Кузь нюк (Соловьёв)
| Кузь нюк (Шактыр беглой) Автор: Иван Николаевич Соловьёв |
| Источник: Кенеш : журнал. — 1928. — № 16. — 15-22-тӥ бамъёс. [1] |
(Шактыр беглой)
Вашкала дыръя улэм удмурт Шактыр. Со аслыз мар кулэ ужаз, лэсьтӥз. Аслаз эшъёсыныз, нылъёсын, пиосын сиён-юон дыръя, шудӥз, чапкиз, эктӥз. Одӥг ныл та пиез яратыса, уйзэ изьытэк, йыр улзэ коттыса, бӧрдыса потылӥз.
Гужем куазен, Шактыр лыз чибор ужпиеныз бусые потыса гыриз. Турнан дыръя, ас кужыменыз шаулатыса турназ. Юзэ пыртон дыръяз, лыз чибор ужпиеныз, уробозэ бадӟым тырылыса нулдӥз. Куасьтӥськон дыръяз, вуко изыкуз бадӟымесь мешокен юзэ нокыӵе кариськытэк ӝуткалляз.
Кытчы гинэ учкиськод Шактырлэн ужам ужезлэн бервылэз сыӵе ик кылемын. Тазьы ӟеч улон куспаз, ӟеч ужакуз пичи тӧдьы бумага лыктыса Шактырлэсь мылкыдзэ пожаз. Шактыр ас понназ малпаськиз, сюлмыз чигиз. Шар синвузэ кисьтыса анаезлы-атаезлы вера:
— Анае-атае, мынам салдатэ мынон аре вуиз. Уг лу ни мынам та гужемез тӥледын уртче ужаме.
Анаез-атаез кӧс лулӟизы: «Мар карод на арлыд вуэм бере» — шуизы. Трос вераськыса улыны дыр ӧвӧл, сиён-юон, дӥськут дасяно. Ӵуказе ӵукна султыса, пус басьтыны мыноно.
Ӵукна Шактыр султӥз, мистӥськиз, лыз чибор ужпизэ сюдыны гидаз потӥз. Валзэ сюдӥз, ачиз вӧйын нянен но ӝожонэн кӧтсэ тыриз.
— Мынон сюрес вӧй кадь небыт медло, атаен-анаен огазьын ужаны мед кылдоз — шуса валзэ кыткиз.
Анаез капказэ усьтӥз, атаеныз Шактыр пус басьтыны кошкизы. Пус басьтонын калык трос. Пинал пиос ваньмыз асьсэ понна лулӟылыса, пус басьтыны черод возьмаса сыло. Шактырлы пус басьтыны черод вуиз, дыр куалекъяса пуссэ басьтӥз, шыр гольык кылиськыса таза, чылкыт мугорзэ возьматыны музон висъетэ пыриз. Салдатэ басьтӥсьёс Шактырез адӟизы но асьсэ понна вераськизы. Кык арнялы дораз бертыны лэзизы. Шактырез салдатэ басьтӥзы.
Шактыр дораз бертыса, туж кырӟаса, вераса, бӧрдыса юмша, яратон нылыныз вераськыса уйзэ ортчытэ. Тазьы улыса кошконэз но вуиз. Калыкъёс Шактырез келяны трос люкаськизы. Шактыр трос кырӟаз, вераз, бӧрдӥз. Ӟеч калыкъёсыныз со берпум нуналзэ ортчытэ.
Шактыр вӧсям вазь ӝук веръяз, мумыкор борды йӧтӥськиз, собере туж бӧрдыса, мылыз потытэк потыса кошкиз. Сузэрез капка усьтӥз, со усьтэм капкаетӥ Шактыр огназ гинэ потыса кошкиз. Капкаез ворсаса, музонзэ усьтыса, калык но ураме потӥз.
Шактырлэн яратон эшез кырезен ӝож гурзэ шудэ. Калык бӧрдэ, нылъёс Шактырез шоразы ӟыгыртыса, кырӟаса гурт пумазы келяло. Пичи выныз нош, лыз чибор ужпиеныз калык бере, каллен гинэ вамыштыса мынэ.
Гурт пуме вуизы, калык дугдӥз, Шактыр ӟеч калыкъёсыныз люкиське, ӟеч кылъёссэ вера. Одӥг ныллэн сюлмыз чиге-бӧрдэ, со ныл нош калык азьын синвузэ кисьтыны возьдаське.
Шактыр яратон нылзэ адӟыса, жингыртӥсь куараеныз кырӟа, бӧрдэ собере уробояз пуксиз, берпум кылъёссэ вераны кутскиз.
— Мон кошкисько тӥ дорысь кызь вить арлы. Та ветлытозям трос мыжык-чапкы сиё, уно сютэк ветлонэз адӟо, урод кылъёс кыло. Мар карод на, та пинал йырын вань ултозь люгыт дуннеын, пӧртэм секыт улонэныд нюръяськоно усе ук. Атай, анаез вӧсь эн кары, аракы юыкуд эн йӧнтэмъяськы, эн жуг, эн чапкы. Со монэ вордӥз, тон монэ ужаны дышетӥд. Табере нош мынам тӥледыз сюдыны кужмы уз тырмы ни. Мон оло суйтэм-пыдтэм луса берто, оло чик бертонэз но уг адӟы. Азьпала улонэз тодыны уг луы. Сюлмы чиге, кӧты шӧдӥське, туж курадӟонэз адӟо дыр кадь потӥсько. Кулон сюресэ азьлон ик син азям пуксе.
Вордэм анае, мынэсьтым мӧзмыкуд, Окиен вераськы, со мынам яратон нылы вал. Огазьын вераськиды ке, оло мӧзмем сюлэмды буйгалоз. Мон тӥлесьтыд люкиськисько, чаляк ум ни адӟиське. Окиен огдэс-огды яратыса улэ. Ой, сюлмы чиге, тыл сутэ, кизилиез гинэ кыре уг поты. Сёт, яратон сузэре одӥг сюмык аракыдэ, оло тынэсьтыд берпум юэме, вераськеме луоз.
Сузэрез аракызэ сётэ, агаез юэ, сузэрез бӧрдэ.
— Эк, яратон сузэре, тон бызёд, мон сямен ик, анаез-атаез пичи выныным кельтыса кошкод. Яратон сузэрме эн тышкаське. Со мон сямен ик туннэ гинэ тӥледын — мар куриз, сое сётэлэ, мар басьтыны косӥз — басьтэлэ. Мон сямен востэм, возьдаськыса медаз улы, аслэсьтыз ужам ужзэ ӟеч калыклы мед возьматоз.
Мынам пыдам сурон сапег ӧз пыра, сьӧд шаравар ӧй дӥся. Со понна мынам кенсы, ӧс сьӧрысь сюры вылэ, сизьымо кутэ, мертчан бинялтонэ, базар шортэн куэм ыштанэ, бурлат шортэн дэреме, сьӧд пыгыли шлапае кыле. Тон, сузэре сое утялты, тӥледлы со син-пель луоз. Яратон калыке, ӟеч луэ! …ӟеч улэ!.. Ваньдылы туж тау утялтэмды понна. Ойдо атай, лыз чибор ужпиез вырӟыты.
Вал ворттӥз, гырлы жингыртӥз. Шактыр, тӧдьы кышет сэзъяса, туж кырӟаса, бӧрдыса, куаразэ кылозы кожаса, кесяськыса кошкиз. Анаез бӧрдыса пограз, пичи выныз йырзэ ошыса кылиз, сузэрез но туж кема бӧрдыса сылӥз, собере, мемизэ кунултӥз кутыса, дораз нуиз.
Окилэн пушкыз тыриз, калык пӧлысь кошкиз, возь вылэ мынӥз. Возь вылын Оки кырӟаз, бӧрдӥз, озьы ик, катьыз бырыса, умме усиз. Изьыкуз вӧтаса адӟе. Та яратон пиез салдатысь пегӟыса бертӥз но дораз ӧз пыры, улыны сьӧд тэле кариськиз. Тазьы вӧтакуз кырныж шунды ӝужан пала туж шуш кесяськыса лобӟиз. Оки кырныж куаралэсь кышказ, шуак султӥз сайкаса. Котыр утчаськиз — нокинэ ӧз адӟы. Возь вылысь сяськаос гинэ тӧлъя пӧртэм-пӧртэм туссэс Окилы возьмато. Окилэн вӧтамез тодаз лыктӥз, кӧтыз урод луиз. Шуак кырныж шоры черектӥськиз: «Чатран аслад йырад мед луоз. Шунды ӝужан пала черекъяса лобӟе, возьыттэм. Эк, сюлмы чиге, улонэ кысэ. Кошкыкуз со мыным вераз. «Мон одӥг арлэсь кема уг улы, пегӟеме луиз ке, пегӟо» шуиз. Мар ке но вань, кырныж шунды ӝужан пала черекъяса лобӟиз. «Ӵок ини, со мон бордысь люкиськиз, монэ огнаме бӧрдыны, курадӟыны кельтӥз».
Оки Шактырен вань улэмзэ, вераськемзэ, ӵошен кырӟамзэс тодаз вайыса, нош ик татысь пушкыз тырыса кошкиз. Бӧрдӥз-бӧрдӥз, сюлмыз ӵоксузиз — каллен гинэ кырӟаса, вераса, гуртаз кошкиз.
Шактыр салдатэ, интыяз вуиз. Начальникъёс Шактырлэн таза, чылкыт мугорезлы, паймизы. Мугорын ӝужыт, сӥльвирын таза, ымнырыз вир кисьтӥськоно кадь, кужыменыз нокинлы уз сётскы. Тусбуйыз гинэ туж секыт малпаськись тусо возьматэ.
Шактыр ӟуч кыл уг тоды. Ӟучъёслэсь вераськемзэс ӧжыт гинэ вала. Начальникъёс куспазы: «Кызь вить ар дышетомы али» — шуса верасько. Шактыр нош озьы верам кылъёссэс валаса, шар-р-р-р гинэ, пӧсь синвузэ кисьтэ. Улон сяиныз, Шактырлэсь гуртысьтыз лыктэм дӥськутсэ октӥзы, со дӥськутэз интые салдат дӥськут сётъязы: кузь луд шинель, сьӧд пустол картуз, сурон сапег, сьӧд пустол мундир…
Шактыр ваньзэ чик мылыз потытэк октӥз. Дӥсяськем бераз ассэ ачиз учкиз, тодмантэм со луиз. Туж секыт лулӟиз но, вераз.
— Эк сюлмы, пинал йыры, мон атайлэн пиез ӧвӧл ни табере, мон олокин луи. Монэ салдат дӥськут воштӥз. Дорам ке луысал, шинель интые куинь куско луд дукесме дӥсясал, сурон сапег интые — сизьымо кутме кутчасал, мундир интые — казакейме дӥсясал, картуз интые — гын шлапаме изьыясал. Лыз чибор ужпиме кыткыса тэле ворттысал. Табере мынам киям ӵуказе пыӵал сётозы.
Кыӵе гинэ Окиен возьвылтӥ, сяська пӧлтӥ кырӟаса, лёгаськыса ветлӥськом вал. Арня нуналъёсы Окиен ӵошен тэле губилы ветлӥськом вал. Со кур кудызэ кутыса губи бичаса, мон нош чебересь писпуосыз чакласа, пус тырыса, ветлӥськом вал. Таӵе ужъёс ваньмыз но бере кылизы, мон соосыз уг ни адӟы. Сыӵе ветлонъёсыз кар урам кузя караулэ ветлон воштӥз ук.
Шактырлы нунал ӧвӧл, уй, уй ӧвӧл. Ӵукна кутскыса ӝытозь бызьылыто, кырӟато, дышето. Ӝыт ке вуэ пыӵал, салдат ужен тодматскыто. Куд-куд нуналъёсы солэн пельдораз мыжык-чапкы но сюрылэ. Пыдыныз ветлэмез но уг луы ни, озьы но дышетыны поттало. Уй ке вуэ, иземез уг луы: анаез, атаез, Окиез, лыз чибор ужпиез тодаз лыкто. Ӟуч кыл тодымтэеныз, калык азьын вераськыны дышымтэеныз трос бӧрдылӥз, трос тыш йӧтылӥз. Мар карод, арез сыӵе вал, нокинлы вераны уг луы. Верад ке, секытэз ас вылад ик лыктэ — секыт лулӟылыса нуналъёссэ ортчытъя. Шактырлэн салдатын улэмез одӥг ар тырме ини. Одӥг пол тазьы улон куспаз Шактыр янгыше усиз. Уйин, коньдон дорын караул возьмакуз, умме усем, со изьыку офицер лыктыса, пыӵалзэ басьтыса кошкем. Шактыр ӧжыт изем бераз, султыса котыр утчаськиз но пыӵалэз ӧвӧл ни. Мар карыны паймиз. Туж трос со малпаськиз. Сюлмыз кышкаса дырекъя.
Озьы малпаськем бераз, лушкем, пыд куаразэ поттытэк, караул возьман интыысьтыз кошкиз. Кар урамтӥ каньылъя гинэ, чакласькыса потӥз: нокин ӧз дугдыты, нокин ӧз юалляськы. Шактыр кар урамез потыса бызиз-бызиз но, пичи тэле, шур дуре дугдӥз.
Куазь ӵукна, ӟардэ ини. Тылобурдоос кырӟало, ву вылын чорыгъёс тэтчало, шунды шораз учконтэм, горд-горд чиляса ӝужа — котырак инльӧль. Шактыр котыр утчаськиз, гуртэз ӧз адӟы. Собере жадем Шактыр отчыяз ик изьыны выдӥз. Куазь тулыс, пеймыт луыны ӧдъя ини. Шактыр, сайкаса, йырзэ ӝутӥз, котыр учкылӥз, нокинэ но ӧз адӟы. Солэн туж сиемез потэ ини. Ас понназ малпаськиз, азьланьзэ учкиз, сюлмысь азьлань, дор палаз вамыштыны кутскиз. Мынон сяин одӥг гуртэ вуиз, отын салдат дӥськутсэ вошъяз, кӧтсэ тыриз, сьӧраз сюрес вылын сиыны тырмыт нянь басьтӥз. Шактыр уен-нуналэн, пӧсь куазь шортӥ, куддыр зор ултӥ но бертэ. Со утыр дор палаз вуэ, трос малпаськыны кутске. Кызьы улоз со ас атай юртаз. Котыразы ӟуч гуртъёс вань, соос тодӥзы ке, чагозы. Шактыр малпаськиз-малпаськиз но дораз бертоно ӧз кариськы, удмурт гуртлы кыдёке ик ӧвӧл, улны кельтӥськиз. Солэн атай юртэз нюк пыдэсын, бадӟым кыз улын — лапас луоз. Лыз чибор ужпиез, котырысьтыз пӧйшуръёс луозы. Озьы тӥни Шактыред бадӟым сӧод тэле, мур нюк пыдэсэ, ошмес дуре аслыз улон инты бырйиз.
Шактыр сьӧд, пеймыт тэльын уйзэ кӧлӥз. Ӵукна куазь ӟардон вадес султӥз. Солэн туж сиемез потэ ини. Сиыны ке нош, нянез ӧвӧл. Мылкыд секыт, вылтыр сӧсырмемын.
— Мар карод… Сюрод ке сюрод, гуртэ мыноно, сиыны нянь утчано.
Шактыр котырак учкиз, нокинэ ӧз адӟы, сылӥсь кызъёс ултӥ лап-лап вамыштыса гуртэ кошкиз. Тылобурдоос кырӟало, кызын коньы вуӵыртэ, Шактырлэн кӧт сюма, сюлэм куалекъя, йыр визьмыз, кытчы бырод шуса, малпа. Тэль дуре вуиз но, отчы дугдӥз. Бусы ю-нянен кисьмамын, соин ву тулкым кадь сэзъяське, ворекъя. Калыкъёс нош куаӵ карса арало. Шактырлэн атай юртэз, бусыез тодаз лыктӥз, мылкыд секыт луса кошкиз. Арасьёсыз адӟыса тодмаз но, ас понназ вераз.
— Татын удмуртъёс уло, соос монэ нокинлы но уз чаге. Нокин начальникъёслы уз сётэ.
Удыс дорын, пуктос вӧзын одӥг муртлэн нуныез бӧрдэ. Шактыр котырак учкиз, нокин но ӧвӧл. Собере со бӧрдӥсь нуны доры мынӥз. Нуныез кияз басьтӥз, солы ву сётӥз, нуныез бӧрдэмысь дугдытӥз. Собере нунылы песьтэрысьтызы пичи вӧй, нянь шедьтыса сётӥз. Сётэм бераз берен пуктос вӧзы салкыме понӥз. Ачиз песьтэрысь одӥг колды (сукыри) няньзэс, аръянзэс, сезьпызьзэс басьтӥз но тэле пырыса кошкиз.
Бӧрдӥсь нунылэн анаез-атаез, культо октыса, мукет ана вылысь лыктӥзы; нуны утись пизылы черекъяло.
— Микта, тон кытын! Чаль лыкты, нуныез утьы, куазь пӧсь луэмлэсь азьло арано.
Микта кыдёкысь, пуктос улысь бӧрдыса потэ. Анаез нош черектэ.
— Марлы бӧрдӥськод, марлы нуныез тазьы огназэ кельтӥськод?
— Палэс мурт нуыса мед кошкоз вал-а, иське пересь гондыр аби мед сиёз-а? Тани али олокыӵе кузь мурт тэльысь потӥз но, нуны доры лыктӥз, собере нуныез кияз басьтыса, ву, пичи, нянь сётӥз. Ачиз песьтэрысь нянез, сезьпызез, аръянэз басьтӥз но, берен тэле пырыса кошкиз. Йырсиез вакчи ӵышкемын, ымнырыз кӧс кӧсэктэмын. Мон солэсь кышкаса, культо пушкы пырыса, шоканы но дӥсьтытэк улӥ.
— Беглой вал дыр али со… Кыӵе мурт, таӵе кысык аран дыръя тэльын улса, арасьёслэсь сиёнзэс лушкаса ветлоз. — Атайзы та вераськемзылы паймыса арамысь дугдэ.
— Ма та тэльысь беглоез кылыны но адӟыны но уг луы вал. Паймод та ужлы. — Уно вераськыса ӧз улэ, араны кутскизы. Шунды лымшоре вуиз. Калыкъёс лымшорзэс лэсьтӥзы. Та муртъёслэн нош, кӧс няньзы сяна, номырзы но ӧвӧл ни. Мар карод, ужам муртъёслэн сием потэ; сиськыны куськизы, сиёнзы кезьыт вуэн кӧс нянь гинэ. Сиськем беразы, пересь, тыл кӧльыен тылзэ поттыса, чильымзэ кенӝытӥз. Сиёнзэс лушкаса нуэм понназ, Шактырлы вожез потэ. Шактыр тэльысьтыз ӧз ни пота. Солэн сиёнэз нунал лумбытлы тырме. Интыез салкым, вуэз юыны ческыт, чылкыт, кезьыт. Котыраз тылобурдоос кырӟало: потыны ӵыдонтэм шулдыр. Окиез гинэ котыраз ӧвӧл.
Шактыр пинал марке, мур нюк пыдэсын, кыз улын, салкымын арня улэ, кык улэ. Сиён шедьтыны шуг. Шактыр тужгес но трос сиён понна малпаське. Озьы курадӟонэ, сюлмаськонэ усьыса, Шактыр паймем, ёрмем мурт, лушкем гуртэ мыныса, дӥсь кеносъёсы йӧгуэ — сӥльлы, вӧйлы, ю-кеносъёсы пызьлы, кеньырлы, сылаллы вуылыны кутскиз. Тазьы ветлыкуз Шактыр одӥг нылэн тодматскиз. Сое, со Окизэ кадь ик яратыса улыны кутскиз. Утыр нош мукет нылъёсыз но тодмано луиз.
Нылъёс, тэле ветлыкузы, Шактырлы сиён-юон нулдыло. Шактыр нош таослы уйин узыръёслэсь поттылэм жиль-жиль коньдоно чырты керттэтъёссэс (чырты весьёссэс) люкылэ.
Тэль котырысь удмурт гуртъёс, дӥськутсы, сиён-юонзы ышылэмен, тынылизы ини.
Шактырлэсь тэльын улэмзэ трос гурто калыкъёс адӟизы ини. Озьы но нокин, номыр уг кары, нокинлы уг верало — кышкало. Шактыр тэляз лёгаське, ас понназ малпаське, секыт лулӟылэ, утыр каллен гинэ кырӟа, шугекъяське, аслаз урод ужъёсыз понна, удмурт калыклэсь возьдаське.
Удмурт гуртысь одӥг ныл Шактырез кенсаз (чумаз) кӧланы дышетӥз. Гурт калык ныллэсь та ужзэ шӧдӥз, ныллы вожзэс поттӥзы. Собере гурт калык ныллы кышкыт кыл вераз:
— Вай татчы пидэ, галактэ, ми сое виём. Галактэ ӧд ке сёты, со интые астэ виём.
Ныл мурт, пинал марке, гурт калыкезлэсь кышказ, возьдаськиз, ас понназ шар-шар синвузэ кисьтыса бӧрдӥз. Собере гурт калыклы кыл сётӥз.
— Мон соин, аран дыръя, киям оло мар потос потыса, араны ветлэме луытэк улыкум, тодматски. Со монэ, нуназе куазен кӧлан кенсам пырыса кышкатӥз. Со дырысен, ялан кышкатса, мон доры кӧланы ветлэ. Нокинлы вераны уг дӥсьтӥськы. «Тазьы ветлэмме кинлы ке верад ке, соку чида» — шуэ, мынэсьтым пе уд пегӟы. Озьы улон сямен со монэ яратыны куськиз, мон но сое яратӥ, собере мыным аслэсьтыз кытысьсэ но вераз: «Мон Актэмыр гурт пи» шуэ, атай нимзэ уг вера. «Салдатысь, одӥг ар улыса, тулыс сезьы кизён вадес пегӟи но татын тӥляд тэляды улоно кариськи» — шуэ.
Гуртысь калыкъёс та ныллэн верамезлы паймизы, мар карыны но ӟудӥзы. Одӥг удмурт, бай (узыр) марке гинэ, «виёме» шуса черекъя.
— Мынэсьтым куд мында азвесь коньдонме, чырты керттэтме (чырты весь), алача дэраме лушказ, соин ик сое асьмелы виыны кулэ. Али ӧм ке вие, асьмемыз со майыг йылэ кельтоз.
Люкаськем гурт калык Шактырез виыны кенешиз; кызьы пиез пӧяны, нылэз дышето.
— Тон, нылы, эн возьдаськы, милемлы юрттӥськись гинэ кулэ. Со уйин тон доры лыктӥз ке, милемлы иворты. Дорамы нокин но кӧлӥсь ӧвӧл шуса, пӧяса дорад кӧлыны ӧтьы.
— Мон нош кызьы тӥледлы, со быдӟа уждылы юрттом. Мынам со быдӟа ужлы кужыме уз тырмы. Собере асьтэос ик берло адями виись шуса, серекъялоды. Бызьыны но инты уг шедьты ни: нокин но уз басьты — ныл ӝожтӥське.
— Ми тонэ ум куштэ, тыныд инты но дась луоз. Ми ужмес гинэ мед быдэстомы, тон сярысь малпаськонэз ик уз луы, мар кулэ ваньмыз юрттэмын луоз. Актэмыр пидэ ми асьмеос кутыса виём, тонэ ум сапталэ, эн кышка — шуса, гурт калык ныллы ӟеч кылзэ вера.
— Яралоз ке, яралоз но… Яралоз, мон тӥляд верамдылы оскисько… Актэмыр пиез кӧлыны ӧтё, соку тӥледлы но иворто — шуса, ныл туж секыт лулӟыса, гурт калыкезлы кылзэ сётӥз.
Гурт калыкъёс, ваньмыз доразы кошкизы. Ныл, мерттос бакчаяз (садаз) потыса, ас понназ малпаськиз, шугъяськиз, синмыз пыктылытозь бӧрдӥз. Шактыр нош номыре но уг тоды на. Со ас понназ гинэ улон тэляз кайгурыса улэ. Мае ке но сюлмыз но шӧдэ кадь. Сӥзьыл вуэмъя, куазь но кезьыт луэ: «Кызьы мон татын толэзь ортчытом» — шуса, ӧпкеле.
Куазь сӥзьыл, кезьыт, зоре, пинал пи тэльын, кыз улын кынмыса сылэ. Соку нылыз отчы лыктӥз, одӥг уйлы кӧлыны бӧрдыса пизэ дораз ӧтиз. Солэн ымыз гинэ ӧз вера, тонэ виын туртто шуса. Тусыз-буйыз нош, туж умой, синучкон пыртӥ кадь возьматэ. Озьы бӧрдыса, йыбыртъяса ӧтиз но, ныл берен дор палаз вамыштӥз.
Со гурт калыксэ ас дораз Шактырез виыны люкаса кельтӥз ини. Шактыр нош ас улон тэль шораз учкыса малпаськиз-малпаськиз но, кӧня ке гинэ кылзэ вераз.
— Ӵок, мон татын уг ни улы! Берто ас атай юртам. Сюро ке, сюро, ӵок! Толэз татын, тэльын ортчытыны пӧйшур ӧвӧл мон — адями. Мед кутозы, мед виёзы, ӵок!.. Мыным тазьы та югыт дуннеын улыны возьыт. Эксэйлы урод уж лэсьтӥ: салдатысь пегӟи. Ас удмурт калыкелы но кудмында урод ужъёс лэсьтӥ. Ӵок ини салдатысь пегӟеме, мон соку огнам ӧй пегӟы: пумтэм-йылтэм пегӟизы.
Но мынам… Мынам сюлмы вӧсь луэ, удмуртлэсь ужамзэ уйин лушкаса арам кари: нылъёслы люкылӥ. Марлы вордӥськиськем мон та югыт дуннее? Эк, сюлмы! Уг валаськы номырзэ но… Кошко нылы доры, берпумзэ чупаса кельто. Со мыным Окие кадь ик мусо потэ вал ини. Оло монэ туннэ ик виёзы, оло туннэ ик пытсэтэ пытсалозы, сое тодыны уг луы. Нылы, туннэ уй огнам кӧлӥсько шуса, бӧрдыса ӧтем вал. Мон кӧлыса уг улы, чупало, ӧжытак дыдык син кадь син шораз учко но, дор палам вамышто. Шактыр тэльысь каллен гинэ кырӟаса потэ, улон интызэ тодаз вайыса, туж кӧтыз урод луса вамыштэ. Гурт калык нош, солэн нылыз доры Шактырез виыны дасяськыса люкаськемын.
Шактыр нылыз доры вуиз, йыгаськиз, ныл соку ик ӧссэ усьтӥз. Со корка пыриз ини; мугорыз кузен сэндра ултӥ лаптӥськыса мынэ. Виыны дасяськем калык сэндраысен Шактырлэн йыраз кыӵес гозы куштӥзы, сое кекатӥзы. Шактыр, ӟигарыз (катьыз) бырыса, пограз. Калыкъёс ӝогак соку ик сэндраысь васькизы, гидкуазьысь но корка пыризы. Гурт калык Шактырлэн чыртыысьтыз гозызэ басьтӥзы но жугыны куськизы. Жугыкузы, Шактыр оло кызьы пуксьыны быгатӥз, кужмо, шуш куараеныз черектӥз.
— Аа… тӥ тазьы-а ма!..
Соку одӥг кужмогес воргорон йыраз кортэн шуккиз но, Шактыр номыр валатэк, кысмыляк гинэ пограз, усиз. Шактырлэсь курадӟемзэ учкыса, гурт калык мар карыны паймыса сылэ. Шактыр тазьы курадӟонъяз, ӧжыт визь пырыны ӧдъяз но, мырдэм гинэ кӧня ке кыл вераны учыр басьтӥз.
— Дугдэ!.. дугдэ жугемысь удмурт калыкъёсы, берпум кылъёсме ке но верало на тӥледлы. Мон но, тӥ кадь ик, му ужась удмуртлэн пиез, урод улонэн пумиськеменым тазьы костаськыны кыли.
Мынэсьтым курадӟемме со яратон нылылэсь юалэ. Мон тӥледлы трос урод ужъёс лэсьтӥ: ышем дӥськутты ваньмыз астэ нылъёсты киын. Та яратон нылы киын гинэ ӧвӧл. Вань нылъёстылы ог кадь люкылӥ. Соин ик тышкаськонзэ но, серекъянзэ но, ваньзэ ог кадь каре. Мон, тӥледлы урод уж лэсьтӥ, мугорме-лулме тӥледлы сётӥсько: котьмар карелэ.
Гурт калык трос малпаса ӧз улы, пиез суйтӥз-пыдтӥз ӝутыса, коркась гидкуазе поттӥзы но Шактырез виизы.
Шактырлэн яратон Окиез возьмаса ик бызьытэк кылиз, атаез-анаез, пизылэсь иворзэ возьмаса, бӧрдыса ик кулӥзы, лыз чибор ужпиез нош коргидаз гырдалляса, ӵабъяськыса ворттылэ — ваньмыз Шактырлэсь бертэмзэ витё.
Виыны лэсьтэм вемечиос, вием беразы, Шактырез аслаз улэм тэляз нюк пыдсы нуыса ватӥзы. Вылаз нош тодмолы беризь мерттыса кельтӥзы. Сибы гуртысь нылъёс, пиос ог арня нунал Шактырлэсь шайгузэ адӟыны ветлӥзы, собере нюксэ ик «Кузь нюк» шуса нимазы. Со дырысь али но калык «Кузь нюк» шуса, нимаса ветлэ ини. Со мерттэм беризьзы ваё луса потэмын вал, ортчем аръёсы кужмо сильтӧл потыса чутырак шортӥз тӥяса куштӥз, та дыре солэн выжыез но ӧвӧл ни, шайгуез гинэ кыдёкысен адӟиськыса улэ.