Москва (Волков)
| Москва Автор: Макар Иосифович Волков |
| Поттэмын: 1927. Источник: Волков М. Москва // Удмурт дунне : газет. — 2018. — № 90. — 16-тӥ бам. |
«Куать буква гинэ. Нош мар быдӟа со! Кин сое уг тоды! Тэтэ карисез но, мушкояз кылльыса, Москвае мынӥсько, шуэ. Кӧня калык отчы пыре-потэ! Со сярысь кин кызьы, вылды, уг малпа, уг вожъяськы! Кинлэн но лыктэмез уг поты! Кин со сярысь кытын уг вераськы?! Оломар-оломар но вашкала дырысь пельысь пеле верало, нылпиос доры но вутто.
— Мар милям улэм пеймыт гуртад! Вот Москваын улэм ке улэм!
***
Калык пужнӥськемысь уг дугдылы. Олань-талань, люр-ляр, чиж но гаж ульча кузя, тӧлпери кадь, весь дыртыса, куалектыса, сюлтыр-р-р мыно-ветло. Берад но синмыд мед луоз. Ӟин-ӟин, чиф-ф-ф, гу-гу-у-у, ду-ду-ду-у, ок-ок! — кеськыло, пӧртэм-пӧртэм машинаос, вистэм-вожтэм тузон пурӟытыса, кыстаськыло.
Ӧйтӧд, оло кин ке ужа, оло уг! Весь ветло, весь ветло, пыр мыно.
Ульча сюлэг, калык трос. Кырыж-кожыль кожыло, одӥг-огзэс ортчыло, гып! мырыштыло но, горд-горд ӵыжектыса, кошко.
Коркаос, коркаос мар быдӟаесь! Учкыса-учкыса синъёсыд берытскозы. Сюэн-сюэн уло, пыро-пото, кузь-кузь тубатъёсыз лэзькыло. Ой, сюлмы! у-ук-к тубат кузя тубыны. Ёркыт-ёркыт, вӧл-вӧл лулскымон ӧвӧл. Оло, инэз но кикур пасьта гинэ. (Коросын ке но — улон! Губечын ке но — карын! Ёркыт ке но — Москваын!)
— Ма, марлы ёрмыса, татын улӥськоды? Татын лулскыны но ёрег ук…
— Малы?! Хе-хе-хе! Шат тыныд уг яра? — Москвайысь адями паймыса кежег вераське.
— Мыным уг яра, люкыт… Нянь басьтыны сыл… Йӧл басьтыны сыл… Пыр сыл… пыр сыл… Нош ку улод? Сылыса ик дауред ортчоз ук.
— Туж ик уд яратӥськы вылэм. Дышод али…
— Мон коть дышо, оло, уг…
Москва! Кыӵе со кылӥське!
Кудӥз отын сяна улыны уг быгаты. Отысь поттӥд ке, бырозы, дыр, чорыг кадь ик, куасьмозы.
***
Адями — машина, машина — адями.
Вылысь коркан. Дун, чус. Лыдтэм висэтъёс лэсьтылэмын. Сэрегын пересьёс пуко. Пайми. Кепыр вайыны кутски. Шузи муртъёс доры шеди ук! — малпасько. Соёс решотка сьӧрын быдэн-быдэн пуктэмын, морда быдчаесь гинэ.
Озь кежег муртъёсты эмъяло (нервной). Зӥбыт пуко.
Оло мар ке вала, оло уг. Уг вазьылы, куаразэ уг поттылы. Оло, со уг но кылы. Дораз матэ кариськи. Малпатэк ӵуж ыргон эгес бордаз ӧй-а кутскы. Киям оломар кадь зурткак йӧтӥз, ачим валамтэ шорысь лапырак тэтчи — отысь тыл кизили потӥз. Мырдэм валай: адямиез, солэсь вирсэрзэ электроен юнмато вылэм.
Пукисьлы электро лампа сётӥзы. Зэм веть, пӧрмытске ик, кожалод. Нош таиз мар сыӵе? Ӝужыт азьын пукон вылын егит пи пуке.
— Тон мар пукиськод? — дӥсьтыса-дӥсьтытэк юасько: керпотоно отын, оломар но луоно кадь.
— Тани уг пукисько… Эмъяськисько…
— Висиськод шат?
— Йырыным курадӟыса улӥсько.
Мар со эмъяськем, пуко гинэ. Урдэсказ пичи питран берга. Машина… таба кадь… уг вертталскылы…
— Ныраз йӧтскы, ныраз, — сестра каллен мыным вера. — Каллен йӧтскы…
Тырт йӧтски. Со пи кышказ, нырысьтыз кизили потӥз. Со валлань ӝутскиз, йырысьтыз кежырак кизили пиштӥз. Озь уллань-валлань сое ӝутъяны ӧдъяз. Ачим кышкай, эскерытэк юн йӧтски. Малы гинэ чиньыдэ йӧттылэмед кулэ! Вот адями, нырысьтыз тыл поттэ. Татын но электро. Йырысьтыз урод вирзэ соин быдто.
Электро, электро! Мар но со уг даурты! Ку меда со ми доры но вуоз?
***
Машина, машина, машина! Корка тыр. Кытын пумыз, кытын йылыз! Люгыр-люгыр калык пӧлаз берга. Мар ни та?!
Сӧсыр калык. Кизэс-пыдзэс татын юнмато-тупато. Потэм пыдэз киын уг кыскало. Машина. Адями кулэ ӧвӧл. Дышето но, ачиз вала. Висись ачиз ассэ уте. Солы люкетӥсь, котыраз бергась ӧвӧл. Кожаз, машинаен лэсьтэ.
Тани отын пумаз, ящик вылын, адями кӧт вылаз кылле. Нискылам кадь, олань-талань кыстаське. Отын но машина. Машинаен кӧт нырко. Огназ, адямитэк, кышномурт ассэ ачиз эмъя.
— Кыӵе висёнэн татчы ветло?
— Котькыӵе висёнэн но луэ, — врач валэктэ.
— Бен трос ветло, дыр, ук?
— Трос луэ. Тани гуртысь но лыктылэмын. Татын та машинаос юртто. Ваньзы соос ужало.
— Кӧня машинады?
— Сю эсэп вань, дыр. Нош али ватсалозы на. Со ужа, дун уг куры. Соос ке ӧй лусал, татчы кӧня адями кулэ лусал. Али милям татын дасо мында сяна ӧвӧл ужась муртъёсмы.
— Таӵе машина вань шуса, ӧй малпалля.
— Вань инӥ табере, вань. Улэмед азьлань кошке. Калык дышетске, утчало, шедьто. Машинаосыз пыртыны, трос карыны юнме уг тыршо. Табере котькытын машина мед луоз нӥ. Машинатэк секыт. Дышетско нӥ выль сямен машинаен ужаны.
***
Татын студентъёс, эшъёсы, уло. Кемалась ӧй нӥ адӟылы. Адсконо, вераськоно, кызьы уло-выло, пыр-поч тодоно.
Ӵушни-пашни коркан гинэ сыло. Пырыны ик шимес.
Ваньмы ӵош дышетскылӥм, бызьылӥм но. Табере нош ик валче вуим.
— Секыт, пиёк, секыт. Тае дышетскем уд нӥ шуы. Куинь арня дышетскиськод, ӝынызэ вакзалын ужаськод. Отын, мар шедем, сое нуллӥськод. Коньдон кулэ. Улоно. Нокудаз но уг окмы. Ваньзэ басьтон. Аслам адямиедлы дышетсконэд капчиен уг дэмӟы. Улэмлэсь азьло сӧсырмиськод.
— Трос-а дышетсконэд вань на, быдтӥськод нӥ, дыр?
— Э-э! Кин со сярысь али малпа. Ньыль ар, пиёк, дышетсконо на. Ньыль арсын кин сое быдтэм, мед тэк ул. Пуком ай, пуком. Тон кожаськод озь гинэ-а?
Шалтыр эшъёссы пыризы. Корка тыр ик тырмизы. Одӥг азьын кызь мурт мында уло. Верасько, дыбырто. Кин отын лыдӟем, гожъяськем?
— Соиз бен вазь кӧлыны выдэм ук.
Сэрегын адями вырӟылытэк кылле. Люк-ляк гинэ шобырскемын. Коркан кезьыт, сӥзьыл нӥ, эстымтэ.
— Со висе. Чакотка… Ми али сыӵе ик луомы, дыр. Тазьы улыны кин чидам? Толэзьлы кызь вить манет басьтӥськом. Котьмар соин чередьы: си, ю, дӥсяськы, книга басьты, кунокуа дун тыр. Одӥг книга ке басьтоно, дас тыроно. Книгатэк дышетскыны уг луы.
— Нош дышетсконэз трос на-а?
— Кык ар но, аль кин солэсь пумзэ тодэм. Туэ тӥнь потон ужез гинэ вал на, кулӥз. Куло, быро пиналъёс. Жаль, туж жаль! Ведь адями куать ар татын дышетскиз. Кызь аръёс дышетскыса, улытэк кулӥз.
— Гм-м!
Дышетсконэд сыске, отчы но котыр ӟег кулэ. Сютэк, кынмыса кузь уд вамышты. Маке со даурдэ ортчытӥськод.
Улонэд мукет луиз, туж вошкиз. Дуннеын улыны ӝыны даурлэсь трос дышетсконо луоз.
Кыӵе луоз азьпала — адӟом.