Паськыт бусыос
Тӧдь-тӧдь кылльыло,
Ин кизилиос
Юг-юг пиштыло.
Туж чылкыт толэзь,
Чебер юсед кадь,
Пилемъёс сьӧртӥ
Ортче гурт йылтӥ.
Кузь сюрес кузя,
Ӟазег уллё кадь,
Дыртытэк гинэ
Кузь обоз мынэ.
Дӧдьы сюл улын
Лымы ӟукыртэ,
Валъёс чыртӥын
Гырлы жингыртэ.
Со куспын валъёс,
Мылзы поттэк кадь,
Пыдзэс вошъяса
Туж каллен мыно.
Дӧдьыос сьӧрын,
Сюресчи муртъёс,
Вераськылыса
Пудэн мыныло.
Мынон куспазы
Кизы кынмыса,
Киоссэс ваче
Лон-лоп жугыло.
Соослэн бамзы,
Вань ымныръёссы,
Тӧдьы гӧръёсын
Юг-юг луылэм.
