Поладкстомо (2016)/Стямось аволь прамо
[276]
| СТЯМОСЬ АВОЛЬ ПРАМО |
Пошань Кучаень канстозо аволь шождынетнеде. Сон тикше ды чувто пирень прявт. Тевензэ зярдояк а маштнить. Эрьва куракшкенть лови ялгакс. Весемеде покш мель яви Вере кужонть чиресэ касыця сыре селеентень. Мекс, сонсь а соды. Паряк, комолянть кис, кона эрьва иестэ кузни те чувтонть пряс?
Сыречись, содазь, аволь Инечи. Ормавтомо а яки. Стардызе сон седеентькак. Чувтось кармась резэме. Васня ожолгадсть лопанзо. Мейле, кизэнь куншкава, коськсть допрок. Арась, эзь учово тензэ меельце сёксезэ. Кулось сон, кода кулсить лия ялганзояк, стядо ды вестькак апак кувсезеве.
Пирень азорось бажась ней те пелев а понгонемс. Марясы, кода урнить «атянть» коське лопанзо, ды пурды кистэнзэ, туи лия ёнов.
Сась тундо. Пачкодсь сон Вере кужоскак. Весемеде пек кецнесь тензэ комолясь: кулозь оянть Сэрьга-рунгова седеяк ён ули касомс-кепетемс. Весе тонеть: модасто молиця ведтне-салтнэ, валдось, варматнень потмо валост.
Комолясь, пиштемань апак сода, кузсь лопавтомо чувтонть тёкшкес ды чоподасто чоподас палсесь чипаенть марто.
Ютась ие.
Весть ловонь соламо шкане камбраз ёнов молйця селеенть ваксс састь кавто цёрат. Мартост кандсть [277] мотопила. Апак сэзнэ нолдызь машинаст. Цярномадонзо, марявсь, сорнозевсь менелеськак. Ве важодицясь нежедизе кедьёнксонзо комелентень. «У-ф-ф...» — меревсь селеесь прамсто, ды рунгозо венстявсь, прок сяворезь ломанень. Чувтонть таркас кадовсь ваксонь сэрьсэ мукорь.
«Весе, прядовсь эрямонь пингезэ...» — мерсь Кучай ды шаштсь ве ёнов. Сон вансь венемезь, синдтрезь тарад чувтонть лангс ды арсесь эрямонть нурькачидензэ.
Ламот мернесть: кадсынек, кадык лияды шекшататненень суксонь вешнема таркакс. Арась, эзинзе кунсоло превень максыцятнень. Мезеяк а теят, эрьванть эсензэ обуцязо, эсензэ чартьчизэ. Кучай атянь «ормадо» содасть пирень весе важодицятне. Сон, васняяк, пансесь ваньксчи мельга. Кшиде иляк андо, ансяк улезэ пиресэнть уряд. Секс самай сявордовтызеяк Вере кужонь «мазычинть».
Куроксто вакнозевсть пире чиресэ эрьксэнть ватракштнэ...
Ватракшт ватордыть — лембе сювордыть.
Явась удомазо комолянтькак. Сон пупизе пшти нерьсэнзэ ланганзо сравтозь лопань вельксэнть ды варштась ушов.
— Вай, кодамо валдо! Вай, зяро сэньшть велькссэнь! — ульнесть васень валонзо. Сиякс жойниця вайгелезэ срадсь чувттнэнь юткова. Серьгедсь ды седеяк эрязасто кундась касомо. Эзть юта кеменьшка читькак, сон венстизе рунгонзо. Берянель вейкесь: автордамс а мезес, маласо кодамояк неже арасель, сонтемензэ, содазь, прят а кепедьсак.
— Те кода истя?! — пижакадсь наян тикшесь. Каршонзо — а куш а каш.
Новольсть комолянть лопанзо. Нуваргадсь.
«Кува ней тень вешнемс кузтема? Кода ней карман пурнамо чипаенть сырнень казнензэ? — яла мелявтсь, яла ризнэсь чувто прява кузницясь. — Мезе ней теемс? Кода улемс?»
Васня пиштяканть нетьксэзэ кирьксэкс тапардавсь мукоренть ланга. Теевсь пиже ашко. Мейле мезе? Кода седе тов эрямс? Арсезевсь. Превть яжи чи, мельганзо омбоце, колмоце... Арась, паро мельс эзь са.
[278] «Сезьган пизэсь» яла келейгадсь. Мукоресь вишкалгадсь. «Мезеяк а теят, сави тень пемгак тесэ муемс...» — састь нусманя мельть стомавицянтень.
Кизэнь ве чистэ Кучай атя варштась Вере кужос. Аволь пек умок сонзэ мазылгавтнесь келей-рацяня, теке лато, селей. Ней вана... Пирень прявтось эртевсь пиже ашконтень ды чувтомсь. Сась ёжос ды марямга мерсь: «Э-э, истя а лади, кирьмицькай... Теемс эряви мезеяк. Терявтома идемс кажостонть. А мезть теть майсевемс».
Чопоньпелев керязь чувтонть таркас стявтозель виде ды сэрей, теке торсей, олога.
Комолясь эзь сода, мезе теемс кеняркстонть. Маштовольгак киштеме, чаразевель. Васняяк сон венстизе нерензэ нежентень, теке чине марясь. Венстизе ды аламонь-аламонь ушодсь карьксэкс тапарявомо перьканзо, эцеме верев.
«Сюкпря теть, ломань-мазычи! — каштордсть лопанзо. — Учан эйсэть сёксня инжекс. Улиндерят од — лездан муемс теть пола, бути атят — казян теть яндава брага ды моро!»