Нопъя сир
Арся вой. Пемыд, кӧть кыкнан синмад тшукӧд, нинӧм он аддзы. Сиктын оз кыв кутш ни катш. Чери кыйысьлӧн оз узьсьы. Мӧдлапӧлын ая-пиа лӧсьӧдісны пыж, кӧзла вылӧ ӧзтісны сирӧд, мӧдӧдчисны кыбны. Пӧрысь батьыс бӧжалӧ, пиыс азьлас киас кутӧ, кыйӧдӧ чериясӧс ва пиысь. Кузь ты кузя мунігӧн пиыс бытшкис сирпи-мӧдлы. Лун овмӧн чери лои. Пӧрысь батьлы сійӧ зэв нимкодь.
Шойччӧм бӧрын батьыс шуӧ:
— Ветлам, пиӧ, Моя тыӧ, сэні ӧд уна чериыд эм.
— Ветлам, ме пайысь.
Воисны Моя тыӧ. Тыыс джуджыд, чукльӧсь, зэв кузь.
Пыжын бара ӧзйис югыд би. Ая-пиа зэв чӧла водзлань йӧткасьӧны. Сирӧд сотчӧ, гажаа ыргӧ, ва пыдӧсысь тыдалас кӧть ем.
Нӧрыс увті мунӧ ньӧжйӧник налӧн пыж.
Лӧпъяс костысь мыйкӧ казяліс пиыс. Чужӧм вылас быттьӧ вежсис.
— Батьӧ, сувтлы! Со, видзӧдлы ваас, гашкӧ кык сыв кузя куйлӧ сир. Мышкас сылӧн ыджыд еджыд ноп. Батьӧ, сутшка али ог?
Батьыс повзис, шай-паймуніс.
— Эн, эн вӧрӧд сійӧс. Сійӧ — звер.
Батьыс бӧрвыв мӧдіс сынны. Ӧдйӧ мӧдӧдчисны гортас. Пыж нырын ваыс ызгӧ, вылӧ чеччӧ гы. Эз и тӧдлыны, кыдзи воис да сувтіс ас берег улӧ пыжыс. Зэв ӧдйӧ кайисны гортӧ. Батьыс повзьӧмысла шензьӧ, сьӧлӧмыс сылӧн ортсӧ чеччӧ:
— Аттӧ дивӧ, кутшӧм зверъяс ваын эмӧсь, ещӧ, пиӧ, удитім ми сыысь пышйынысӧ-а, пыжӧ миянлы эз чеччышт!
— Колі сутшкыны сьылі вужъяс, сэки эськӧ тӧдім, кутшӧм вӧлі звер. Аддзыла кӧ мӧдысь сійӧс, видла нин ме сылысь еджыд нопсӧ, — мӧвпаліс пиыс, кытчӧдз унмыс эз личкы.
Мӧд лун асывводзыс гажа, югыд, петӧма нин шонді, быттьӧ гӧгӧр ставыс ловзьӧ. Ньӧжйӧникӧн шогъяс вунӧны. Батьлӧн повзьылӧмыс бара нин вуні, окота нин бара кыбны мунны.
Пиыс терпитнысӧ оз вермы, кыдзкӧ колӧ аддзывны зверсӧ.
Лун-мӧд мысти, пемыд рытын, Моя ты вылын бара ӧзйис би. Ая-пиалӧн пыжыд кутіс воны, кытысь аддзылісны звертӧ. Пиыслӧн сьӧлӧмыс ёна типкӧ, гӧгӧр видзӧдӧ ва пыдӧсысь, быттьӧ корсьӧ ассьыс вошӧмтор. Сэсся друг сутшкис. Азьласыс быттьӧ мырйӧ сибдіс. Лэптынысӧ некыдз оз вермы. Муртса-муртса кыдзкӧ лэптісны. Асьныс кос сунистӧг кӧтасисны резӧмысла. Швачкӧдчӧмӧн пыжйӧ кайис ёна ыджыд нопъя сир. Батьыс повзис, синмыс сувтіс:
— Мый нӧ тайӧ, кутшӧм звер?!
— Батьӧ, тайӧ ыджыд сир. Вайлы видлам, мый сылӧн тані нопъяс эм.
Нядзмӧсінӧ берег дорӧ сувтӧдісны пыжнысӧ. Вӧлӧмкӧ, сир мышку вылӧ сибдӧмаӧсь сюзьлӧн лыясыс. Пиыс сералӧ, батьыс шензьӧ:
— Первой на аддза татшӧм дивӧтӧ.
Со тай сирыс! Бур, зонмӧ, тайӧ.
|
This work is in the public domain in the United States but it may not be in other jurisdictions. See Copyright.
|