Пиме сӧризы (Кедра Митрей)
| Пиме сӧризы Автор: Кедра Митрей |
| Кылдытон дыр: 1923. Источник: Кедра Митрей Пиме сӧризы // Удмурт литература: средней школалы учебник / Д. И. Корепанов. — Ижевск: УДГИЗ, 1935. — 29-30-тӥ бамъёс. |
Мон Саля гуртысь пересь Дурга луисько. Дорам ӟеч мылкыдын лыктэм муртэн тяпыртыны туж яратӥсько. Улэм-вылэм сярысь вераськем потэ.
Ляб мӧйы синмыным та дуннеез учкисько-учкисько но, номырзэ уг валаськы ни. Аслам кузпаллы быземе туж ӵем тодам лыктылэ. Олокытчы кыдёке, кылонтэм-адӟонтэм интые монэ кузпаллы сётӥзы. Милемыз черкын венчать карытозь, нэнэе мыным эмеспизэ но ӧз возьматылы. Зэмзэ ке верано, ачиз но ӧз адӟылы. Отысь-татысь кылыса, узыр, умой уло шуса, 60 иськем ёроскы монэ бызьытӥзы. Соку арлыды мынам 22 лэся лыдъяське вал. Нэнэе кунулаз кадь дораз нуныяса воземен, номре но дуннеысь тодытэк улӥ.
Кузпалылэн бубиз туж лек сямо вылэм. Ӧжыт маке мыдлань ужам понна, гондыр сямен гурӟылэ, гудыръя вал. Дӥсьтытэк, кышкаса улӥ. Со мӧйымы кулэм бере, кузпалы мынам мукет луиз, вошкиз, аракы юыны дышиз. Кудӟыса, монэ токма шорысь ӵем жугылӥз. Одӥг кыл но вераме уг лу вал. Трос мыжыкъёс сии. Уйбыт-уйбыт бӧрдылӥ. Пиналъёсмы но данак вал. Бубызылэсь кышкаса, дэймыса, коскась луизы, куатьсэ шай вылэ нуимы. Курадӟи, юн курадӟи.
Ойдо, ӵок шуод ини вылды. Сыӵе улэм-вылэм быриз, кузпалы но кемалась кулӥз, бубыез борды ик ватӥм. Одӥг пие но кык нылы бордам кылизы. Туж секытэн вордӥ, будэтӥ. Улэме куанермиз, юртэ куашкан доры вуиз. Малпасько ке, кузпалылэсь шай вылысь султэмзэ но витисько кадь, оло дышем бере, мыжыктэк но улыны секыт лэся.
Ар бере ар ортчыса, пие воргорон луиз, войнае мынӥз. Кык арлэсь кема салдатын кыстаськиз. Гуртэ бертэм бераз мон сое ӧй тодма ни. Книга, газет лыдӟыса улэ, бускельёсты ӧтчаме кенешыны люкалля. Озьы уй-нуналъёссэ ортчытылэ. Мон арлыдоесь пиос, кышноос, кырыж синмын со шоры учко, коммунист вылэм шуо.
Таиз оло умой лусал на вал, солэсь но уродэз ке ӧй вадсаськысал. Пиелэсь улэм-вылэмзэ абдрано гинэ луисько. Бубизлэсь юон сямзэ уг возьы, черке уг ветлы, попез коркамы но пыраны уг лэзь. Инмарез вунэтӥз, уг вӧсяськы, войнаысь бертэм бераз кымсаз кирос понэмзэ ог пол но ӧй адӟылы на. Табере нош кышнояськиз. Олокытӥ мартӥ со ужез луиз, ӧй но шӧдылы. Бласловенняме но ӧз куры, венчат ӧз кариськы лэся. Умойтэм, умойтэм улэ. Кабен пиме сӧризы, оло вылаз син уськытӥзы. Туноез-пелляськисез ӧтёно вал. Оло бен шурысь ваем выль ву ке вылаз пызгысал, тупатскысал дыр. Солы кыӵезэ пелляськисез но бырйыны уд вала, ёрмод соин.
Ма гинэ бен та вераме! Солэсь но юн паймоно кадез вань. Э, туклячиосы, кудоосы, мусоосы! Тазэ кызьы вераны но уг тодӥськы, уг валаськы ук. Кыл но уг шедьтӥськы. Куар вӧсь вылтӥ кенэлэн пиез вордскиз. Солы мон туж шумпотӥ. Табере кинэ ке пинал возись шедьтоно шуса малпай.
— Ку нуныдэ черке пыртыны нуод? — шуса, пиме юай.
— Малы отчы нуллод, кулэез ӧвӧл, — пие шуиз.
Мынам куарае ик гуньдӥз.
— Кызьы бен солы ним сётод? — нош ик юасько.
— Ним понӥм ни. Ким солэн нимыз, — шуэ.
Озьы шуэм бере, мар юам-верамме но вунэтӥ.
Пиналзэс но черке ӧз нуллэ, мудоръёсмес но гуртын сутӥзы. «Э, шузиосы! Инмар улын ветлыса, сое вунэтӥллям», — шуса, малпасько. Ким нимо экемы шоры ке учкисько, оло зэм ик инмар но ӧвӧл лэся шуса, ас поннам верасько. Ким чик висьытэк будэ, тэтча, эктэ, серекъя, шудэ. Озь но аслым ачим оскытэк, нунылэн йыролтэс улаз корт качы понӥ. «Нуныез чер алямлэсь лэчыт корт возьма», — пересьёс шуыло вал.
Кузпалыным улэме тодам лыктыса, таӵе малпанъёс но йыре пырало: «Ӵем-а меда пие кышнозэ-пӧрасьсэ жугылоз? Сотэк кышномурт визьмо уз луы». Та дырозь жугиськемзэс ӧй шӧдылы на. Огзэсты огзы яратыса уло, уртче ужало. Собере нош тазэ кытысь кылод-адӟод вал? Ӝытлы быдэ пие кышнозэ книга, газет лыдӟыны валэктэ. Ачиз но кенэ вольыт гинэ лыдӟе ини. Абдрасько гинэ мон соос шоры учкыса. Сӧризы ик дыр пиме шуса куректӥсько.
Вераськыны мон туж яратӥсько. Дорам ветлылэ, мусо туклячиосы. Туннэ супыльтэме понна эн лекатэ. Котырысь йырсазь кошкем бере, ма карод на.