Нелючкияс удждысян тӧвариществояс уджын
Август тӧлысьын ВКП-лӧн центральнӧй Комитет видлаліс (кывзіс доклад) удж Центросельбанклысь. Аслас постановленньӧӧн ЦК шуис: удждысян удж мунӧма буракодь, удждысян тӧвариществояс век содӧны-паськалӧны.
Быд выль уджын эм кутшӧмсюрӧ нелючкияс. Дерт, эмӧсь нелючкияс и удждысян уджын. Гырысьджыкъясыс со кутшӧмӧсь:
1. Уджӧн босьтӧм сьӧм удждысьысьяс видзӧны не сэтчӧ, мый вылӧ босьтӧмаӧсь, а мукӧдлаӧ (сёйӧмӧ да кытчӧ да, а оз уджалан кӧлуй лӧсьӧдны); сэсся босьтӧм сьӧмсӧ, ссудаяс оз вештыны строк кежлӧ.
2. Тӧвариществояс абу на кужӧмаӧсь чукӧртны крестьяна ордысь прӧст сьӧмъяс асланыс кассаясӧ вкладъясӧн, учрежденньӧяслысь — вкладъясӧн да текущӧй счётъясӧн; уджалӧны сӧмын государствосянь сетӧм сьӧмӧн, а сійӧ оз тырмы. Та кузя тырмидз отсӧг вермытӧминӧ судзсьытӧм крестьяналы абу.
3. Тӧвариществояс омӧля на водзсасьӧны ковтӧм рӧскодъяскӧд, вӧчалӧны гырысь рӧскодъяс Правленньӧлы да мый да, тӧргуйтӧны ас сьӧм вылӧ, куйлӧдӧны удждысян сьӧм тӧваръясын.
4. Крестьяна омӧля пырӧмаӧсь удждысян тӧварищество уджӧ: гижсьӧмаӧсь шленӧ, мынтӧмаӧсь пай (а унджыкысьсӧ и пайсӧ абу мынтӧмаӧсь), кор ковмас ссуда — воласны тӧвариществоӧ, а сытӧг, мукӧд пӧраӧ, шленӧс тӧвариществоӧ, кыдз шуласны, «сира нырагезйӧн кӧть кыскы», — оз весиг волыны собранньӧяс вылӧ, оз тӧдны, мый и керсьӧ тӧвариществоясын.
5. Омӧля на мунӧ отсасьӧм гӧль крестьяналы, найӧс удждысян тӧвариществояс пыр кок йылӧ кыпӧдӧм.
Татшӧм гырысьджык нелючкияс крестьяналы удждысян уджын СССР пасьта, татшӧмӧсь жӧ и миян, Коми Обласьтын.
Комисельбанк важысянь нин индалӧ удждысян тӧвариществояслы тайӧ нелючкияс вылӧ, сӧмын сьӧкыда вӧрӧны тӧвариществояс.
Удж лэптӧмныд ас саяныд, крестьяна: колӧ кӧ унджык, донтӧмджык кредит, — кор эм тэнад прӧст сьӧм, вайӧй удждысян тӧвариществоӧ вкладӧн; ссудаяс вештӧй строкын (мед сьӧм ӧдйӧджык бергалас), энӧ тӧргуйтӧй ас сьӧм вылӧ, нуӧдӧй чорыдджыка ковтӧм рӧскодъяс бырӧдан удж, да бурджыка видзӧдӧй правленньӧ удж бӧрся, тойлалӧй сійӧс уджас!
Мед тіян удждысян тӧварищество лоас «Деревняса Банк» кодь, чукӧртӧй сэтчӧ прӧст сьӧмъяс став вӧлӧсьтувса учрежденньӧясысь вкладъясӧ да текущӧй счётъясӧ.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1930 (more than 95 years ago). The author died in 1939, so this work is also in the public domain in other countries and areas where the copyright term is the author's life plus 85 years or less (if applicable), or the copyright term is 98 years or less since publication (if applicable). |
|