Пици-палакст/Мезе теят - секень неят
МЕЗЕ ТЕЯТ — СЕКЕНЬ НЕЯТ
Ум-м-м! Ум-м-м! уммм! — увнось чокшнэнь венельксэсь. Баяга вайгелесь каятоць манастырь вакссо вирентень. Виресь шалнось, прок мельс апаросо аштесь, мекс токизь сэтьме эрямонзо.
Манастырень настоятеленть келия вакссо аштесть озадо кавто ломать: настоятелесь — архимандрит Геронтий, омбоцесь — манах Маврикий.
О. Геронтий корты салавинька. Мерят — пели мезде бути.
— Эрямом, о. Маврикий, мекс бути берякадомо кармась...
— Мекс истя, о. Геронтий?
— Вере пазось содасы. Эрьва вене мень бути стака онт муцить эйсэнь... Превстэ эль лисян.
— Стака онт?.. Моненьгак косто-косто сакшныть апаро моронь онтнэ... О. Геронтий, ёвтнека вейкешка.
— Ламо эйстэст, весе а повнявить... Ёвтниса исеньсенть. Аштян буто чаво паксясо, ков иля варшта — а куш, а каш. Якан буто паксяванть, а маштан месть тейнеме. Аламос аштезь венельксэсь кармась чопулгадомо. Кармась сеереме пурьгине, кивчкаеме ёндол. Ки соды косто вачкоцть зверть. Вана сезнить эйсэнь, вана сезнить. Эль нолдасамизь панксонь панкс. Сешкане ки бути каподимем сиведе, ды кепедимем верев. Кандымем буто церькувас. Венчамон кармасть. Ванан вакссон тейтерь, чамазо вельтязь пацясо. Монень а невти эйсэнзэ. Эзь кенерть попось кеденек вейс кальдямост — кепетець покш вихерь: салызе церькува прянть. Попось ды одирьвась ёматоцть. Кадувинь ськамон. Маряса — ловныця. Вайгельзэ прок [ 42 ]калмсто лиси. Соракадынь весе. Ловны. Мезе? Кунсолан, монень куломань приговор ловны. Сюлоньпекень сырьгаст таркастост... Превень велямо кармасть. Вачкодимем кельме ливезь. Оймем лоткась тарксевемадо. Мезе бути душамон кармась. Пижакадынь пиже-ожо вайгельсэ. Карминь прамо отьмас, ков бути трисподни... и секе марто сыргозинь. Киякссан. Оном пачк, нать, таркастонть прынь. Берянь онось. Те шкас кодаяк паро ёжо а саян...
О. Геронтий стакасто укстась, варштась манастырень крёстнэнь ланкс.
— Ну, о. Геронтий, те онось мезненьгак а маштуви! Мон зярс кунсолынь, сорнынь, кува-кува черень дубошки стякшность. Меньгак покш апаро карми улеме теть. Вант эсь прят берянь ломаньде...
— Монсиньгак седеем марясы, о. Маврикий, те онось мезеяк паро тень а й‘алтни. Но мон эсь прянть оймавтнян, мерян: эрьва ононть кемемс а эряви. Вень перть зяро бредят, токавлитьдеряй эрьва онс, тешкас мень тамашас ансяк аволинек поланя.
— Монгак истя думан, о. Геронтий. Шайтянось кода машты, истя маньши-муци минек коньдятнэнь. Тон, о. Геронтий, ломанесь пельс-светоят. Кемень иеть вана уш эрят настоятелькс, кемень иеть пазнэнь ознат ломанень грехень кис. Кемть пазонть ланкс. А катанзат вере пас корьминецесь.
— Сюк пря, о. Маврикий, чевте валозот. Астяк теть потмом чамдыя, од вий максыть тень. Адя, брат, вечерняв...
Маврикий кундызе Геронтиень кавалалдо ды кавонест совасть церькувас.
Вечернянть о. Геронтий служизе мельде-валдо. Ёжозо беряньгаць. Прязо сталгаць. Седеезэ пек скирятоць.
О. Геронтий вечернядо мейле сась келиязонзо, озась библиянть вельксэс. Истямо уш Геронтиень коезэ: кодак сталгады ёжозо, кодак кармить эцеме лангозонзо эрьва ёндо берянь арьсимат — сайсы библиянть ды кувать ловны. Библиясь курок оймавцы седеензэ, мерят, киндербальзамасо валсы. Течи мекс бути библиянь валтнэ чаво паксяв чавсть. Кадызе о. Геронтий библиянть, стясь таркастонзо. Варштась пазаванть ёнов, уголстонть [ 43 ]лангозонзо вансь христозонь ликесь: лампатканть ды свечань валдонть пачк Геронтиень прок уросо пельсть христозонь сельтне. Геронтий ланга ютась мень бути кельме кошт. Тандаць Геронтий, лецть мелезэнзэ эрьва мень берянь тевензэ. Виськс чама саизе. Прась кумажа ланкс, пек озномо кармась, молитвазо валанясто эзь моле, кирекс тапарявсь.
— Иисусе сладчайший, спаси мя. Сладости райские сподоби, иисусе человеколюбче...
Геронтий аламос лоткась ознумадо, нилексть-ветексть крёстась, эрьва крёстамсто сюкунясь киякстонтень, ёжозо аламодо паролгаць. Таго кармась озномо. Седеяк покш мельсэ, валтнэсэ путозь путсь:
— Иисусе пречудный — ангелов удивление, иисусе пресильный — прародителей избавление. Иисусе претихий — монахов радости. Иисусе предвечный — грешников спасение. Иисусе сыне божий, помилуй мя, во имя отца и сына и святого духа и ныне и присно и во веки веков аминь.
Геронтий прядызе ознуманзо. Стясь кумажа ланксто. Седеезэ шождалгаць. Нардызе ливезев чаманзо. Пурнась-сэрнясь мадеме. Свечатнень весе мацтинзе, ансяк лампаткиненть кадызе. Геронтий крёстызе удума тарканзо, пурксизе светой вецэ, мейле уш маць... Кувать эзь матедевть. Исень онось оймамо тензэ эзь макст.
— Да воскрестнет бог и расточатся врази его, — салава моткоди Геронтий. Сельмензэ кармасть конявомо. Удемганзо ютась тейтерень чама, рангозь сельме марто... келия, мазый валт тосо кортазь... ламо... пал... Геронтий матедевсь пеле валонть ланкс.
* * *
1921-це иенть ки стувцы? Теле миколас народ яла тарнось. Кона розьнензэ марш марто човоринзе. Почт тейсь. Куть апек тантей — яла теке, вачо аштимадо, ярсат. Ламот маршто ансяк ярсасть. Скотинадо аместь кортамскак.
Ютась сёксесь. Сась якшамо телесь. Майшь народонь ярсамо-пелесь. Кармась народось куломо вачо. [ 44 ]Кулость чаво кудос, кулость ульця куншкас, кулость паксясо, ки ланксо, кулость вакзалсо.
Манастыренть эрямозо лияталь. Сынь мекш лацо эрьва ёндо пурнасть сускомонь-сускомонь, таштасть теленень эрямо-чи. Шабра велетне сельмень сявадозь вансть манастыренть ланкс. Снартнесть вешеме тосто кше сускомо. Невцть тенст бабань пеште.
Роштувадо мейле манастырентень сась од тейтерь. Кемгавксово иесэ. Кецэнзэ тапардавкс. Совась келияс. Тосо манах.
— Месть якат, сазор?
— Кудосонок покш семия — кемгавтово ломань. Весе вачотано. Вана авам коцт марто кучимем тей. Полавтомс мезеяк ланкс. Зярояк ярсамо-пель...
Манахонть мельс пек тусь тейтересь: чамазо мазый, вачодо эрямось аламодо ашолгавтызе, яла теке мазызе эзь ёма. Рунгозо вадря: аволь пек эчке, аволь пек човинеяк. Самай паро. Манахонть поцо кирвайсь пси сятко. Седеезэ кутмолдомо кармась. Саевлиссе тейтеренть... кода ней саемс? Мазый валсо, алтамс мезеяк... Ривезь лацо корты манахось:
— Сазорнэм, чи-валдынем... мейсэ кастыдизь ды косо ванцтыдизь тонть — истямо мазый цецянть? Чамат тонть прок сацто сезень умарь, сельметь тештень кондят, рунгот прок од килейне... кода леметь?
— Полага...
— Марясак, вана, лемеськак кодамо мазый... Полага кода мон вечктян... кеветее ие ва уш эрян манахокс, кеветее ие ознан пазнэнь ломань грехень кис, кеветее ие муцян прям эйсэ — асодана вань таньсть. Аванть седейстэнь овси ёртния. Кодак тонть неитень, истяк кирвайсь мекев седеем. Полага, кармат мартон эрямо? Весе седеем пуца тенть, оршатан, наряжатан куклакс...
Полага кашт моли. Манахонь валтнэ превензэ велясткавтызь. Тейтересь сон од, эрямо ладонть содасы беряньстэ. Цёра марто тевезэ вестькак арасель, а содасы те ёнксонть.
Манахось а тукшны мелезэнзэ: сыре атя, иензэ ведьгеменьшка, черензэ ды сакалонзо кувакат, прок алашань [ 45 ]гриват. Пупить пек. Рунгозо манахонть эчке, мерят куя боровонь, келезэ аламодо понгони, кортамсто кургозо човдо пешксе... Кода кармат вечкемензэ истямонть?!. Сон паламо эцеме карми... фу!.. Полагань мик седейзэ човоргатоць.
— Полага, мекс кувать думат? — корты манахось. — Думак седе курок ды чаркодик: иесь ней вачо, кулат, пиштяка тейтерь вачодо, стяко ёми вадря рунгот... — Манахось кутмордызе Полагань.
Полагась седейс мезе-бути кундась, кармась сювордамонзо прок клещасо. Седеезэ сэредеме кармась. Те сэретьксэсь тусь рунгованзо, Полага кармась сорномо. Манахось кутморды седе кеместэ. Полагань сорнуманть манахось лиякс чаркодизе: коли тейтересь соракаць, — тев карми улеме...
Полагань мельс лець ды ёндолкс ютась икельганзо вейке кизэнь чи. Вирь поляна. Тосо сынь налксить, вирь пулованть чийнить. Сонзэ мельга чийсь Петя — велень од цёра, кона умок уш Полагань мельга паньси. Чиезь тусь роща пулонтень. Петя кундызе Полагань, кеместэ кутмордызе. Полага каштмольсь. Варштасть карадо-каршо, сельмезэст кирвайсть толнэть, цют-цют пейдезевсть — турваст педясть вейс.
Кизэсь ютась мазы онкс. Эрьва чокшнэ сынь вейсэ эрясть. Вачо-чись явтынзе. Петя тусь Сибирев — прянь трямо. А стувцы Полага Петянь туима чокшнэнть. Церькува огратсо веньперть ульнесть. Ламо месть-месть ульнесть кортамс, ды кортамотне эсть моле. Кельтне кундатозельть. Сынь явить вейкедест-вейкедест ки соды зярс. Секень вант а савияк вейкень-вейкень неемс. Петянь меельсь валонзо:
— Полага, сяткинем! Валське мон туян васов, Сибирев. Ки соды, мезе тосо юты пряван. Велявтан ли живстэ? Мон, Полага, тонеть максыя весе од седеем, лиянень мезеяк эзь кадовт. Пек учинь Михаловонь чинть. Тетянень, аванень кортнинь эйстэдеть... Сынь тонть содатадызь... Тетям истя мерсь:
— Ва, цёрам, сы сёксесь, бути паро ие ули, урьваксттадызь.
[ 46 ] — Эзь са истямо иесь. Арась зярс часиянок, Полага. Яла теке, куть сисем иеде мейле — минь карматанок улеме вейсэ...
А стувтовить Полаганень Петянь валтнэ... Зярдояк а яви седейстэнзэ Петя. Чистэ рангони кисэнзэ.
— Полага, чи-валдынем! — тошки пилезэнзэ манахось. — Мекс а кортат? Эли теть пек уш а вечкиван?
Полага каштмоли. Сон муевель месть меремс причань устав манахонтень, ды... вачо-чись... вачо-чись!
— Полага, месть муцят эйсэнь? Тонть марто, мон ванса, лиякс а кода... ансяк вана истя... — Саизе эземстэ берюмазонзо, кандызе тарканзо ланкс.
* * *
Нарсудонь кудось пешксе: ават, бабат, цёрат, тейтерьть. Конат эсть кельге кудонтень — кудыкельксэнть пивтить, вальматнень эзга поволевсть. Куть пиле песэ мезеяк марямс.
Течи судить манах алиментэнь кис. Весе кортасть те тевденть. Сяк эсь койсэнзэ.
— Ванта эй, пазонь буканть кундызь...
— Сонзэ течи ней ёварцызь...
— Ды уш максыть тензэ тейтерень маньшиманть кис мезеяк...
— Ки истямо те манахось?
— Эли а содасак?..
— Шайтян сынст весе содасынзе.
— Те о. Геронтий, настоятелесь.
— Иля маньше.
— Эли дуракат. Азе тетькить сельметь, варштык...
— Те архимандритэсь Геронтий? Мезень кис истя кармить судямонзо?
— Пек ланга уш тукшнось.
— Кода истя ланга?
— Ланга... Эйкакш сотворясь.
— Кинень?
— Ортянь Полаганень.
— Вай, авакай-корьмакай! Умок ульнесь?
— Умок уш... колмоце иезэ эйкакшонть.
[ 47 ] — Манахнэнь панемс эряви веленть маласто! — сеери вейке дова. — Мон улко скал вешнинь вирьга. Тосто вастынь вейке манах... Куродокшнымемь шайтянось, цють менинь...
— Мекс эзик жаля ломаненть? — пейдезь мери вейке цёра.
— У, бесэнь курго! Месть онгат?
Од тейтерьтне пурнавсть куцяс ды чоледить:
— Кодамо сыре манахось...
— Поназояк сатанань...
— Турванзо прок букань...
— Эли Полага палсизе те причань кургонть?..
— Эно мезе, ваксонзо уцесь!..
— Уцесь, уцесь... шкатне истят ульнесть: вачо куломадо пряткак ёмавцак.
Од цёратнеяк эсть кадовт лиядо. Сынь чарасть тейтерьтне юткова ды „шпилясть“.
— Маря, ванта, кодамо од цёрась, прок паро племань боров.
— Маря, тонть мельс тусь: Нать кода ванат лангозонзо.
— Оймак, кискань курго. Месть монень пецят?
Полага кудонть куншкасо, скамиянть ланксо. Эйкакшось вакссонзоль. Полагань истямо ульнесь ёжозо: буто сон печксь кемень ломать, ней судить эйсэнзэ. Эрьва ёндо лангозонзо ваныть. Кортамотне Полаганень эсть марявт, яла теке сон содасы, весе ломатне кортыть ды арьсить сонзэ кувалма. Полагань свистизе стака тошна. Кармась рангомо.
О. Геронтиень ёжозо ульнесь прок пек чавозь кискань. Сон — архимандрит, манастырень настоятель, зняро иеть тонавць народонть ванькстэ эрямо, эйсэнзэ ловсть преподобнойкс, кедензэ крёстонь таркас палсизь, а ней... ней сон суцо... алимент кецтэнзэ вешить... Эх, авакай... Куть моданть пачк тук. Срамавсь весе епархиянть келес. Паньсызь ней манастырьстэнть, куть прят повик...
* * *
Судось прядовсь! народось шалнозь сралесь кудова. О. Геронтий лись суцтонть сех мейле. Састыньке тусь [ 48 ]кияванть келиязонзо. Лецть мелезэнзэ берянь онтнэ. Кумболк! мольсь седеезэ, кармась усковомо алов. Геронтий сталгаць, майшь дарманонзо ды сяворсь кинть чирес, прок сювасо пештязь ташто мешок. Киненьгак а жаль. Киненьгак а эряви. Куть наксат теске — питнеть синдезь грош.
* * *
Кавто ломать листь суцтонть, кортыть приговоронть кувалт:
— Монь койсэ, судось пек лац тейсь: 120 целковой иень перть Полаганень саты... — Парсте ёвардызь Геронтиень, ней стувцы паряк...
— Геронтий кемень целковойтнень ковозонзо сельгень прамс каясынзе.
— Мекс истя пек шождынестэ?
— Секс: зняро кандыть тест эрьва ёндо ярмаксо, оршамо-пельсэ, кшесэ-салсо ды лиясо-мейсэ.
— Истя, истя. Ламо эщо минек ютксо дуракнэ... Зярдо ансяк маштыть сынь?..
— Маштыть. Од ломатне касыть миньденек превейстэ. Калмасызь весе ознума койтнень.
Москов, ГИЖ. 1927 ие.