Музъем люкон (Кедра Митрей)
| Музъем люкон Автор: Кедра Митрей |
| Кылдытон дыр: 1923. Источник: Кедра Митрей Музъем люкон // Удмурт литература: средней школалы учебник / Д. И. Корепанов. — Ижевск: УДГИЗ, 1935. — 30-32-тӥ бамъёс. |
Милям туж чебер, таза гуртамы агрономез ыстӥзы. Агрономмы бускель пимы ик удмурт шедиз. Музъем ужаммес учкиз но тазьы вераз:
— Бускельёс! Умойтэм ужаськоды. Учкелэ: муосты убо кадь сюлэгесь. Гырыны, усыяны, кыеданы но сое уз луы. Жаг гинэ музъемдэс басьтыса улэ.
— Туж мыдлань ужаськом, — герман пленысь бертэм калыкъёс шуо. — Тон, иськавын, милемыз валэкты. Мӧйы калыклы визь-кенеш сёт. Одӥг но соос милем уг оско.
Собере агрономмы гурт кенешъёсамы лапак ветлыны кутскиз, выль сямен музъем ужанлы, ю-кидыс, турын кизёнлы валэктылӥз.
— Токма дыр тон мадиськод, — куд-огез оскисьтэм муртъёс шуо. — Кызьы со луоз, возьматы али милем.
Озьы вераськем бере, агроном исполкомын черк музъемез басьтӥз но калыклы возьматон бусы пӧрмытӥз.
Ми бускелен люкаським но сизьым бусыен табере ужалом шуса пуктӥм. Ӟеч ужмы умой кошкоз дыр шуса, малпаны ӧдъям. Малпамъя чик ӧз луы.
Шунды пуксён азьын ӝытазе гуртысьтымы узыръёс ӵуштыр-ӵуштыр гинэ куспазы кенешыны огазе люкаськизы. Отчы Микаля поп но, вузкарись Габи но лыктӥллям.
— Монэ музъемтэк шат кельтоды? — бӧрдыса сямен поп вера. — Пиналъёстэс пыртӥсько, бубыостэс вӧсясько, кулэмъёссэ инме, сояз дуннее келясько. Табере оло монтэк-а улоды?
— Тонтэк милям улэм-вылэм секыт луэ. Куанерлэсь визьзэ согыны быгатӥськод, милем юрттӥськод, — Габи шуэ.
— Тонэ ум вунэтэ, ум куштэ, батько. Музъемдэ берлань тыныд берыктом, — ваньзы люкаськем кырныжъёсмы поплы верало.
— Агрономдэс уллялэ, — поп валэктэ.
— Вашкала сямен музъеммес ужалом, — Сели Иван шуэ. — Кыедам муосме мон кытын-ось сёто? Война дыръя ваньмыз пиосы мынам гуртын улӥзы, ужазы. Бускельёслэн пиоссы войнаын калгизы. Асьме сэрен соос ӧз куанерме.
— Сизьым бусы ум поттэ, ум поттэ, — шуса, огкылысь луса, узыръёс кошкизы.
Со арын ик милесьтым агрономмес музон волосе воштӥзы. Ми агрономтэк кылимы.
Узыръёс улэ шедемен сизьым бусыен ужанмес вунэтӥм. Черк музъеммес нош ик Микаля поп кияз басьтӥз. Олокызьы вузкарись Габи но со музъем котыре бинялскиз. Асьсэос уг ужало, милемыз ик медъяло. Кылемзэ музъеммес нош люким. Му вылам лыктӥсько но зар-зар бӧрдӥсько. Валэным берытскеме уг лу, вакчи, сюлэг. Вичак куанеръёслэн озьы.
— Ужаны кужымо кариське! — шуса, серекъяса, шултыса ми дортӥмы Габи кузё пара валэн кошке.
— Уждылы инмар мед юрттоз! — шуса, ми вадсытӥ поп гойыса ортче.
Ӟеч музъем узыр калык кие кылиз. Чапкиськом, йырмес ошыса чыртымес кормаськом. — Мар тазьы карыны лэзим шуса, куректӥськом. Эрикмы киямы, озь но зӧк кӧтъёслы сётскиськом.
Аръёс ортчизы. Совето кунмылэн ваньбурез юнматскиз. Милям гуртамы но выльысь агроном вуиз. Вичакызлэн куанер бускельлэн нылпиез комсомолэ пырыса дышетске, визь люка: музъем бергатон ужез сэзь-сэзь валаны кутскизы. Кузь толъёсын кут кутан, пӧзь керттон, мертчан черсон, вуриськон куспазы пудо вордонлы но, бакча емыш мерттонлы но, уно бусыен ужанлы но дышизы.
Пиналъёслэн тодэмзы юн будӥз. Пересь, пурысьтам тушо калыкез но пумен валэктытэк ӧз кельтэ. Табере тодэм-валам вылысен, Габи кузёмылэсь но ымзэ шымыртӥмы. Зӧк кӧто Сели Иванмы но паськыт синъёссэ лушкемен гинэ кырыж-мерыж бералля. Микаля поп чалмытскиз, ас йӧназ пиньёсыныз ӟукыртэ.
Чебер куазен шунды пиштон нуналэ лудъёсмес шори-шори люкылӥм. Гурт кузёлы луд пыдсы музъем сётӥм. Та виысь милям куать бусымы. Муосмы паськытэсь, пасьталаен кузьдалаен огкадесь. Турын кизиськом, пудомес возьмасен вордӥськом. Мукет гуртъёсын пудозэс кионъёс кесяло, пе. Сыӵе ужъёсыз тодэ вайылон милям быриз.
Шудо-буро мед будозы пиналъёс! Бадӟым тау Совето властьмылы! Солэн ыстэм агрономез визьлы валэктӥз, солэн крестьянлы эрик сётэмез юртмес пыд йылаз ӝутӥз, улонмес капчи кариз. Нош комсомол туж ӟеч маке со вылэм. Киям кутыса дыб-дыб вешаме потэ, сокем яратӥсько сое.