Бакча шорын беризь сылэ,
Куаръёссэ сӥзьыл нюлэм;
Улвайёсаз шепез гинэ
Кезьыт тӧл улэ кылем.
Тӧл пельтӥз ке, беризь шепед
Будэм интызэ кельтоз,
Зӥр бергаса, мылыз поттэк,
Кот музъем вылэ усёз.
Ӟеч музъеме со усиз ке,
Кайта адӟом вож куарзэ,
Из вылэ ке усьны шедьтӥз —
Эн возьмалэ будэмзэ.
Тон но сыӵе удмурт нылы.
Беризь шеп кадь луиськод:
Ныл дыр улондэ синвуэн
Пылатыса келяськод;
Аслад кӧтъяд пал шеде ке
Тон кадь шудо кин-о вань?
Яратэмед уг ке басьты,
Йырыд мыкыртске уллань.
