Асьме эксэйёс вашкала дырысь ваньмыз ӟучъёс луо вал. Соин Россиын улӥсь векчи калыкез ялан ӟуч кадь карын турттыса возизы. Дышетын ке но тырто, ӟуч кадь карон понна гинэ дышето вал. Удмурт дышетӥсь ке вань, сое удмурт гуртэ уг лэзё вал, удмурт сямен дышетоз шуыса, лэзё вал: я крашин гуртэ, я пор гуртэ. Озьы тӥни ас сямзэс векчи калыкъёс мед вунэтозы шуыса, соосыз онратыса возё вал. Сыӵе улон революция потэм бере быриз. Табере кажной калыклэн ас сяменыз улэмез луэ. Солы нокинлэн пумит ваземез уг луы. Озьы асьмелэн но выль сямен улэммы луоно, асьме сямен нылпиосмес дышетэммы луоно. Асьмелэсь нылпиосмес та дырозь ӟуч дышетӥсь дышетэ вал. Со дышетӥсь лыктэ вал городысь. Со городысь лыктэм мурт удмурт кыл чик уг тод, удмуртлэсь улэмзэ-вылэмзэ азьло адӟемез но ӧвӧл. Дышетӥсь, лыктэменыз ваче ик, нылпиосыз ӟуч сямен дышетын куське. Нылпиос мынэмзы потыса уг мыно школае. Удмурт кылын вераськымтэ дышетӥсь соослы мукет дуннеысь мурт кадь потэ. Дышетӥсьлэсь верамзэ валатэк пукемен нылпиослы дышетӥськон номыре кадик уг пот. Соос мӧзмыса, усыкмыса гинэ пуко. Озьы пукыса нылпиос утыр-утыр асьтэм но луыса вуо, шайырын но дышо. Туж секыт етэ ӟуч сяин дышеськон соослы. Берло соос дышо ке но, первой номыр валамтэенызы, туж шаплы луыса уг вуо. Соин удмурт нылпиос ӟуч кадь шаплы уг дышо. Удмуртэз ас кылыныз дышетӥд ке, со но шаплы дышоз. Мед дышетоз удмурт школаын удмурт дышетӥсь яке удмурт кылэз тодӥсь мурт.
