Поладкстомо (2016)/Пелюма
[296]
| ПЕЛЮМА |
Аштемковонь ушодкс. Самай тикшень ледема шка. Ков а варштат, пиже луганть седеяк мазылгавтыть, сельметь кецневтить ашо, сэнь, якстере, тюжа тюсонь панжовкскетне. Вановтот а саеви пейделькасо пургсезь таркатнестэ! Кецневтить седей овтумарень валдо-якстере покш, роза ёнов молиця панжовкстнэ. Сэнь балягинетне важовсто сюконякшнять вармань чевте зэхельтненень.
Пиренек ве пезэнзэ мезеяк а путнетяно. Эмежень-умарьксэнь таркас тесэ уцорсо касыть килейнеть ды пичинеть. Видизь сынст шабрасонок касыця вирень сыре чувтотне. Минськак, мерема, эзинек удо — озавтнинек чевгень куракшт. Ней сынь мазылгавтнить эрямо тарканок кизэнь прядовома шкастонть. Гувкадить якстере толпандякс ды, маряви, эждьсызь сыця сёксень коштонть. Пиренть куншкава ды чувтынетнень юткова-алга кецнить чипаентень ды пиземесэ сюпав пельтненень эрьва кодат тикшеть. Истя мерян тенст келейстэ арсезь. Зярдо кортамось моли мазычиде, лемдьсынь, нолдынк чумом, аволь цецякс — балягакс эли чахракс. Те карми эрзякс.
Кодат мазый валт иля путне, кодат ёвкскеть иля ёвтне, сась шказо лисемс пелюма марто.
Лисинь. Нежедия чирь пееленть нерензэ калгодо таркинес, ютынь човсемкайсэнь лёзанзо ве ёнга весть, омбоцеде, колмоцеде, ютынь зняроксть омбоце ёнганзо... Варчия сурсо. О-о-о... пшти, теке бритва! «Туить тевем...» — меринь эськам.
Вана лугамгак. Ушодынь яннэнть чирестэ. Ахолдынь «бритвасом» весть, омбоцеде... Празь правтан уськазт, чудожовт, чеерень карькст... Кодаткак янксемань мельть превзэнь а совсить. Натой токшить седеем кецнемань ёжот, ледстнемат! Кода эно, зяро мартонк, зыян тикшеть, майсемат ульнесть вишка пингестэ саезь — а лововить. Арась, арась... суронь кочкомась зярдояк пряудемсэнь а олы.
«Лоткак!» — мерсь тень потмовайгель. Вансть лангозом, прок кецнесть, чавкань прянь якстерть-сэнь [297] оскинетне! Кецнесть монень ды псисэнзэ виень, кенярксонь казиця чипаентень. Кедем новольсть. Пелюмам энгамсь. Ледсь мелезэнь войнань шкань эйкакшпингем, кода эрьва кува кочкилинек неть «прятнень» ярсамс. Костямодост мейле авам пидиль мезе-бути кашань кондямо. Ней, содамс, сэвевель тень куш пенчке се кашадонть?
Эскельдинь курыненть трокс ды поладыя тевем. Седе сеедьстэ вастневи тюжа пря тикше — лютик. Сондензэ а мезть мелявтомс. Лемезэяк... «ядовитый». Керяк, пелюма, керяк! Керяк истятнэнь!
Куроксто понгсь керицям икелев атятеште, лиякс — чемерица.
Авам — омбоце эли колмоце классо тонавтнилинь — рамакшнось ведрекш. Валске марто каясь тензэ тикшине. Зяро-бути шкань ютазь ведрекшенек тоцк прась бока лангс, кармась пильгесэнзэ дрягамо, кургостонзо тусть човт. Авам чийни перьканзо, лайши, а соды, мезе теемс. Мейле совась кудос, ливтсь лембе ведь. Тона а сими. Ну, секень вант, кадовтано скалтомо. Сюк Чипазонтень, аламонь-аламонь ормась потась. Кепедизе сюракшось прянзо, варштась веденть ды минек лангс. Чумось ульнесь сон — атятештесь. Ды теде мейле кавтолдомс — керямс а керямс? Правтт, пелюма!
Эскелян галань эскелькссэ седе тов. Вастовинек эльденачко марто. «Ужо, пелюма! — меринь нарыцям туртов. — Вачо шкатнестэ сон ульнесь тенек васень ярсамопелекс, сехте тантеекс ды пекень пештицякс. Иляк токше!» Э-э-э, кинень пшкадинь, марикскак эзь тее. Выськ — ды эльденачконь истят потьмежа, куяв нетькстнэ аштесть празь. «Вай! Те тон мезе истя теят, седейтеме?! Тунь а кунсолат азорот», — ловнынь моралень кондямо. Кортак сонензэ, кшнинтень!
Панян икельксэм седе тов. Чудожовт, Лугалангонь пинемс, ривезьпуло, каткань пуло... сяворить увсо. Лоткавтымим умбравонь верев бажиця, теине лопа нетькске. Кувакасто лекстинь. Ды кода сонзэ маштомс, саемс оймензэ?! Кие мон карман улеме теде мейле? Зярдо таргозекшнинь вачочиденть ды эзинь якавкшно, умбравось ульнесь [298] пильге лангс стявтыцям. «Мезе карматано тееме, кичкере пеель, а? Кадык, иляк сае оймензэ. Сон, умбравнесь, куломадо монь идимим. Иляк токше ризаня те тикшиненть». Кортак, иля кшнинь седеентень, сонензэ тонь валот — кода атякшонтень «На сопках Маньчжурии» Вальсэсь. Керизе умонь-умонь шкань идицям ды шаштызе керш ёнов.
Панаром педясь копорезэнь. Превейтнестэ вейкесь лемдекшнизе ледеманть весемеде виень саицякс. Секскак улемс коське панарсо а кодаль. Весемесь вадря, ансяк сеськетне... Эряволь ахолямс панартомо, истя аволинь ливезькале. Варчик азё! Козонь ансяк а эцить!
«Аниська, тон?» — прась кельпрястом, зярдо эртевинь зонтикекс келемтезь ашо пря те тикшенть эйс. Псилгалемадо лоткинь. Таго састь превезэнь, идемевсь калгавлинзе, чоподадояк чопода, вачочиде пешксе иетне. Ледсь мелезэнь, кода вете иесэ сазорнэнь марто якинек васоло Калмазырь латко чирев аниськань кочкамо, кода понгонинек виевдеяк виев пиземе алов. Умок, пек умок те ульнесь!
«Ужо, оймак аламнес! — меринь кежей пеелем туртов. — Кадык, иляк токше, иляк врадо ато ашо пря те касынькаенть». Кодат, эзь арсеяк! «Ледть!» — рангстась каршо. Мон, кочкарянть лангс нежедезь-лепштязь, поладыя ахолямонть. Керявсь, кулозекс мадсь вечкевикс аниськам.
Модась тесэ лаймонь, начко. Секс цивцясь минек пиресэ кассь ансяк ве таркинесэ. Пачкодинь сонзэ эйс. Ськамонзо вечкевиксэм лиятнень ютксо, ськамонзо.
«Ванстома!» — меринь эсь пачкам. «Эскельдяк трокс!» — кармавтыя пелюмам.
«Иля арсеяк!» — маринь каршо.
«Иляк токше! — серьгединь, эзинь кирдеве. — Сон, тантей чине ашо панжовкскесь, арвонь-медень максыця, модань вадрялгавтыця. Те тикшесь од шкастом панжокшнызе тень наукань кудонтень кенкшенть. Секскак — эрязо».
Монь апак кунсоло, ледицясь чижк керизе тень лездыця тикшенть. Вана истя. Кшнинть пельде иля учо седеймарямо.
[299] Варштынь перькам. Мезе, а стяко сеськетнень андынь, а стяко псилгалинь — лугам, мерть, ледевсь. Кадовсь «оймавтомс» чилисема ёнга пирявксонть ёжова касыця азарсь пиципалакстнэнь. Эряви, эряви! Ломантнеде визькс, секень вант, Скирдатадызь: «Нуят пиципалаксонь раштамо кармасть... Курок весе пирест макссызь сынст алов. Базарсо микшнемест кармить».
Кепедия лавтовом лангс «оймевтементь» ды ютынь тов, ков тень эрявсь.
«Э-э-э, маряви, алонк модась аволь кальдявтнеде! — пшкадинь пиципалакстнэнень. — Лопаяк рукшнашкат ды чопода-пижеть, сэрьскак оно ков кирнявтыде! Икельдинк ламонь. Каня те а корты андыцянк сюпавчидензэ?! Мезть илязт корта шабратне, мон тынк ванстовлидизь. Войнань ды войнадо мейлень иетнестэ эйстэнк ямось, конанень мекс-бути мерилинек баланда, марявсь весемеде тантеекс ды пекень пештицякс. Ашти мельсэнь: ансяк, рангозь-пижнезь, кирякстынь латкотнес ловось, пирявкстнэнь ёжова ды лиява-кува кирвазильть пиже толнэть. Истямокс неявильть тенек пиципалаксонь вишка куракшкетне. Сезнилинек лопанек-нетькснэк ды седе курок аванень — каявлинзе ямс.
Аштян, ванан, ледстнян...
«Тон мезе учат? — каятотсь лавтовом лангсто кшнинь кельме вайгель. — Саты аштемс, нолдамак тевс!».
Марязденть абунгадынь. А мезть теть абунгалемс: аволь васенцеде чевелить пилеть ацирьгалицянть валонзо, аволь васенцеде топавтат мелензэ.
...Ютасть минутат, ды тусто, эсексэст мазый, рацяня куракштнэнь эйстэ кадовсть ансяк ледстнемат.
Кудов эскелинь каладозь ёжосо, прянь нолдазь. Чокшнень перть эзь лисне прястом мелесь: кодамо а ёвтавикс покш зыян канды, ризкст види, верь валы виесь, конань мельга арась ваныця, кона киньгак а кунсолы, а мари, а неи...