Крам праздник
Миян гажа грездын коркӧ
Вӧлі ыджыд праздник «крам»,
Пелькӧдісны бура керка;
Виччысисны лёк и рам.
Аттӧ, нывбабалӧн мырсьӧм!
Коли узьтӧг уна вой...
Сэні мыськасьӧм и вурсьӧм, —
Ёна мудзис налӧн сой.
Лӧсьӧдісны сёян-юан,
Лоӧ востӧдз вина-сур.
«Крам»-ыд вонас абу уна,
Мед и шедлас кынӧм нур.
Висьтала на водзӧ, энлы...
Рытын кӧтісны нянь шом.
Юрбитісны бура енлы,
Лӧсьӧдчӧмлы воис пом.
Со и праздник асыв воис,
Колӧ кутны «бур ен дум».
Паськӧм вежис быдӧн нойӧс, —
Вичкоӧ сэк, мыйӧн «бум».
Лун шӧр кежлӧ служба эштіс,
Керкаясӧ шӧтіс гӧсьт:
Батьӧ пызан мӧдӧс вештіс.
Ӧдзӧс дзирйыв, сэтшӧм пӧсь...
Сэсся пызан сайын мӧдіс
Сёйӧм, юӧм, сёрни бур;
Коді кыдзи вермӧ — лӧдіс
Медся уна вина, сур.
Ӧбед бӧрын ывла вылӧ
Быдӧн петіс ныв и зон.
Гудӧк бӧрысь мӧдіс сьылӧм,
Ёна увтны кутіс пон.
Рытъявылӧдз йӧз век соді,
Гӧгӧр лыбис — «ыджыд мать».
Косьӧ пырӧ медся коді?
Быдӧн сувтіс — пи и бать.
Гӧгӧрвоны он и вермы:
Пыр и воши «бур ен дум».
Чегӧ майӧг коді вермӧ...
Зэв нин ыджыд лои шум.
Вина ӧддзис, мӧдіс шырны,
Позьӧ шуны: лои «страм».
Кыклы гуӧ лои пырны...
Со мый вайис «ыджыд крам».
Сэтшӧм пежтор вӧлі важӧн
Вайӧ праздник, муса вок.
Колӧ овны садя гажӧн.
Важсӧ эновт, мед оз лок!
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). The author died in 1935, so this work is also in the public domain in other countries and areas where the copyright term is the author's life plus 88 years or less (if applicable), or the copyright term is 102 years or less since publication (if applicable). |
|