Кызь одӥгетӥез (Миронов)
| Кызь одӥгетӥез Автор: Александр Сергеевич Миронов |
Пыд улын кын музъем, мостовой музэн, шарт, шарт вазе. Чылкыт омырен гадь тыр шокчиське. Музъем вылэ уй шӧдтэк шорысь кадь пеймытлык васькытэ, кезьыт нимаз лыктэ на. Ульча шорын йыромыса сылӥсь кык скалъёслэн гонзы дышымтэ кезьытлыкен пештырскемын. Жвич, жвич, жвич! карыса со кык скалъёс мылзы потытэк йырйисько.
— Тани, — шуэ егит пи (сое Семон шуыса нималом), — общественной ужлэсь нокытчы но мозмыны уг лу, — ачиз чик вырӟылытэк сылӥсь скалъёс шоры вожъяськыса кадь учкиз. Вӧзаз мынӥсь эшезлы али мыноно ужъёс сярысь со ладь-ладь валэктэ, чик дыртытэк.
Соин артэ мынӥсь егит пи Семонэн оло одӥг кылысь кариськыса, оло солы пумит кариськыны мылыз потытэк:
— Да-а! — шуыса, дырын-дырын йырыныз шонтылэ.
Кенешыса мынӥсь егит пиос сизьымо кутэн кын музъем вылэ ладь-ладь лёгало. Ӵушык-ӵушык вазё кутъёс кын музъемез зӥбыны туртскыса. Уг кылскы соослэн кутсылэсь, егит пиослэн секытсылэсь кын музъем…
— Ну, шуом, али асьмеос государстволы ум юрттэ. Соку мар луоз? Веть кин со государство? — Семон валэктэ Мишаез. Государстволэсь мар бордын кужымзэ ёзэн-ёзэн азьланяз со валэктэ. Мынон сяменыз, Семон йырысьтыз вуж изьызэ, ужен сюрмем бур киыныз, пыдлогес нюртӥз. Собере, солэн мугорыз юзыр-кезьыр вайыса, быдэсак дыректӥз. Солэн вакчи вуж дукесэз мугораз кезьытлэсь пыӵамзэ возьыны тырмыт быгатымтэ.
— Кезьыт ке шат? Мар тон озьы? — ымдурзэ сутӥсь папирос пумзэ музъем вылэ сялӟыса, Миша Семонлэсь юаз.
— Мон таин быдэсак кынмысал дыр но… ярано, дукесэ шуныт сӥньысэн вуремын, тани, учкы, — дукесэзлэсь паллян сӧзызэ ӝутыса, Семон вераз.
— Шуныт сӥньысэн шуиськод, иське!
— О-о, шуныт сӥньысэн…
Ульчалэн кык палаз ик сылӥсь гольык писпуос шимес учко. Вожзэс потто кадь соос арлэн дырызлэн воштӥськемезлы, соослэсь вож дӥсяськонзэс быдтэмлы. Гольык писпуос вискытӥ учкись укно пиялаосы ӝытазе васькись кезьыт пӧртэм пужыос суреда. Кудаз коркаосын ӟольгыри син быдӟаесь тылъёс ӝуатылӥсько ни. Коркан ӝуась лампаослэн югытсы уйлэн шобрет улысьтыз васькись пеймытэн нюръяське… Ог палась таба быдӟа толэзь ӟаректыса потэ, инмысь вылысен югдась кизилиос шудыса кадь учко лумбыт ужаса жадем гурт шоры. Чик уг вырӟылы омыр.
Коркаос шоры учкыса: — номыр малпаськытэк улыны али нокызьы но уг луы, — малы ке пыдлось лулскыса, шуиз Семон. — Али котырак чакласьконо… Асьмелэн гинэ улонмы умой мед луоз шуыса, чакласькыса улыны уг луы… Быдэс кунмылэн юнмамезъя гинэ асьмеос но улонмес умоятыны быгатӥськом… Веть чакласькы али ачид, — Семон паллян киызлэсь азьчиньызэ вылэ карыса возьматӥз, — тани асьмелы пӧртэм машинаос ке ӧз сёт завод, хозяйствоямы маин ужалом. Тодӥськод ачид, пу герыен гырыны уг луы…
— Гырыны, бен, сое луэ вылэм но, — Миша Семонлэсь веранзэ ӝыныё кариз.
— Ӧвӧл, гырыны уг луы, бугыртыны гинэ…
— Соиз зэм, гырыны ӧвӧл, бугыртыны гинэ… пу геры музъемез парсьлэн бугыртэмез кадь сяна уг бугырты, со уг гыры, — Миша Семонэн одӥг кылысь кариськиз.
Мишалэн пичи дыръяз пу герыен музъемез бугыртэмез син азяз соку ик пуксиз. Дас кык арес гинэ али со… Аиз Германь оже басьтэмын. Семьяын, мемеез сяна, со самой бадӟымез. Нош ик куинь пичиосыз вань на. Пар бусыез гырыны потэмын. «Аид сӧсырмемын, солэсь бур пыдзэ снаряд ишкалтыса кошкиз» — аиезлэн эшъёсыз окопысь ивор ыстӥзы. «Солэсь пыдзэ шедьтыны ӧй лась. Больницае келямын аид, оло кулоз… Ивортыны куриз…» ивортэмын на вал гожтэтын.
Мишалэн синкылиез шапыкен-шапыкен вияса со геры сьӧрын мынэ. Чурыт лёг шедьтыса, солэн герыез шонтӥськиз но, Миша, герыез возьыны вормымтэеныз, бур пала шонтӥськыса, гырем му вылэ усиз. Мырдэм султыса, вожпотонзэ вал вылын ортчытыны чакласькиз.
— Н-но-о! мать!.. — вань куараеныз кеськыса, валлы сюлоен шроп! шуккыса, чукинь-вокинь, чукинь-вокинь мыныса, со нош ик усиз. Мишалэсь усемзэ адӟыса, солэн валэз дугдӥз но, Миша шоры ӝож синмын учкиз.
Соин артэ ик, туэ тулыс но гужем плугез пал киыныз гинэ кутыса гыремез син азяз пуксиз на. Плуг улысь музъем пызыр-пызыр луыса, огез салем мукетэз салем вылэ юри тупатыса понэм кадь усе.
— … Трактор сярысь ум ни вераське, плугез гинэ но коть басьтом… Веть сое но лэсьтыны корт кулэ, ужасьлы нянь сётоно… — Семон азьланяз Мишалы валэктэ. Малы мукет кунъёсысь пунэмен коньдон, мукет но ваньбур басьтыны быгатымтэез но со ог валлин валэктыны кутскиз.
— Соин, государстволы нянь сётэм гинэ ӧвӧл, солы коньдонэз но пунэмен сётэмын… — Семон веранзэ йылсаса ӧз вутты, кын музъем шоры солэн паллян пыдыз мыриськыса, веранэз ӝыныё лась.
— Фу, чорт, усисько вал, пыд пӧлыме ӧжыт гинэ быдэсак ӧй чигты!..
— А тон пыд улдэ учкы… Мон тыныд вераны ӧй вуы.
— Ӵок, ортчоз, — Семон бур киыныз шонтӥз.
— Озьы ке, со я озьы но, малы нош тани басма вуз но чик ӧвӧл, карасин? Веть кык-куинь ар талэсь азьвыл котьмар но вуз лачак ни вал. Кытчы со кариськиз? Веть сотэк уг луы! Малы сое ваньзэ мукет кунэ келяло? — Семонлы азьланяз вераны эрик сётытэк, пыдлось лулскыса, Миша юаны кутскиз. Сое юан куспаз Миша ӧжыт урдсӥн кариськыса, Семонлэн синмаз долы-ы учкиз. Солэн синмаз улонлэн ческыт-кузьытлык кельтэмез тодмо.
Мукет коркаосын но шыртылъёс укноетӥ асьсэлэсь югытсэс ульча шоры кисьтыны кутскизы. Ульча шорын писпуослэн вужеръёсы, асьсэос сярысь олокӧня пол кузесь луыса, сӥзьыл уез чильпето каро.
— Можно, тазэ но валэктыны можно, — шуыса, соос бур пала кожизы.
Семон бур киыныз пичи капкаез усьтыку, пичи капка кужмо ӟукыртыса, солэн куараез чус омыртӥ кыдёке вӧлдӥськиз.
Инмысь таба пасьта югыт толэзь югытсэ музъем вылэ ыстэ. Куаратэм, гольыкесь писпуос вылын тӧдьыесь векчи веньёс югыт шорын кисьтасько, югыт шорын шудо. Черклэн бур палаз вужерез кузь-кузь кыстӥське.
— … Мар со озьы луоз али? — шуыса, Миша Семонлэсь юаку, соос кыксы ик одӥг мурт кадь, черк укноетӥ пичи гинэ пиштӥсь тыллэн вужерез, лемтаен кадь, вис карысь вылэ лёгиськизы. Секыт черк ӧс ӟукыртыса усьтӥськиз.
Черк пушкы пырыса, Миша отын чуслы, черк пушлэн мукет луэмезлы паймиз. Кемалась дырысь черк гырлыос жонгетымтэлы Миша дышемын ини. Сое ворсам дырысен татчы ог пол сяна Мишалэн пырамез ӧй на вал. Пырыса, со котырак учкиз но, малы ке пуны куэз вурем вуж изьызэ бур киыныз басьтыса, дӥсьтытэк азьлань вамыштыны кутскиз.
— Лык ойдо, лык, пыдло пыром, — солэсь азьлань мыныны дӥсьтымтэзэ шӧдыса, Семон азьлань чортыны кариськиз.
Черклэн паллян пал урдсаз пичи кортгур сылэ. Со котырын ньыль-вить мурт крестьянъёс асьсэ понназы маке но кенешо.
— Ну, шуом, али асьмеос тазьы ке ӧм лэсьтэ, со бордысь мар, бен, пайдаез потоз, — вакчи гинэ сьӧд шубаен дӥсяськем пиосмурт паркет выж вылын кыллись кык муртлы вера.
— У-у-у-у! — азьло алтарь палась куара потыса, черкетӥ котырак шуккиськыса кошкиз.
— Фу, бадӟым ньылон. Азьлон татын Микола поп озьы бӧксылоз вал, али со Трофим шат поп интые кариськыны туртске ни?! — вераськыса улӥсь муртъёс доры матэ кариськыса, кесяськисьлы пумит Семон шуиз.
— Даёшь соревнование, даёшь великий план… — азьло куара ик сцена вылысь кылӥськиз. Ог ӝыны минут улыса, сцена сьӧрысь Трофим потӥз но:
— Ойдо, татчы, матэ кариське, собрание татын луоз, — сцена вылысь тэтчиз. Солэн пыд куараез нош ик быдэс черкетӥ шуккиськыса кошкиз. — Марым, уд кынме али, сокем кезьыт ӧвӧл, — со будэтӥз.
Пичи гур котырысь люкаськем калык мылыз потытэк азьлань вамыштӥз. Гур, выль кенэз калык азе поттэм музэн, гордэктыса огназ кылиз. Отысь пу тачыртыса ӝуа.
— … Ӵуказе асьмелэн бадӟым праздник… Со нунал асьмедыс, ужаса улӥсь удмурт калыкез, мукет наци калыкез музэн ик эрике поттӥз, — лапег мурт газетъёс, журналъёс вӧлдэм ӝӧк дурын сылыса, лэчыт тӥрен корам музэн вера. Киыз ӝӧк вылын кыллись бумагаосыз пумен бугыръя.
— Со праздник — Октябрь революцилэн 13 ар тырмемезлэн нуналэз луэ. Дас куинь ар талэсь азьвыл асьмелэн айыосмы Ленин эшлэн, большевикъёслэн кивалтэмзыя… — азьланяз со вера. Пеймыт ӝуась лампа жаляса сётэ югытлыксэ. Секретарьлэн гожъяськыны дышымтэ кияз карандаш мылыз потытэк кадь тӧдьы бумагаез кырыж-мерыж сьӧдмаса кельтэ.
— Асьме гуртын кулакъёслэн кужымзы али вань на. Сое дунъямтэ — асьмелэсь тушмонмес адӟымтэ луысал, — доклад лэсьтӥсь кык киыныз ик ӝӧк вылэ пыкиськыса, калык пала някырскиз но: кулакъёслэн «кенешсы» али асьмелэн ужмылы пумит туж бадӟым кужым луэ. Лушкемен соос кенешо: медаз шӧд нокин. Али веть «мон совето властьлы пумит» шуыса верась шуӟи муртъёсыз уд ни шедьты. Со «кенешъёслэсь» выжызэс чутрак чигтоно, солэсь быдэсак выжызэ ик портыса поттоно. Асьмелы огазеясь, кыны кулэ. Сотэк коть нош кыӵе но хозяйственно-политической ужъёсыз умой-умой быдэсъяны нокызьы но ум быгатэ. Асьмелэн пуктэм ужпумъёсмылы пумит соос пуктэм потто, — кызьы, кин отын кивалтэм сярысь докладчик тупен-тупен валэкъяны кутскиз.
Мылысь-кыдысь кылске Миша Тарасовлэсь верамзэ. Синъёсыныз борд бордъёстӥ учкыса, котырак ортче. Кытын-кыӵе мудоръёс сылӥзы — со тодаз вае. «Татын — богоматерь, татын — Александр Невский, отын тӥни — Георгий Победоносец вал… Нош али», — малпаське со азьланяз: — «На основе сплошной коллективизации, ликвидируем кулака, как класс», — азьлон Георгий Победоносец мудор ошиськыса улэм интыысь тӧдьы бумага вылын горд буёлэн гожтэмез адӟыса, слоген-слоген Миша ас понназ лыдӟе. — «Кыӵе но улон уг воштӥськы, веть мон пичи дыръя пересь айы жугыса татчы вайылоз вал», малпаськонъёс солэн йыраз ортчизы. Запятой доры вуыса, «малы али со отын пуктэмын?» шуыса, Миша нимаз малпаськиз на. Кылем арын та черк йылысь ез кузя гырлы васькыку солэн нимаз жалямез тодаз лыктӥз на.
— Асьмелэн хозяйственно-политической кампаниосмы тросэз быдэстымтэ на. Та нуналъёсы, Октябрь революцилэн 13 ар тырмон нуналъёсаз, вань хозяйственно-политической кампаниосыз быдэстыны вылысь куанер собрание вазиськоз шуыса мон оскисько, — доклад лэсьтӥсь аслэсьтыз веранзэ йылпумъяса, бур киыныз малы ке шонтӥз но, интыяз пуксиз.
Ог минут котыр собраниын пукисьёс чус улӥзы. Юась но, верась но ӧвӧл.
— Кинлэн юанэз, яке веранэз вань-а? — шуыса, олокӧня пол юаз.
— Мон сямен, татын ваньмыз тодмо, вераськыны гинэ кулэ, мар дырез юнме быдтод, — шып пуконысь собраниез Семон мозмытӥз.
— … Милям гуртын та сярысь толон кенешизы но, куанер собрание тӥлесьтыд гурттэс социализмо ӵошатскыны ӧте, — сьӧр гуртысь лыктэм мурт, вераськыны куинетӥен потыса, собранилы туж дыртыса вера. Гадь кисыяз бугыртӥськыса, посӥськем бумагаез озьы ик дыртыса лыдӟыны кутскиз. — Ну, вот, сыӵеесь ужъёс ми выламы басьтӥськом, сыӵеесь ужъёсыз тӥледыз быдэстыны ӧтиськом, — шуыса, верамысь дугдӥз.
Кырын, азьло сямен ик, чус. Толэзь гинэ ог пала берыктӥськыса, вылэгес кариськиз. Черклэн ог пал укноетӥз толэзьлэн югытлыкез пырыны кутскиз. Урамын музэн, черкын, мыдлань верасько, татын али черк ӧвӧл ни, нардом, нардомын чус ӧвӧл. Ваньмыз собраниын пукисьёс ужез кызьы быдэстон сярысь кенешо, тэкшеро.
— Кулакъёслы понэм твёрдой заданиез одно ик быдэстоно, — Семон вера.
Атасъёс уйшорзэ чортэм беразы гинэ нардомын кенешисьёс куспазы вераськыса потӥзы. Нырысь кезьытъёс мугорез юзыр-кезьыр вайыто, пуныос, ум йылтӥзы, мылзы потытэк уто, толэзь йыр вадьсы тубыса, нуназе кадь, югыт каре ульчаез.
Пичи гинэ тымет вылын ӵукнаысен ик пичи пиналъёс кынмем музъемъёсын лэзясько. Векчи кынмем йӧ вылтӥ ӵашетыса, кыдёке кошке кын. Дӥсьтытэк, чакласькыса, соин ӵош ик шумпотыса пыро пиналъёс тымет вылэ. Тачыртыса пилиське векчи йӧ, со кыдёке кошке тымет вылтӥ чузъяськыса. Кудъёсыз пинялъёс, куспулсазы тӥр поныса, киосазы визнан шачаосын тымет вылэ васько.
— Чорыгез кутом али, соослэн шедён дырзы та вакыт.
Векчи кынмем йӧ, кык-куинь пол ӵогыса, пичильтык пась луэ. Кисьтаськись визнан курикъёс отчы лэзьиськыса, чорыгез пӧяло. Тӥни огез пичи пи, усто инты шедьтыса, ог минут куспын гинэ вить чорыгез поттӥз. Солэн поттылэм чорыгъёсыз котыраз йӧ вылын ӵыжасько. Ымъёссэс пась карыса шоканы туртско: мултэс соослы омыр, уг тырмы ву, туж курадӟыса ӵыжаськемысь дугдо. Гурезь сьӧрысь потӥсь шунды сӥзьыл ӵуклэсь туссэ чебератэ на. Ӝужытэсь писпу йылъёсыз нырысь ик югдытыны кутскыса, собере соослэн выжыазы ваське шундылэн югытэз. Солэн кеӵевыл лыктӥсь шунытлыкез уг ни вормы музъем вылэ уй ӵоже васькем кезьытэз…
Шунды гурезь сьӧрысь потэмлэсь азьлон ик султэмын ни гурт. Нылкышноос ведраоссэс кутыса, чай пуктыны чылкыт вулы уноез кошкизы. Сион курыса, гидъёсын ыжъёс, искалъёс бӧксо, валъёс гыльдыръяло. Соосыз сюдыны лыктэм кузёоссэс шумпотыса пумитало.
Мукет нуналъёсы сярысь, быдэс гуртын туннэ олокыӵе мукет — валаны уг луы, соиз шӧдске — мукет омырен шока туннэ та гурт.
Ӵукнаысен султыса, гурт вылэ вӧлмемын толон куанер собраниын луэм ужъёс: куанеръёс, азьмынӥсь шоролыкъёс, бригадиръёс сое вӧлмыто. Сельсовет председатель ӵукна ик султыса, кинлы ужась кужым кулэез чакласа, сое сётон сярысь приказ сётӥз. Тымет вылэ васькем арлыдо кӧня ке муртъёс толон кенешем сярысь вераськыса, тымет вылысь йӧэз лэчыт тӥрен корало. Кисьтаськись визнан курикъёс чорыгез пӧяны тыметэ лэзисько.
— Ӧжыт оло чорыг шедёз, сӥль ӧвӧл, сиыны яралоз, собере ю-нянь дасянэз быдэстон котыре кутсконо, митинг но туннэ луоз, — визнан шачазэ туркак-туркак кыскаса, Тарасов шуэ. Солэн вылысьтыз горд шубаез кускытӥз еэн керттэмын. Куспулсаз понэм тӥрлэн азьыз ӵук шунды шорын кисьтаське.
— Э-эх, стоп! шедиз лэся огез, — визнанзэ секытэн ӝутыса, ог метр солэн палэназ сылӥсь мурт шоры берытскиз. — Учкали, ӝыны йырвонка ук! — чорыгез йӧ вылэ поныса, со будэтӥз на. Ог вись вылэ тэтчыса, чорыг шач! карыса, йӧ вылэ усе но шуӟимыса, кӧня ке кылле, собере нош ик озьы тэтче. Ымзэ бадӟым усьяса шоканы туртске.
Ульча тупалась кутсаськон машиналэн жингыртыны кутскемез тымет вылын чорыгасьёслэн пелязы шуккиськыса, мукет ульчае выжыса кошкиз. Чус омырын шулдыр гурен кутсаськон машиналэн кырӟамез Тарасовлэн пель сьӧраз кылӥськиз. «Калык кутсаськыны кутскиз, ужмы туннэ умой мыноз», — малпаськыса, Тарасов одӥгзэ юшпиез поттӥз на но, визнанзэ утялтыса, йӧ вылтӥ тымет выллань тубыса, аслаз бакчаяз буре кожыса, кенер вамен тэтчиз. Сое отын мумиз пумитаз: «Трос-а чорыг кутӥд?» — солэн нырысь юанэз вал. Собере бригадиръёслэсь возьмамзэс ивортӥз. «Тонэ ӧтьыны монэ бригадиръёс али ыстэмзы вал», нырзэ сьӧд азькышетэныз ӵушылыса, Тарасовлэн мумиз будэтӥз на. Собере пизэ ушъяса, чорыгез басьтыса, сое сузяны куала кошкиз.
Куинь бригадиръёс малы ке кырыжгес учкыса пумитазы сельсоветлэсь секретарьзэ. «Таӵе пӧсь уж дыръя тон чорыгаса ветлӥськод, тонэ татын возьмаса улоно лыктэ», — егитэз малпаськыса, Тарасовлэсь пыдысьтыз гынсапегзэ, со вылэ золтэм кесяськем голошизэ учкиз но, синзэ Тарасовлэн ымныр шораз воштӥз. Егит бригадирлэн но Тарасовлэн синъёссы ваче пумит мыриськизы. Бригадирлэсь мылкыдзэ валаса кадь, Тарасовлэн синмысьтыз мукет малпаськон тодмо лась. «Токма тон мон шоры озьы учкиськод. Мон изёнме тырмыт изьытэк чорыганы мынӥ. Ужез но лэсьтыса быдэсто али».
Бригадирлэн лек синъёсыныз ог дасо секунд учкемез Тарасовлы туж кема потӥз. Тымет вылысь тубыкуз, со пырыкуз ик, трос вераськыны чаклаз вал но али вань малпаськонзэ вунэтӥз.
— Ми али гинэ лыктӥм, тонэ ӧтьыны мемедэ ыстэммы вал, — небыт куараен нылкышно бригадир вазьыса, Тарасовлэсь малпаськонзэ ӝыныо кариз. Егит бригадирлэн лекесь синъёсыз но али, азьлон кадь лекесь ӧз ни потэ. Гажаса кадь учкизы нылкышно бригадирлэн сьӧдэсь синъёсыз со шоры.
— Тымет вылын йӧ кынмемын ини, калыкез но ворме, — оло малы сураськыса вазиз Тарасов. Гур пала мыныса, путэг вискысь горд тараканъёсыз учкиз но, огез пузо таракан солэн син шораз йӧтыса, со шоры синзэ ог вадеслы дугдытӥз. Мырдэм гинэ интыысьтыз вырӟиз пузо таракан. «Секытэн ук!» — со сярысь малпаськиз Тарасов.
— Ну, давай, кенешом, кинлэн мар тыриськонэз вань? Толло собраниын пуктэмез быдэсъяны кутсконо, — Тарасов, дӥсьсэ воштыса бригадиръёс доры, ӝӧк дуре пуксем бере вераськыны кутскиз егит бригадир.
— Кинлы кулэ валэктыны — валэктоно, нош кинлы ке твёрдой задани сётэмын, соосыныз трос-трос вераськыса улоно ӧвӧл, — будэтӥз на со вӧзы нылкышно бригадир.
— Т. Гурина, тон гуртлэн мукет палаз выж, Тарасовен ӵош, сельсовет членэз но басьтэ, нош тон, Игнатьев, та пал ульчалэн ог пал пумысеныз…
Тарасов бумагаос пушкын бугырскыку, дыртытэк валэкъя Васильев. Толон лыктыса, куанер собраниын вераськемез, гуртлэсь кызьы люкиськемзэ, кыӵе омырен шокамзэ Васильев аслаз эшъёсызлы нимаз валэктӥз на… Кин котырын, кыӵе амалын ужан сярысь вакчияк кенешизы. Вылэ ӝутӥськем шундылэн югытэз укноетӥ пырыса, син учкон шоры мыриськиз но «кечен» шудыны кутскиз.
— Давай, дыртыны кулэ, тӥни ук, — бур киыныз укноетӥ пырись шунды шоры возьматӥз на Васильев.
Тупал ульчаын шулдыр гурен жингыртӥсь кутсаськон машина кырӟамысь дугдӥз. «Шат отын кутсаськонзэс быдтӥзы ини?» — Тарасов кыре потыса, кутсаськон машиналэсь куаразэ кылытэк эрыктэм малпаськиз. «Уз быдтэ на, веть алигес гинэ кутскизы вал, — соку ик со мукет чаклаз. — Шат машиназы тӥяськыса!?» — малпаськыса Тарасов корка пыриз.
— Мар тӥ туннэ, та быдӟа нуналэ кутсаськиськоды, веть туннэ… мар быдӟа праздник… бадӟым нунал ук!.. — Моко Тёпан лыктыса кутсаськисьёс пӧлын вераськыны кутскиз. — Таӵе нуналэ нокызьы но уг луы… — чильымзэ курткыса со азьланяз вера.
— Бен, ю-нянь дасян планэз быдэстыны кулэ ук!.. Веть кунлы юрттоно… — Миша кутскиз соин кенешыны. Толон куанер собраниын Васильевлэсь вераськемзэ со тодаз уськытӥз. — Нуоно ке, нуоно вылды, — Васильевлэн верамезъя Миша аслаз син азяз бадӟымесь пукись выль заводъёсыз пуктӥз. Тани выль туж чылкыт цех. Отын липетъёс пияла. Радэн-радэн сыло вылесь станокъёс. Электро кужым бергатэ, ужатэ со машинаосыз. Ужась отын машинаен кивалтэ. Соин ӵош ик машина адямилэсь, ужасьлэсь ужзэ капчиятэ. «Асьме кунын машина — ужаса улӥсь калыклэсь улонзэ капчиятэ, нош капитализмо кунъёсын кужымзэ кыске берпумзэ», — Васильевлэн собраниын сюлме пырымон валэктэмез Мишалэн йыраз.
Бадӟым электро молот… Отчы корт маке быдӟаен пыре. Машина ик сое отчы пыртэ. Адями пичильтык кнопкаез гинэ зӥбе. Собере, молот ачиз шукке но пӧсям корт горд-горд луыса, мукет интые машинаен мынэ… Мукет интыын со корт ик мукет суред басьтэ… Заводысь трактор пӧрмыса потэ… Чаш карыса мынэ трактор бусыетӥ… Выльвылъёсыз кесяса кошке…
— Веть ужасьёс туннэ уг ужало, асьмеос маин соослэсь пӧртэмесь, ӵыдэтскыны кулэ… Котькӧня ужа но, куинь аршин сяна музъем уз сётэ, — ымысьтыз тамак ӵынзэ поттыса, шуиз Моко Тёпан.
Вуж завод, вуж техникаен ужась заводэз, герыен курадӟыса гыремез мукет суредэн пуктӥз син азяз Миша.
— Мар туэ улэмед, карасин гинэ но ӧвӧл… Ваньмыз олокытчы луиз… Ваньзэ сое мукет кунъёсы келяло шуо. Тынысьтыд берпум няньдэ… дунтэк… — машиналэн жингыртэм вискытӥз кылӥське Тёпанлэн куараез. — Тыныд веть номыр но уг сёто… Учкали, кооперативын номыр но ӧвӧл… котькудзэ ик вольнойысь… Олокӧня полэс дунын басьтоно… Та няньлы ик базарын куд мында басьтод, соиныз коньдонэн сётаки маке но басьтыны луоно ик…
Вис карыны дугдӥзы кутсаськисьёс… Нылкышноос куроез носилкаен куро люке нуо. Пиосъёс тамак кыскыны куролэсь палэнгес люк кариськизы. Татын нош ик вераськыны кутскиз Моко Тёпан. Со куспын Митрофан татчы вуиз. — Мон коть со нянез номырин но уг нуы… 100 пуд веть понӥллям… Мынам ваньмыз няне 50 пуд сяна ӧвӧл ни но… Ачим маин улом? Уз ошелэ… Сельсоветысь ужасьёс сое ваньзэ сӧро: тӥни, Кушман сельсоветын ю-нянь дасян планэз кутӥллямтэ но номыр но ӧвӧл…
Кема ӟичыяськиз Митрофан. — Крестьянлы али улон ӧвӧл ни, — шуыса, сялӟиськиз берло.
«Тыныд веть номыр но уг сёто… Кооперативын номыр но ӧвӧл… Ваньзэ вольнойысь… дуно дунын… Кунлы юрттыны кулэ… Ужась — крестьянлы машина сётэ… Крестьянлэсь — нянь куре… Сотэк ужасьлэсь но, крестьянлэсь но улонзэс умоятыны ум быгатэ»… Мишалэн йыраз малпаськонъёс нюръясько.
— Соослы котьмае сёт, сёт… берпум ваньбурдэ сёт… вылын ке нуллыны басма дэрем ӧвӧл ни… — итӥськиз на та вӧзы Мишалэн кышноез. — Нылпиослы номыр басьтыны уг луы…
— Озьы… озьы…
— Митрофан, конешно, шонер вера…
— Коммунистъёслы ке котьмар вань, — ӵаш карыны кутскизы нылкышноос.
Толон собраниын вераськем но туннэ нунал, туннэ вераськонъёс нюръясько Мишалэн йыраз. Каллен лыктӥсь тӧл макняез, лошъяськись куроез иса… Итымлэн ог пал пумаз ог дасо ӟольгыриос макня пӧлын бугыртӥськыса ӟегез бичало… Удалтэм ӟеглэн ӵуж-ӵуж куроез, шунды шорын, зарни кадь кисьтаське. Шундылэн ляб лыктӥсь шунытлыкез но сӥзьыл нуналлэн кезьытлыкезлэн нюръяськемзы музэн, Мишалэн йыраз малпаськонъёс нюръясько. Одӥг ӟег куроез кияз басьтыса, сое ӧжыт посӥз но, солэсь ог пал пумзэ ымаз донгыса, йырйыны кутскиз Миша.
— Иван сват но няньме уг нуы шуэ, — Митрофан нош ик писъя. — Веть солы но 80 пуд понӥллям. Кӧня быгатӥм — нуим. Государстволы юрттоно ӧвӧл мон уг шуиськы… Нош берпумзэ нуыса ачид мае сиод?! Веть ужасьёслы музэн асьмелы уз сётэ…
Котырак итымез учкиз Миша, гурезь йылысь ляб вожектӥсь ӟегудэз берло учкиз.
Юске валъёсыз, ум кутсаське туннэ, к чорту! — бур киыныз шонтыса, шуиз Миша. Вал чортӥсь кык пиналъёс «туннэ ужанлэсь мозмиськиз, йӧ вылэ шудыны кошком» — шуыса, шумпотыса, бизьыса кошкизы валъёссэс юскыны…
— Дас кык часозь ужез быдэстоно; сокем трос татын уж ӧвӧл, соку демонстрация луоз, — Гуринаен висъяськыку шуиз Васильев.
— Адӟом, кызьы уж мыноз, быдэстыны быгато дыр, — тымет вамен выжыны йӧ вылэ лёгиськыкуз Гурина шуыса, соос висъяськизы.
Сельсовет член доры, кӧня ке активистъёс доры пыраса, ньыль кузя соос кошкизы Тупал ульчатӥ. Митрофан доры пырыса, солэн гуртысьтыз кык пичи нылпиоссэ гинэ шедьтӥзы.
— Аи олокытчы мынӥз, — огез Митрофанлэн нылыз шуэ, «аид кытын?» шуэмлы. Со куспын, ӧсэз усьтыса, Митрофан пыриз. — Ну, мар вераськоды али? Тӥледлы шат нокыӵе праздник но ӧвӧл?! — мар сярысь лыктэмез тодымтэ улэ аналскыса, Митрофан юалляськыны кутскиз. Горд тушсэ маялтӥз но, ӝӧк дуре пуксьыса гырпумъяськиз.
— Милям тонэн вераськон пичи: тынад 50 пуд нянь нуонэд вань на. Сое али ик нуиськод-а, уд-а? — Гурина ӝотрак пуктӥз ужпумез. Соослэн синзы ваче пумит мыриськыса кӧня ке учкизы но, Митрофан, Гуриналэн синмысьтыз чурытлыксэ адӟыса, солэн син шораз учкыны ӧз быгаты, выж вылэ учкыны кутскиз.
— Мае, бен, мон нуом? Мынам ӧвӧл, берпумзэ нуи, государстволы юрттонлы пумит, веть, мон ӧвӧл… Юрттытэк уг луы… Маин быгатӥ, соин юрттӥ…
— Мон сое тынысьтыд уг юаськы: нуод-а, уд-а али ик? — тыныд шуисько.
— Оломаин монэ кулак шуо. Мынам…
— Ойдо, соиз сярысь али ми ум вераськиське, маин кулаке поттон сярысь трос вераським ни. Нянь нуонэд сярысь ми тынысьтыд юаськом, — Семон Митрофанлэсь вераськонзэ ӝыныо кариз.
— Кызьы ӧвӧл, шори вылэ кизем вылысь гинэ тон туэ куд мында нянь басьтӥд! Шат ми сое ум тодӥське кожаськод? — сельсовет член итӥськиз.
Ог минут котыр гуньдыса, мар вераны тодытэк улӥз Митрофан. Собере:
— Ӧвӧл, шуисько, мынам, веть ачим сиытэк уг кыльы…
— Уд-а нуы?
— Уг!…
Гурина, блокнотысьтыз бумага поттыса, сое сельсовет членлы сётыса, акт гожтыны косӥз.
— Тырмоз тӥледын… Чидаськиз, — вожзэ поттыса, выж шортӥ ветлыны кутскиз Гурина. Ӧжыт палдур кариськыса, Семонэз дораз ӧтиз но, маке но лушкемен вераськизы.
«… Митрошин Митрофан Николаевичлы, кулаклы, ю-нянь нуыны твёрдой задани сётэмын. 50 пудзэ няньзэ нуэмысь отказачке»…
— Бен, сое коть ӧжыт кулэстыны уз меда луы? — трубкаяз тамак тырыса, юаны кутскиз Гуриналэсь Митрофан. Аслаз чиньыосыз кулаекъяло, тамакез выж вылэ пырдэ.
— Кулэстэм ӧвӧл, будэтыны кулэ али, — Гурина интые, Семон Митрофанлы вераз.
— Бен, ӧвӧл ни ук, маин мон со нылпиосыз сюдом? Веть соослы няньтэк улыны уг луы…
— Тани, гожъяй, ме, Митрофан, гожтӥськы, — сельсовет член гожтэм акт вылэ гожтӥськыны сётӥз Митрофанлы.
— Какой ӧвӧл, кинлы ке твёрдой задание сётэмын, соослы эшшо будэтыны кулэ вал… Трос на няньзы.
Бумагаез кияз басьтыса, кема учкиз со шоры Митрофан.
— Дак ӧвӧл ни ук, мае нуом? — шуиз.
— Гожтӥськы, гожтӥськы .. уд ке нуиськы.
— Коть, бен, ӧжыт ке но кулэстэ вал! — гожтӥськемлэсь пыкиське Митрофан.
— Толон таослэн «кенешсы» вылэм. Моко Тёпан но отын вал шуо, — Тарасов пырыса вераны кутскиз. — Номырин но, пе, нянез ум нуэ шуыса пуктӥзы. Нянез нуонтэм вылысь гуртын но кылпум вӧлмытыны кутскиллям ни…
Кион синмын учкиз Тарасов шоры Митрофан. Сое йырысеныз пыдозяз мертаз. Пилиськоно кадь горд ымнырыз солэн воштӥськиз. Карандашсэ ӝӧк вылэ поныса:
— Я, нуо, сие… няньтэк ке кыли, ачидэс ик сюдоды, тӥ доры курыны мыно!… — вожзэ поттыса шуиз.
Митрофанлэсь нянь нуыны росписка басьтыса, Миша доры кошкизы соос. Мишаез азбараз ик пумитаса, солэн кырыж синмын учкемезлы паймиз Семон. Кутсаськемысь ӝыныё дугдэмез адӟыса: — «малы али кутсаськемысь дугдӥд?» — шуыса, юаз.
Кема посӥськыса сылӥз Миша. Гурина, каллен, эскериськыса, тупен-тупен валэктэ Мишалы.
— Учкы, кызьы ужаны кулэ, Митрофанэз ӝотрак пуктӥз, таиныз чылкак мукет кылын вераське, — Семон но сельсовет член куспазы палэнын верасько.
Собере, кутскиз Миша Моко Тёпанлэсь, Митрофанлэсь солэн кутсаськон дораз ветлыса вераськемзэс серттыны-пертчыны.
Соослэн «кенеш» люкаллямзы сярысь валэктӥз на Тарасов.
— Сылэ, ӧжыт возьмалэ, — шуыса, Миша кенер вамен кечыртскыса, мукет азбаре выжиз. Ӝамдэ гинэ корка пыраса: — Мыным Иван пунэмен сётэ, сечас вал кыткыса нуом. Ойдо, мынэ, мукетъёссэ татчы вае, горд обоз кылдытом! — кужмо кеськыса аслаз азбараз берен кечыртскиз.
Дас одӥг валэн ю-нянь тырыса, Мишалэн азбар пумитаз ульчаын сыло крестьянъёс. Миша кияз горд флаг кутыса сылэ
«13 арлы салам!»
Горд басма вылын кырыж но конгыль букваос. Со — дыртыса мелэн гожтэмын.
— Давай, мынӥськом, — Мишалэн чылкыт куараез омыртӥ чузъяськиз. Тӧл флагез каллен гинэ шона.
— Т. Гурина, лык мынам уробоям пуксьы! Ӵош мыном! — Миша Гуринаез кеськиз, обоз интыысьтыз вырӟем бере.
— Э-эх! Кырӟа вал, уг быгатӥськы! — вуко дортӥ кошкыкуз Гуриналы вера Миша.
— Да, умойзэ кырӟа вал, кыӵезэ дас ар талэсь азьло милям гуртын фронт сылыку красноармеецъёс кырӟазы… Уг, уг луы…
Нардом вадьсын уно люкаськемын ини калык. Мукет гуртъёсысь но лыктэмын.
— Да здравствует союз рабочих и крестьян! — радэн-радэн султэм дышетскись нылпиос горд обозэз пумитазы.
Палэнын милиционер Митрофанэз, Моко Тёпанэз но Самсон Одотьяез возьмаса сылэ.
— Асьмелэсь ужмес тӥни соос, — трибуна вылысен кыл верась, милиционерен возьмано муртъёс шоры возьматӥз, — туганы туртско… — Ваньмыз сямен калык соос шоры берыктӥськыса учкиз.
— …Ми, 17 мурт куанеръёс, 3 шоролыкъёс колхозэ пыриськом, сое татчы кылдытыны выжы понӥськом, — трибуна вылысен Семон вера. Калыклэн ки чапкемез Семонлэсь веранзэ ӝыныё кариз. — Колхозмылы ним «13 октябрь» понӥм…
— Кызь одӥгетӥез — мон! — Гожты монэ, Семон! — уробо вылаз сылыса, бур кияз горд флаг возьыса, вань куараеныз кеськиз Миша.