Ме кӧ эськӧ верми
Ме кӧ эськӧ верми
Пӧткаяс моз лэбны,
Позйӧ ассьым юрӧс
Эг кут эськӧ дзебны.
Ме кӧ эськӧ кужи
Колипкай моз сьывны,
Вӧрын менам гӧлӧс
Дугдіс эськӧ кывны.
Гажӧдчӧм да дзольгӧм
Менам эськӧ вуні,
Ӧдйӧ эськӧ вӧрсьыс
Мӧдлаӧ ме муні.
Муні эськӧ сэтчӧ,
Кытчӧ сьӧлӧм нуӧ,
Кӧні буржуй чукӧр
Йӧзлысь вирсӧ юӧ.
Кӧні югыд лунсӧ
Уджалысь оз тӧдлы,
Кӧні сійӧ збоя
Миян моз оз ветлы.
Муні эськӧ, лэби,
Пӧткаӧн кӧ лои.
Регыд эськӧ тадзи
Ӧти карӧ вои.
Карас уна озыр,
Уна лёк сьӧд кырныш.
Буржуй муын найӧ
Ӧніӧдз эз бырны.
Кар шӧрас зэв ыджыд
Тюрма джуджыд стена.
Вир юысь жандармъяс
Видзысьясыс сэні.
Сюялӧма сэтчӧ
Йӧзсӧ тюрма тырыс.
Мукӧдӧс ме аддза
Векни ӧшинь пырыс.
Пукалысьыс ставыс
Уджалысь да гӧрысь.
Некод сэні абу
Мортлы лёктор керысь.
Му да вӧля вӧсна
Тышкасисны найӧ.
Сы понда и быдӧн
Сюри иган сайӧ.
Дорӧм йӧзлӧн сьӧлӧм
Курыд шогӧн тырӧ.
Пемыдінӧ шоча
Шонді югӧр пырӧ.
Сёян-юан этша,
Пукаланін дзескыд.
Буржуй кипод улын
Олӧм абу чӧскыд...
Пӧтка тэрыб бордйӧн
Эг ме эськӧ дзугсьы,
Тюрма ӧшинь водзас
Вылӧ эськӧ пукси.
Колипкай моз гора
Понді эськӧ сьывны,
Мед эськӧ став тюрма
Вермис менӧ кывны.
Сьылі эськӧ тадзи:
«Вокъяс, энӧ полӧ!
Вой шӧр бӧрад пыр на
Гажа асыв волӧ.
Кыпӧдчас кӧ тулыс,
Кӧдзыд тӧлыс бырӧ.
Ӧтувтчас кӧ гӧльыс,
Озыръясӧс нырӧ.
Тыдалӧ нин матын
Кырнышъясӧн помыс.
Миян муын налы
Тупкӧма нин вомыс.
Оз нин югыд луныс
Гудыртчывлы миян.
Онӧ кӧ ті повзьӧй,
Сідз жӧ лоас тіян.
Жугӧдласны кӧртсӧ
Дорӧм кияс-кокъяс.
Тюрма ӧдзӧс воссяс
Тіянлы, бур вокъяс.
Пукалӧмыд тані
Регыд сэсся вунас.
Татшӧм сьӧкыд олӧм
Ставнас му пыр мунас.
Нартитысь лёк котыр
Ачыс сюрас рельӧ.
Мырсьысь-тільсьысь йӧзлы
Локтӧ зарни вӧля!
Тайӧ вӧля некор
Оз нин сэсся бырлы.
Озыр кипод улӧ
Уджалысь оз пырлы.
Пролетариатлӧн
Выныс быдмӧ, содӧ.
Капиталлӧн кокыс
Чорыда нин чотӧ.
Виччысьыштӧй, вокъяс,
Мый ме шуа —лоас:
Муса зарни вӧля
Тіян дінӧ воас!»
Тадзи эськӧ сьылі
Тюрма водзас сэні,
Миян дорӧм вокъяс
Пукалӧны кӧні.
Менам сьылӧм налы
Збойлун эськӧ сетіс.
Долыдысла налӧн
Синва эськӧ петіс, —
Сэтшӧм синва, коді
Сьӧлӧмӧс оз орӧд,
Коді лютӧй врагкӧд
Тышкасьӧмӧ корӧ.
1938 во.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 85 years or less since publication (if applicable). |
|