Обокат (Кедра Митрей)
| Обокат Автор: Кедра Митрей |
| Поттэмын: 1926. Источник: Кедра Митрей Обокат // Удмурт литература: средней школалы учебник / Д. И. Корепанов. — Ижевск: УДГИЗ, 1935. — 33-37-тӥ бамъёс. |
- Палсин Микта. Обокат, узыръёслы пыриськись адями, ачиз куанер.
- Овера. Сельсоветлэн тӧроез, пыртос, узыр улэ.
- Кион Иван. Сельсоветлэн членэз.
- Камаш Миша. Гурт кузё пи, удалтымтэ нерге.
- Палага. Палкышно.
- Ӟымыр Ёгор. Куанер улӥсь бускель.
- Ӟумья. Пересь кышно, ёрмыса улӥсь марке.
- Продотрядник.
Микта. Верамме гинэ кылзӥське. Мон умойтэмзэ уг вера. Мынам сямен ке ӧз луы, синмам сялӟе яватэ.
Иван. Я, вера, вера. Со понна ик тон обокатмы милям.
Микта. Сыл али, дугды али! Кытчы, тырттэм шыкыс, мерскиськод!
Овера. Ӧжыт тӥ каньылгем вазьылэ. Мон азям ӵаш поттӥськоды.
Микта. Эн куареты! Мон тыныд юрттэмен гинэ старшинаын улӥд. Монтэк бускельёс тонэ гуртамы ӧй пыртысалзы. Узыр лусал шат тон, — куашкам штаниен татчы лыктӥд ук. Мон сэрен улыно-вылыно корка возиськод. Ӝоген инме тубод ини…
Овера. Ма токма зулиськод. Ужзэ вера… Тон но, Микта, тырмостэм кӧт. Дорам куноямысь уд дугдылӥськы. Ялам винаен сектасько, пиналъёстэ но сюдылӥсько. Кукъёсыныд-йырыныд валче астэ мыным вузад ини… Я, ужмы сярысь вераськом. Дыртыны кулэ. Развёрскаез сэрыт тырмытоно. Ӵуказе ӧм ке сётэ, монэ сьӧразы каре нуозы.
Микта. Кемалась озьы вера вал. Мон азям тыныд «мон но мон» шуыны одӥг но уг тупа. Котькызьы шу, асьмеос огмытэк огмы улыны ум быгатӥське на ай… Табере ма сярысь вералом на… Озь веть, кыл куспы пырыса, тон ужез сӧриськод.
Иван. Ойдо ӝоггем, Микта. Асьмедыз со кионъёс уз вите ук.
Микта. Ачид тон кион!.. Ӧсэз пытса, мултэс калык медаз кыл. Кӧня пуд ю-нянь асьме гуртлэсь куро?
Овера. Кык сю пуд ӟег, кык скал, вить парсь, ньыль сю курегпуз, ӝыны пуд вӧй…
Иван. Ма-ма, сокем тупыттэм!
Микта. Визьмыд ке уг тырмы эн мерскы, нюлэс пи, мунчо мурт коскатон люкет.
Иван. Бен трос ук, Микта.
Овера. Сое асьмелэсь уг юало. Ӵуказе ӵукна ваньзэ та верамме исполкоме вуттоно. Ӧм ке нуэ, мынэсьтым куме ик ниозы.
Микта. Куэд зӧк тынад, чидалоз.
Овера. Куанер муртэз эн исалэ шуса, веразы мыным. Узыръёслэсь гинэ октэ шуизы. Табере кинэ асьмелы пӧсятоно луоз меда?
Микта. Овераен Микта обокатэн ноку но уз тыре. Азьло ик тазьы верамен пуктоно. Ма понна асьмеос сельсоветэ быръемын. Со мында ужаммы вылэ нош-а курадӟомы? Уг, уг сёты, нокызьы но уг сёты. Кышканэз ӧвӧл, люканы быгатом. Мыным оске, мон валэкто. Нырысь ик вичаксэ пиостэм кышноосты ньылдалом. Соос понна дурбасьтӥсь уз шедьы.
Иван. Мӧйы Ӟумьямес ум вунэтэ.
Овера. Со доры мынэммы остэ карем луоз. Солэсь скалзэ поттоно. Парсез кык.
Микта. Асьмелы соиз яралоз. Собере Ӟымыр Ёгорез маялтоно. Сьӧд пуны музэн со куспамы пырыны турттэ. Ситэк, ютэк сое вордыны кулэ. Мед шӧдоз кужыммес.
Камаш Миша (бызьыса пыре). Марым, марым…
Микта. Ма марым?
Миша. Тятяе марым, тятяе ыстӥз. Дас вить подводлы, марым, вал пе куро.
Иван. Э, со шайёс! Одӥг но эрик уг сёто.
Миша. Марым, Овера, тонэ ӧтизы. Ӝог пе лыкты. Тятяе бызьса, марым, бызьса ик мын шуиз. Туж пе дыртыто, марым.
Микта (Овералы). Я, мын, бадӟым туш. Валме кельты. Отӥзэ ми лэсьтом. Эк, Ӟымыр пиез йӧскадь пызьыртом на! Мыном, Кион.
Палага. Егор, Егор!.. татчы лыкты ай!.. Сэрыт вамышъя. Кылӥд-а, адӟид-а, Егор? Ма сярысь сьӧсьёсмы кенешо? Ньылдам пуппы Микта тынэсьтыд юдэ поттом шуэ.
Егор. Кытысь сое тодӥд, кин вераз?
Палага. Ачим, ачим мон кылӥ. Ӟумья кенак доры мыныкум, Микталэсь Овера доры пыремзэ адӟоно луи. Пӧлазы ик Кион пи но вал. Нош ик ма ке но умойтэм пуктозы шуса, мон сьӧразы корказе пыри. Вань вераськемзэс кылӥ.
Егор. Ма, бен, кенешо?
Палага. Тӥни верай ук. Неномыртэм йыры кур.
Микта (лыктэ). Ма сылӥськоды?
Егор. Тонэ, обокат, витиськом.
Микта. Мар монэ витёд! Мон нокинлэсь но витемзэ уг возьмаськы, котьку азьло ачим вуисько.
Егор. Кыӵе мар выль иворед вань?
Микта. Ӟечез ӧвӧл, уродэз вань. Вераны ик секыт. Тон, пиок, 30-35 пуд ӟегдэ дася ай. Тон но, Палага, 20 пудзэ потты.
Егор. Тыныд-а со мында сётом, паськыт ньылон…
Палага. Эк-эк-эк! кызьы вераны ик уг валаськы ук. Тырттэм кеносысьтым, сиён шедьтытэк, шыръёс пегӟизы ини. Маме басьтыны медӥськоды на?
Микта. Кема вераськыны мон уг ваньмиськы, ӝог дасялэ! (Кошке.)
Егор (Микта сьӧры мыжыксэ сэзъя). Шедёз ай тыныд чырты берад!
Палага. Тьфу! нокытчы лэсянтэм лытэм урд! (Микта пала сялӟе.)
Камаш Миша (бызьыса лыктэ). Палага! Марым, мын валдэ, марым, подводэ сёт.
Палага. Ма, шузимид-а, мар-а тон? Мынам валэ ассэ ӝутъяны уг вормы. Кыдёке-а соин вуод?
Миша. Я, кыткы, кыткы, эн вераськы ни, марым.
Палага. Кытын-ось мон кышномурт сое кытком. Кулэ ке, кытке асьтэос.
Миша. Ачид, марым, ямщикаса мын.
Палага. Нош собере пиналме тон-а нонтод?
Миша. Со сярысь мон тонэныд уг вераськы. Марым, подвод сёт.
Палага. Иське, кыткы но мын ачид. Утча, возь вылын мынам валэ.
Егор. Астэ, Миша, малы уд кыткиськы? Учкы али, кыӵе тон ымныро-мугоро куаем.
Миша. Тятя… марым, тятяелы верало.
Егор. Коть ваньмызлы черъёслы урттылӥськы. Мынам кеберы но ӧвӧл.
Ӟумья (бодыен лыктэ). Э, тол гудыри шукконъёс, пери шоры йӧтонъёс! Кылэмды вань-а, пиналъёсы! Скалме кыль басьтонъёс таланы медо ук.
Миша. Ай парсьтэ но нуозы.
Егор. Эй, ӵушъял! Мӧйы муртэн озьы вераськиськод.
Палага. Кытын тынад возьыт буред, ӵуж акаедлы кызьы шуиськод!
Ӟумья. Таӵе октосъёслэн куке возьытсы луоз-а бен?
Миша. Начар-куанер калык, марым, ака уз лу мыным.
Ӟумья. Э, куртчаньги кутон! Кӧтты пилиськоз ини. Калыкез вӧсь карыса улэменыды узырмиды. Мынам выжые ӧвӧл тон, ӧвӧл. (Кошке. Кунулысьтыз бугорез усе но ӧр кыреме погыльске. Бугорлэн сӥньыс пумыз бодыез борды бинялскыса кыле.)
Миша. Тӥ сэрен кӧня дыры ортчиз. Тятяе, марым, табрезэ тышкаськоз. (Ӝог кошкыны ӧдъя.) Марым… (Пыдыз золскем сӥньысэн сьӧлтаське но, кизэ азь пала куштыса, погра. Палагаен Егорен гой-гой серекъяло.)
Миша. (Султэ. Синмысьтыз синвуэз потэ, ымнырыз луоен наштаськем.) Ы-ый, марым! Марымъёс! (Кошке.)
Микта. Гуртмес мон туж юн тодӥсько. Кин кызьы улэ, одӥгтэм валасько. Ма ас гуртэз гинэ, быдэс волосез, быдэс улосэз тодӥсько. Пал ке синмы, со палыз но зол адӟе. Гожтэт лыдӟыны уг ке но валаськы, ваньмыз закон мынам ки улам…
Продотрядник. Ма зулиськод. Пелям ик жангыртэ ини. Ӝог-а косэмъя люкалоды?
Микта. Али ик, али ик со дась луоз. Туж чылкыт ми ужаськом.
Продотрядник. Куанер калыкез уд-а ёрмытӥське?
Микта. Ум, ум. Куанер бускельлы ми юрттӥськом.
Овера. (Пыре. Сьӧраз Кион Иван лыктэ.) Я, люкало ни пумен. Кӧй-вӧй но, ӟег но дась луоз.
Иван. Кудӥз уггем сётскы. Даллашонэ медаз вуттэ вал.
Микта. Ыстӥд-а октыны?
Овера. Вуттозы ини.
Продотрядник. Кытын подводэ дасям валъёсты?
Овера. Ульчаын витё.
Продотрядник. Етӥззэ валдэс мыным сётэ ай. Люкам юдэс исполкоме али ик ыстэ! Кык скал вае. Тодӥськоды веть, тӧдьыосын ожмаськонмы лек мынэ. Горд армиез няньтэк возьыны уг лу. (Потэ.)
Микта (сьӧраз мынэ). Соиз понна эн кышка. Нимы но мынам быдтырзэ обокат луэ. (Кошке.)
Овера. Эк, сюлэм ик капчи луиз. Синмам мертчем чаг кадь улэ вал.
Иван. Кӧня мултэсэз луоз, шори люком уть.
Овера. Дырыз вуоз ай, люком.
Камаш Миша. (Бызьыса пыре. Кымесыз лызвож пыктэмын.) Марым, марым…
Иван. Нош марым вуиз.
Овера. Ма луиз?
Миша. Марым, марым… пӧртмаське отын.
Овера. Кытын, ма пӧртмаське?
Иван. Умой-умой, дыртытэк, чиньыедлы быдэ, нимаз-нимаз кылдэ вера.
Миша. Озьы ик, бен, верало ай. Марым, Ӟумьялэсь парсьсэ Микта поттыны косэм вал. Мон гидэ, марым, пыри но, отысь олокин ӝуштыса, гурӟылыса вылам тэтчиз. Марым, суйтӥм ик кутэ вал ини. Урттэ ик мынам котырысьтым пегӟиз. Тусь вамен, марым, погыльски но, олокытчы пеймыт гуэ вуи.
Овера. Сюр нош кытысь шедьтӥд?
Миша. Палагалэсь, бен, шӧтэм валзэ кыткыны мынӥ но, марым, шӧй кадь урдэс йылаз кылле ук. Быжтӥз золтӥ но, марым, ӵыж-жиз ук со мыным… Кытчы вуэмме но ӧй вала ни. Отчы ик шузими.
Микта (дыртыса пыре). Э, лыкто ук со кулэтэмъёсыд. Киязы зыр кутылӥллям.
Иван. Нош тон, Микта, соосты визьматыны уд-а мар-а быгаты?
Овера. Тон, Микта — обокат. Котькыӵе быректэм вуэз кынтод. Ми потом татысь. (Мукет ӧсэтӥ потыса кошко.)
Миша (корка шортӥ берга). Быри, быри татчы мон. Марым. Э, марыме! Гуньдӥськод ни. Сюлмы, сюлмы марым, пилиське ини.
Егор (корка пыре). Озьы тӥ ялам куанерез куасалтӥськоды! Туштӥд кыскало! (Учке но пайме.) Кытын Овера?
Палага (Ӟумьяен пыре). Кионъёс, сьӧсьёс! Валме но быдтӥзы. Табере валтэк кельтӥзы!
Микта. Ма луиз, ма луиз?
Ӟумья (бодыеныз сэзъяса). Быдтӥд, быдтӥд вань улэмез, ӟичы! Кылемзэ но синдэ кокчалто.
Микта. Дугды али, дугды али, пересь кенак…
Егор. Сёто мон тыныд дугдаль! (Мыжыксэ урдыса Микта вылэ тэтче.)
Овера (Кион Иванэн пото). Кошкизы лэся. Асьме котыре гинэ медаз кутске. (Ӧсэз пытса.)
Иван. Кӧня, бен, кылёз?
Овера. Трос эн вераськы. Шори гинэ ке люким, окмоз асьмелы. Ужаммы токма уз луы. Микталы эн поттылляськы. Мон солэсь валзэ подводэ сётӥ.
Иван. Октэм юдэ мыным тон возьматы.
Овера. Я, мыном, учком. (Кошко.)
Миша (гур сьӧрысь потэ). Ой сюлмы, сюлмы путэ. Пут пилиськыны медэ. Учкы, кыӵе жугиське. Мае мон нош тодӥ али. Марым, тятяелы туннэ ик верало. Кытын мед-а юзы ватэмын? Сое, марым, адӟоно вал.
Микта. (Юн шокаса, огеныз киыныз кымессэ, кыкетӥеныз тыбырзэ возьыса пыре. Ӝуштэ.) Я, обокат лэся каризы. Жугизы, дӥсьме кесязы… (Пукон вылэ пуксе.) Ма пайдаез табере потӥз… Кин, ма понна мон сокем выри? Э, об-бок-каат! (Йырсиоссэ кыска.) Визьтэммем ини тон. Км… ачид куанер улэм бере…
Миша (сэрегысен). Микта!
Микта (кылытэк). Куанерез тон жаля вал.
Миша (матэ лыктэ). Обокат!
Микта (тэтче). Тон, гын тул, малы татын?
Миша. Ю, Микта, люком.
Микта. Люко мон тынэсьтыд кудэ. (Мишаез чырты бертӥз кутыса ӧсэтӥ донге.) Котьмае тодӥсь!.. (Ас кымесаз мыжга.) Законник, обокат! Кем, кем тыныд! Озьы кулэ вал, кемалась кулэ. Узыр кузёослы, сьӧсьёслы эн юртты. Азьпала визьмо луод.