Поладкстомо (2016)/Телесь нарвасы тундонть
[305]
| ТЕЛЕСЬ НАРВАСЫ ТУНДОНТЬ |
Зяро монсь?..
Комсешка иеде икеле вальмалов озавтокшнынь зярыя чувтынеть: укшторнэ, пекшине ды кавто топольнеть.
Иетне аволь нармунть. Сынь ярсамо-симеме а валгонить. Ютасть — эзть редявояк. Пекшесь кенерсь венстеме рунгонзо колмоце этажонть видьс, укшторось — нилеценть. Икельдизь сынст топольтне: пачкодсть натой ветеце этажонть видьс. Варштан лангозост, сайсамам мельспаро. Вана неть алят!
Эряза обуця чувтотне комсь иень перть сайсть-изнясть вете этажт.
Монсь зяро? Кода тень онкстамс?
Ашо пилекст
Кода ансяк а оршнить аватне!
Совась автобусонтень ды озась икелем тейтерь. Зяро мазычизэ чачонь коряс, эзия редя. Удалдо ванозь сельмем икелев понгсть пилексэнзэ. Мольсть сынь тензэ, мезеяк а мерят. Лавтовонзо ланга чадозь чадсть лияназ-ашо черензэ.
«Кодамо, кодамо оймезэ те прясто пильге ашосонть? — пиксесь удемсэм мелесь. — Паряк, оршавксонзо кондямо ашо? Паряк, мекевланг, чопода, теке сёксень ве?»
Весть вастневсть тень истят пилекст. Истя кувтолдсть пилепотинесэнзэ, сокоргадокшнынь мик. Сынст валдодост пупорькшнян течинь чис.
Коське пиземе
Азгун вармась юв-яв ютась пойтнень велькска ды тусь та-ков ялганзо вешнеме.
Поцерь-поцерь... — каятотсь каршонзо моданть ёжосто. Пиземень петнявкст? Кодат пиземеть истямо маней чистэ? Варштынь перькам.
[306] Ловось умок солась. Соламодо икеле мелень лопатнень истя матрынзе-вадяшинзе, теке ацась чувтотнень алга эчке коцтонь велькс. Зяро эзинь вешне, эзинь редя лангстонзо ве петнявкскеяк.
Коське ды лембе. Виренть весемеде валдо шказо! Седейсэмгак валдоль.
Ш-ш-ш-ш... — таго нармунекс ливтясь велькскам варминесь.
Лостерь-лостерь... — каршонзо коцтонть лангсто. Теке кияк кснавт каясь.
Инешкипаз, те мень тамаша?
Окойники, чулгия пештенть, чарькодинь.
Анелькай вармась истя пеедькшнесь лангсом! Сон судрясь чувто тарадтнэнь ды ёртнесь лангозом пургондавксонь лукшт. Коське «вельксэнть» лангс эшкевемстэст марявсь пиземень лостерькс, теке мольсь... коське пиземе.
Неяви ожо тештинекс
Сатано паксясто.
Чивалгомась гувны якстере-ожола тюссо. Вармас, — кортыльть седеикеле.
Пачкодинек леенть чирес. Мадамонть ланга ютамсто Лияна, монь лездыцям, саизе ашо кавшаня черензэ лангсто газетань венчкензэ, ландясь ды нолдызе сонзэ ведьс.
— Истя вана менсь кедьстэм эйкакшчимгак! Косо ней сон? — мерсь тейтересь ды, мизолдозь варштась сельмезэм.
— Монь койсэ, Лияна, васов тонь сон эзь туе... Кемгавксово топодсть? — поладыя кортамонть леенть чирева молемстэ. Чатьмонезевинек. Ванынек ашо вармамевть конёвонь венчкенть мельга.
Сась превезэм тамашань мель. Апак учо венчкесь полавтызе уема ёнксонзо ды кармась уеме чудевксэнть каршо. Ванан, сы седе малав, малав... Мезес ансяк а ветятадызь арсематне!
Омбоце чистэнть теке янганть капшинек исень тевтарказонок. Лаймеванть молемстэ Лияна — эзия нейгак — [307] кенерсь уськазонь нетьксстэ ды ловцагайстэ кодамо каштаз. Леенть трокс ютамсто лоткась мадамонть куншкас ды исенекс каизе прястонзо сырнекс кувтолдыця кирьксэнть, мейле пульзясь ды нолдызе ведьс.
— Те истя од шкам эйстэнь туи, — мерсь нусманя вайгельсэ тейтересь.
«Кодат «туемат», самай мазый шкат...» — меринь эськам ды сеске поладынь марямга:
— Ды тон терявтык кирдемс сонзэ, иляк нолда.
— Тон тонсь варчник? — кундымим Лияна валсо.
— Снартния...
— Ды кода?
— Вант вана. Сырекс эсь прям а лован.
Лияна виздезь ютась сэрьгам.
— Виде, виде... Моненьгак эряви кедьёнкске муемс. Монгак терявтса васов а нолдамс, — пейдезь мерсь валмукшов лездыцям.
— Терявтык, терявтык...
Тейтеренть каштазозо, зярс сувтнинек валтнэнь, кенерсь туеме васов ды неявсь ожо тештинекс.
Эрьва мезенть кис пандома
Эмежень анокстамо шка.
Кенерсть нормальтне, чукшторовтне, инзейтне. Курок сы атямартнень кочкамо шкасткак. Ансяк кенерть сезнемест. Седеяк кандтнемест.
Икельдимим цёра.
«А визькс теть, — цяк эзть мене кельбрястом валтнэ, — истямо бурина, ды эйкакшонь ведрыне мартат. Истямо шкане тонеть эряволь чийнемс ды усксемс лишмень симдема ведрасо...»
Сюкпря эно, шкастонзо суския келем.
Сасыцям-ютыцям ульнесь истямо сэрей ды келей лавтов, кедьсэнзэ ведратне неявсть тень налкшкекс. Мольсь алясь мартост, прок чавонь кедть, теке аволь копкомгак ульнесть пештезь.
[308] «Илямак чумондт, ломань-парочи, — меринь эськам прянь идемга,— ковгак а кекшат моданть лангсо авейкеть-чиденть. Тон вана, видеяк, сэрьс — маралят, мон, тонь коряс, — Цёрынян».
Зярыя чинь ютазь вастовинь цёранть марто омбоцеде. Кепедия вановтом ды абунгадынь. Пазось макссь тензэ аволь ансяк сэрь ды келей лавтовт — мазычияк. «Аполлон, — ютась прявам, — алкуксонь Аполлон».
— Содасак, кинь алясь? — пшкадсь тень Автаень Боляй ялгам.
— Арась.
— Пупор Кильдяень покш цёразо. Эсензэ Кильдяень кирдят мельсэть?
— Эно кода!
— Сонськак Кильдяй мазыель, цёразо — седеяк, — поладынзе валонзо Боляй, — ансяк вана Пазось покордызе.
— Те кода истя? Мейсэ?
— Превсэ.
Се вастовомадонть мейле вестькак эсь «вишкине» уцяскам лангс эзинь пеняцякшно.
Тамаша
Вирьга молиця кись валовсь толонь тюссо. Эскелян эзганзо ёжомарязь. Пелян тандавтса каштмолеманть. Туи эйстэм се, мезень кис сыньгак тия яксеме.
Варштавинь верев ды таймазкадынь.
Килей пряс, эстеньгак эзь кемеве, баксорсо кутморязь-кутморязь кузсь-эцесь овтолевкске... Истямо пондакш, истямо кольняйне!
Чувтоминь.
Паряк, те ансяк неявкс? Он?
Ванынь зярсыя. Яла тень эзь кемеве.
Тевесь оно мейсэль.
Чага пангось, кона педясь ды тапардавсь килеенть перька покш раужо-тюжа пинксэкс, монень неявсь алкуксонь овтолевкскекс.
[309] Ды пек паро.
Кодамо вирь, кодамо Вирявань Мастор тамашавтомо?
Кие косто сась...
Эрьва чувтось, кортыть, кулы, а сявордындерясы узере, стядо.
Домка мелесь.
Кулозьгак кадови пильге лангсо.
Ие, омбоце ды, прясто-пильгс пельнезь, сон пукштор-лакштор сявори модалангс. Пры ды венстясы рунгонзо, кода чинть-ковонть ало эрьва покш эли вишкине эрицясь.
Судот, оинем, пек иля кепсе — модадонть васов а туят. Истямо уш сонзэ обуцязо — пурнамс-сэрнямс ды саемс эстензэ мекев седе икеле максозенть, весементь. Весень сон вейкетстясынзе. Чувтонть, тикшенть, превеенть, чаволанть...
Кие косто сась — тов мекев туияк.
Кие мейстэ теевсь — истямокс тееви мекев. Те «теевкстэнть» таго мезеяк чачи. Мон, паряк, икелень эрямосом ульнинь цецякс. Мезекс сан седе мейлень эрямонтень? Нармунекс? Эли, паряк, ламодо арсиця тумокс?
Теленть полавтсы тундо
Веть пургсесь кельме пиземе.
Валске чоподава кельмевтсь. Чувттнэ-тарадтнэ вельтявсть солавтозь суликасо. Варштась чипаесь, ды сынь цитнезевсть сельмень конявтыця ашо толсо.
Дзинь-дзинь-дзинь... — каятотсь маласом килеенть прясто. Те сыргозсь ды лекстясь вармась.
Зярыя шкань ютазь таго: дзинь-дзинь-дзинь...
Чинь-чоп лембель. Чопоньпелев одс якшавтсь. Валскесь сась шлязь-нардазь ды лекшасо оршазь. Кальтне-ламартне пондакшкадсть. Оймень апак таргсе кунсолыть каштмолеманть ды кевкстнить эськаст: косто саевсь зняро сиясь?
Ютавтомс теленть весеменень стака. Майсевемс савкшны нармунтненень, нимилявтнэнень, [310] пачатненень, гуйтненень-метьказтнэнень... Аволь шождыне печтямс сонзэ ломантнененьгак.
Ие тень савсь эрямс лембе ёно. Олеандрат, кипарист, платант, чинек-венек лымбиця моря... Эзинь кирдеве тенст. Сынст изнизь эрямо ёнкстом пачколиця килеень вайгельтне. Тосо учость эйсэм ашо пор телень паксятне. Якшамо, кежей те шкась? Кадык эрси истямокскак. Эли тон арсят эрямот эрямс кежей валонь апак маря? А берянь, содазь, улевель ды ансяк чуросто кинь истя лисни.
Иень шкатне ды тенек Верде нолдазь иетне эскелить кедте кедьс кундазь. Явовить кист телень прядовома малава. Телесь свал пурды тов, косо сёрмадозь «Тундо», нолдазь иетне — косо «Тоначи».
Кемть, чольдерькай!
Сась теле.
Леесь энгамсь. Кекшсь музгордиця якшамотнеде ды урныця-ирныця кандыловтнеде лембе эй алов. Копачась ёзмолкаесь, ушодсь учомо олячинь максыця лембе чить.
Саия прястом вазем ды пульзинь кумажа лангс. Ловось чевте, кавшаня. Комавтыя прям. Кунсолан. «Мезе марят истямо эчке кувонть пачка?..» — кавтолдозевинь.
А чульть, а чальть. Ашо каштмолема.
Ш-ш-ш... Васолдо-васолдо тошказевсь, эзь кемевеяк, сурень эчкинесэ, цяк марявиця вайгельне. Чольдердсть сиянь Кансёрошка горниповнеть. Длинь-длинь-длинь... Лексемамгак кундатотсь. «А ён тесэ тень, — пачкодсь пилезэм вайгельне, — а ён ды чопода. Куш сельмепонань пачка варштавлинь пиже чирем лангс. Чипаесь курок кирвазтьсы тундонь толпандянзо? Лексемскак стака...»
Лашминенть потмакска эрьбань, ламарень, индерь чувтынень куракшт. Сынь карксамга лов потсот. Учить седе мазый, виень раштавтыця чить. Эйстэдест седе ве ёно — валаня комель лепеть. Каль прянь рацяня рашкинесэнзэ, мерть, ловонть элесэ, нармунень пизыне. Аволь цёковонь? Паряк, пиже озязонь? Кинь илязо уле, [311] кадозь, чаво эрямо таркась валдо мельть а вельмевтни. Нейгак: теке ловсяткинеть валгсть Седеезэм.
Пизынесэнть — чевте-ашо покольне — кедькоморо кельги. Потынь пизэнть эйстэ эскелькс-омбоце ды ловоскинесь велявтсь нармунекс. Мерят, ансяк-ансяк озась ашо толгинесь. Муизе, ялатеке муизе кудынензэ. «Я, ды те, лисни, — токнозевсь кеняркстонть седеем, — телесь тундонть нарви!»
Нарвасы. Тунь а кавтолдан.
Велявтынь чиень тарказом. Одс пульзинь. Ды таго пачкодсь пилезэм васолдо-васолдо пеняцямонь вайгельнесь.
Кемть, чольдерькай: телесь нарвасы тундонть!
Кемть тенень, кода кеман мон.
Зяро питнест викшневкстнеть?
Зярдо илязан са Цицер вирьпулос, кудов велявтан мелень витезь. Истя лиссь нейгак.
Ловось мик сэньшть мери. А вановаткак лангозонзо. Куракштнэнь потс совась каштмолемась. Каштан укштортнэ, покордавинь пойтне, ашо рунго килейтне таймазкадозь учить менеленть пельде вал.
Веть, чарькодинь шушмотнень коряс, азаргалесь тенсилов вармась. Ормазкалесь талайс. Ашолгадома ёнов ахолясь мик начко ловсо. Ансяк седе мейле, зярдо маштсь илыкезэ, выжнэзь ношкстась ков-бути оймсеме. Тарказонзо сась те «кельтеме» шкась.
Ваннан перькам. Сельмем а пештевить викшневкстнень мазычидест.
Ютынь вечкевикс салмуксов чувтонь кужозом. Сеске тень эзть содаво. Теевсть седеяк сэреекс, ёлганякс. Истя акирдевикс вармась сёрмалгавтынзе комелест, — ашо ды раужо панкстнэнь лангс ваннозь, сельведеть туить.
Лисинь пецек-пецек ойсевтезь пичетнес.
Эскельдинь анеявикс буенть трокс ды понгинь ёвксонь мазый латалов. Ков а варштат, сияждыть челькинеть, курсят, артовкскеть. Кемельдинзе сынст кувака пуло [312] кандыловось. Раужо, пиже, ашо. Колмо тюст ды истямо мазычи. Эскельдят — челькинетне лыказевить, лоткат — сыньгак лоткить.
Весть таго-зярдо сельмем икелев понгонесь яволявтома.
Микшневи, эйсэнзэ тешкстазель, Ван Гогонь «Чиньжарамот» артовксозо. Питнезэ — ниленьгемень миллионт долларт. Эзь кемеве. Ютынь букватнень ланга омбоцеде. Эзинь маняво: ниленьгемень миллионт.
Аштиндеряй зняро цёкинесэ теезесь, сестэ зяро Масторавань теевксэсь? Зяро путовольть сонзэ путозь озномань кудонть кис? Паряк, кияк ёвтасынзе перькам викшневкстнэнь питнест?
Вечкса Цицер вирьпулонть. Сован сонзэ потс, теке чачома кудозом, косо свал перькам малавикс ломанть ды зярдояк эсь прям беряньстэ а марян.
Паряк, тынь, домкасто арсиця пичеть, ёвтасынк тень викшневкстнэнь питнест?
Чатьмонить каршом чувттнэ. Паряк, сыньгак аздыть.
Ёми ломанесь, ёми...
Чиньперть азаргалиця вармась ды якшамось мазылгавтызь вальматнень сияждыця тюссо. Суликатнень викшнизь тикше лопасо ды тарадкесэ. Верьга тешкстнесть пупскеть. Сынст коряс кудонь Шаршавтне педе-пес ёмавтызь мазычист. Мерят, румсть.
Сундерьгадсь.
Вельмевтинь тол ды — чувтоминь.
Каршом вальмастонть вансь лангозом вень менеленть тюсозо. Истямо сон эрси телень маней якшамо шкасто. Тусто-сэнь менельстэнть кончтнесть тень тешттне. Кувтолды, ванан, ковось. Оно Сириус, Лира тештень куротне, оно Покш Кечесь.
Тештть, планетат, кувтань-кувтань сувтт... Прок планетарийсэ.
Суликанть тона ёндо, пштистэ цивтёрдыця сяткинетнень удалдо, варштась лангозом эсь чачом. Неия те [313] тамашань артовксонть ды ледсь мелезэм школань умонь шкань книгасто вейке невтевкске.
Монахонь, кочкаряс кувака оршавкссо ломань. Сон совась моданть велькска сравтовозь суликань ябунцянть тона ёнов. Пульзясь ды, икелев кедензэ венстезь, ваны абунгадозь, кода сувтнить валдосост тешттне, якить верьга паксятнева чись ды вечкицятнень вечкицяст — ковось.
Ломанесь ды менель томбальксэсь...
Зярс кияк а соды: улить тосо, ломанденть башка, эрицят эли арасть. Зярс ськамонок. Лия планетасто сакшныцятне — ёвкст. Мезе карми улеме, кулындерятано?
Арсезевинь теде ды токимим кельме ёжо.
А ванстовиндеряй войнадо-мезде эсь прянок ды кудонок — Модась, — палыть-ёмить Чи ёнкстнэяк. Ансяк миненек максызе Пазось чанстенть марямс ды неемс эрямонть домкачинзэ. Ёми ломанесь - чопавти отьмас Модась-Менелеськак.
Менель томбальксэсь — те сонсь ломанесь.