячи, кода лиякс мерят. Тосо мон эринь... Вай, кода беш мерить?.. Ледсь, ледсь мелезэнь, муевсь — зоопарксо! Те кодамо, алкукскак, эрямо?! Майсевема. .. Ваннодо, ваннодо, псака ялгинем, илядо маняво! Содадо, косо ды мезесэ эрямонть растезэ-танстезэ.
Теке чистэнть сырькаем марто пачколинь вирь чирес. Авань варчамо саиксэлимим. Эзинь моле. Вандынень прям алтыя. Видькстан: мельсэнь паро ладсо чачозояк эзь кирдеве. Содави-арась? Шкась оно зяро ютась. Трицям-андыцям марто совсинек вирень ванстыця кувака пильге пичетнень алов. Вете-кото эскелькст — ды минь уш тосолинек. Пижелгадсь, ансяк совинек, вельксканок сравтовозь менель сэньксэсь.
Вирень кужосто самодонок мейле лытынь-ваннынь кудонок вакссо эрьва ёндо пирязь лугиневанть. Ютазь кизна эзизь ледне. Секскак ожолт мериця мелень тикшесь — [262] тесэ мерить тензэ гавдан — ацазь моданть ланга эчке ватолакс. Варятне эзганзо — а ушодкс, а пе! Ошсо эрямсто истят эзинь нейне. Фу, веляза пря псака! Тонськак а содат, мезть яжавтат! Косто тосо неят?! Кшни, ков а варштат, ды кев. Карык азё...
«Эряви, псака-псакине, ванномс, мезень мазычист неть пельневкстнэнь», — арсезевинь ды венеминь, мадинь пекекиське лангс ве вариненть икелев. «Мейсь истя, видеяк, модачаманть пельнизь — сувтемекс теизь? Кить?» Учан. Учан кувать. Кунсолан. Кашторкс!.. Ёмась. «Крк-крк-крк», — таго марятотсь. Одс ёмась. А куш а каш. Маряви, кулость тосотне, модапотмонсетне. «Саты, — теинь эстень чапине, — саты ёмавтнемс шканть». Ансяк сыргиксэлинь, цивтёрк верьгедсть кинь-бути суро ямкскешка сельмть-сяткинеть. Седеяк пек каятотсь судонь кутькавтыця чинесь. Ансяк невтизе сельмень азорось нернензэ, мон — кивчк — каявинь лангозонзо. Икельце пильгень кенжтне совасть чевте, лембе рунгинезэнзэ. «Пик-пик-пик!» — мария кундазенть вайгелензэ. «Нолдамак, нолдамак», — энялдсь пайстомось. «Учок», — меринь эсь пачкам ды ношкстынь мартонзо кузтемпе ёнов: невтемс азораванень, мезе кундынь. Сень, мезде марсинь, мезенть чинезэ свал явови лия ламодояк ламо чинетнень ютксто, мезенть чинек-венек бажинь цопадемс.
Ушодовсь колмоце чись. Трицям-андыцям «атянзо» марто пурнасть-сэрнясть мекев ошов, келей-покш, лембе ды валдо квартиразост. Кирьмицязь аштян кузтемпесэ ды чатьмонезь ванан совсемаст-лиснемаст, котьмамост лангс. Ванан ды арсян.
«А эрявить, вечкевикс азором, а лапшанк, а кашанк, а эряви натой ошонь вечкевикс каломгак, мейсэ сеедьстэ каванякшнымизь. Кадован теске, чачома масторозом. Содан, ськамом а шождыне карми улеме, ялатеке лиядан. Тесэ весе монь: коштось, лугась, чувттнэ, виресь, менелесь, кудотне-читне, олячись... Тесэ мон эрян, эрян эсень эрямосо, апак пекста».
[263] Арсян, ваннан туиця азором лангс. Снартнян «панжомс» кой-кона валост. Мезде, меремс, корты «вастомазонок» валось? Мезде? Кодамо смустезэ? Истя арсезь, эзия редяяк: сельместэнь нолажтсь сельведень эрьгине ды прась судом вакска. Мекс — а содан.
— Вастомазонок, Ашо пильгине! Иля мелявто, курок велявттано, — омбоцеде мерсь азоравам, ды сынь мельцек-мельцек лиссть пирявкс кенкшканть.