Йәш ай, ҡарт ай - икеһе лә
Бер иш ураҡтар,
Йәше үҫер, ҡартын иһә
Ваҡыт тураҡлар.
Ҡарашы ла һилалдың* бит
Ҡояш сығышҡа.
Ҡарты арҡа йылытырға
Көнгә йылышҡан,
Ҡояш байыр яҡҡа ҡарап
Меҫкен моңая...
Йәше-ҡарты араһында
Бары бер ая.
Шул бер ая айҙы бора:
Ваҡыт - хакимдар.
...Ай булып ай бер үк түгел -
Ҡартлыҡ хаҡы бар.
Иҫкәртәлер ул йәшлекте
Күкрәк киргәндә:
Арҡаң айҙай көмөрәйер
Ҡартлыҡ килгәндә,
Һис үҙгәрмәм, тиһәң дә...
*Һилал - яңы тыуған ай
