Няньтӧмдыр

by Попов Фёдор Васильевич

Воис нин тулыс.
Матысмӧ гожӧм:
Ывлаын гожйыс
Шонділӧн сотӧ.
Мӧдӧмась войтыр
Черӧн да нопйӧн
Пармалань, вӧрлань
Кӧдзтӧм нянь корсьны.
Мунӧны ыб вывті
Кӧдзаяс дінті.
Ӧзимъяс быдмӧны
Мичаӧсь, вежӧсь.
«Майбырӧй ӧзимӧй,
Кутшӧм тэ мича!
Кор бара воан тэ,
Шепсялан, тыран?
Дыр на зэв виччысьны
Тайӧӧс лоӧ...
Уна на пармаын
Лун миян кольӧ».

Воисны пармаӧ.
Кузь вӧра, пемыд,
Ордымтӧм, пӧрӧмӧсь.
Пода туй векньыд.
Зэв тшӧкыд сён-керӧс
Регыдӧн воис.
Сувтісны, сатшкисны
Мыр йылӧ черъяс.
Мышкуысь пӧрччисны
Кӧлуйтӧм нопъяс,
Шапкаяс, тасмаяс,
Шабуръяс, лазъяс.
«Татчӧ вай сувтламӧй.
Эмӧсь тай тані.
Кысь торъя унасӧ
Сэсся тась корсян».

Катшкӧны, колскӧны
Ньыв улын ставныс.
Лозгӧны-пӧрӧны
Кузь мича ньывъяс.
Шувгӧны, шаргӧны
Вӧр пӧвстті йывъяс.
Нитш пиӧ киссьӧны,
Вошӧны кольяс.
Кылӧны гӧгӧрын
Пармаын шыяс:
Пӧрлӧдчӧм, увйысьӧм,
Гогнасьӧм, сёрни.
«Онӧй на пажнайтӧй?
Шойччамӧй локтӧй!» —
«Гортын нин пажнайтам.
Абу тан нинӧм!»

Шондіыс увтасмӧ,
Вуджӧръяс кузьӧсь.
Керасьӧм, увйысьӧм,
Сёрни шы кусі.
Гӧгӧрын куйлӧны
Волькӧдӧм ньывъяс,
Нитш вылын косьмӧны
Веж лыска йывъяс.
Лэччӧны нопъяяс
Пармаӧд туйӧд.
«Сё морӧй ветлӧмӧй...
Коркӧ и волам».
— «Позьӧ ӧд кольлыны
Сьӧкыд кӧ лоӧ». —
«Тонӧ со локтӧны
Паныдӧн вӧлӧн!»

«Анук, вай петавлы,
Ӧшлыштӧй сёръяс.
Лизук, тэ Чалкотӧ
Кук йӧрад лэччӧд».
Горт гӧгӧр тырӧма
Качӧн став сёрйыс;
Гож водзын югъялӧ,
Ньӧжйӧник косьмӧ.

Пӧрысь пӧчӧ верстьӧ пикӧд
Вушталӧны лабич шӧрын
Косьтӧм качсӧ лэчыд пуртӧн;
Ныв сэн гырйын зіля тойӧ.
Кык пи, ичӧтикӧсь, джоджын.
Налӧн аслыссяма ворсӧм:
Гӧгӧр уна сикас чача,
Ӧти тэчас, мӧдыс кисьтас:
«Огӧй сідзи, тэчам этадз!»
Пызан дорын копыртчӧма
Налӧн мамыс мыйкӧ вурӧ:
Киас кутӧ еджыд дӧра.
Емыс ветлӧ сылӧн сюся.
Чеччис ӧти пиыс джоджысь:
«Мамӧ, мамӧ, йӧвтӧ вай нин!» —
«Шӧрӧм няньтӧ, мамӧ, тшӧтш вай!» —
Шуӧ мӧдыс воддза бӧрсьыс.
«Абу, пиӧй, шӧрӧм няньыд...
Кача няньтӧ крӧшитӧ дай»...
Вайис налы улльӧв тасьті,
Кач папурка вит-ӧ-квайтӧс.
«Вайӧ асьным пажнайтам жӧ».
Пуксялісны пызан сайӧ.
Мамыс вайис криньча вылльӧв,
Сэсся папуркасӧ унджык.
Ньӧжйӧн панясьӧны ставныс.
Пызан сайын кылӧ сёрни:
«Тан кӧ эськӧ пызьыд джынйыс,
Сійӧ зэв нин пӧтӧс сёян».
«Ырӧштӧ тай небось он ю!»
«Кӧть нин йӧлыс миян эмышт:
Сійӧн кылӧдыштан немас...

Ньӧжйӧник мунӧны
Пу доддьӧн-вӧлӧн.
Куш муті ньӧжйӧник
Ыджыд горт кыскӧны.
Бӧрсяньыс уна
Колльӧны бабаяс,
Мужикъяс, челядь.
Горзӧмӧн лыддьӧдлӧ
Том ичмонь бӧрсянь:
«Коньӧрӧй дай меӧй мортӧй,
Мый нӧ кута ӧні керны?
Бур кӧзяинӧй тэ менам,
Мыйла колин тадзи менӧ?
Кыдз нӧ кута керны уджсӧ?
Код нӧ отсавнысӧ кутас?
Кодлы челядьястӧ колин?
Ой-ёй жӧ нин, ой-ёй, ой-ёй!
Код нӧ менам кольӧ гортӧ
Кор ме уджавнысӧ муна?
Код нӧ меным сьӧкыд уджсӧ
Кыт ог вермы отсалыштас?
Ой-ёй жӧ нин, ой-ёй, ой-ёй!..»
Мукӧдыс синваӧн
Бӧрдӧны гусьӧн.