Кӧрт пиня колдун
Важӧн кутшӧмкӧ сарствоын служитӧ вӧлі салдат. Сійӧ салдат зэв бура служитіс сарлы, и служба кончитӧм бӧрын лэдзисны гортӧ. Локтіс да локтіс и ӧти деревняӧ узьны пырис. Аски чеччис и бара водзӧ мӧдӧдчис. Пемдыны нин пондіс, а салдат деревняӧ эз во; а пӧраыс вӧлі ар, и зэв ёна зэрӧ вӧлі. Верст квайт кымын эзджык во и сувтіс гуяс вылӧ вевта крест улӧ узьны. Войшӧрӧдз кымын оліс сійӧ крест улын, но кор войшӧр кад лои, ӧти гу воссис, и сэтысь петіс ӧти морт и кытчӧкӧ муніс. Салдатлы вӧлі кӧдзыд, и сійӧ мунӧм бӧрын, лэччис гуӧ и водіс сы местаӧ — гортйӧ. Ӧти дук овмысьт морт воис и шуӧ:
— Пет тэ менам местаысь.
Салдат шуӧ:
— Ме ог пет, он кӧ висьтав, кытчӧ тэ ветлін и мый киад ваян?
Сійӧ морт шуӧ:
— Ме ачым кӧлдун вӧвлі и ветлі ӧти деревняӧ. Сійӧ деревняын ӧти купеч пи гӧтрасис, пируйтігӧн зэв ёна юис вина. Ме сылысь войын узигӧн вир лэдзи, и сійӧ ӧні висьӧ. Некод сійӧс оз вермы бурдӧдны, ме кӧ ог сет киысь туис.
Салдат шуӧ:
— Он кӧ сет, ме вот ог и лэдз.
Кӧлдун шуӧ:
— Сета, вай пет, толькӧ пет.
Салдат петас, и сылы туис сетас, и сійӧ гусьӧникӧн саван дорсӧ косьыштас и юалас:
— Кыдзи сійӧс лечитны?
Кӧлдун висьталас, кыдзи колӧ лечитны, и салдат мӧдӧдчас бара водзӧ. Муніс да муніс и сійӧ деревняӧ воис, кӧні вӧлі висьӧ купеч пи. Купеч шуас:
— Верман кӧ, лечит.
Салдат тшӧктас ломтыны пывсян, корас бабалысь йӧв. Йӧвсӧ пуктас туисӧ, кытӧн вӧлі вирыс сылӧн, и гудралас. Кор пывсян кад лоӧ, салдат висьыськӧд лэччас пывсянӧ и пывсигӧн юкталас вир сора йӧлӧн, и купеч пи бурдас. Каясны гортӧ, и бать-мамлы и невесталы зэв рад лоӧ, и найӧ зэв уна деньга сетасны салдатлы, и сійӧ мӧдӧдчас водзӧ. Сійӧс кутасны десятскӧйяс и юаласны:
— Кыдзи тэ лечитін тайӧс, кутшӧм морт туйӧн, кор некод эз вермы лечитны?
Салдат висьталас, мый босьтіс туиссӧ кӧлдунлысь, коді войын волӧма вӧлі и узигӧн лэдзӧма вирсӧ купеч пилысь.
— А он кӧ веритӧ, то сылӧн саван торйыс.
Найӧ оз веритны, мунасны гу вылӧ, кодъясны гу и аддзасны косясьӧм саван тор. Вӧлисти салдатӧс лэдзасны мунны.
Мунас да мунас салдат и ӧти деревняӧ воас, и пырас сэтчӧ узьны. Пырас да керка пытшкын зэв бӧрдӧны. Салдат юалас:
— Мыйысь ті бӧрдад?
Сылы висьталасны: «Батьӧ пӧ миян вӧлі кӧлдун и кулі, и сійӧс колӧ миянлы, куим воклы, видзны куим вой; талун пӧ медыджыд вокнымлы, и сійӧс войнас сёяс батьӧ».
Салдат шуӧ:
— Сё чӧлкӧвӧй кӧ сетад, узя.
Найӧ кӧсйысясны.
Коркӧ воас и петан пӧра узьны. Салдат корас дас ура сись, салтыр босьтас да петас. Мӧд керка джодж шӧрын вӧлі кӧрт асыкӧн дорӧм горт. Салдат петас да Енув пельӧсӧ сувтас, сись ломзьӧдас и пондас юрбитӧмӧн лыддьысьны. Коркӧ войшӧр кад лоӧ, и друг гортйысь кӧрт асыкъяс оръялӧны, и сэтысь петӧ кулӧм морт. Первой сійӧ пӧтӧлӧксӧ косялас, сэсся стенъяссьыс керъяссӧ шыблавны пондас, а салдат век лыддьысьӧ. Кор петук войшӧр кадъя чукӧстас, кулӧм морт усьӧ джоджӧ. Салдат босьтас и пуктас гортйӧ, ачыс водас узьны.
Аски мӧд керкаса локтасны видлыны, кулӧма абу салдат, и аддзасны, мый салдат ловъя, и чуксаласны сійӧс, и зэв бура вердасны, и сё чӧлкӧвӧй сетасны, и салдат мӧдӧдчас мунны. Шӧркоддьӧм вок бӧрддзас и шуӧ:
— Ме пыдди узь, ме сета кыксёӧс.
Салдат бара кольччас. Узян пӧра воны пондас, и сійӧ бара дас ура сись корас, и петас узьны. Бара войшӧр кад лоӧ, и асыкъяс бара чегъясясны, и кулӧм морт бара петӧ. Салдат сійӧ век лыддьысьӧ. Кулӧм морт чеччас и пондас стенсӧ косявны. Кор джодж бердӧдзыс воас, сэки бара петук чукӧстас, и сійӧ усьӧ. Салдат бара сійӧс гортйӧ пуктас и водас узьны.
Аски чеччас и петӧ мӧдарас. Сійӧс зэв бура вердасны, кыксё босьтас и мӧдӧдчас туйӧ. Медічӧт вок бара бӧрддзас и шуӧ салдатлы:
— Ме пыдди узян кӧ, ме куимсё сета.
Салдат бара кольччас, и кор узян пӧра воны пондас, корас куим ура сись и петӧ мӧд керкаӧ узьны. Коркӧ войшӧр кад лоӧ, и бара кӧлдун чеччас, и первой косялас джодж плакасӧ, сэсся лэччас, гӧбӧч мусӧ лояс няйтӧ пидзӧсӧдзыс, и войшӧр петук чукӧстігӧн усьӧ. Салдат бара гортйӧ пуктас, дорас гортсӧ зэв ёна кӧртӧн и водас узьны.
Аски чеччас и петӧ оланінӧ. Сійӧс вердасны, юкталасны, и сійӧ мӧдӧдчас туй вылӧ. Куим вок ӧтлаасясны и шуӧны:
— Вай тайӧ гортсӧ дас верст вичкоӧдз ну, ми сетам тэныд пара вӧв и кыксё деньгаӧн.
Салдат тшӧктас доддясьны, горт пуктыны доддьӧ, и мӧдӧдчас. Кӧлдун зэв ёна сьӧктӧдчас и вит верст бӧрын петӧ. Салдат тӧдӧ, вӧлӧм, мый кӧлдун чеччас, водзвыв каяс зэв джуджыд пуӧ. Войшӧр кад лоӧ, и кӧлдун чеччас, и пусӧ пондас кӧрт пиньнас йирны, а пуӧ кайны оз вермы, киыс вӧлі кӧрталӧма. Пу пӧрны нин пондіс, и петук чукӧстӧм бӧрын кӧлдун уси. Салдат лэччас, горт кӧрталас и мӧдӧдчас скачӧн мунны. Югдігӧн вичко дорӧ воас и поплы дас чӧлкӧвӧй сетас сьылӧдӧмысь, и кӧлдунӧс гуаласны.
Сы бӧрын салдат вӧв доддьӧ пуксяс и мунас гортӧ. Гортӧ воас да гӧтрасяс, и зэв бура овмӧдчас.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1959 году, соответственно эта работа выйдет в России в общественное достояние в 2030 году.
The author died in 1959, so this work is also in the public domain in countries and areas (outside Russia) where the copyright term is the author's life plus 60 years or less. |