Поладкстомо (2016)/Меельце эскелькс
[210]
| МЕЕЛЬЦЕ ЭСКЕЛЬКС |
Нуицясь прядызе икельксэнзэ, видемтизе сизезь рунгонзо ды кепедизе вановтонзо чипаенть пелев. «Мезе, ловт, суромгак ули прядозь, пинеть аламо кадовсь. Эх, а шказо, шказо, вантая! Тутмадонтькак арсема. Каравсь, маряви. Апак ярса, иля арсеяк, васов а туят!» — арсезевсь Сёдор атя, ды пильгензэ сынсь, «верде» апак кармавто, сайсть ёнкс а васоло копанянть ёнов. Тосо лоткамо тарказо, «лапазозо», тосот кудосто саезь ярсамопелензэ. «Варштама, варштама, мезть вачкась пешторозом Ограй баба», — копанянть вакссо мадстезь пултонть лангс стамбаро, атякс озамсто мизолдозь мерсь сон эсь пачканзо. Венстизе кедензэ ды путызе эседензэяк ташто ленгень кедьгенть элезэнзэ. Эзь кенере панжомонзо, икелензэ стясь умань коряс шабразо Чудожов Лёва, сэрей, теке рицяга. Кодат тевть яксевтсь сёксензэ лангс, мерть, пельсчаво паксятнесэ, сонсь содась.
Шумбракстнемадо мейле теде-тонадо зярыя валонь ёвтазь, шабрась пачтясь куля. Райцентрасо течи улемстэнзэ вейке ломанень пельде марясь: седе теле малав кармить, келя, старямо кулактнэнь, велесэнть седе парсте, «пильге лангсо» эриця азортнэнь; пансесызь, келя, та-ков васов. Зярыяксть Лёва ёвтынзе неть валтнэнь: «кулакт», «ми-мироедт» «по-под-подкулачникть...».
Марязденть нуицясь, сонськак а соды мекс, путызе пешторонть мекев тарказонзо, панжтнемензэяк эзь карма. Кулясь тунь колызе кайксэнзэ. Ярсамонь мелезэяк ёмась. Те эзь юта каршонзо аштиця Лёвань вановтонзо вакска. Чарькодизе, секс кортамонзо прядызе општсо. Песэнть мерсь мезе-бути нуемань тевтнеде ды сыргась, сэрей ломанень келей эскелькссэ эскелязь, эсь уманзо ёнов.
[211] «Мезе, сыре кренч, карматано тееме? Ёвтак!.. Эрямо. Эряви эрямс! А тосо...» — ютась Сёдоронь пряудемга кармавтыця мелесь, конань ёвтнесь ды ёвтни эстензэ седеень сэвиця шкатнестэ. Нейгак вана. «Эряви эрямс!» — мерсь, эль лыказевсть турванзо ды одс саизе элезэнзэ кедьгенть. Панжизе. Путозельть эйзэнзэ кши кочом, саразонь кавто (содась, письверек) алт, ойсэ ваднезь, товсюро почтонь эчке пачалксеть. Эзь ёма юткозост чапамо ловсодо пешксе суликаськак. Вечки Сёдор чапамо ловсо! Седеяк-пачалксе марто. Машты Ограй, сави шнамс, пидеме-чапавтомо! Кол. Куринкасонть, арсят-теят, истямо а муят. Сускат оев пачалкседенть зяро кельги кургозот, копордат-корштат ловсо... Тантей, седееть витеви! Сускат-корштат... Ограень тонавтомс а савкшны, соды, мейсэ-кода каванямс атянзо.
«Кулакт», «подкулачникть» — пиций сяткокс таго кивчкадсть Сёдоронь прява Лёвань кургсто марязь валтнэ, ансяк кенерсь порксамо васень алонть вакссонзо валаня недь муворонтень . «Лисни, минекак Ограй марто сокардасамизь. А кадсызь, кавтолдомс а сави, Михалоньгак, Лексееньгак, — эсь янгаст чийнесть нуицянть прясо арсематне. — Мон уш кадык, сырян. Ужока! Паряк, текеде кадсамизьгак? Мезекс, видеяк, макшиязь мукоресь? Кодамо лезэ эйстэнзэ? А? Э-э, атя... Эзить велязеве? Кадтадызь... Теде иля арсеяк. Сускиця пинесь мурныця псакакс зярдояк а тееви. Сайсамизь... Ковгак а молят. Цёратнень вана...
Габордасызь улипаром... Вай, те кода истя? Истя вана! Сайсызь — сельгеме а кенерят... Ды те эно кадык, ансяк эсенек аволимизь токше. Кадовлимизь велес. Пазось кудотнень-читнень марто! Эх-на, Пазось мартост... Шожда меремс! Пинге карязт яжинь, веть эзинь удсе, ливезьсэ зяро экшелинь, яла бажинь теемс тевем шкастонзо, ломанде икеле. А стувтови зярдояк: явомсто, чачома кудостом туемстэ, тетям максокшнось тень вашине. Сокамо-изамо иеде ламо савсь сивелемс ве ёндо. Стакаль. Ды зярдо, меремс, сон шождынель?.. Вашинесь кассь-кепететсь паро эльдекс. Тевем аламонь-аламонь лыказевсть.
[212] Кодат стакачить эзь саво печтямс, совинь вийс. Кардазсом кирдевеме кармасть, шка ютась, кавто лишметь. Ламонень велесэнть эзь кирдеве вейкеськак, монь — кавто. Те уш паро азор! Ломань! Аволь кода Ёколкань Хрола, велень неень прявтонок».
Сэпей кулядонть арсематне оймамо эзть сода. Ансяк кургось — пейтне-келесь — содасть эсест: човсесть-човорясть пей лангс путозенть. Сынь пек эзть мелявто седе, кодат кежей, вешкиця вармат-арсемат чарыть-велить седе вере, пряудемсэнть. Секскак кудосто саезесь эзь марявояк кода прядовсь. Сёдор путынзе тарказост пенчензэ-ваканонзо, аволдынзе сакалозонзо празь кшипаморкстнэнь кедькоморозонзо ды ювкадинзе кургозонзо. Энгамсь. Аламо шкань ютазь нежедсь керш кедьсэнзэ пултонтень, стясь. Ютась, кундась нуеме.
Цирьк, цирьк... — човине вайгельсэ одс кортазевсь муворозо суронь пельскоське нетькстнэнь марто. «Монь кодамо тевем, ломантне ангорить-порить вейкест-вейкест?» — марявсь седейтеме керсицянть цирькаемасо. Виде, эрьванть эсензэ тевензэ-мелявксонзо, эрьванть эсензэ майсеманзо-орманзо, эсензэ молевксэзэ, кортавксозо... Тень эйстэ мацтс а валгат, тавадкс алов прянек-пильгенек а эцят.
Атясь керясь карксокс нетькст, видемтизе рунгонзо. Таго варштась тов, косо эри Пазось — менеленть сэняжа чамас. «Авардеме, неяви, а арси, — ювк сась превзэнзэ. — Арась, а неяви». Алкукскак, менеленть чамазо ванькс. Лытыця пельнеяк а неяви. Мерят, аволь сёксень ушодкскак. Умарьковось, арсезеват, сайсь мель кувалгадомс. Истя-аволь, сонензэ, кода сэньсэ гайгиця менелентеньгак, — ялатеке, кодат вармат-кандыловт вешкить-азаргалить Буянь Сёдор атянь мештьсэ, мезде сон арси. Те сынст а мелявтовты. Те, марят, тонь, Сёдор атя, пря сэредьксэсь, тонсь кунсолокак неть варматнень морост. Нерьгстызе атясь муворонзо модас, кавто кедьсэ пурдызе-понызе нетькс керьменть карксокс ды эрязасто, маштозь сюлмизе пултонть.
«Монсь эно кадык, — либорк сась ёжонь пуштыця теке мелесь. — Михал эйкакшонзо марто, Лексей... [213] Мезень чумост? Паньсамизь минек, педить сынст эйскак. Сыньгак аволь вальмалга яксицятнень эйстэ. Кардазост а чавот. Михалонь вана курок чами Натузо. Ветеце учить. Мейле мезе — ветеце? Мезе — потякай эйдине? Каня те сынст кшнинь седеест ризнэвти? Куш кемень, кемгавтово, комсь чачтак. Сыненст... Хролань, велень прявтонть кондятнэнень, ялатеке. Эри ды эри кукорькай кудынесэнзэ нецюнай нинзэ марто. А кудыкелькст, а кузтемпеть. Венельдема таркасткак арась. Лишме... Козонь сонзэ совавтсы?.. Менель алов кадсы? Кершасызь, кершасызь цёрам, седеем мари...»
Нуемс суродонть кадовкшнось «вакс». Секскак Сёдор атя ноцоризе сонзэ куроксто. Кадсь апак нуе, эзизе стувто, панкске. Ютась «станозонзо». Кепедизе озамо пултонзо лангс путозь-анокстазь кшикочомонть, ватксезь алонть ды велявтсь мекев апак прядо панкскенть чирес. Стясь икелензэ. Путызе анокстазь кшикочомонть апак нуе суронть потс ды пшкадсь: «Те тонеть, паксянь азор-Норовава! Лездак сы иестэ кастомс-пурнамс паро сюро. Олгозо улезэ ажиянь эчксэ, товозо, — тейсь нурькине кашт ды путызе алонть кшинть ваксс, — Норовава, казезь алшканть. Пешкедест кескавонок-сусекенек копком. Макст, паксянь прявт, сэтьме пиземеть, сэтьме, лембе вармат. Ванстомизь цярахмандо-даволдо. Паз, чангодть, Паз, чангодть, Паз, чангодть».
Варштась Сёдор чикуншкадо мейлень валдосонзо элякалиця ожо чама чипаенть пелев, кепедизе ютамсто муворонзо, саинзе курмонзо-кармонзо ды апак эрязкале сыргась веле ёнов, кудов. Теде икеле вановтозо нолажт ютась эйстэнзэ аволь васоло, вайгельпешкань ютко, кезэрень пингень сэрей-эчке, кавто цёраненьгак эрьвась а кутмордави, пичетнень ёнга-ланга. Умок, допрок одоль, покштязо тензэ ёвтнекшнесь. Келя, умоктояк умок тесэ кассь, увнось варматнеде, морась моронзо пиче вирь. Мейле аламонь-аламонь, иестэ иес чувтотнень саидизь, ды те таркантень теевсь пакся. Вирьаванть полавтызе Норовавась. Сесэ, косо ней касыть сыредеяк сыре вете пичетне, [214] ульнесь, покштянзо ёвтнемга, калмазырь. Калмсесть эйзэнзэ эрзянь койтнень коряс. Сестэ, келя, Сарговелень эрицятне Христосто эзть марсеяк. Озность Инешкипазнэнь репештясо, вирьсэ. Кить тосо «удыть»? Кодатольть сынь? Кодатольть коест-кирдаст? Крёстт, келя, калмотнень лангс эзть стявтне. Седе покш пежеть — понгавтомс кирьгазот крёст, путомс крёст — арасель. «Паро улевель сынст юткс пильгем венстемс...» — кивчк кирвазсь ды мадсь мелесь. Косто саевсь сон, истямось? Мекс, алкукскак, тозонь, кезэрень а мадемс калмотнень юткс?
Арсезевсь теде велев эскелицясь ды таго содавтызе нусманя, дарманонь лавшомгавтыця ёжось. «Кулакт», «мироедт»... Эзть марсевеяк велесэнть истят валт, идемевсь трескавлинзе! Кодамо карциган кандынзе? Косто? Паро улевель, алкукскак, мадемс сеть пичетнень алов, покштянь покштянзо ваксс, а марямс седеень тардевтиця, рунгонь сурневтиця Тюгаень неть меревкстнэнь...» — эвтсть, кирнявтнесть арсеманзо вейкестэ лиятас: таго содавтызе пильгень венстемадо се тюнголькс мелесь.
...Ютась, эзь марявояк, ков малава. Мартонзо ютась сёксень мелявксто пешксе шкаськак. Ламольть мелявкстнэде, улавс а вачкавить. А стяко, мерема, велень эрицятне лемдизь иень те шканть таштамковокс. Тевть, тевть, тевть... Истяяк мереват: каня сакшныть велес тевтеме, шожда, киштезь-моразь ютавтовиця шкат? Телесь? Цюр, иля капша! Виде, паксянь-лугань мелявкстнэ икелепелев эседест а ледстнить. Сень кис лодорсо прыть лавтовот лангс, секень вант, чирькекс мендятадызь, кудонь-кардазонсетне. Тикше каяк, симемс ливтть, пенгть совавтт, ведь кандт... А штердематне-кодамотне? Мезе-мезе, куринкаванть штапо бренцяеме а кармат, визькс таркат, киськеть мейсэяк ды копачама.
Буят, сонсь Сёдор атя, низэ ды кавто цёранзо, шкастонзо кенерсть розест, пинемест, сурост пивсэме. Весе, мезе видезель-путозель, пурназель утомга-кавга. Сыця телесь сынст эзь тандавтне, эйстэнзэ эзть пеле — мезе эрявсь сонзэ вастомга-ильтемга, анокстазель.
[215] Юртсо-кардазсо энгамомань а содыця ботамось лавшомгавтызе панемадо пелеманть, шаштызе ве ёнов, сон ней удементь эзь ноцоря.
Весть чокшнеланга варштась Лексей, Буятнень омбоце цёраст. Лангс ваномс эйкакштнэ тетяст ёнов тукшныть аволь сеедьстэ. Тюсонь максыцясь васняяк — авась. Лексей вана — омбоце Сёдор од шкасто. Тетят-цёрат прок кавто ведь петнявкст. Кавонест келей чамат, валдо черть, судост нурькинеть-видеть, сельмест — менель сэнть. Лексеень лавтовтнеяк Сёдоронь. Ансяк сэрьсэ, паряк, суронь эчксэ, икельдизе тетянзо. Ды, меельце пелев, — тевсэ. Од, кода а икельдямс. А пели чочконь кепедемстэ кундамс эчке пентень. А стяко Сарговелесэ ловови виевтнестэ вейкекс.
— Тетяй, — пшкадсь цёрась, ансяк стясть стувор экшстэ чокшнень ярсамонь прядозь. — Кершавкстнэнь ютксо, мельсэнь, ульнесь бляшка марто панцтонок. Вешнинь, вешнинь...
Меельце валтнэнь ёвтамсто Лексей кончтась, макссь тешкс — лисемс ушов. Тетязо чарькодсь. Оршнесть-тейсть ды тетят-цёрат лиссть кузтемпес.
— Апаро куля маринь, — лепштязь вайгельсэ яволявтсь Лексей кузтемпень кенкшенть мельгаст пекстамсто.
— Кодамо?
— Сундерьковонь сисемеце чинтень, келя, велестэнть «кулактнэнь» чиевтеме кармить, — чоподасонть таго каштордозевсть Лексеень валонзо.
Сёдор талакадсь, эзь сода, мезе меремскак цёранзо кургсто марязенть каршо.
— Арсят, тетяй, минек эйс а пачкодить, вакска ютыть? — салава, прок кияк кунсолы, пшкадсь Лексей тетянстэнь.
— А содан, — атянть лавшо, сэтьме вайгельсэнзэ марявсь тандадома, сон нолдынзе лавтовонзо, рипакадсь. — Васенцеде те кажодонть марякшнынь, ёвтнекшнинь уш, сёксень ушодкссто. Чудожов Лёвань кургсто. Се шкастонть саезь превсэнь текесь вели...
— Монень сисемеце чиденть ёвтась Тёляй Галё. Важоди сон, содат, вельсоветсэ ванстыцякс, теке марто [216] тенси-шли тосо, тельня ушты-явавты... Пингстэнзэ Ёколкань Хрола ды районсто сыця та-кодамо «чин» кортасть пансематнеде. «Чинэсь» те чинть ёвтызеяк.
— Тевесь тенень молияк, — сыресь прась одонть марто ве мельс, аволдызе прянзо ды кепедизе вановтонзо чоподасост тандавтниця пельтнень пелев. — Мезе тееме карматано?
Општ. Марявсь, пе тензэ а ули, усковозь ускови. Мезе, алкукскак, теемс, кода идемс прянть, таштазь кудотнень-читнень ды а понгомс кажонь те чопода-кельме латконтень? Кода улемс? Пилесэ бийниця, теке сеське, каштмолемань гайтенть аволдызе юртонь прявтось:
— Улипаронок эряви сравтнемс малавиксэнек ланга: кува стякодо, кува пелепитнеде; мезе маштови — кекшемс седе васов. Кадовтано кепе-штапо. «Беднякт», а токасамизь.
Марязденть цёранзо токизе абунгадомань кондямо. Эзь са тетянзо марто ве мельс:
— Вай, кемат теньс? Шкаськак эзь кадово.
Кудазорось кадовсь эсензэ мельсэ. Нежедизе копорензэ, кавтолдозь ёвтась:
— Паряк, мезть а эрсить эрямосонть...
— Эйкакшонь валт, тетяй! Каня а содат, кие ки? — цёразо машнетезь сорновтнесь чаманзо икеле кедьсэнзэ.
— Мезе виде — виде. Улипаротнедеяк... — атясь таго кортазевсь таштазь эрьмеденть. — Кода истя вырновтнемс тей-тов? Пинге карязт яжинь, бажинь ломанде а кадовомс. Ды ней весе тень варма мельга? — прядынзе валонзо, кувакасто таргизе оймензэ.
Лексей чатьмонезь вансь ушов, куронь тона ёнксонь кудотнень пелев. Некеть мельтне бизмолдсть сонзэ превсэяк. Кода улемс, мезе теемс, кинень пшкадемс — эзь сода сонгак.
— Паряк, кекшнезь-кекшнезь кадомс веленть, оргодемс? Ношкстамс ковгак васоло ёнов? — Сёдор атянь содавтызе, мик кецневтизе, од мель.
Лексей арсезевсь:
— Мелесь вадря. Ансяк теде эряволь арсемс седе икеле. Ней... чить кадовсть. Теяк: тынь авань марто туевлиде, а Михал... керькс пакшанзо марто?
— Пароль сыре патянень, Нижноев, кирякстомс. Ды эсензэ тосо эйкакштнэде пизэ... А, а мезть ней теде. Лишмесь тусь — улавось кадовсь. Шкастонзо эзинек арсе. Пивтинек тевтнесэ, яла эзть нолда. Видьстэ меремс, аволь тевтне чумот — минсь, минсь курго автнинек, — янксезевсь Лексей.
Зяро тетят-цёрат эзть онкстне, мезе теемс, — идиця, парос ветиця мельс эзть са.
Ушосонть аволь кизэ. Кельмевтсь. Лавшосто оршазь кудазоронтень педясь сурневтема. Сон явсь цёранзо марто ды совась кудос; тона валгсь кузтемаванть, тусь эстензэ.
Каштомикельксэнь тевензэ прядозь, Ограй баба аштесь озадо удалцькудонь вальманть вакссо эземсэнть. Оймсесь. Пилысэнзэ понань кемть. Цяк пекставсь совиця поланзо мельга кудо кенкшесь, пшкадсь тензэ:
— Атя, тунда аволь аламо видьмекс сюро пандомга макснить. Тенень, тонанень... Мекс кияк а панды? Мон зяроксть мернинь: иля максне!
Сёдоронь теке рицягасо риштизь. Истякак мештьсэнзэ идемевсть киштсть, ды сон тесэ... сонсь а соды, мезде лаборды!
— А пандыть, а пандыть — повавост! — машнетезь мерсь мирдезэ, эзь варштаяк «тонавтыцянть» лангс. — Истякак куш килькш анокстак, ды тон тесэ! Ёртыть превстэть неть пандоматнень.
— Я! Те кода истя?
— Истя!
Сёдор ацирьгалеманзо матравтынзе, апак лапно, апак эрязкале оршась седе лембестэ ды лиссь, валгак эзь правто, кудостонть. Валгсь кардазс, тосто, удало кенкшканть, пирев. Содазь, сон умок чаво. Эмежтне-мартне умок каськасот-мацтсот. «Мекс таго тов, кие кармавты эйсэнь?» — лаказь лакасть прясонзо некеть мельтне. Эскелясь стамбарнэ, путнезь путнесь пильгензэ.
Апак учо ледсть мелезэнзэ Ограень валонзо, ды арсемань яннэзэ сайсь лия ёнкс.
[218] «...Вай, те кода истя? Теинь паро, видема шкасто лездынь видьмесэ, — сынь оно мезе теить. Пондояк кияк эзь велявто, а! А пандсызьгак. Марясть, содыть, ков ветить китне. Секс... Э-э-эх, ломанть! Косо, ков теинк визьксэнк? Ужо, ужока, паряк, сон зярдояк арасельгак, а? Теде ней ледстнемскак а мезть! Нардасызь кедькоморо пурназентькак — вана мелявксось. Васенцекс, содави, кундыть тень эйс Ёколкань Хрола, «предэсь», ды Юхмань Микита. Пупоронь Стяпангак, ватракш кургось, ули ютксост, сененьгак лездакшнынь тунда. Вансак ва! Сыть аволь саезенть пандомо — таштазенть нельгеме», — неть сумборя мельтнень-мелявкстнэнь марто Сёдор эзизе редяяк, кода пиреютконь янганть пачкодсь кудост удало умаст пес. Эскелясь прянь нолдазь. Кепедизе вановтонзо — икелензэ ушодовикс вирьпулось. Совась чувтотнень юткс. Аволь сэрей од килейть, пойть... Вана сонгак, истямо содавикс-малавикс, рацяня, тусто черь укшторось. Эйзэнзэ аламнеде апак пачкоде лоткась. «Монь укштором...» — лангозонзо ванозь, менсть кургстонзо валтнэ.
...Сёдорнэнь кемгавксово, Ограйнень, седейпелькскензэ туртов, — кемзисемге. Самай мазый, самай панжиковонь шка! Кизэнь перть, сёксень экшетнень самс, салавине вастневсть те чувтонть ало. Сон ульнесь вечкемань толост неицякс. Сон кунсолокшнось вечкемадо, учиця шкадост цёковтнень чоледемаст. Сестэ тарадонзо латокс, кода ней, эзть сравтневе. Одоль. Ламоксть се кизэденть мейле Сарговелес савсесь телесь ды цельця тейтерькс пачколесь тундось, шкась ламоксть полавтнинзе укшторонть кизэнь ды сёксень мазычинзэ. Мезе ульнесь — ульнесь. Мекев а мурды. Зярдояк! Кадовсть ансяк ледстнемат. Солыть, сы шка, сыньгак. Шка... Цёранть теизе атякс, укшторнэнть — укшторокс.
«Таркась а берянь, мазый...» — сонськак эзь сода, мезекс марямга ёвтынзе неть валтнэнь, ожосо оршазь укшторонть ало стядо аштезь. Сынст лисемстэ седейс скирдызе кодамо-бути а чарькодевикс эй кельме ёжо.
[219] «Мезе, бути...» — теке басом ёлк совась удемень сормсевксэзэнзэ кие соды косто саевезь мель ды сеске тусь чиезь лия яннэва.
Сёдор талай яксесь мекев-васов вирьпулонть чирева. Яла арсесь, яла велясть-эвтсть прясонзо оймень човсиця кевкстематне: кода улемс, мезе теемс? «Кулакт, кулакт...» — торнось пилесэнзэ.
Туемадо икеле варштась укшторонть лангс. Одирьва, аволь чувто! Валдо-ожо, толокс палыця копачавксстонзо сельметь а саевить, ванат вановлить. «Таркась а берянь...» — таго содавтызе та-косто васолдо-васолдо сыця те а чарькодевикс, дюниянь мелесь.
...Кувать Буянь прявтось эзь матедеве. Мекс-бути марявсь алкинекс прялксозо. Яла витнесь эйсэнзэ. Сэрейгавтсь. Вельксэсь... Сон зярдояк истямо нурькине арасель! Удомантень эзть максо совамс васняяк колганонть потсо кашкиця арсематне. «Мезе теемс?» — превстэ ливтиця кевкстемась эзь нолда, прок пирявкс, удоманзо, топодемазонзо майсевтсь Сёдоронь. Окойники кадызе. Мелезэ, секень, вант мольсь. Эли киненьгак лиянень шаштсь. Каня ськамонзо атясь? Истяяк эрси эрямосонть. Ды аволь чуросто. Матедевсь уш ламодо пелеведе мейле.
Венть полавтызе а капшиця, чатьмонемань вечкиця ашолгадомась, сонзэ — сёксень экше маней валскесь. Сёдор чоп тевсэль. Пенгть лазнось-анокстась, тикше, ведь кандтнесь, пиреть-кардот ванськавтсь, симдсь-андсь... Ансяк кенерть! Сюк котьмамонтень, тевтнень топавтозь, оймеёжонь сэредьксэзэ аламнеде потась. Пряськак истя эзь увно. Сынтемест, пелема, ломантне пес пачкодевельть. Сёдоргак...
Чинь-чоп яжавомадо мейле седе курок чиремемаль шержей прясонзо таркас, сыре ловажатненень максомаль зярскак оймамо. Арась, кудазорось та-кода сизема эзь маря. Сон каясь ланганзо оршамопель, саизе кардазсто кшнинь койменть ды таго сыргась пирепев, укшторонзо алов.
«Кода улемс? Мезе теемс? — ноцорясть седеензэ некеть валтнэ. — Ужока, а мезе, бахадиндеряса пансицянь [220] прявтонть, Хролань?.. Ну-у, допрок, атя, сырнеме кармить! Човорят тонськак а содат мезть. Теке а коськениця Тилюс Филя. Сеске цопадтядызь. Ды киненьгак зярдояк уш а муеват. Теяк: куш кемень маштт — тевест а кадсызь. А потыть. Арась, арась, те а тев! Эно кода лиякс? Явшемс улипаром неть вацев, пандтнезь понкстнэнень? Во-о-о-о, те ансяк кадовськак! Рашкоютксось тенст а эряви?.. Ужока, бути теня... якстере атякш нолдамс?.. А шабратне? Сынст мезень чумост?»
Укшторонзо ланга зярс каязь сырнень тюс ябунця. Сёксесь тедеде мекс-бути а капши кайсевтемензэ. Кадык кецневти мазычисэнзэ ломантнень ды виренть. Вечксы Сёдор почаня-кавшаня прянть! Седеяк пек — алтюжань тюссо цитниця шкастонзо. Палозь палы! Васолдо неяви. Маряви, лембе эйстэнзэ лиси. Совиндеряй потмозот экше, пувазевиндеряй зыйниця варма, ютак малазонзо, венстить, иля пеле, кедеть, ды сайтянзат лембе ёжо. Кода а вечкемс сень, конань ало васенцеде палакшнык вечкевиксэть?..
Сёдор атя саизе лавтовонзо лангсто койменть ды цятадизе луганар модантень. «Калгодо...» — тешкстызе эськанзо ды седе виевстэ лепштясь карсезь пилысэнзэ койменть кшнинь лавтовонзо лангс. Виень путозь таргизе поколенть ды ёртызе веёнов. Чалгась омбоцеде, колмоцеде... Ливчакадсь. Чувсь, ёртнесь модань покольтнень кавто ёнга.
— У-у-у, прок кев... — кувакасто укстась, видемтизе аволь сэрей эчке рунгонзо, нежедсь койме недентень ды арсезевсь: «Саты, ёртык тень превстэть!».
Арась, эзь ёртово. Аштесь-тейсь аламошкас, таргизе оймензэ ды одс кундась ушодозентень. Стака, лугасо вельтязь, ундокс потсо, секс виень путозь чувновиця моданть савсь кирьпецень-кирьпець керсемс. Изнизе теньгак.
«Течис весе! Уш сундерькст якить...» — мерсь эсь пачканзо ды ёртызе меельце поколенть. Каизе лавтовонзо ланга кедьёнксонзо ды нурькинэстэ эскелязь, апак эрязкале сыргась нетькскень пес содавикс, сурекс таргавозь яннэванть кудов.
— Ковгак, истяко... — мельтеме, мокнозь мерсь Сёдор чалгамо вакссо эзементень озамсто. Кундась карензэ юксеме.
— Мезе «истяко»? — эзь ойма, омбоцеде пшкадсь каштлангсто сырькаесь.
Учось. Атянть кургсто пельвалгак эзь лисе. Сёдор чатьмонезь путынзе карензэ-пракстанзо тарказост ды носкозь кузсь каштлангс, кода сонсь мери, сёвонень пандопряс.
...Валскесь манеель. Седе тов, чикуншка малав, кепететсь келей сёлмо, увныця-вешкиця варма. Сонзэ Сарго-велесь учось зярыя таргонь перть. Чивалгомась педе-пес копачавсь чопода-сэнь, сынськак а содыть ков капшиця ды вейкест-вейкест сасыця пельсэ.
Сёдор атя шкань апак таргсе сась ведькевев ды чоп велявтнесь-кепсесь пешксе кескавтнень. Виде, кузнесть, кайсесть комшос кескавонь лия азортнэяк. Розь, пинеме, виш... Сёксь, ули мезе яжавтомс. Зярс варма ды пувияк вейкетьстэ, аволь коволонь-ковол, иля удо, иля составтне рунгот. Буянь Сёдор теде содась ды истя тейськак. Аволь нолготуло цёрыне, оно зяро таштась иетнеде, соды. Пандошка, стакадояк стака ведькевень кевесь стяко, мельде-валдо эзь чара, почтось алдонзо ашо чудикерькскекс чудсь.
Сыргась кудов, зярдо чизэ пурнась мадеме. «Стоман, карязт яжан... Мезекс? Кинень? Эх-ох! Тов мартот ялатеке мезеяк а саят! Венемат — мезеяк эрявомо а карми. Мезеяк! Эно мезекс, кие, кодамо лецькай кармавтсь ды нейгак кармавты монь, превтементь, чийнеме эрьва трёшникенть мельга? Яла тень аламо, яла а саты. Мекс а содан пе, пешкедема? Косольть превем? Виде, Ограень сельмензэ домкат, мейсэяк а пештявить. Те — сонзэ. Авань. Косольть монь, цёрансетне? Арась, эсеть эйстэ а. туят. Пингем ютавтыя ажия ютксо. Тонадовсь. Кода лишментень. Эйстэст а лисеван».
[222] Кудос сеске эзь сова. Саизе кардазсто тарказонзо путозь койменть ды сыргась содавикс янганть вирь чирев. Прок кодамо-бути модапотмонь вий панезь пансь эйсэнзэ тов. Пачкодсь — эзизе маряяк. Вана укшторонть ало ушодозь тевеськак. «Мезе те... Аламо. Ушодкс ансяк. Виде теяк: ушодксось сехте стака», — содыцянь вановтсо макссь питне теезентень.
«Мезе, Сёдор атя, поладсынек? Саты сельмть микшнемс!» — мерсь тошказь, турванзо эль панжтнезь, эскельдясь чувозь яндавантень ды сялгизе коймензэ сёвонев калгодо модантень. Исенекс кода понгсь чувомо эзь карма. Койме лавтовонть лангс пилысэнзэ нежелезь, керсесь-тейсь ломанень сэрьсэ-келесэ буй. «Вай, те мезе истя мон теян? Мезе? Каня те тев?» — сорновтнесть эйсэнзэ седеень невелиця кевкстематне. Тень лангс апак вано, валгсь чувозь таркантень ды недясь тевезэнзэ одс: ушодсь чувомо-чупонеме ды кавто ёнга моданть кайсеме. «Лиякс а кода, лиякс а кода...» — кивчкаесь превсэнзэ. Шкань-шкань, мерема, тень полавтнесть аламнеде лия валт: «Текесь кадови, текесь кадови...».
Чувицясь талай псилгалесь, кедьёнксонть нерьгстнезь. Мода. Ды сёвонень. Те аволь чувар. Панарозояк, маризе, ливезденть копорезэнзэ педясь. Домкалгавтызе мельстуиця тарканть коймепенчень кавто-колмо сэрьсэ. Ютась омбоцеде, вейкетстинзе стенатнень-ужотнень ды лиссь, чиретнес нежедезь, эсензэ кедьсэ чувозь латкостонть.
Кудов эскелясь сизезь. Эно кода, валскестэ чокшнес пильге лангсоль. Васня ведькевсэ, ней... Мольсь — эль пильгензэ кандсь. Майсемань-кавтолдомань ёжотнень таркас совась эйзэнзэ мель: теемс истя, кода арсизе; тей-тов кайсевематненень те чистэнть саезь путови пе, а мезть ангорямс седеенть.
...Ютась таргодо ламо. Кудонь-кардазонь эрьва чинь тевтне кирдсть, эзть максо тонгомс прянть сюмора ёжонь, ризкстэ пешксе ашконтень. Кажонь латкос понгозь, аволь эрьвась кирдеви пильге лангсо, аволь эрьванть ванстови ломанень чачозо, седеяк — оймезэ. Веенстнэ пряст [223] каясызь, полавтыть палыведь эрькентень, лиятне каить кирьгаваст килькш, лиятне лия мезеяк теить.
Сарговелесэ седе сюпавсто эрицятне содасть, седеест марясть: сы, кода сы куломаськак, сынст пансемань чись. Ялатеке эрьванть потсо, косо-бути васоло, типельдсь кемемань толнэ: паряк, кодаяк вакска юты те раужо чись, паряк, чочить киньгак лиянь, ансяк аволь монь. Видеяк, мезть а эрсить эрямосонть. «Кулактнэнь» пансемадо кортамот марсевсть икелеяк, мейле сынь кода-бути матравсть. Кода илязо уле, седе келейстэ, таноконь марязь эскелицятне те чопода тевенть самонзо учость, учость чатьмонезь ды пелезь.
Сёдоргак седе оймась. Зяроце чи уш эзь варштне вирь чирев, рацяня укшторонзо алов. Течи эзь кирдеве, сась. Латконзо чувизе кумажадо верьга. Ков алов — тов седеяк стака. Кевекс лепштязь сёвонь. Улевельгак аламнеде начко, седе шождасто тевесь молевель. Чувомась, модань ёртнемась ламо вийть саить, седеяк ламо саи седейсэнть кандтневикс пондонь сталмосо кевесь. Лутазь сёвонь поколенть, ахолдат, — ёртсак, седейсэ кевенть вана...
Лиссь, стясь кепедевезь сёвонень марнэнть ваксс. Варштась латконть потмаксос. «Ну, бодяй, тонеть байтяк сави псилгалемс! Аламо сокить. Пукшо видьскак эзить пачкоде. Мхы! Те мекс истя: аламо? Мезекс седе домканть?.. Кода мезекс?! Эряви! Улезэ алкуксонь. Аволь мельде-валдонь. Теске, минек укшторонть алов, кадовозангак. Ансяк...»
Эзь кенере одс тевс кундамо, ваксозонзо, эзизе редяяк, стясь умонь-умонь «деряба» ялгазо, Ограй низэ.
— Вай, авакай, те тон мезе истя теят? Мезекс чуват латконть? — умок аволь од аванть вайгелезэ эчке, теке цёрань, теке басом аламнеде корсяня. Марясак вайгельпень ютко. Эскельдясь сыцясь овсе чувовксонть чирес, комавтызе прянзо, ютась вановтсонзо потмаксканть, мейле перьканзо.
— Мезе, мезе... а чарькодеви? — эзь талакадо штапо колган Сёдор. — Сюродонть козоньгак куш зярыя кекшема! Арсят-арась теде? Эли парнесэ кармат ливтнеме пансицятненень?
[224] Ограй аламнеде оймась, пшкадсь седе сэтьместэ:
— Вельть уш теине. Те мезе, седе келейстэ ушодомаль, — превть макссь цяр вайгель азоравась.
— Алов седе чувса, — экшеденть кедензэ ёзазь, нусманясто мерсь Сёдор.
— Кодат тесэ кекшемат! Шабратне мезе, сокорт? Эзизь нее, мерят, мезе теят? Сеске пачтить, — сурсонзо шабратнень ёнов невтнезь, поладызе превень максоманзо Ограй.
Вечксы сон тень — превть макснемс. Ледстясы, ков ярсамсто пенчентькак венстемс.
— Иля тотно. Теньгак арсия. Сюронть ланга ацан лазт, лангозост — модамарть, мейле — мода. Велькска — тикше капине, — судодо ветсесь сыре нинзэ Сёдор. Токизе кедьсэнзэ кенерепакарьс ды мерсь: — Тон азё, ярсамс мезеяк анокстак. Мон котьман зярскак. Аволь кувать.
— Улезэ тонь коряс, — кунсолызе атянзо, эзь кемеве эстензэяк, Ограй. — Тон, Сёдор, теня, эзик стувто... укшторонть? Мельсэть? Умок те ульнесь...
Неть валтнэнь ёвтамсто аванть мизолксозо эзь кирдеве. Келейгадсть турванзо. Марявсь, вайгелезэяк гайгсь аволь истя эчкестэ, та-кода чевтелгадсь, теевсь седе валанякс. Нинзэ турваютксто лисезь валтнэ токизь Сёдор атяньгак. Ютась пачканзо лембе, вечкевикс коволнэ.
Кодак тусь Ограй, мекев-васов ютась укшторонть алга. Пильгензэ ало каштордсть сёксень тюс лопат. Ледсь мелезэнзэ тесэ ютавтозь чокшнетнестэ вейкесь: Коввалдоль, морась цёков, кувтолдсть ковонть каршо Ограень сельмензэ... Эскельдясь атясь цинсть чувтонть малас, каизе вить кедьстэнзэ варьганзо ды вадяшизе сормсевезь, казямо керензэ.
Чувицясь кундась сезезь тевезэнзэ. Кундась ды, коське сёвоненть аламонь-аламонь «сусконезь», куроксто таго домкалгавтызе латконть коймепенчень сэрьсэ. «Истя вана, кувака черь! Ней ули козонь кекшемс куш зярояк сюродонть неть вардонь сельметнеде! — эсь пачканзо муст-муст мусколязь, арсезевсь Сёдор атя Ограйнень ёвтазь валдонзо. — Маштат, цитний пря, ведень валомо [225] кува-кува». Арсезь-теезь, прядызе икельксэнзэ. Нежедизе копорензэ латконь теине пентень, лоткась оймень таргамо. «Байтяк кадовсь. Ды кодаяк уш... Сан весть-кавксть — ды прядса. Капшама. Сыть апак учо, прок маней чистэ пурьгине, мезе сестэ тееме карман? Капшама, атя, капшама. А мезть шканть таргсемс. Вадряль чиде-кавтодо икеле содамс само шкаст. Хы! Теде мезе полавтови? Капшама!.. Ков? А шождыне учомась, ды ков молят, сави. Сыть, кода а сыть. Сыть ды нардасызь сюром коморонь пес. Чеерненьгак а кадыть. Мон эйкакшпингестэ саезь улавонть ускинь, пинге томбинь, яла пурнынь-сэрнинь, сынь сыть — ливтнесызь часонь-омбоцень перть. Кадови кудось урозокс. Паряк, кодамояк конторакс тейсызь?
Зяро авидечи, алкукскак, моданть лангсо! Ды эрьва кодамо тюсонь, эрьва кодамо покшолмань, сталмонь. Те мекс истя? Кияк а соды... Курок тень кодгемень вете. Аволь уш кодамояк латякарь. А пеняцян, прям-пильгем таркасост. Кедемгак... Вайть-ойть а сеерян. Ограеньгак. кадык стявтнияк чеченанзо, а стувтнеса. Атянь мазый шка, яла кортнить. Ды Тов? Кода истя?.. Кода эно лиякс? Кода прянть а нолдамс неть эвсень пона хролатнень икеле? Ватракш сельме те самай Хролась, аволь ломань! Нулгодян ваномскак лангозонзо. Сон ды сонзэ кондят штапо мукоро яксицятне кармить сельмем икеле ливтнеме-кандтнеме таштавксон. Кода тень кирдемс? Ливтьсызь кардсто Тешнярень, омбоце лишменть, скалтнэнь, паразевить реветне... Вай, Верепаз! Марямак, макст тень вийть, нардевчи кирдемс тень весе, а каявомс неть ортнэнь лангс. Вай, те мезде истя мон? Мон жо...»
Стяко оймакшнось, нолдакшнынзе ризксэнь ведьмензэ Буянь Сёдор: кадсызь, пекстасызь кежпаргост злыдарь «раскулачниктне». Оймакшнось, мерема, ланга-прява, превсэнзэ кирдевсь текесь: сыть, а стувтсызь.
Ды састь. Ожоковонь прядовомсто «чукадизь» кудостост-чистэст ды саизь ков-бути «лембе» ёнов колмо цёранзо марто Перкай Олдынькань. Весть ахолдазь, Пичепесэ кадовсть колмо чаво кудот, колмо юртт-урозт — [226] теке сыре ломанень кургсо тарныця колмо пейть. Пельсэ ацазь менелекс нувара се чистэнть лажнось, валсь сельведть Сарговелень те песь.
«Монь дёпомгак а васоло, учок, — тейсь чапо Буянь азоратясь. — Миньгак цёрам марто кадтано пекстазь вальма колмо кудот. Шкась моли, анокстама. Ансяк мезе, мезе анокстама?» Талай уш, нуемань прядома ланга, атясь ильтизе ваксстонзо а мариця, «кельтеме» Яхимень. Пандызе тензэ кортазь питненть, ды цёрась, мельспаронь кирдезь, тусь Моргов, эсензэ велев. «Мезе уш тень вельть анокстамс? Умок весе анок. Истяк шканть ансяк, мерян, ютавтан, ужосто ужос коштонть пансян-човорян. Паро кулянь учозьгак цякскадат, а тесэ... Кодамо тевс а кундан — налкстави, кадса; ков а сырган — мелем полавтса...» — зяроце чи уш истя майсеви, пря чави сыре Сёдор. Паряк, пикскак истямо эрямодонть муевель, а весть вановтозо пракшнось потолокс чавозь чоблантень, ансяк сон...
Азорось теваразде ды чопода арсематнеде лиссь, Сурайнень вал эзь ёвта, кудыкелев, совась кавс. Венстизе кедензэ, ноцковтызе стенас понгавтозь ружиянть. Сайсь, кодамо понги кедь алов, нулыне ды лиссь — седе валдо улезэ — кардазов. Мезекс Сёдор рамакшнызе куломань кандый те «налкшкенть», превсэнзэ кемевиксстэ эзь кирдеве. Меремс, оцинямонь вечкемась ветякшнызе рамамо таркав — а мерят. Сон истят тевтнеде эзь арсеяк. Налксемакс сынст ловсь. Сокарясь-тейсь куштазь иетнесэ ды окойники эшкевсь рамамонь тувталонтень: леднемапеленть саекшнизе ули-паронзо ванстомга, кемекшнесь, маштови. Арась, кодамояк азгун альгач весе иетнень перть тензэ эзь вастовкшно. Муевсь истямось, злыдня салыцясь, орось, натой а кемевияк, ней. Ансяк сонензэ истя а мерят ды сондензэ те ружиясь а лезды. Мезеяк а лезды. Кияк а идетянзат. Паряк, Пазось? Э-э-э... Ёколкань Хрола сондензэ виев! Арась, сехте вере эрицянтеньгак те орось а лепштяви. Сон аволь ансяк сюрот товнень пес тенсесы, чувтонь пейтеме ангоринеяк кудочизэть а кады. Тонсетькак, пшкадиндерят каршо... Кавтолдомат а соды.
[227] Сёдор саезь нулынесэнть нардтнизе ружиянть. Мендизе, циньк мерсь, кавтов. Ёзызе цивтёргадомазонзо почконть. Таргизе потстонзо патрононть. Эйсэнзэ, мелезэнзэ тусь, кивень эрьгинеть — дробт. Ёвкстызе патрононть тарказонзо, видемтизе-пекстызе ружиянть. «Кирдема тарканзо полавтома, — сась мельс «пукштяемканть» мельга якицясь. — Седе ён карми автордамс кардосто». Истя арсезь, сайсь узере, эске ды тейсь — козонь сайсь мель — понгавтомка, туло. «Мезе теян, сёвонень прев? — арсезевсь, мик тарск тейсь, кудонь прявтось. — Каня те отьмастонть лиякс кодаяк а лисеват? Ну тейса тень, полавтови мезеяк? Ограень, маряви, ськамонзо саемензэ а кармить. Сыре. Мезекс истятнэ! Майсевеме а карми. Монгак а карман... Цёратне вана, Лексей, «чавкалевкскензэ» марто, Михал... Паньсызь, кадсызь понкстомо...»
Превсэнзэ истя кайсезь-велявтнезь, Сарговелень «кулакось» нетькскень пес содавикс пиреютконь янганть таго, зяроцеде уш, пачкодсь вирь чирень таркантень. Укшторось прок учось эйсэнзэ. Сыцясь валгсь кедьсэ теевть латкинентень. «Меште видьга, — стенанть ёжос стязь, сеске онкстызе домкачинзэ. — Байтяк сави ахолямс, эсень сэрьсэ улезэ». Мерезь — топавтома! Кундась тевезэнзэ. Курок лембесь пачкодсь кутьмерезэнзэ, панарозо педясь киськентень. Лутнесь яла, лутнесь койменерьсэнть, ёртнесь яла сёвонень штелькстнэнь-паморькстнэнь верев. Топавтсь тевенть кежень сазь ды иердезь. Окойники дарманозо маштсь, ды копорензэ нежедизе удалонзо теине стенантень. «Чуван, чуван... — содавтызе мель, — а кода лисеме карман? Ней эно тень кодаяк тейса! Мейле... Теде эно а мезть ногодтнэнь кайсемс, тезэнь а кадсамизь, ливтьсамизь, — меленть полавтызе мель. — Козонь седе тов? Теде а мезть мелявтомс, содамо а карман, ялатеке тень карми. Вай, а кить ильтемень кармить? Кить, алкукскак? Теяк тонь, сыре ведун, илязо ангоря. Лексей, Михал... Да, теня, сынь уш велесэнть а улить. Паряк, чис-кавтос кирдьсызь? Седеест, чей, аволь азарсь пинень».
Аламос аштезь кундась тевезэнзэ.
[228] «Инешкипаз, кода максомс ливезьсэ, удомань сезнемасо пурназь-сэрнязь сюпавчитнень? — таго, паряк, сядоцеде уш, паряк, седеяк ламоцеде, совасть превзэнзэ седеень пидиця некеть ризкстнэ. — Сокамось, модань кепедемась мезе ансяк ашти! Начкат, ливезесь чудезь чуди. Панарот куш пурдык. Кургот коськи. Певтеме мель — симемс. Веть кедтне чулксетить. Истя сэредить, истя сэредить — сыргозят, ушодат куломань вешеме! Кардосояк а весть удсинь. Лишметнень вакссо. Вант, илязо машто пинемест, ведест. Тундо, сокамо шка. Андомат. Кода эно лиякс, дёкуштомить — модат, секень вант, педе-пес а сокави. Мезе тееме кармат: човонеть ёзамо, кедьсэть рукштяеме?.. Ды ней истямо питнесэ таштазенть максомс кинень-бути? Сынь а кармить мелявтомо, каштомпочкова качамо марто нолдасызь! Кирьгапареськак лезды. Ёколкаень пельде лиятат а мезть учнемс...
Чувомс, мерема, аламо кадовсь. Лавтовга уш. Ютан икелькс, котьман-теян — ды саты. Инешкипаз, невтик молема ёнксом! Каня алкукс... Тов? Топавтомс арсезенть? Ёвтак, лездак. Паряк, сельгемс, видеяк, тень лангс? Мезе ули — се ули! Паньсамизь... Мейле мезе? Тевесь эно аволь панемасонть. А ёман, кедень-пильгень мартом. Од таркасояк сынь кармить эрявомо. Стакачись лиясо: те кода истя — Тешнярень сельмем икеле ливтьсызь кардазсто ды сайсызь? Аволь айгор — варма! Питне тензэ а муят. Иензэ ниле — самай виев шказо. Цивтёрдозь цивтёрды лангозо. Эрьва тулгинесь налкси рунгосонзо. Кильдьсак — ажиятнень ютксо киштезь кишти, лавшомгавтсыть ведьметнень — налокс ливти... А содан, а содан, мезе теемскак. Неемс нельгеманть, кирдевемс — вием, пелян, а сатыть. Секскак седе виде ули...»
Сёдор видемтизе рунгонзо, эскельдясь икелев ды одс, зяроцеде уш, кундась тевезэнзэ. Цяпадизе коймензэ сёвонентень, лутась поколь ды вырновтызе верев, латконть вить чирев. Мельганзо «сусксь» омбоце, колмоце... Эзь кенере илыкезэ маштомо — арсезесь топавтовсь. Лиссь ды сеске сыргась кудов.
[229] ...Кувать учомс эзь саво. Сундерьковонь вейксэце чистэ, Октябрянь «якстере» читнеде мейле сеске, Буянень састь апак терде, теке марто умок «учовикс» инжетне.
Ушосонть а сёксь, а теле. Зяроце чи уш модась копачазь пачкневтиця ашола велькссэ. Соламскак а солавты, кельмевтемеяк а капши. Чись теке кадовсь чопода-сэнь, алга уиця пельтнень потс. Тунь прянзо а невтни. Кие соды, паряк, мелезэяк покш арась ваномс авидечиде, пежетте, сельведте ды верде пешксе моданть лангс.
Истямоль Сарговелесэ сёксень те чись. «Од эрямонь путыцятне» «муизь» Буянь кудост апак вешне. Састь ветенест. Эйстэст кавтотне — ушкс-трокс кшнань каркссо кершнезь милицият. Эрьванть вить бокасо — «сеянь пильге», леднемка. Прясост, талай сёксенть лангс апак вано, сэнь, алга якстере кирькс картузт. Лангсост кочкаряс токиця дюм сэнь шинельть. Форма... Сынь тевест содазь, чатьмонезь сеске палманькс стясть кузтемпес. Лиятне лодор-лодор ютасть кудыкелев, тосто — кудос. Прявтост — Ёколкань Хрола. Ней, виде, истя тензэ а мерят. Ней сон — Фрол Петрович. Покш ломань. Содак!
Велень прявтось апак шумбракстне, прястонзо ревень кедень шапканзо апак кая ёколк-ёколк ютась икелев. Стясь стуворонть ваксс. Чирьстэ, сельмепонань пачк варштась кониксэ прянь нолдазь аштиця Сёдор атя лангс, таргизе шубань меште зепстэнзэ конёв лопанть, каштор-каштор витизе ды ушодсь ловномо. Прядызе сёрмадозенть эсензэ валсо: «...Вчера, натчица, восьмого ноября, Саргосельской советэсь пириняла, знатчица, решения: Письмаров Фёдор Ивановичень ды Письмарова Аграфена Григорьевнань выселить из села кода кулактнэнь. Сынь, натчица, мешают социализмань строямонтень... — Шикадизе конёвонть мекев зепс, поладызе кортамонзо: — Письмаровонь, натчица, кавто лишмензэ, кавто скалонзо, комсьвейкее ревензэ, ламо саразонзо. Эзть ловово, натчица. Кирди батрак. Те уш... Секскак ниле часонь перть, натчица, кудотне-читне улезт чамдозь. Лишметнень нейке ветямат вейсэнь кардос. Сон [230] зярс, натчица, апак путо, арась. Секскак, Сёдор леляй, ветясыть Перкаень кардазс. Эрить Пичепесэ, содат...».
Сёдор вал эзь правто. Мелезэль каявомс нулгодькс, чинев одар те ломаненть лангс ды, теке ватракшонть, ёртомс кудостонть. Кежтне эйсэнзэ лаказь лакасть. Мокшнанзо киневтсть, ялатеке оляс сынст эзь нолда, кирдсь прянзо. Содась, мезес пачтятанзат, нолдындерясыть.
«...Тынсь, натчица, Письмаров Фёдор Иванович ды Письмарова Аграфена Григорьевна, уледе анокт кемгавтово часос. Те шкантень мельганк сы ускиця. Мартонк саеде — зяро эрьванень кандови. Оршамот-карсемат, пенчть-вакант...»
«Кулакось» ды «кулачихась» «советэнть» мелензэ кунсолость чатьмонезь. Мезе мерят? Мезе теят? Кирдийтне — вий, сынь свал превейть, ламонь содыцят, васов неицят. Тесэ Ограй сырькаесь эзь цидярдо, каятотсь кашто-микельде ильсемазо:
— Ней ков истя сизьгемень иесэтнень пантядо? Куломо куш кадовлимизь, — сельведень нильнезь, сезизе «начальникенть» кортамодонзо мейле теевезь каштмолеманть.
— Те тон косто семьдесят летгнэнь муить? Фёдор Ивановичнэнь ансяк кодкемень кото. Семьдесят... А тон, Фёдор Иванович, тон, натчица, лишметнень ливтить нейке. Азё ветить, меринь уш, Эрёмкань кардазс. Айгоронть, знатчица, кадык путсызь башка. Паро лишмесь. Эстенек, советс, сайсынек...
Кудазорось чатьмонсь. Кирдсь ведьмензэ кавто кедьсэ. Лекшат пурдызь ансяк ве мельденть: сави кортамс нузякс, кельсэ «важодиця» те кундонть марто.
— Ливтемест-ветямост монсь а карман, — стясь коникстэнть ды мерсь казямо-нардев вайгельсэ.
— Кармат!
— А карман.
— Мон мерян: кармат! Тон мезе, советской властенть каршо? Счас, натчица, акт сёрмадтано. Серьгедьсынь милициятнень ды...
Сёдор арсезевсь.
Мельганзо дубор-дубор лиссь, зэрьсэ пекстызе кенкшенть, пансицятнеде вейкесь. Валгсть кардазс.
— Вана те кардосонть лишметне. Панжик, вант. Мон венелев, — неть валтнэнь ёвтазь, Сёдор совась маласо кавонтень, сорныця кедьсэ ноцковтызе стенастонть леднемканть ды, ёжозонзо сень лепштязь, илязо неяво, эрязасто лиссь кардаз удалов. Капшазь сыргась вирь чирев, якшамоськак эзь маряво.
«Пароль, — сась превзэнзэ апак учонь мель, — васня лишметнень. Вай, Верепаз! Ды сынст мезень чумост? Ды мартом лисицяськак аволь максо тень топавтомс. Каяволь лангозон. Кадык уш монсь, ськамом...»
Эзь марявояк, пачкодсь укшторонть алов. Верде алов ютась вановтсонзо лопавтомо, штапо тарадонзо эзга. Сельмс каятотсь рацянячизэ. «Зярдо-бути умок-умок сонзэ ало васенцеде кеместэ кутмордакшныя, турвас псистэ палакшныя Ограень. Мейле — пинге вейсэ. Паро, паро, мезе ульнесь, се ульнесь, мекев а велявтсак. Кадовсь меельце эскелькс...» — эськанзо неть валтнэнь ёвтазь, эскельдясь чувозь латконть чирес. Жу-у-уйть мерсь седеезэ. Латкось марявсь домкадояк домкакс, чоподакс, марявсь, эйстэнзэ лиси якшамо, сурневтиця кошт.
Сёдор атя арась латконтень копорьёндо. «Пран-арась тов кунст? Празан уш. А-а-а, теде а мезть мелявтомс! Теде уш содамо зярдояк а карман...». Стясь овсе чирес — ансяк а нолажтомс. Прикладонть путызе карьсэ карсезь пильгензэ юткс. Комавтызе прянзо ды путызе вить пиле ёндо раужо варя почконть лангс. «А маняван, туи? Кадовсь меельцесь, лепштямс... Ну мезе, Буянь Сёдор, прядовсь кить-янот? Нолдык, нолдык чумом, Ограй. Кадоват ськамот, нолдык чумом. Нолдынк чумом, Михал ды Лексей...»
Кудо ёндо каятотсь шалт, цёрань вайгельть. Чарькодсть, неяви, Буянь «инжест»: «кулакост» менсь кедьстэст. Марявсь Ограень лайшемазо. Сёдор атя варштась [232] кудочинзэ пелев. Паницятнеде вейкесь лиссь кардаз удалов, мельганзо, пижнезь, кедьсэнзэ ахолязь, чийсь Хрола. «Илядо учо, а кундаван...» — мерсь эськанзо «кулакось» ды теке басом венстизе вить кедензэ, муизе эрявикс тарканть ды лепштизе пелькасонзо кечказонть. Каятотсь зэрть. Ружиясь прась икелензэ. Чаразевсть укшторось, менелесь, чаразевсь сонсь, ды сеске весемесь ваясь чоподас, весемесь ёмась. Атясь чирьказевсь тей-тов, ландявсь ды увол-авол прась чопода, теине кельме латконтень.