Пинал дыръям дышетскеме (Усков)

Пинал дыръям дышетскеме Автор: Пётр Михайлович Усков

Пинал дыръёсме чакласько, дышетскемме тодам ваисько. Ортчизы ни со дыръёс, эксэй улын улэмъёс. Мон соку вордскиськем, шудтэм улэ ӝимиськем. Пеймыт удмурт семья пӧлын будӥсько, школае мыныны но вуисько. Акаршурын школамы, удмуртэз дышетон коркамы. Отчы монэ ысто.

— Дышетӥсьмы туж усто. Ачиз со удмурт, луоз тыныд ӵужмурт. Удмурт сямен вераськоз, туж каньыл дышетоз. Эн кышка, пие, дышетскыны мын, мусое — озьы буйгатэ монэ мемее.

Акаршуре монэ нуизы, школае пыртӥзы. Арня-кык, толэзь-куинь улӥсько, дышетӥсьлэсь кышкасько, йырсиос ик пештырско. Дышетӥсьмы кесяське, пиналъёс шоры лекъяське. Линейка кияз кутэ, кымесэ соин вуттэ. Золэсь вылэм кымесъёс, тӥясько линейкаос. Батырлэн мыжыкъёсыз пильыло ӝӧкъёсыз. Перемена ке луэ, олокытысь со вуэ: мыжге одӥгзэ, ӵыже мукетсэ, сэреглы быдэ пиналъёсыз султытэ, парталы быдэ пыдесъяськытэ. Синъёссэ лек карыса, учке кырыжъяськыса. Учке одӥгез шоры, мукетсэ нуэ доска доры. Пельтӥз золтыса, карта доры нуэ бызьыса. Отчы вуттэм бераз, пиналлэсь йырзэ йыга борддораз.

Сыӵе вал милям дышетӥсьмы, пиналъёсыз курдатӥсьмы. Пиналъёс сое шуо вал «Покой», гурт калык ним понӥз солы «пропой». Али но калыкъёс Покой дышетӥсез «ушъяло», линейкаен йӧтэм йыръёссэс кормало. Ачиз Покой удмурт кылзэ вунэтэм, ӟуч сямен гинэ супыльтэм.

Пинал дыръёс ортчизы, тросэз жугемъёс но вунӥзы. Акаршурысь дышетӥсьмы кошкиз, ӝоген собере революция кылдӥз. Собере… школа тусъёс мызон ини табере, лякытэн дышето пиналъёсыз, умоен визьмало соосыз. Удмуртлы удмурт кыл сётӥзы, удмурт кылын дышетны кутскизы. Дугдӥзы борддоре нырез йыгамысь, кӧжы вылэ пыдесъямысь.

Дано мед луоз совето властьмы! — шуо табере пиналъёсмы. Мынам но «ӵужмуртэ», лекъяськись удмуртэ, дышетӥсьысь поттэмын, кыдёке ӵужыса куштэмын.