Люгыт сюрес вылэ (Герд)
| Люгыт сюрес вылэ… Автор: Кузебай Герд |
| Поттэмын: 1919. Источник: Куӟебай Герд. Люкам сочинениос : куать томен / Люказ Ф. К. Ермаков. — Ижевск: Удмуртия, 2004. — Т. 3. — Б. 35—49. |
| Семон — пиосмурт, 50 арес маке; туж небыт вераське. |
| Параска — Семонлэн кышноез, 52 арес маке. |
| Аннок — ныл, 17 арес маке | пиналъёссы. | |
| Ондрей — 12 арес пи |
| Иван Петрович — дышетӥсь, 25 арес маке. |
| Потап — 24 арес пиосмурт, аракыез туж яратэ. |
| Одотя | 18—20 арес нылъёс, кырӟанэз, юмшанэз туж яратӥсесь. | |
| Васиння | ||
| Олёна |
Вож бадяр кадь вож мугоры,
Горд бадяр кадь бамъёсы.
Со мугорен мар-о карод? —
Вордэм атае медло вал.
Вож бадяр кадь вож мугоры,
Горд бадяр кадь бамъёсы.
Со бамъёсын мар-о карод? —
Вордэм анае медло вал.
Толэд ортчоз, гужемед вуоз —
Тылобурдоед чир луоз.
Монэ нуозы кезьыт Сибыре
Бадӟым замок улъёсы…
Олёна. Аннок! Нош тон мар-о огнад пукиськод — уд кырӟаськы? Ми тон доры огинын кырӟаса пукны лыктӥм ук!
Семон. Со милям киньга лыдӟе, интыяз ик усыкмиз, лэся, ини. Весь лыдӟем карса пуке но — неномыре но уг вала, лэся.
Аннок. Туж валасал, дыр, но, чик удмурт сямен гожтэмын ӧвӧл бере, мае валалод! (Лулӟылэ.) Ку медам асьмелэн удмурт кылын гожъям киньгаосмы луоз? Ку удмурт дышетӥсьмы луоз?
Одотя. Мар-о сэбре, асьме дышетӥсь Иван Петрович удмурт ӧвӧл-а, мар-а? Удмурт, лэся, ук со?
Аннок. Мон сое удмурт ӵотэ уг понӥськы! Сыӵе луоз-а удмурт дышетӥсь? Со, ассэ ӟуч карса, удмурт сямен вераськыны керпотэ.
Васиння. Алигес со ми доры нянь басьтыны юаса ветлӥз но — анай соин удмурт сямен вераськыны кутскиз. Со, валамтэ улэ кариськыса, керпоттэк: «Мон уг валаськы, мон удмурт ӧвӧл», — шуиз.
Ондрей. Милемыз со учильшаын но удмурт сямен вераськыны уг лэзьы. Одӥг пол Еремейлэсь Педорзэ, удмурт кылын вераськемысьтыз, «на коленки» пуктӥз. «Ӟуч кыллы дышетске, удмурт кылэз вунэтыны кулэ», — шуэ. Кин ке ӟуч сямен начар ке вераське, «тон слепой вотяк» шуса, тышкаськыны кутске.
Семон. Нош тӥ солэсь ӟуч кылын верамзэ валаськоды-а, уд-а?
Ондрей. Ма, мае-о валалод? Пукиськод нунал лумбыт, мар ке со кылзэм карса. Киньгаез ке лыдӟыны куткиськод, чиста йыр порме, со ӟуч кылъёсыз лыдӟыны турттыса.
Олёна. Милям Микаля но дышетсконэз номыре но уг валаськы шуса бӧрдэ. Тани туэ ньылетӥ толзэ школае ветлэ ини но — весь первой классын пуке. Атай сое сэбре, уд валаськы, учильшае шудны гинэ ветлӥськод шуса, олокӧня пол но куткыса жугиз ини.
Семон. Коть жуг, коть эн, пичи пинал мае валалоз, таман асьмеос, бадӟым муртъёс, валамтэ бере?
Аннок. Валамтэез ӵок вылэм но — ӟуч пиос удмурт пиналъёсыз котьмар шуса исало. Алигес милям Ондрей бӧрдса сямен дорамы бертӥз…
Ондрей (бӧрдса сямен вера). Ма, соос весь «гожмо шыр, синтэм воти» шуса исало ук.
Одотя. Нош тӥ мар-о сокем удмурт сямен вераськыны ёрмиды? Вераське вал ваньды ик ӟуч кылын но — нокин исась-серекъясь ӧй лусал.
Семон. Ма-а-а… Пинал бере пинал ини. Мае соос валало? Табере асьмелы вань удмуртлы ӟуч сямен вераськыны, улыны кулэ. Мар-о асьмеос улӥськом? Котькин асьмемыз унь-мань каре, удмурт шуса. Ненокытчы мыныны уг лу — «гожмо шыр, тон эн куареты» шуо но — гуньдыто. Пичи тырысь ик ӟуч кыллы дышетысалзы ке, милемыз нокин но табере серекъясь ӧй лусал ни. Тӥ пинал визьмыныды уд валаське неномыре но: дышетӥсь тӥляд азьлань улонды каньыл мед луоз шуса турттэ уга.
Васиння. Зэм вераськод, Семон агай: шай-а карод со удмурт кылын? Эсьмаса, ӟуч кылэз ке тодӥд, оло, картлы но ӟучлы бызёд!
Аннок. Эн визьтэммы, Васиння. Удмурт ноку но ӟучлы уз пӧрмы, ыж неноку но кион уз лу!
Параска. Э-э-э, Инмаре, Инмаре! Марлы медам та нылпиез вордӥ? Таман нокин но ӧз поты вал суралтыны юрттыны. Чылкак огнам ёрми. (Понарьзэ кысса, лымызэ курткыса, дӥсьсэ кыле.) Мар-о, ӟус борды берыд бурмиз-а, мар-а? (Анноклы кесяське.) Ноку но анаедлы юрттон манерыд ӧвӧл.
Аннок. Ма, ачид чик номыр верамтэ бере, мон тодко-а? Верасалыд ке, мон мынса суралтысал…
Параска. Ойдо весь пумит вера. Ноку но таӵе манерыд быроно ӧвӧл, лэся.
Семон. Мар-о таос нош ик кесясько? (Параскалы вера.) Тон вера вал Анноклы но, со тыныд юрттысал.
Параска. Нош ик дурбасьты со нылыд пала! Весь коркан лыдӟем карса, дышетӥсе пыроз али со нылыд. (Нылъёс серекъяло.) Уть, али ик кыӵе анайзэ дышетэ ини!..
Ондрей. Анай, ма, сэбре киньгаез дышетӥсь луон понна гинэ лыдӟозы кожаськод-а, мар-а? Тырос, котьмае тодон понна калык киньгаез лыдӟе.
Васиння. Мае-о бон сэбре со киньгаысьтыд тодод? Отын калыкез гинэ ӧрекчаса гожъямын уга, одӥг кылыз но шонер ӧвӧл!
Параска. Улӥм ми: киньгаез но лыдӟытэк, дышеткытэк но. Озьы но туала калыклэсь умой улӥм. Кытын туала калыклы ми кадь умой улны!
Аннок. Соин весь синды висьса, урод висёнъёсын висьса курадӟиды, дыр, о-о-о!
Параска. Киньга лыдӟем поннад, мар-о, одӥг пол но уд вись ни кожаськод-а, мар-а?!
Ондрей. Конешно, уд вись ни! Киньгаын — кызьы висёнэз йӧнатыны кулэ, кызьы мукет дуннеын калык улэ — ваньмыз верамын уга.
Семон. Ӧйтӧд! Мон но оломарлы уг оскиськы со киньгаостылы. (Султыса чильым кыскыны кутске.) Таман дышеткем муртъёслы но уг оскиськы.
Одотя. Ма, кызьы, пе, оскод. Алигем милям кенаклэн пиез висьны усьса, доктор солы оптекысь олокыӵе но эмъюм сётӥз, «кажной юэмлы быдэ ньыль каплиен юоно» шуса. Кенак арня мында озьы сектаз но, нокыӵе но пайдаез ӧй вал. Собере нош курса вань эмъюмзэ огпол куткемаз ваньзэ нуныезлы сектаз но — нуныез ӵуказеяз ик кулӥз. Асьме кадь пеймыт калыкез гинэ ӧрекчало соос.
Олёна. Милям но анайлэн синмыз висьса, нерад луиз. Весь оптеке ветлыса, нокыӵе но пайдаез ӧй вал… Пелляськись доры Кейшур гуртэ гинэ ветлыса йӧназ.
Аннок. Эмъюмез чик умой юымтэ бере, висёнлэсь ноку но уд йӧна; умой валась адями быдэс пияла эмъюмез нуналлы удоз-а? Озьы таман бадӟым адями но кулоз.
Семон. Нош дышетӥсь аракыез юны уг лэзьы: аракыез юса, адямилэн тыэз-мусэз сӧриськыны, сисьмыны кутке, шуэ. Аракы ӧй ке лусал, ми, ужась мурт, кызьы меда улсалмы? Аран дыръя туж жадьыку юиськод одӥг чарка но — небӟиськод, уйзэ но умой изиськод.
Аннок. Ӧжыт гинэ жадем вылэ юон — соиз номыр ӧвӧл. Тӥ юон дыръя олокӧня но ведра аракыез юиськоды ук, сэбре сӧриськиськоды. Таиз туж урод.
Семон. Мон валъёсыз чакланы потало али.
Одотя. Юон дыръя нош со понна кыӵе-о шулдыр юиськод! Арган шудса, кырӟаса, эктыса, бекче поттыса сектаськиськод! Пинал пиосыз туган кутӥськод… (Кырӟа.)
Мынам туганэ Потап нимо,
Со туж усто арганэз шудэ…
Олёна! Потап арганэз усто шудэ ук, о-о-о?
Олёна. У-у-уй! Со кадь арган шудӥсь асьме гуртын нокин но ӧвӧл.
Одотя. Нылъёс! Мон Потаплы кышно бызё али.
Васиння. Возьма! Со тон шоры уз но учкы али.
Одотя. Марлы? Адӟод ук али, мон солы бызё!
Параска (чильымзэ ымысьтыз басьтыса, музэ сялӟыса вера). У-у-уй! Оломаръёсыз эн вера, Одотя. Кытын, пе, со тонэ басьтоз! Со ӟучез кышно басьто шуэ уга ини; кыӵе со, ассэ ӟуч карса, ӟуч кылын урам кузя кырӟаса ветлэ но! Туала калык ассэ удмурт шуны керпотэ уга ини.
Одотя (лулӟыса вера). Ма, уз басьты ке — ӵок. Пиос быремын ӧвӧл на ук али, нош, оло, мукет туган шедьто.
Олёна. Ой, Одотя, вуж туганэз кызьы вунэтод! (Кырӟа.)
Гурезь валлань тубны туж секыт,
Уллань васькыны туж капчи.
Туганэз кутны туж капчи,
Люкиськыны туж секыт…
Семон. Таӵе кырӟан гуръёсыз мон укыр кылзыны яратко. Пинал дыръёс тодэ лыкто. Кырӟалэ али, нылъёс, зол-зол куткыса, юон дыр гуръёсыз…
Одотя. Мон юон дырез ке малпасько, сюлмы ик олокыӵе луса кошке. Соку укыр шулдыр луэ ук. Кутке, нылъёс, кырӟаломе!
Параска. Кырӟалэ ойдо, кырӟалэ! (Чулка керттыны кутке.)
Пичи бекчеын
Ческыт винаед.
Туж пичи коркан
Чебер кышноед.
Ческыт винаез
Кин-о уз юы?
Чебер кышноез
Кин уз яраты?
Семон. Тӥни, кыӵе корка юон дыръя кадь ик шулдырткиз! Юон дыртэк но, пе, улны луоз, шуо. Юон дыр ке ӧй лусал, удмурт калык ку кырӟасал, мылкыдзэ ку бугыртысал?
Аннок. Ма, сэбре кырӟаны юон дыртэк но луоз ук. Аракыез ютэк но улонэз шулдыртыны луоз ук.
Параска. Аннок! Кыӵе-о тынад со кылыд-о? Тонтэк номыре но уг тодо-ло, о-о-о! Пересь муртэ дышетны эн ёрмы, тон пинал на али. Пук чал-чал!
Купи, тятенька, коня —
Я буду кататься.
Жени, маменька, меня —
Я не буду шляться.
Параска. Юмшокчиос потӥллям уга ини.
Одотя. Ой, Потап потэм ини юмшаны! Ойдолэ, нылъёс, асьмеос но, татын пуктозь, потса юмшаломе.
Семон. Ма, ми доры Потап пыралоз, дыр, ук. Возьмалэ!..
Аннок. Таӵе кезьыт куазен ветлытозь, эсьмаса, пуке вал али черсса. Мон тӥледлы киньга лыдӟысал.
Одотя. Со киньгаедлэн вылаз сяласа куштом али. Эсьмаса, потса юмшалом!
Ондрей. Мар-о, умой кожаськоды-а со юмшанэз?
Васиння. Ойдо пуке тӥ коркан чырсаса, со киньгадэс лыдӟыса. Нылъёс! Мар-о сылӥськоды, ойдолэ потса юмшаломе.
Ми юмшаськом шуласа,
Шулдыр гуръёс кырӟаса…
Семон. Черсонзэс ик куштыса кошкизы, лэся, ук. Пинал мылкыд бере пинал мылкыд ини.
Параска. Аннок! Мар-о, номыр ужатэк, весь со киньгадэ лыдӟем карса пукиськод? Черс — пуксьыса! Гольык, дӥськуттэк картлы уд бызьы ук!
Аннок. Картлы?! Монэ картлы сётны ӧдъяськоды-а?!
Семон. Ма, сэбре, калыклэсь но керпоттэк, весь нылъёсмуртын-а пукод?
Аннок. Ӵок! Мон картлы уг бызьы!
Параска. Озьы сэбре гуртысь калык мар-о шуоз? Серекъяса, ненокытчы потэмед уз лу ук!
Аннок. Мед серекъялозы! Мон соослэсь серекъямзылэсь уг кышкаськы.
Ондрей. Мар-о таос сокем Анноклы ёрмиллям! Огнад но луэ-ло ук, анай, черсэмед. Весь солань но талань вераськытозь, ачид пуксьы но черс вал.
Параска. Семон. Та пидэ ӧжыт ньӧр кутса дышеты вал. Солэн укыр кылыз кузь луиз.
Аннок. Тонэ астэ, ньӧр кутса, зол-зол дышетыны кулэ вал, Ондрей интые.
Параска. Map?! Map шуиськод? Анаедлы сыӵе кылъёсыз вераськод-а? (Анноклэсь ӝӧк вылысь киньгазэ музэ лэзе.) Кыкнады ик киньга лыдӟон интыяды огпалмиды, лэся, ини: анайдэс но, атайдэс но уд тодмаське ни.
Семон. Параска, визьтэммид-а, мар-а?
Ондрей (музысь киньгазэ ӝутыса бӧрдны кутке). Тани, татӥзэ копак кесем. Дышетӥсьлы кызьы-о возьматом на? Нош ик тышкаськоз ини.
Семон. Ойдо эн бӧрды, Ондрей, дышетӥсь, оло, номыр но уз кар.
Ондрей. Уз тыныд. Огпол анай, гӧршоксэ ӵоктаса, киньгаме копак вуэ куштыса коттӥз но, соку но дышетӥсь кыӵе-о тышкаськиз.
Параска. Ойдо дышетӥсьлэн киньгаез казённой — тырмоз.
Нылъёс кырӟало.
Аннок. Казённой шуса, казна пыдэстэм тымет ӧвӧл ук.
Потап (кырӟа). Купи, тятенька, коня — Я буду кататься. Жени, маменька, меня — Я не буду шляться…
Ӟеч-а улӥськод, Семон агай? (Кизэ сётэ.) Вождэ эн вай тазьы уин ветлэммы понна.
Семон. Ма, мар-о, пе, вожез ваёд? Ми но пинал дыръямы юмшам ук! Мын али, Параска, винадэ поттыса утялты та куноосыз.
Одотя. Потап, шуд аргандэ: ми эктом!
Сударь, сударь, сударь мой,
Сударь-батюшка родной.
Сударь-батюшка родной,
Сядь на лавочку со мной.
Сядь на лавочку со мной,
Посоветуем с тобой.
Параска (педлось виназэ пыртыса сектаське). Мар-о, Потап, тон весь ӟуч луид-а ини, мар-а?
Потап. Монэ у-у-удмурт ко-ожаськод-а? Озьы э-эн малпа! Мынам дӥ-и-иськутэ удмуртлэн ке но, со понна мынам мугоры но, сюлмы но ӟуч! (Кырӟа.)
Без меня меня женили,
Я на мельнице молол.
Приезжаю я домой —
И встречаюся с женой.
Семон. Ойдо кышно ӧз на басьтэ на али, эн ушъяськы.
Потап. Хе-хе! (Серекъя.) Басьто ке но, кышно удмуртэз басьто кожаськод-а? Мон ӟуч, мон «гожмо шыр» ӧвӧл! Адӟоды ук али, мон ӟучез кышно басьто!
Аннок. Нош удмурт нылъёсыз кытчы-о куштод?
Олёна. Удмурт нылъёсыз со «какак» каре уга ини. Уть, йырзэ ик кыӵе ӟуч манер гинэ возе!
Потап (Анноклы вера). Тон эн куареты, пук, зынмем киньгадэ лыдӟыса. Тон, ӧжыт улса, святое пырод уга ини!
Аннок. Мар-о, ачид сямен аракы юса, юмшаса ветлыны косӥськод-а, мар-а?
Одотя. Юмшаны сяна, удмурт ныл марлы дуннее вордӥськемын? Юмшаны, аракы пукны, пиосыз яратыны!
Аннок. Нош дышеткыны кин вордкемын?
Потап. Дышеткыны инмар тонэ дунне вылэ вордэм.
Васиння (музэ сялӟыса, пыдыныз лёгса). Тани тӥляд дышетконды. Ми, эсьмаса, кыӵе гинэ юмшаськом. Сыӵе шулдырез маин воштод? Винаез кызьы уд ю?..
Потап. Зэм вераськод, Васиння, зэм. (Ӟыгыртэ.)
Ондрей. Мон тодӥсько, маин аракыез воштыны луоз. Ми Аннокен кыкнамы ик тодӥськом!
Олёна. Маин бон?..
Параска. Ойдо эн юалэ соослэсь! Соос, ӧжыт улса, оломае но тодозы ини!
Аннок. Аракы юса ветлытозь, визьтэммытозь, эсьмаса, огазе люкаськыса, киньгаос, газетъёс чирдэ вал али: йырды но ӧз висьсал, мылкыдды но шумпотысал.
Потап. Аннок нош, кышно сямен, весь одӥг кылзэ вера. Киньга лыдӟон интыяз усыкмем, лэся, ини!
Семон. Потап! Оло, сэбре Аннок шонер вера. Оло, киньгаез лыдӟыса, асьмеос умойгем улны куткысалмы.
Параска. Ойдо киньгатэк но умой улӥськом: юиськом, сииськом!.. Мар-о кулэ на, о-о-о, Потап? (Кырӟа.)
Асьмелы мар-о кулэ на, о-о-о, Потапе,
Юны вина сюрем бере:
Одӥг сюмык юод, кык сюмык юод —
Мылкыдыд туж капчи луоз!
Потап. Озьы, озьы, Параска! Юон, сиён сяна, асьме удмуртлы мар-о кулэ, о-о-о?
Параска. Ма-а-а, юон, сиён вань бере, шай-а, пе, киньгаосыз лыдӟем нерге карод?! Потӥ, шуд али аргандэ, мон но — пересь ке но — экто!
Параска. Ой-ой-ой!.. Шокчон интые пытсаськиз. Жади, аран дыръя сеен ик. (Нош ик сектаськыны кутке.)
Милой мой, не стукайся,
Милой мой, не брякайся,
В среднее окошечко
Только поцарапайся.
Дышетӥсь. Эй, удмуртъёс! Чале мон котыре!
Ондрей. Аннок, анай, атай! Дышетӥсьмы удмурт сеен вераське, лэся, ук?
Дышетӥсь. Туннэ мыным удмурт газет вуиз…
Калык. Удмурт газет? Возьматы али, возьматы! (Учко газетэз.)
Дышетӥсь. Та дырозь мон асме удмурт шуны керпотӥсько вал но — табере удмуртъёс но адями луны куткиллям ини.
Потап. Лыдӟы али, лыдӟы, мар-о отын гожтэмын — мон, ӟуч ке но, кылзо!..
Одотя. Мар-о, астэ ӟуч шуны ми азьын кер но уд потӥськы-а, мар-а, Потап!
Потап. Эн куареты, гожмо шыр! Мон ӟуч!
Семон. Дугдалилэ, эн кесяське, мед лыдӟоз Иван Петрович! Иван Петрович, лыдӟы!
Дышетӥсь (лыдӟе). «Удмуртъёс! Асьмелы но люгыт дуннеын улон дыр вуиз. Та революция асьмемыз но калык радэ пуктӥз: ӟучъёсын одӥг кадь кариз. Удмурт ми шуса, асьтэдыз уллапал эн каре, удмурт кылын вераськыны эн керпотэ. Табере пиналъёсыз но удмурт киньгаосын, удмурт кылын дышетыны кулэ…»
Аннок. Кылӥськоды-а? Пиналъёсыз удмурт сямен дышетозы! Ондрей, тон шудо!
Дышетӥсь (лыдӟе). «Асьмеос табере ми удмурт шуса кер ум потэ ни. Кызьы ас калыкедлэсь возьдаськод…»
Ондрей. Иван Петрович! Тон табере милемыз удмурт сеен дышетод-а ини?
Дышетӥсь. Дышето, дышето, гажан нуныосы!
Васиння. Нылъёс! Учке али, татын кырӟанэз но шуккемын, лэся?
Калык. Лыдӟы, лыдӟы, ваньзэ лыдӟы. Укыр умой, сюлме пырмон отын гожтэмын!
Дышетӥсь (лыдӟе). «Азьлон удмуртъёс ас кылзылэсь возьдасько вал. Табере удмурт кылын гожтэт но гожъяны луоз, киньга но, газет но поттозы…»
Аннок. Кылӥськоды-а? Удмуртъёслы шунды ӝужа ук!
Параска. Дугдали, Аннок! Мед лыдӟоз дышетӥсь.
Потап. Иван Петрович! Вай али со газеттэ — ачим, ас синмыным лыдӟо (лыдӟе).
Ондрей. Иван Петрович, нош милемлы удмурт кылын гожъям киньга сёткалод-а?
Дышетӥсь. Сёткало, сёткало, удмурт сямен гожъям киньга сёткало!
Нылъёс. Озьы бере, тон милемлы но удмурт кылын киньга лыдӟы. Чик юнме урамтӥ кырӟаса ветлытозь, ми, эсьмаса, калыклэсь визьмо кылъёссэ кылзом.
Дышетӥсь. Лыдӟе, ӝытлы быдэ лыдӟе. Азьло мон асме ӟуч карисько вал, табере мон удмурт ини!
Потап. Юлтошъёс! Мон но табере удмурт ини!
Одотя. Нош кышно ӟучез-а, удмуртэз-а басьтод?
Потап. Удмурт ныл маин ӟучлэсь уллапал? Мынам кышное удмурт луоз!.. Одотя, вай кидэ: луод-а мыным кышно?
Одотя. Марлы-о уд лу! Тон табере удмурт уга ини. Мон тонэ кемалась яратыса улӥ но, только тон монэ уллапал карид!
Потап. Map ортчиз, сое эн малпа ни. Ну, нылъёс, кырӟалэ!.. Та шумпотэм сюлэмез берыктэ.
Зарни шунды ӝужалоз,
Калыкъёслы шуд ваёз.
Куанер калык ӵыдэткоз,
Весь курадӟемысь дугдоз.
Султэ, вырӟелэ, эшъёсы!
Сайкатэлэ удмуртэз!
Возьматэлэ тӥ солы
Люгыт, зарни сюресэз…
Семон. Пиналъёс! Дугдалилэ, дугдалилэ! Удмурт кылын гожъям газет асьмелэн син усьтӥсьмы вылэм.
Параска. Весь валатэк, синтэм нумыр сеен улсалмы. Нылъёс, пиос! Али ик Иван Петрович доры мынса дышетке! Со табере ӟуч ӧвӧл ни, удмурт ини.
Нылъёс. Учильшае мынса дышетком — люгыт сюрес вылэ потом.
Азьло корка ик. Параска ӝӧк вылэ сиён пуктылэ.
Куазь нуназе.
Параска. Мар-о та Ондрей учильшаысьтыз кема уг берты, Аннок но олокытчы пыриз.
Семон. Турын вайны турттыса, нерад луоно лась. Вань сюресэз тӧл пелляса быдтэм. (Лымызэ курткыса кылиське.) Мар-о, Ондрей ӧз берт на-а, мар-а?
Параска. Ӧз на али! Оломар туж кема учильшаяз каре?
Семон. Нош Аннок кытын?
Параска. Чулка керттӥсь маке, мон искал кыскыны потэм сьӧркытӥ, со олокытчы луиз.
Ӧсэтӥ шумпотыса Аннокен Ондрей бызьса пыро.
Ондрей. Анай, атай! Учке али, милемлы Иван Петрович удмурт киньга сётказ.
Аннок. Туннэ нош ик удмурт газет вуэм но, отын Алабгое удмурт семинарья усьтӥськиз шуса ивортэмын. Кин ке двукласснойысь потӥз, вань удмуртъёсыз лыктыны косэмын.
Параска. Со быдӟа мугореныд тон мынны уд малпаськы-а? Тонэ уз пыртэ ук!
Аннок. Иван Петрович тон кадь мылпотӥсь муртэ одӥг кыл но вератэк пыртозы семинарьяе шуиз. Атай! Лэзёд-а монэ Алабгое дышеткыны?
Семон. Ойдо мын, мын, зарни комоке! Ми пеймыт дуннеын улӥм, синтэмесь ми, номыре но ӧм валалэ!.. Со понна тӥ, выль будосъёс, синмо луэ: дышетке! Ваньды ик дышетке! Та пеймыт дуннеысь потэ люгыт сюрес вылэ…
Аннок (шумпотыса). Ондрей, Ондрей! Монэ атай дышеткыны лэзе. Мон дышеткыны мыно! Зарни атае, синмыд тынад усьтӥськиз. Тынад сеен, вань удмурт калыклэн озьы синмыз мед усьтӥськоз вал. Туннэ кадь мон тонэ ӧй на ярат на вал али, атай! (Чупа.) Азвесь анае! (Чупа.) Мон табере шудо луи! Мон бурдо луи! Ондрей, мынам, бубылилэн сеен, та-а-а быдӟа бурдэ потӥз! Турагай сеен, мон инъёстӥ, люгыт дуннеостӥ лобало. Ондрей! Мон лобало, мон лобӟо ини. (Кизэ лобам кадь карса, коркатӥ бызьылэ.)
Семон. Тӥляд сюресты паськыт… Милям туж ӟоскыт вал. Тӥляд нуналъёсты шундыё луоз, милям весь пеймыт, пильмаськемын вал.
Параска. Я, тырмоз ини, пуксьы сиськыны! (Аннок сиськыны пуксе.) Ма, Аннок, тон кытӥ-мартӥ учильшае вуид?
Аннок. Ма, таки сюлмы татын пукны ӧз чида ни!
Семон. Ондрей! Возьматы али киньгаостэ. Вера, кызьы-о тонэ Иван Петрович дышетэ? Табре валаськод-а ини солэсь верамзэ?
Ондрей. Кызьы уд вала, удмурт сеен дышетэм бере! Тани таӵе киньгаос со милемлы сётказ.
Параска. Ма, суредъёсаз но удмуртъёс пуктэмын, лэся, ук? Сыӵе киньгаосыз лыдӟыса, кин-о, пе, уз дышы. Семон, Семон, учкали! Татын удмурт кышномурт таӵе ик айшонэн-маин сылэ! Мае ке но адӟод!.. Улаз мар-о гожтэмын, лыдӟы али, Ондрей? Марлы медам мон лыдӟыны уг тодӥськы? Дугдылтэк быдэс киньгазэ лыдӟыса быдтысал!
Аннок. Иван Петрович пересьёсыз но лыдӟыны дышето шуэ.
Параска. Зэм-а?!
Ондрей. Инмар, шунды понна! Со вералэ анайёстылы, атайёстылы, мед лыктозы дышеткыны шуиз.
Семон. Ойдо, иське, Параска, мынса дышетком! Эсьмаса, синтэм дуннеын ултозь, пересь йырынымы но мынса дышетком!
Ондрей. Иван Петрович табре кыӵе умой дышетэ-э-э!.. Таки учильшаысь бертны ик мыл уг поты.
Параска. Соин ик тон туннэ кема улӥд, дыр?
Аннок. Ма, уд улы — кыӵе-о гинэ со умой дышетэ. Пиналъёс кыӵе шумпото!..
Ондрей. Аннок, тон эн вера, мон верало. Иван Петрович милемлы киньга сётказ но, удмурт сеен ми лыдӟыны кутким. Кудӥз кырӟанзэ кырӟа, кудӥз серекъяно кадь выжыкылзэ лыдӟе, мукетыз, «узыр Микаля» шуса, бадӟым куараен чирдэ. Ми удмурт кылын сочиненья но гожъяськом ини, асьме удмурт тӥрлыкез но рисоватьтӥськом. Туннэ Иван Петрович милемыз туж умой удмурт кырӟан гурез кырӟаны дышетӥз. Ми кырӟаськом — со будӟым крезьзэ шукке.
Семон. Шудо будӥсьёс ини тӥ! Ми номыре но ӧм адӟе сыӵе мае ке! Ми удмуртмылэсь возьдаськыса улӥм… Ӵуказе мынса, дышеткондэс кылзо ини.
Васиння. Аннок, Аннок! Али мон Иван Петрович доры киньгалы ветлӥ но, со мыным Алабгое удмурт семинарья усьтӥськем шуса вераз. Зэм-а, ӧвӧл-а со, Аннок?..
Аннок. Зэм, зэм, Васиння. Монэ атай дышеткыны отчы лэзе ини. Мон вуоно арняе Алабгое мыно ини!
Васиння. Ой, Аннок, Аннок!.. Мон но мынсал ук!.. Шай-а та пеймыт дуннеын улод? Люгыт дуннеез адӟытэк, урам кузя юмшаса шай-а ветлод? Аннок! Ну монэ сьӧрад!.. Мынам но дышеткеме потэ, мынам но люгыт шундыез адӟеме потэ!.. Мон асме та дырозь пиосын юмшаны гинэ вордкемын кожасько вал. Та улонлэсь умой улон ик ӧвӧл, дыр, кожасько вал. Мукет люгыт дуннеос вылӥллям!.. Аннок! Ну монэ сьӧрад!..
Семон. Нош тон воксё дышеткемын ӧвӧл ук! Пыртозы-а меда тонэ отчы?
Васиння. Ӵок! Коть пыртозы, коть уз, мон Анноклэсь уг кыльы! Мынам синмы усьтӥськиз!.. Коть одӥг пол ке но городэз адӟо. Пичи ке но люгыт шундыез, люгыт дуннеез адӟо!..
Параска. Нош атаед лэзёз-а медам?
Васиння. Ӵок! Ӧз ке лэзь, мон пегӟыса кошко… Соос монэ тупазы (ярашизы) ук ини! (Бӧрдэ.)
Аннок. Тонэ? Тонэ картлы тупазы-а ини?
Васиння. О-о! Вӧй дыръя сюан карны аракы но пуко ини.
Параска (кизэ чабкыса вера). Мае ке но адӟод! Ма, ми нош ноку но ӧм тодэ ук!
Васиння. Ӵок! Мар-о карод картэн, чик люгыт дуннеын улымтэ бере… Мон та дырозь юмшай, урам кузя эктыса, коркалы быдэ аракы юса ветлӥ… Табре азьлозэ малпаса керпотӥсько…
Параска. Шедьтэм чик юнме бӧрдон. Дорад бертса, лушкем Алабгое мынны тыриськы но, Аннокен кыкнадэс ик Семон ӵуказе нуса кельтоз.
Васиння. Яралоз, иське, мон дасясько, только атайлы эн вералэ, ява!
Семон. Потапен Одотя кызьы-о уло?
Васиння. Соос туж умой уло. Корказы кыӵе ке но чылкыт, люгыт! Ӝытлы быдэ кыкназы ик учильшае дышеткыны ветло. Потап арганзэ ик сутса куштэм. Весь киньга лыдӟыса пуке.
Аннок. Тодӥз-а меда ини табре, маин аракыез воштыны луоз?
Васиння. Тодӥз, тодӥз!.. Вуоно арняе соос учильшаын удмурт спектакль лэсьто ини. Олёна но, Пильып но, Одотя но, Потап но — ваньзы ик отын шудозы шуиз дышетӥсь… Аннок! Мар-о киньга со ӝӧк вылады?
Ондрей. Дышетӥсь сое сётӥз!
Аннок. Удмурт киньга со!
Васиння (бызьса сеен лыктыса учке). Ой, Аннок, суредъёсаз но удмуртъёс пуктэмын ук! Кыӵе умой та киньга!.. Зарни ук та киньга! (Чупа.)
Семон. Гажан будӥсь пиналъёсы! Котырысь уй ӧжыт люгыт луны кутке, лэся, ини. Удмуртъёс но иземысь султо, лэся, ини!.. Мынэ, пиналъёсы, люгыт сюрес вылэ: огды но эн кыле дышеткытэк та пеймыт дуннее!
Аннок. Тӥ но, анай, атай, мынса дышетке! Ваньмы ик дышеткоме!.. Ми Васинняен Алабгое мынса дышеткомы! Тӥ татын, дорамы, дышетке!.. Удмуртъёс, асьмелэн азьлапаламы туж тырос чебер нуналъёс вань на али!.. Асьмелы туж паськыт, туж люгыт, туж эркыт сюрес усьтӥське. Потэ чаляк со люгыт сюрес вылэ!..