Од пингень вий/Яла сыргсить а сыргавить
ЯЛА СЫРГСИТЬ А СЫРГАВИТЬ
Отяж велень станция. Станциянть эйстэ аволь васоло машинань-тракторонь станция.
Крилець прясо лыйни апокш якстере флаг. Совинь конторантень. Кудось пирсезь сисемшкав. Панжия галанка ёжосо кенкшенть. Ванан, робочкомонь председателесь ды секретаресь кенерепакарест лангс нежедезь ёвтнить вейкест-вейкест туртов, кона косо эрясь, ки мезть тейнекшнесь, косо кода чить-веть ютавтсь.
Царёв, робочкомонь председателесь, сайсы директива марто ансяк туезь почтасто конвертэнть, тей-тов велявтсы:
— Таго директива!
Сёрмады уголозонзон «исполнено» ды седе курок эцэсынзе конёвтнень столь потс.
— Тынь, — мерян, — мариде, што «Правда» газетась ютавты весесоюзонь келес таркава печатень конкурс?
Ваныть кавонест сельмеде-сельмс. Талнозевсть.
— Кодамо конкурс? — талны председателесь.
— Эзинь маря! — буркстась секретаресь.
— Стенань газетэнк, — мерян, — ули?
— Мон ульнинь стенань газетэнь редакторкс эщо Узбекистансо, — шнась пря председателесь.
Стенань газетэст арасель.
[ 109 ]— Кода эно арсетядо сюлмавомо конкурсонтень? — кевкстинь таго. А ламос кашт мольсть. Натой вармась марявсь вальмантень чавомадо.
Царёв сянгорсо козкстась, суронзо нерькстынзе черезэнзэ.
— А содан!.. — Эщо мезть бути ёвтыксэль, прок валт эзь мук.
— Давайте, — мерян, — пурнасынек робочкомонь члентнэнь, тейдяно заседания стенань газетэнь кувалт. Эрявить пурнамс колхозникнэнь ютксто велькоронь пост, карматано нолдамо стенань газета.
— Тень минь тейсынек! — рангстась председателесь.